Matayo 20
20
Varundi va efo nndeny wa misabibu
1“Umangyi lwa iruveeu mmbo luvakye nndu muni kyeny alekwiipoo ngama nraasi nanderuuya varundi va efo nndeny wakwe wa misabibu. 2Kadeeryana na varundi valya kya urundi, nkonu umwi navaniinge weesi lwa nkonu, kavarika efo nndeny ulya wakwe wa misabibu. 3Kawuya kakwiipoo lyingyi elyi kwamfika sa isaru, kakooya vengyi vasalali kulya singireny valarunda mashora. 4Nawo kavevavia, ‘Na yeni keveendeny efo nndeny wakwa wa misabibu. Mmbo nshemuniingaa ekyo kisumani.’ 5Vakaenda. Kakwiipoo lyingyi elyi kwamfika sa irindaru, na sa keenda, kavetana indo, 6Na elyi kwamfika sa ikumi na imwi kavekwiipoo kakooya vengyi vasalali indo, kavavia, ‘N kikyi elyi musalali indo nkonu piti mularunda mashora?’ Vakaamba, 7‘Llwaona nndu aluvika varundi-fo.’ Nawe kavavia, ‘Na yeni keveendeny kulya nndeny wa misabibu.’ 8Naasa elyi kwamiila nndu ulya muni kyeny kavia ulya amweekya ikallya findo fyakwe, ‘Vaanga varundi valya kuvaniinge weesi lwawo, kupooke valya vafurummya isha, kufike valya valava isha.’ 9Valya va sa ikumi na imwi vakasha. Vakawarya wo nndu weesi lwa nkonu. 10Valya va mbee vakasha, vakakusara kulakooye wo vashewaryaa kilanya. Nawo-da vakavewarya indo, wo nndu weesi lwa nkonu. 11Vekiwarya vakakunung'unnya ulya muni kyeny. 12Vakaamba, ‘Nkyelola yewo vafurummyi ni sa imwi nsi varunda-u, na yewe kwawuya ivainanisa neese. Neese mmbo lwansisirya mavina a nkonu piti, na ikorwa mmwi.’ ” 13“Nawe karouwa, kavia ulya umwi, ‘Mbuya yakwa nshi shakutannya kindo kilasumani-fo. A mmbo kulaore kwairikya ludeeryanaa kyaasa kya weesi lwa nkonu? 14Kamarany ekyo kyafo kwakweenngya! Mmbo shikunndye indo iniinga yeto afurummyi kiinani na ekyo kyafo. 15A findo efyo fyakwa mmbo shilatiri mumu wa itana nafyo ndesa shankunda? A mmbo kwanying'a elyi yeny shitiri maako?’ 16Naasa ni indo kivaa, yewo vafurummyi vaaluke va mbee, na yewo va mbee vaaluke vefurummya.”
Yesu arera lya kararu kya ufu lwakwe
(Mar 10:32-34; Luk 18:31-34)
17Na elyi Yesu eefo arie shia yeenda irwa na kulya Yerusalemu, karwaa valya ikumi na vavii mbai, llya vekee kyaarony, kavavia, 18“Llen-te lwiifo lwiirwaa na kulya Yerusalemu, na Mwana yeto wa nndu asherambikywaa maakony a vakohani vaniini na velosha mavavaso, nawo vashemmbutyaa uvingo nandewaawa. 19Mmbo vashenrambikyaa maakony a vandu va masanga, nandeteendwa na ikapwa na ngova na ikapyo nsalabeny, na elyi lya nkonu wa kararu asherukaany.”
Kiterewo kya maye wa Yakobo na Yohane
(Mar 10:35-45)
20Nalyo maye wa vana va Sebedayo kasha na yoo akai, aryani na vana valya vakwe vavii, kamoolokya si akundye intereva kindo. 21Nawe kammbia, “A ekyo kwakunda nkyokyi?” Kammbia, “Ammba vana yeva vakwa vee vavii vavandami neewe efo umangyi ny lwafo, umwi nakae uvari lwafo usha, na ungyi uvari lwafo umuso.” 22Na Yesu kaallwa kaamba, “Mmwiishi nta ekyo mwatereva shaasa kyikai-fo! A ndesa mushiidimaa ina upata lwakwa shiifo shinaa?” Vakammbia, “Lukwiidimmya-da!” 23Nawe kavavia, “Ina upata lwakwa mushenaa-da. Indi iniinga vandu ando eekaa yoo uvari lwakwa usha ao umuso, ekyo nshi kindo kyakwa yeny-fo.” Vandu vaniingwa-u ni yewo valemmeekideesyo ni Nde-yaakwa. 24Naasa valya ikumi elyi vaita indo, vakasua vana yewo va nka vee vavii. 25Na Yesu kavavaanga na yoo akai, kaamba, “Mwiishi yewo veshillya vandu mmbo vavaafinya. Na yewo vaniini vawo vakavalammya. 26Indi kunu nnang'ani yaany nshi indo kivaa-fo. Indi nndu kakunda ing'ana kunu nnang'ani yaany, we kuti nave nndundi waany. 27Na nndu kakunda iva wa nrwe kunu nnang'ani yaany, we kuti nave ishinga lyany. 28Niindo-da kivekai, Mwana yeto wa nndu nshi asheye irunndyo-fo, mmbo asheye we nave nndundi navevika na muu wakwe uve kiraso kyeewouwa veengyi.”
Yesu ashiisa vafu miso vavii
(Mar 10:46-52; Luk 18:35-43)
29Na elyi veefo vashuukaa kulya Yeriko vandu vakallatya nsemu mwiingyi. 30Nalyo akakava vandu vafu miso vavii vakee rembo yoo mbaambaa ya shia. Vakaita Yesu mmbo eefo eshiiraa-u vakaonisa ngyunyanga vakaamba, “Woi Nndumi lusarye! Yewe kukee mwana wa Davidi!” 31Na vandu valya veefo mamwiingyi vakavakeemmya vamalallye. Nawo vakaengera ifua, vakaamba, “Woi Nndumi, Mwana wa Davidi lusarye.” 32Na Yesu kairisha, kavavaanga kaamba, “A mmbo mukunndye shimutannyi inda?” 33Vakaamba, “Woi mbee, ni miso yaa eru naambo alole!” 34Naasa Yesu kavalyilya, kapaana miso alya awo, nalyo yeni vakalola. Vakallatya.
Currently Selected:
Matayo 20: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.