Zakaliya 5
5
Wulajilwe wo mutandatu Citabu cono ciguluce
1Hobaho kanyhi nghenula meso, nghawa kuwona citabu ciguluce mucanyha. 2Malayika yakawa kumbuza, alu wukuwona cici? Nghamupitula nghatya, nghuwona citabu ciguluce mucanyha, cono cina wutali wa mita yicenda no wugazi wayo mita yine na nusu. 3Baho yakawa kunonjela yakatya, “Mu citabu cici mo wandicigwe wulijitwe wono wobita mu yisi yose, no lubavu luyagwe lwe citabu, lukutya vyono, i wahizi wose wa mu yisi yiyi, wowuswa mu yisi. No lubavu luyagwe nalo, lukutya vyono, na kuli munhu wo wose mono kokwilahiza ko wulambi, nayo kowingwa. 4Zizi zo yakulonga u Muwaha Mulungu we Mihanga yakutya vyono, kowuleta wulijitwe, nawo wokwinjila mu zikaya ze wahizi wose, na mu zikaya za wose wono wakwilahiza ko wulambi ale wulijitwe wowa mu zikaya zawo no kuwaleka mu matongo.”
Wulajilwe wo mupunghati: Mucekulu, mono yali yali mu nhoto
5Hobaho malayika yu yulya mono calonganaga, yakejela hamwande yangu kanyhi yakanyitya, “Wulanje! Ko cili cinhu cinji kanyhi cono cikuza!” 6Nane nghamuwuza nghatya, “Cicici cene?” Nayo yakamhitula yakatya. Ayo nhoto yo yikulajila wubi we yisi yose. 7Langa ta ne nhoto yiyo yali yina cigubiko we liwala lye buli. Nane lono nali nghali niyilanjile, hobaho cigubiko cayo cikenulwa na mugati yayo, mo yali munhu wa cicekulu yekaye. 8Malayika yu yulya yakatya, “U mucekulu ayu yakulajila u wubi.” Hanyuma yakamugomoleza kanyhi mu nhoto, yakawa kuyigubika ne cigubiko cayo. 9Nghenula meso nghalanga kucanyha, nghawawona we cicekulu wejete waguluce wakuza kono nali nimile wena mabawa gono gali vilungo muno kotya ga Yobwa. Wakayinula nhoto yiyilya wakawa kuguluka nayo. 10Nghawa kumuwuza malayika nghatya, “Alu wawa wakuyitegula nhoto yiyino hayi?” 11Nayo yakapitula yakatya, wakuyitegula ku Babiloni wakayizenjela nyumba kuko. Na kolo nyumba yiyo yikukondya, i nhoto yiyo ho yowikwa baho, i hanhu hono wowa kuyihembela.
Currently Selected:
Zakaliya 5: LLKWW
Highlight
Share
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.