MATYE 15
15
Juwifiyee pe tokpɔɔ pe kalɛʔɛlɛ
(Mar 7:1-13)
1Ki nyiŋi na, Farisiyee pèè ní, ní Furu sɛbɛ cɛnfɛɛ pèè ma jɛ wa Jerusalɛmu kàʔà ni ge mà pan mà bâ Jesu po we: 2«Nyaʔa ma kan ma ploʔofɛɛ pé ma ce wò tokpɔɔ pe kalɛʔɛ ma ge? Mɛjɛn pé na li kyɛbajeʔere ní.» 3Wɔ̀ɔ pé po: «Nyaʔa ma kan yé ma ce Nyɛʔɛlɛ li kayoro ma de yè kalɛʔɛ kɔsɔ na we? 4Nyɛʔɛlɛ à li yo: Ma to nì, ma no nì maa pe kpɔʔɔ, mà yo nɛ: Nà hɛn ŋa bí kayopeʔe yo biʔi wá wi to ma, ná kiì ban, wi no ma we, kí ma yala ki woo wi kù.#15:4 ma wèle wa Nyi 20:12; 21:17; Sraʔa 20:9; Lado 5:16 ni wè.
5Di yèé à ye yo: Nà hɛn wà biʔí yo wi to kan, ná kiì ban, wi no kan bì yo: ‹Ga mi dá bì gân má ma ge, mí maʔa kan Nyɛʔɛlɛ ma sraʔá,› 6ki hɛn ŋa wi ìn jori bì wi to kpɔʔɔ we adi ní wi no nì we. Ki pomo na me, yé na Nyɛʔɛlɛ li kayoro cɔʔɔ de yè kalɛʔɛ kala na le. 7Yèé noyomo syɛn syɛn fɛɛ, Esayi wi dá kayocɛnŋɛ yo ye na mâ yo:
8 Nyɛʔɛlɛ à li yo:
Ki hɛɛn bee pé na na kpɔʔɔ nosɛrɛ na,
àʔa hín bo pe dihon wí nyɛ leʔe na ní. # 15:8-9 ma wèle wa Esa 29:13 ni wè.
9 Mɛjɛn pé na na kpɔʔɔ waʔafe.
Pé na hɛɛn krɛʔɛ be ga nì ge
kí nyɛ hɛɛn honriʔi gi
mà naʔa hanri nɛɛ Nyɛʔɛlɛ li honriʔi gi.»
Ga kí na hɛɛn kran be
(Mar 7:14-23)
10Wɔ̀ɔ janma yeri me màʔa yo pé ma mà yo: «Ye nagruʔu can, ye da nurú, yeʔe cɛn.» 11Yraʔa kà wóo gban bì je wa hɛn wi nò nî ge bùu kran Nyɛʔɛlɛ li yɛʔɛ̀ na ge. Di ga kí na nyini wa no ni ge kiì gi kí na hɛn kran we banmɛ ge.
12Ki nyiŋi na, wi ploʔofɛɛ à pe flo wa wì tanla mòo po: Mɛ ìn ki cɛn bì yo Farisiyee pé ma ma kayoro da loʔo, kí ma pe bɛn ge yo? 13Wɔ̀ɔ pé po: «Tiʔi o tiʔi ga na To ŋa wí nyɛ wa namuru ni de, wi ìn ki ton ge, pé bi baʔa kɔ.
14Ye pe yaʔa wa. Fyoon bɛ pé naʔa ca bì da kloʔò teri fyoon na be. Di nà fyon wà bí da kloʔò teri fyon wà na ge, pè syɛnmu pa pe blɛn bì do wa tindɛʔɛ kà ni.»#15:14 ma wèle wa Luk 6:39 ni wè. 15Pyɛri wɔ̀ɔ wí po: «Ma ki yomɛlɛ li kɔ̀rɔ́ tyɛʔɛ wo na.» 16Wɔ̀ɔ pé po: «Yèé fanna, yé nyɛ kabajɛnyee adi yo? 17Ye ìn ki cɛn yo bí yo yraʔa kì bɛfu ga kí na jin wa no ni, kí na jin wa lama ni, pe na yáʔà yrígi màʔa wa finmi na ge yo? 18Ga kí na nyini wa no ni, kí na jrɛʔɛ wa dihon wiì na. Kiì gi kí na hɛn krɛʔɛ tipee Nyɛʔɛlɛ li yɛʔɛ̀ na ge.#15:18 ma wèle wa Mat 12:34 ni wè. 19Mɛjɛn ga kí na jrɛʔɛ wa dihon na we, honribere nì, hɛnkpoʔo ní, cɛkpere ní, nagbere nì, kyɛnrɛ ní, nikonro nì, akpoflɛnʔɛ ní, yele cɔʔɔmo ní ki wobo piì bi pí na hɛn kran we Nyɛʔɛlɛ li yɛʔɛ̀ na ge. 20Ki yrɛbɛ ba piì bi pí na hɛn kran we. Di nòo jaa li kyɛbajeʔere ní, ki woʔo ga kòo gban bùu kran Nyɛʔɛlɛ li yɛʔɛ̀ na ge.»
Jesu wí ma cɛnabonŋo wi picɛple pwɔʔɔ
(Mar 7:24-30)
21Jesu wɔ̀ɔ jɛ be ki deʔe na ge mà kɛri Tire kàʔà klɛnmɛ ni, ní Sidon kàʔà nì ge. 22À Kana woo cɔ wà ma jɛ wa ki klo klɛnmɛ ni me mà pan mà báa daʔara mà yo: «Wò fɔlɔ, mo ŋa má nyɛ Dafide pyɔ we, na nyugara ti wa má na. Welé, gbosyo nyɛ na picɛple ni le.» 23Di Jesu wi ìn yo wí ni. Wi ploʔofɛɛ à pe flo wa wì tanla mòo nyɛri mà yo: «Maʔa yo ki cɔ ma we wi da sye, mɛjɛn wí na taʔara na pan wò krugu.» 24Wɔ̀ɔ pé po: «Nyɛʔɛlɛ li ìn dà ná tun peè ma nà ki ìn bo Israyɛli kluʔu mbara tiì di da tí ma punŋu ge.» 25Di cɛlɛ wɔ̀ɔ bâ kunbiʔi kán wì tanla mà yo: «Na fɔlɔ, ma na haʔa.» 26Wɔ̀ɔ wí po: «Ki ìn yala hɛn wi pii pe bru kpe wuu wa poon ma.» 27Ki cɔ wɔ̀ɔ wí po: «Na fɔlɔ, kayocɛnŋɛ gi, ɛɛn di, poon pa pe gban bì da ŋa ka wí na tun tra na pe fɛɛ ma be wa tabali noʔo na ge.» 28Ki nyiŋi na, Jesu wɔ̀ɔ wí po: «Cɛlɛ, ma pama mí nyɛ kpangbanma. Ki hanri ki yala má kan ma honriʔi nì ge.» Wi pyɔ wɔ̀ɔ pwɔʔɔ kpo ki nyidege na ge.
Jesu wí ma hɛɛn fafaʔabaa pwɔʔɔ
29Jesu wi gâ jɛ be ki deʔe na ge, wɔ̀ɔ kɛri mà yâ go wa Galile nyugbɔmo tanla me mà yâ luʔu mà klɛn wa angolo yugu na. 30À hɛɛn fafaʔabaa ma bâ gboʔolo be wì tanla mà na pan wí kan lemloʔomoo ní, ní atere fɛɛ ní, ní fyoon ní, ní boboyee ní mà plɛn pèè ní nɛ fafaʔabaa mà báa pe teri be wì tanla. Wɔ̀ɔ pé pwɔʔɔ. 31Ki dá hɛɛn fo, mɛjɛn pe dáa boboo nyaʔa be à pe na nyu. Atere fɛɛ à pe na pori. Lemloʔomoo à pe na tanri. Fyoon à pe na nyaʔa. À pe na Israyɛli woo pe Nyɛʔɛlɛ kpɔʔɔ le.
Jesu wí ma nabii saamo kan, à pe li
(Mar 8:1-10)
32Jesu wɔ̀ɔ wi ploʔofɛɛ yeri be, à pe flo wa wì tanla. Wɔ̀ɔ pé po: «Hɛɛn pe nyugara tí ma wa ná na, mɛjɛn pé ma wlɛrɛ tanri kɔ nɛ nà tanla. Pe ìn yraʔa kà ta bì li. Mi ìn jori bì pe yaʔa pe da sye balili. Ná kiì ban, pe fanŋa paʔa yà gɔ wa kloʔò na ge.» 33Wi ploʔofɛɛ à poo po: «Wó bi bru fafaʔa ta hanbe naʔa ki sinbriʔi ni ge bí ki janma fafaʔa kan mí li mi tín ge?» 34Jesu wɔ̀ɔ pé po: «Bru jori nyɛ be ye ma?» À pe yo: «Wí nyɛ bru nasyɛn mà plɛn fyɔbiʔi cɛnri nì.» 35Wɔ̀ɔ janma po mi klɛn tra na de, 36mà bru nasyɛn kpe we ní fyɔɔ ní be mà Nyɛʔɛlɛ syeri le mà pi konʔolo mà pi kân wi ploʔofɛɛ ma be. Wi ploʔofɛɛ à pe pí tiʔibi janma na me. 37Pè bɛfu à pe li mà tìn. Bru ní fyɔkonmo ní ba pi dá gori ge, à pe pí kpoʔolo mà pi le kpogoo ni. À pi kpogoo nasyɛn nyi. 38Bee pe dá li ge nabii pe dá bo saamo (4 000). Pe ìn cɛɛ ní pii tonli be. 39Ki kruʔu ma wɔ̀ɔ jɛ be janma tanla me mà je nyumu kɔrɔ ni mà kɛri Magidala klɛnmɛ ni.
Currently Selected:
MATYE 15: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire