Zakaliya 2
2
Wulajilwe we kadatu: Mulejehe wo kupimila
1Kanyhi mu wulajilwe wangu wunji, nghawona munhu mono yali yebate mulejehe wo kupimila. 2Nghamuwuza nghamutya, “Alo 'gwe wukubita hayi?” Yakamhitula yakanyitya, “Nghubita kuwupima Yelusalemi, ho manye uwutali no wugazi wayo.” 3Hanyuma nghamuwona malayika yulya mono calonganaga nayo yakutela ha mwande, nayo malayika yunji yakaza viketang'anila nayo. 4Malayika ayulya umulongozi, yakamulonjela muyagwe yakamutya, “Wumanyhe, wukamulonjele u muzelelo ayulya mono yena mulejehe wo kupimila, vyono ku Yelusalemi kolowa ko wali wanhu wenji, hamonga ne mitugo minji. Holeka ne likaya lyowiluka liwe yiwaha sunga lifute no kuwuzenjela majinji. 5Muwaha Mulungu mweneco, yelahiza vyono, u mwene yo kolowa majinji go moto gono gololipilima likaya no, kulidima kanyhi mwene kolojendelela kwikala baho nhondo zose, hamonga no lukumyo lwakwe lose.”
I wahamywa wakucemwa wawuye ku Yelusalemi
6Muwaha Mulungu yakalonga ne wanhu wakwe yakatya, “Naweyagaza anye wose mu malanga gose. 7Ninga alu nyo wahamywa, muwuce lu ku Babiloni, muwuye ku Yelusalemi. 8No munhu wo wose mono komusagalenyi anye, yamanye vyono yakusagala cinhu co wuguzi wukamu kuli'ne.” Holeka u Muwaha Mulungu we Mihanga kandeta nizilolose zizi kuli makungugo gono gawahamya i wanhu wakwe, nigatye nha vyono, 9Muwaha Mulungu we Mihanga mweneco kolokwihoma na nyenye. Nanye molosolwa ne wanhu wono baho halulongozi, wali wo wetumami wenyu.
Na kolo zizi zakondya kwijela, nawo wose ho wolomanya vyono yo gwegwe Muwaha Mulungu mono wanhuma. 10Muwaha Mulungu yakatya, “Ale mwimbe musangalale 'nye nyo wanhu wa Yelusalemi! Hambi nha nghuza kwikalana nanye!” 11Na mu vilo vivyo makungugo menji golokuza kuli Muwaha Mulungu, nawo wowa wanhu wakwe. Nayo Muwaha Mulungu kolokwikala hamonga na nyenye. Nanye ho molomanya vyono mwene yo yanhuma kuli'nye. 12Kanyhi Yuda yolowa yo sawo yakwe siwanulwe yo Muwaha Mulungu mu yisi yakwe yono yelile, nayo Yelusalemi yolowa lyo likaya lyono yalyendile muno. 13Ale munyamale wose twiii, hamwande yo Muwaha Mulungu. Hambi nha yakuza yakulawilila mu wikalo wakwe zono welile.
Currently Selected:
Zakaliya 2: LLKWW
Highlight
Share
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.