MATYE 12
12
Jesu ní, fyonriwlɛʔɛ nì
(Mar 2:23-28; Luk 6:1-5)
1Ki nyiŋi na ge, Jesu wɔ̀ɔ báa doro syɔʔɔ kere tà ni Juwifiyee pe fyonriwlɛʔɛ na, funŋu àʔa po kí ma wi ploʔofɛɛ co be. À peʔe hli mà na ke kaʔabu na ke kun.#12:1 ma wèle wa Lado 23:26 ni wè.
2 Farisiyee pe gáʔà nya ge, à poo po: «Welé, ma ploʔofɛɛ pé na ga hanri ki ìn yala pé da hanri fyonriwlɛʔɛ na ge.» 3Wɔ̀ɔ pé po: «Ga Dafide wi dá hanri, nyiŋi ga na funŋu ki dɔ́ɔ co, wiì nì, ní bee ní pe dá bo wí ni ge, ye ìn jeʔe wele wa Nyɛʔɛlɛ li sɛbɛ ni we yo?#12:3-4 ma wèle wa 1Sam 21:1-7 ni wè. 4Wiì nì, wi hɛɛn ní be, pe da jé wa Nyɛʔɛlɛ li go nî ge mà yâ bru ŋa ka wi dá gan Nyɛʔɛlɛ ma le. Ki ìn dà yala pe ki bru ka we. Bì yala Nyɛʔɛlɛ li furu kayoro sɛbɛ ní we, wi dá gan li sràʔá farafɛɛ pee nigbe ma.#12:4 ma wèle wa Sraʔa 24:9 ni wè.
5Dee di, ye ìn jeʔe wele wa furu kayoro sɛbɛ ni we mâ yo fyonriwlɛʔɛ na, Nyɛʔɛlɛ li sràʔá farafɛɛ pé na fyonriwlɛʔɛ cɔʔɔ wa sraʔá go ni ge, di à pe po baʔahaʔa fun ge.#12:5 ma wèle wa Ton 28:9-10 ni wè.
6Ɛɛn di, mí biʔi yo ye ma bì yo, yraʔa kà nyɛ naʔa ga kí ma kpɔʔɔ sraʔá go na ge. 7Mɛjɛn nàʔa po ye dí ki kayoʔo ki kɔ̀rɔ́ cɛn we ga kí maʔa yo mâ yo: Mì Nyɛʔɛlɛ, mí na nyugara tiì ca. Ho na sraʔá ca we, ye ìn di bî da kiti kon hɛnsinbee na be.#12:7 ma wèle wa Mat 9:13; Ose 6:6 ni wè.
8Mɛjɛn Hɛn Pyɔ wí nyɛ fyonriwlɛʔɛ ki fɔlɔ.»
Kyɛwaʔaga fɔlɔ kayoʔo
(Mar 3:1-6; Luk 6:6-11)
9Wɔ̀ɔ jɛ be mà kɛri mà yâ je wa pe sɛrigo kà ni. 10Naŋa wà dà bo wa wi kyɛʔɛ àʔa po kí ma waʔa wí na. Hɛɛn pèè dá bo wa kpo, bee pe dáa ki ca bì baʔa Jesu na we. À poo yugu mà yo: «Kí ma yala wà bí hɛn pwɔʔɔ fyonriwlɛʔɛ na ge yo?» 11Wɔ̀ɔ pé po: «Wiwii nyɛ naʔa ye ni, nàʔa po mbyɔ nigbe nyɛ wí ma, nòo yá do tindɛʔɛ nî fyonriwlɛʔɛ na, wòo wi co bùu yrígi ge? 12Di hɛn wí ma ponro mbyɔ na we. Ki kala na, kí ma yala hɛɛn pe da kakmaʔa hanri fyonriwlɛʔɛ na ge.» 13Wɔ̀ɔ naŋa po we: «Ma ma kyɛʔɛ haʔala ge.» Naŋa wɔ̀ɔ ki haʔala. Àʔa pwɔʔɔ kpo mà po nɛ pa ki tɔ nyɛ ge. 14Farisiyee à pe jɛ be mà yáa ticlimi mà ca jango bùu kpo.
Tungɔɔ ŋa Nyɛʔɛlɛ lí ma fara ge
15Jesu wi gáʔà cɛn, wɔ̀ɔ jɛ be ki deʔe na ge. À hɛɛn fafaʔabaa ma pa wí na. Wɔ̀ɔ yabaa pè bɛfu pwɔʔɔ, 16màʔa yo pé ma gbanʔa mà yo pò gɔɔ tyɛʔɛ hɛɛn na be. 17Ki dá hanri ban jango kayoro ti fùnŋù da Nyɛʔɛlɛ leyoo Esayi wi dá yo ge mâ yo: 18Nyɛʔɛlɛ à li yo:
Na tungɔɔ wele we,
ŋa mí ma fara ge.
Wiì wi wí na na glanʔa
mâ po na tanma fɔlɔ we.
Mí bi na Nyìli trigi le wi na.
Wí bi ba na kiti konmo tyɛʔɛ me
klòʔo kè bɛfu na. # 12:18-21 ma wèle wa Esa 42:1-4 ni wè.
19 Wi ìn bi da kakara wa hɛɛn ní be.
Wi ìn bi da daʔara pé na kpo.
Pe ìn bi da wi àkpolo nuru le
wa kloro na de.
20 Wi ìn bi ba kpaaganla krugɔlɔ
ka bì li tanʔa.
Wi ìn bi ba lamba ŋa fiʔi
wi na cɛ́n bi fiʔí ge.
Wí bi daʔa hanri banmɛ ge
fɔ kiti konmo mi ba fanŋa ta
wi fonʔo ni ge.
21 Klòʔo kè bɛfu
ké bi ke honriʔi pa wi na.
Jesu ní, Bɛlisebuli nì
(Mar 3:22-30; Luk 11:14-23)
22Ki nyiŋi na ge, à pe pan wí kan gbosyo fɔlɔ ní. Wɔ̀ɔ po fyon mà po bobo nɛ. Jesu wɔ̀ɔ wí pwɔʔɔ. Wɔ̀ɔ na nyu mà na nyaʔa. 23Àʔa janma fo me. À pe yo: «Dafide pyɔ ban ki woo ŋa nì we yo?»
24Farisiyee pe gáʔà loʔo ge, à pe yo: «Ki naŋa ŋa woò na gbosuu prɔ hɛɛn ni be Bɛlisebuli wi kruʔu na, ŋa wí nyɛ gbosuu pe kundiʔi we.»#12:24 ma wèle wa Mat 9:34; 10:25 ni wè. 25Di Jesu pɔɔ da gâ pe honriʔi cɛn ge, wɔ̀ɔ pé po: «Klo nà li da jan lì ní ge, pa li ba jɔʔɔ. Kàʔà nàʔa da jan kì ní, ná kiì ban, hedeme woo nà pe da jan pè ní ge, pòo yerehaʔa ta. 26Sotanri nòo da Sotanri prɔ we, pɔɔ da jan wì ní, wi masaʔa paʔa kì po mɛlɛ bí yerehaʔa ta ge. 27Nà mi da gbosuu prɔ Bɛlisebuli fanŋa ni ge, paʔa bo yè ploʔofɛɛ pé na pe prɔ han fanŋa ní? Ki kala na, pé bi ba bo yè kiti konfɛɛ. 28Di nàʔa po mí na gbosuu prɔ Nyɛʔɛlɛ li Nyìli fanŋa ni ge, paʔa bo Nyɛʔɛlɛ li masaʔa kí ma no ye na.
29Hɛn pɔɔ kì po mɛlɛ bi ya jé fanŋa fɔlɔ go ni bì wi yrɛbɛ yu be kí po wi ìn wi pwɔ ge, fɔ wuu pwɔ kpɛn wi na da wi wi go yrɛbɛ yu be.
30Hɛn ŋa woò na tunŋu ko ná ni, paʔa bo wí na can ná ni. Ee, hɛn ŋa woò na na hari bì da hɛɛn kpoʔolo, paʔa bo wí na pe craʔa ná ma.#12:30 ma wèle wa Mar 9:40 ni wè. 31Ki kala na, mí naʔa nyu ye kan, hɛɛn pé na kapere da hanri mâ na Nyɛʔɛlɛ li yele cɔʔɔ le, ki kapere tì bɛfu tí bi yaʔa pé kan. Di nà wà bí da Nyɛʔɛlɛ li Nyìli li yele cɔʔɔ le, ki kapeʔe ki ìn bi yaʔa wí kan. 32Nà hɛn wà bí hɛnpere yo bì wa Hɛn Pyɔ ma we, ki kapeʔe kí bi yaʔa wí kan. Di hɛn ŋa wí bi hɛnpere yo bi wá Nyɛʔɛlɛ li Nyìli ma le, ki kapeʔe ki ìn bi yaʔa wí kan ki ŋaŋa nyiŋi na ge, ní nyiri da nì tí na pan wa ge.#12:32 ma wèle wa Luk 12:10 ni wè.
Tiri ní, ti pibi nì
(Luk 6:43-45)
33Nàʔa po tiʔi kí nyɛ kmaʔa, ki pibi pa pi bo kmaba kpo. Nàʔa po tiʔi kí nyɛ tipeʔe, ki pibi pa pi bo tipebe kpo. Mɛjɛn hɛɛn pé na tiʔi cɛnni ge ki pibi na.#12:33 ma wèle wa Mat 7:20 ni wè. 34Yèé bee wɔfɔri pii be, yé nyɛ tipee pomo ma na ge, pa yeʔe po mɛlɛ bí da kayokmara nyu ge? Mɛjɛn hɛn dihon wí nyɛ nyìŋì ga nì ge, wi nò ki naa kiì nyu.#12:34 ma wèle wa Mat 3:7; 23:33; 15:18; Luk 3:7 ni wè. 35Hɛnkmaa wi hîn na akmaba yrigi wa wi krɔkmaʔa ni ge. Di hɛnpee wi naa apebe yrigi wa wi krɔpeʔe ni ge. 36Mí biʔi yo ye ma, tonro fun kayoro tì bɛfu da hɛɛn pé na nyu ge, pé bi ba ti kɔ̀rɔ́ yo we kiti konwlɛʔɛ na ge. 37Mɛjɛn Nyɛʔɛlɛ lí bi kiti kon má na ma kayoro fanŋa ni bì tanʔa kan má ma, ná kiì ban, bì klomo kan má ma.»
Hɛɛn pee na kafonŋoo ca Jesu ma we
(Mar 8:11-12; Luk 11:29-32)
38Ki nyiŋi na, Furu sɛbɛ cɛnfɛɛ ní, Farisiyee pèè ní à peʔe yo Jesu ma we mà yo: «Krɛʔɛfɔlɔ, wó ma cori ma kafonlo là hanri wo kan, woʔo nya.» 39Wɔ̀ɔ pé po: «Ŋaŋa hɛɛn pé nyɛ hɛnpee mà po kakloʔo hanrifɛɛ. Pé na kafonlo là ca. Di kafonlo lɛ̀ ìn bi hanri pé kan, nà ki ìn bo Jonasi wi kafonlo liì li ge, ŋa wí nyɛ Nyɛʔɛlɛ leyoo we. 40Jonasi pɔɔ da wlɛrɛ tanri ní yebliri tanri kɔ wa nyugbɔmo ni fyɔkpɔ wi lama ni me, ki podeme miì na, Hɛn Pyɔ wí bi ba wlɛrɛ tanri ní yebliri tanri kɔ wa tra ti lama ni me.#12:40 ma wèle wa Jan 1:17 ni wè.
41Kiti konwlɛʔɛ na, Ninife kàʔà hɛɛn pé bi ba yere ki ŋaŋa hɛɛn ní be bì baa kiti kon pé na. Mɛjɛn pe dá kruʔu wa pe kapere ma de Jonasi wi kayoro fanŋa ni. Di welé, yraʔa ga ki kpɔʔɔ́ Jonasi na we, kí nyɛ naʔa.#12:41 ma wèle wa Jon 3:5 ni wè.
42Klo fɔlɔ cɛlɛ ŋa wi dá jɛ wa yaa prama na, wí bi ba yere kiti konwlɛʔɛ na ŋaŋa hɛɛn ní be bì kiti kon pé na, mɛjɛn wi dá jɛ leʔe wa klo kanla na mà pan, jango bì ba Salomo wi ticlimi kayoro loʔo de. Di welé, yraʔa kà gi ga ki kpɔʔɔ́ Salomo na we, kí nyɛ naʔa.#12:42 ma wèle wa 1Mas 10:1-10; 2Masa 9:1-12 ni wè.
Gbosyo wí ma hru mà pan
(Luk 11:24-26)
43Gbosyo nòo nyini hɛn ni we ge, wi na kɛrí mà yáa nyari na hɔlɔ wa lɔkluru ni de na fyonrihaʔa ca. Nòo gá fyonrihaʔa ca bi dé ge, 44wi na yo: ‹Mí bi hru bì yà je na go nî ge, ga mi dá nyini ge.› Nòo pan bì baʔa nya waʔafe, pé maʔa hanri màʔa pɛ mà yrɛbɛ tyɛʔɛ wa ge. 45Ki nyiŋi na, wi na yâ gbosuu nasyɛn yeri mà pe haʔa wì na, bee pé nyɛ tipee mâ toro wiì na we. Pe na bâ je mà ko wa. Ki kruʔuma nyiŋi ki na po gbanʔa mà toro kplɛʔɛ woʔo na ge. Kí bi ba bo ban ki ŋaŋa hɛnpee ma be.»
Jesu wi no nì, ní wi cyɛɛn ní pe kayoʔo
(Mar 3:31-35; Luk 8:19-21)
46Jesu wi dá bo wí na nyu janma ní me adi, wi no nì, ní wi cyɛɛn ní à pe pan mà bâ yere be dala na mà naʔa ca pé bi yo wí ni. 47À wà moo po: «Ma no nì, ní ma cyɛɛn ní pé nyɛ wa yerehaʔa dala na le. Pé naʔa ca bì yo má ni.» 48Wɔ̀ɔ kí yo ŋa ma wí na nyu wí ni ge mà yo: «Han wi na no we? Hanbee bɛ na cyɛɛn be?» 49Wɔ̀ɔ kyɛʔɛ ŋroʔo wi ploʔofɛɛ na be mà yo: «Welé, na no nì, ní na cyɛɛn ní pé bee. 50Hɛn o hɛn ŋa wí na na To ŋa wa namuru ni wi nadanma hanri ge, wiì wi na heme woo we, wiì wi na no we.»
Currently Selected:
MATYE 12: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire