MATYE 3
3
Jan wi dá bo na Nyɛʔɛlɛ kayoro nyu
(Mar 1:1-8; Luk 3:1-18; Jan 1:19-28)
1Yɛʔɛ́ fafaʔa dà gâ gɔ kɔ ge, Jan ŋa wi dáa hɛɛn batise ge wɔ̀ɔ pan mà báa ki jari wa Jude klo sinbriʔi deʔe kà na, 2mà yo: «Ye kruʔu wa yè kapere ma de, mɛjɛn Nyɛʔɛlɛ li masaʔa kí na nori.»
3Nyɛʔɛlɛ leyoo Esayi wi dá Jan wi kayoʔo yo ge mà yo:
Wà na wi àkpolo wa le wa sinbriʔi ni ge naʔa pin:
Ye wò fɔlɔ wi kloʔò kpari ge, yeʔe sìn. # 3:3 ma wèle wa Esa 40:3 ni wè.
4Jan wi dáa nyoʔomɛ joro dreʔe ni. Wɔ̀ɔ na hlɛʔɛ anuʔulu pun wa wi hɛnŋɛɛ ni ge. Wi dáa kabɛrɛ kà ní nya hrɛnʔɛ ní.#3:4 ma wèle wa 2Mas 1:8 ni wè.
5Ki nyiŋi na, à hɛɛn pèè na jrɛʔɛ wa Jerusalɛmu kàʔà ni, ní Jude klo lì bɛfu ní, ní Jurudɛn lɔʔɔ dere tì bɛfu ní mà na sye wì krugu, 6na pe kapere tanli de. Wɔ̀ɔ na pe batise wa Jurudɛn lɔʔɔ nî ge.
7Wi gâ Farisiyee ní Saduseyee nya pé na pan fafaʔabaa jango wí pe batise ge, wɔ̀ɔ yo: «Yèé bee yé nyɛ nɛbo wɔrɔ di ge, han maʔa tyɛʔɛ ye na mâ yo yé bi gban bí syɔ Nyɛʔɛlɛ li nàʔà ma ga kí na pan wa ge?#3:7 ma wèle wa Mat 12:34; 23:33 ni wè. 8Nàʔa po ban, ye da danrí pomo ma na mí biʔi tyɛʔɛ hɛɛn na be, peʔe cɛn pé yo yé ma kruʔu wa yè kapere ma de. 9Yò gaʔa honri bì yo: ‹Wó nyɛ Abrahamu kluʔu pii.› Mɛjɛn, kanyɛmɛ na, Nyɛʔɛlɛ pa li gban bì ki ŋglɛnrɛ da tà krɛʔɛ hɛnwyee, pe po Abrahamu kluʔu pii.#3:9 ma wèle wa Jan 8:33 ni wè.
10Yèé yé nyɛ nɛ pa tiri nyɛ de. Pé na cɛn pé bi tiri ti niri konlo de kɔ kakplonʔo nì ge. Nàʔa po ban, tiʔi o tiʔi ga koò na pikmaba seri ge, pa peʔe kon bìʔi wa kwɔʔɔ nî.#3:10 ma wèle wa Mat 7:19 ni wè. 11Domi mí na ye batise nyumu ní jango bìʔi tyɛʔɛ hɛɛn na be peʔe cɛn pe yo yé ma kruʔu wa yè kapere ma de. Di ŋa wí na pan wa na kruʔu ma ge, wi fanŋa kí ma kpɔʔɔ na woʔo na ge. Mi ìn bi ja gban bì wi sabara maʔaŋaa haʔala ge. Wiì wí bi baa ye batise Nyɛʔɛlɛ li Nyìli ní, ní kwɔʔɔ ní. 12Wi glefɛʔɛ kí nyɛ wa wi kyɛʔɛ ni ge. Wí bi ba wi akaba pì bɛfu fɛ ba pí nyɛ wa wi aclaʔa na ge. Pɔɔ yà pí le wa wi bolo ni le,di wí bi ba akaba pi fafaba hogo be wa kwɔʔɔ bajefiʔi ni ge.»
Jan wí ma Jesu batise we
(Mar 1:9-11; Luk 3:21-22; Jan 1:29-34)
13Ki kruʔu ma, Jesu wɔ̀ɔ jɛ wa Galile klo ni mà pan Jurudɛn lɔʔɔ ma Jan krugu we, jango Jan wi bɔɔ batise. 14Di Jan wi ìn dà yereʔe na. Wɔ̀ɔ yo: «Kí ma yala ma domi batise. Mo à ma ná ban nà krugu yo?» 15Jesu wɔ̀ɔ wí po: «Ma yèréʔé na ŋaŋa ni ge. Ki pomo miì na, wó bi kì bɛfu funŋu ga Nyɛʔɛlɛ lí na ca ge.»
Jan wɔ̀ɔ yereʔe na. 16Jesu wi gâ batise kɔ mâ nyini wa nyumu ni me, ki nyidege na, nyɛʔɛlɛ à li nyɛʔɛ. Wɔ̀ɔ Nyɛʔɛlɛ li Nyìli nya lí na trigi na pan nɛ pa kòtolo nyɛ le. À li bâ glɛn wí na. 17À pe ákpolo là loʔo wa nyɛʔɛlɛ na le, à li yo: «Ki woo ŋa we wí nyɛ na Piglaan wi. Wí na na glanʔa ceŋge.»#3:17 ma wèle wa Hli 22:2; Ŋuʔu 2:7; Esa 42:1; Mat 12:18; 17:5; Mar 1:11; Luk 9:35 ni wè.
Currently Selected:
MATYE 3: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire