HLIMI 11
11
Babɛli binŋi kayoʔo
1Ki nyiŋi na drunya hɛɛn pè bɛfu pe dáa hɛnrɛ nigbe nyu mà na nyu podeme na. 2À pe gâ jɛ wa yaa ki jɛhaʔa namyɛlɛ na mà kɛri. Pe gáa sye, à pe yâ gbedeʔe kà nya Syineyari klo ni mà klɛn be. 3À pe gáʔà yo pe ma mà yo: «Ye pan, woo tufa kon wo dɔɔ cinni kwɔʔɔ ní. Ki kruʔu ma à pe ki tufa kpe, wɔ̀ɔ po nɛ ŋglɛnrɛ di, à pe tra kro kpe mà na fanri tí ni nɛ pa poro nyɛ de.» 4Ki kruʔu ma à peʔe yo pe ma nɛ mà yo: «Ye pan, wo ya kàkpɔ̀ʔɔ̀ fan ní binŋi nì ga kí bi glon fɔ bì yaa màʔa wa nyɛʔɛlɛ na le. Nàʔa po ban, pa wo grɛʔɛ lekpangbanmaa, pa wo go dedege na, wòo jraʔa bì gɛri tra dere tì bɛfu na fyeu.»
5Bajegɔ Nyɛʔɛlɛ à li trigi jango bì ba kàʔà wele ní binŋi ga nì hɛɛn pe dáa fanri ge. 6Bajegɔ Nyɛʔɛlɛ à li yo: Wele, pè bɛfu pé nyɛ teme na mà na hɛntere nyu. Nà peʔe hli banmɛ ge, kpɛndo ni yraʔa kà wo wa bì gban bì pe yrigí ga na pe cori bi hanri ge. 7Yoo kɛ wo trìgì wo ya pe hɛnrɛ wlele de pe ma, woʔo hanri jango pò gáa hɛnrɛ nuru pe ma adi. 8Bajegɔ Nyɛʔɛlɛ à li pe craʔa pe na be ki deʔe na ge. À pè pe kàkpɔ̀ʔɔ̀ ki fanma yaʔa mà kɛri tra dere tì bɛfu na. 9Wele kiì gi ki dá gan á pe na ki deʔe yeri Babɛli, mɛjɛn ki deʔe kiì gi Bajegɔ Nyɛʔɛlɛ li dá hɛɛn pe hɛnrɛ wlele pe ma ge. Mà kpe ki deʔe na Nyɛʔɛlɛ à li hɛɛn craʔa be naʔa tra tì bɛfu na.
Tokpɔɔ pe yegee mà kpe Sɛmu na fɔ mà yâ no Abramu na
10Sɛmu wi kluʔu pii pe yegee ké gee: Sɛmu wi dá bo wí ta yɛʔɛ́ too kɔgunnu wɔ̀ɔ pyɔ wà he nabii ŋa pé na yeri Aripakisade we. Nyufafaʔa ki dá ban àʔa ta yɛʔɛ́ syɛn wɔ́ɔ wi he ge. 11Aripakisade wi heme kruʔu ma Sɛmu wɔ̀ɔ lɛ mà ta nɛ yɛʔɛ́ saa syɛn ní too kɔgunnu mà nì ma pii pèè he nɛ nabii ní cɛɛ ní.
12Aripakisade wɔ̀ɔ bâ da yɛʔɛ́ fonɛrɛ mà kɛ̀ kɛ̂ mà kɛ̀ kɔgunnu mà pyɔ wà he nabii, à pe noo yeri Syela. 13Syela wi heme kruʔu ma Aripakisade wɔ̀ɔ lɛ nɛ mà ta yɛʔɛ́ saa syɛn ní yɛʔɛ́ tanri. Ki kruʔu ma wɔ̀ɔ pii pèè he nabii ní cɛɛ ní.
14Syela wi da gâ yɛʔɛ́ fonɛrɛ mà kɛ̀ kɛ̂ ta kɔ, wɔ̀ɔ pyɔ wà he nabii, à pe noo yeri Ebɛri. 15Ebɛri wi heme kruʔu ma, Syela wɔ̀ɔ lɛ nɛ mà ta yɛʔɛ́ saa syɛn ní yɛʔɛ́ tanri mà pii pèè he nabii ní cɛɛ ní.
16Ebɛri wi da gâ da yɛʔɛ́ fonɛrɛ mà kɛ̀ kɛ̂ mà kɛ̀ ticɛrɛ nyiŋi ga na, wɔ̀ɔ pyɔ wà he nabii, à pe noo yeri Pelɛgi. 17Pelɛgi wi heme kruʔu ma, Ebɛri wɔ̀ɔ lɛ nɛ mà ta yɛʔɛ́ saa syɛn ní fonɛrɛ mà kɛ̀ kɛ̂ mà pii pèè he nabii ní cɛɛ ní.
18Pelɛgi wi da gâ lɛ mà ta yɛʔɛ́ fonɛrɛ mà kɛ̀ kɛ̂, wɔ̀ɔ pyɔ wà he nabii, à pe noo yeri Hrewu. 19Hrewu wi heme kruʔu ma, Pelɛgi wɔ̀ɔ lɛ nɛ mà ta yɛʔɛ́ saakere ní yɛʔɛ́ nacɛrɛ mà pii pèè he nabii ní cɛɛ ní.
20Hrewu wi dá da yɛʔɛ́ fonɛrɛ mà kɛ̀ kɛ̂ nyiŋi ga na, wɔ̀ɔ pyɔ wà he nabii noo yeri Serugi. 21Serugi wi heme kruʔu ma, Hrewu wɔ̀ɔ lɛ nɛ mà ta yɛʔɛ́ saakere ní yɛʔɛ́ nasyɛn. Ki kruʔu ma, wɔ̀ɔ pii pèè he nabii ní cɛɛ ní.
22Serugi wi bâ da yɛʔɛ́ fonɛrɛ mà kɛ̀ kɛ̂, wɔ̀ɔ pyɔ wà he nabii noo yeri Nahɔri. 23Nahɔri wi heme kruʔu ma, Serugi wɔ̀ɔ lɛ nɛ mà ta yɛʔɛ́ saakere mà pii pèè he nɛ nabii ní cɛɛ ní.
24Nahɔri wi bâ da yɛʔɛ́ fonɛrɛ mà kɛ̀ nacɛrɛ, wɔ̀ɔ pyɔ wà he nabii noo yeri Tera. 25Tera wi heme kruʔu ma, Nahɔri wɔ̀ɔ lɛ nɛ mà ta yɛʔɛ́ too kɔgunnu ní kprɔʔɔ ní yɛʔɛ́ nacɛrɛ mà pii pèè he nɛ nabii ní cɛɛ ní.
26Tera wi da gâ lɛ mâ ta yɛʔɛ́ too tanri ní kprɔʔɔ, wɔ̀ɔ pii pèè he nabii. Pe yegee ké gee: Abramu, Nahɔri ní Aran nì.
27Tera wi kluʔu hɛɛn pe yegee ké gee ŋa Abramu wi to we, ní Nahɔri nì, ní Aran nì we. Aran wi dá pyɔ wà he nabii mà noo yeri Lɔte, 28mà ku mà wi to yaʔa nyuwyeʔe na ŋa Tera we wa klo la ni pe dɔɔ́ he ge, Uri ni wa Kalide klo ni le. 29Abramu wɔ̀ɔ Sarayi kpe wi cɔ. Nahɔri wɔ̀ɔ Milika kpe wi cɔ, ŋa Aran wi picɛ we. Aran wi dá bo Yisika wi to. 30Sarayi wi ìn dà pyɔ wà he mɛjɛn wi dá bo cɛbahe.
31Tera wɔ̀ɔ wi pyɔ Abramu kpe we, wi najɛ pyɔ Lɔte nì ŋa Aran pyɔ we mà wi najɛ cɔ Sarayi plɛn we ŋa Abramu wi cɔ we mà jɛ pe ní wa Uri ni Kalide klo ni mà na sye pé ni Kana klo ni. À pe kɛri fɔ mà yâ glɛn wa Aran ni. 32Tera wi da gâ lɛ mâ ta yɛʔɛ́ saakere ní yɛʔɛ́ kɔgunnu kɔ, wɔ̀ɔ ku wa Aran ni we.
Currently Selected:
HLIMI 11: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire