Malaki 3
3
1Nayo Muwaha Mulungu yakupitula yakutya, “Ane, nomutuma mutumwa wangu yanozelezeze nzila. Nayo Muwaha Mulungu mono mukumulanjilila, kolokuza nhinicizo mu Wuhembelo wakwe. No mutumwa mono mukumulanjilila, kolokuza no kuganula icilagane cangu.” 2Nani 'mbi mono kolosuma kukangalila mwi'zuwa lilyo lyo wuze wakwe? Hamba nani mono kolosuma kwima kolo yakwijela mwene? Hambi mwene nha kolowa nha sabuni yono yikukanza myenda, kanyhi kolowa nha moto wono wukukwema fweza. 3Kolokuza yaling'anize kotya mono yakukwema fweza no kuyeza. Kotya mono yakwituma mulimo wo kukwema fweza na zahabu. Nayo mutumwa wo Muwaha Mulungu, koloweza wakohani, ho wasume kutegula kuli Muwaha Mulungu, i vilavywa vyono vikwilaniciye. 4Holeka vilavywa vyono wanhu wa Yuda na Yelusalemi, wolovileta kuli Muwaha Mulungu, vyolomwendeza, nha vyono vyamwendezaga ha mwamulizo.
5Muwaha Mulungu we mihanga yakutya, “Ane nolomuzizenyi so wuling'anizi, nane nowa muhomelezi mupelu kuli wono wendile kwituma zo wuhawi, na muli wasenyha, na muli wono walavyaga wuhomelezi wo wulambi, na muli wono wawapujilaga i wetumami wawo musahala wawo, na muli wono wawewonelaga i wafwile, ne wana wono wasina walezi wawo, ne wajenzi. Sunga na muli wose wono si wanyogopile 'ne.”
U wulavye we zaka
6“Ane yo nene Muwaha Mulungu, mono sina cipitupitu yaye. Holeka nanye nyo lulelo lwa Yakobo, mukali si najililila lukulu ng'o. 7Anye, mwihwanile ne walezi wenyu walongola, wagabedegala malajilizo gangu, hamba kugebata yaye. Ale mbuyilenyi nene, nane nomuwuyilenyi nanye. Ninga hono mutye, ‘Alu citende wule ho cisume kukuwuyila?’ 8Ale nane nghumuwuzenyi nghutya, wulenyi, yili viswanu munhu yamukonje Mulungu? Ng'o, si yowa viswanu. Ninga hamba nhavivyo anye mukunghonga 'ne. Kanyhi mukuwuza mukutya, ‘Alu cikumukonga nhawule?’ Mukunghogela mu nzila yo wulavya zaka ne vilavywa. 9Holeka wulijitwe wuli muli nyenye wose, hambi likungugo lyose nha likunghonga nene. 10Holeka letenyi ku Nyumba yo Mulungu zaka yenyu yono yikwilaniciye, ho hawe na ndigwa nyinji. Ta munjelaje, nanye mowona, nodigula madilisha ga ku wulanga, nimumwajilenyi ko winji muno muno i vinhu vyose i viswanu. 11Hamba sinoleceleza mang'onyo gahodanje nhwanga yenyu hamba hadodo, sunga ne mizabibu yenyu, yolela zabibu nyinji muno muno. 12Sunga ne wanhu we makungugo gose womucemenyi, ‘Muli wamoti’ hambi yisi yenyu nha yolowa hanhu haswanu muno ku wikale.”
Wihuwizo wo Mulungu wo lusungu
13Muwaha Mulungu yakutya, “Anye mwalonga nghani zo wogofye muno kuli'ne. Ninga kanyhi mukuwuza ti, mukutya, ‘Alo 'se cakulonga nghanici?’ 14Mwalonga mukatya, ‘Kumwitumamila Mulungu yo nghani ya bwete du. Hamba ho cili cambuzici mu wituma zono mwene yakulonga, hamba zo kujela kumulajila Muwaha Mulungu we mihanga nha vyono cikuzikalalila zono cetuma? 15Ninga nha vyono ase cikuwona, i wanhu wevuni wo wawo wono wekalaga wena nyemo. Ninga i wanhu wabi, si vyono wakumota du, langa kanyhi wakuwa kumujela Mulungu wukangalizi wakwe mu metumo gawo mabi, nawo wakupona.’ ” 16Ne wanhu wono wamogopile Muwaha Mulungu, walonganaga weneco wose, nayo Muwaha Mulungu, yakawahuliciza, yakahulika zono walonganaga. Hali Mulungu, hakawa na citabu cono candikwe matagwa ga wose wono wamogopaga Muwaha Mulungu no kumuhulika. 17Nayo Muwaha Mulungu we mihanga yakutya, “Wawo wo wowa wanhu wangu. Na mwi'zuwa lyono nolofisiliziza wihuwizo wangu, i wene wolowa wanhu wangu. Nane nowawonela lusungu, nha vyono sogo yo munhu kamuwonelaga lusungu, mwana mono yakumwitumamila. 18Kanyhi i wanhu wangu, ho wolowuwonela wisimajile wono wolowa, kuli we ling'ani na kuli i wanhu wabi, na kuli munhu mono yakunyitumamila, na kuli yulya mono si yakunyitumamila'ne.”
Currently Selected:
Malaki 3: LLKWW
Highlight
Share
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.