Matayo 18
18
Yeto akee nniini efo umangyi ny lwa Iruveu
(Mar 9:33-37; Luk 9:46-48)
1Naasa sa ilya sheni valya vakiloshyony vakasha ikuummbya yoo Yesu akai, vakaamba, “A yeto akee nniini wa wooroye efo umangyi ny lwa iruveeu ni viiny?” 2Nalyo kavaanga kimwana na yoo vakai. Kakivika nnang'ani yaawo. 3Kaamba, “Nkya dede shamuvia, ‘Kwakooya kulaore mwaaluka mukava va ngata ya fivana, efo umangyi ny lwa iruveeu mmukooyaa yaanga-fo nta-fo!’ 4Naasany nndu kakwaalwa n-du we muni, kava wa ngata ya kimwana yekyi, yeto mmbwe nniini wa wooroye efo umangyi ny lwa iruveeu. 5Na wo nndu aiyo moose awarya kimwana kya ngata yeyo kimaruma kya irina lyakwa, mmbo ashiwarya yeny.”
Misindara
(Mar 9:42-48; Luk 17:1-2)
6“Na yeto ammba nsindara weetuula yewo vafwafwa vakusirye neeny, naakwa ni yeto umwi tupu, kya nndu yeto kyava kisha kilanya nafinngyo isewe lyirungutwaa ni nshungu efo singony yakwe, nandeolotwa efo uroony lwa yeeve. 7Oshiny lwa ulana yelu kimaruma kya misindara iifo. Kya misindara isha kuti ishe. Indi oshiny lwa nndu yeto nsindara ushaa weendwa mmbwe. 8Na kwakooya woko lwafo ao urende lwafo lushekweenngyee nsindara, lurummbwe kwalweera efo! Mmbo kyava kisha kilanya kwakooya kwaanga na efo muuny kukee kisaya ao kitongororo, ngota elyi kwatira maako ai avii na marende ai avii kwandeerwa efo murony ularumikaa. 9Na kwakooya iriso lyafo lyishekweengyee nsindara, lyiillwe kwalyeera efo! Mmbo kyava kisha kilanya ikwiirya na efo muuny kukee nndu wa iriso lyimwi, ngota elyi kwatira miso ai avii, kwandeerwa efo Gehena ya muro.”
Kyaaso kya yaanri lyirekye
(Luk 15:3-7)
10Manyiny mure mulamina yewo vafwafwa nta umwi! Mmbo shamuvia, vasu vawo efo iruveeu mmbo valollye kisangu kya Nde-yaakwa wa efo iruveeu kyeeri kyoose. [ 11Kimmba Mwana yeto wa nndu kindo asheye yuuta ni ishekira ekyo kirekye.] 12A mmbo mukusarye inda? Kwakooya kwiifo nndu atiri moonri iyana kakooya lyimwi lyanreka-u nawe nare nalatiiya-u alya makumi kyeenda na kyeenda nandepara na efo mafumbuny asyaa lilya lyirekye. 13Ikava pule yakwe kalyilollya, nkya dede shamuvia, mmbo afuraa nalyo kilanya ngota kya alya makumi kyeenda na kyeenda alarekye. 14Na efo kisanguny kya Nde yaakwa wa efo iruveeu nawe-da nnakunndye yewo vafwafwa vareke-u nta umwi-fo.
Ifwaayana
15“Na mwanamau kammeelyamara enda kumoore ulyamari lwakwe mwiiyo muveni. Kammekwiirikya mmbo kyava iviiri lyafo, kwankooya mwanama-u. 16Kanra nalakwiirikya enda kundeende nndu umwi ao vavii-se, kushe nawo wo kindo kirumbuke kisunundwa nkana ka vakureekyi vavii ao vararu. 17Kallema ivairikya wo enda kundekyoongoya siri. Kallema iirikya siri, naasany nakuviiyeeny sha nndu wa masanga na n-dedemi.”
Ifinga na iporommwa
18“Ni kya dede shamuvia, wo kindo mwankifinga kunu urukeny, na efo iruveeu ni kiwo-da kyaveva kifinge. Na kindo mwankiporommwa kunu urukeny, na efo iruveeu ni kiwo-da kyaveva kiporommwi. 19Na kingyi-se shamuvia, ‘Vandu vany vavii ao vararu vakandeeryana kya wo kindo vakitereve efo kwa Iruva, mmbo vashewonisaa kyuuka na Nde-yaakwa wa efo iruveeu.’ 20Mashika ando kwankuumbya vavii ao vararu kikee kya ikummbwa irina lyakwa, na yeny mmbu ando nkaa nnang'ani yaawo.”
Kyaaso kya nndundi nalatiri usari
21Nalyo Petro kaserikya yoo kufii, kaamba, “Ale Nndumi! Mwanama mmbo ashirenngyaa keenga na yeny shive mwiimfwaaya! A ndesa shifike matorito mfungare, naasany?” 22Yesu kammbia, “Shakuvia, nshi matorito mfungare-da-fo. Mmbo kufikaa matorito makumi mfungare ka mfungare.” 23Nkyo kimaruma umangyi lwa iruveeu lukashefwanana na nndu mangyi akundye yeekena siye takwe na mashinga akwe. 24Apooka yeekena kaengywa nndu wa sye atiri sye yakwe ya talanta 10,000. 25Kakooya nalatiri fyeetaa, naasa nndumi ulya wakwe kavavasya nandekumbwa nasandwa na nka na vana, na findo fyakwe fyoose atiri, sye ilya indetawa. 26Naasa ishinga llya lyikakweera si, lyikamweererya, lyikammbia, “Woi Nndumi, shisisirya, shikaa shikutaa-da.” 27Naasa nndumi ulya kalyillya ishinga llya kalyilekeya. Na sye ilya katana alyireeya shoose. 28Naasa ishinga llya kasomuka na efo poo. Kakooya mashinga wooroye, ulya umwi, atiri sye yakwe ya dinari 100. Kantira isanga, kammbia, “Shitaa sye yakwa kutiri!” 29Ishinga llya uroye lyikammbia, “Shisisirya shikaa shikutaa-da!” 30Nawe kalema fushu kandenrwaa kifingyony natani ataa sye ilya yakwe atiri. 31Elyi mashinga wooroye valollya kive indo, vakasukywa nnu, vakanderuuya nndumi ulya wakwe mbony tilya tatanyika toose.
32Nalyo nndumi ulya wakwe kammbaanga, kammbia, “Kukee ishinga yeesi! Sye ilya yakwa mmbo shilekureeya shoose llya kuleshyeererya. 33Afikaany yewe nshi indo kivekusumanyi isarya ishinga uroo, shaasa yeny shavekusarya yewe?” 34Nndumi ulya wakwe karooywa nngoo. Kanrambikya efo maakony a vetuurwa vandu, na natani ataa siye yakwe atiri namae piny. 35Na Nde-yaakwa wa efo iruveeu ni indo-da ashemutanyaa yeni, kwakooya kulaore mwasaryana wo nndu na uroye efo miriminy yaany.
Currently Selected:
Matayo 18: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.