2 Akorinto 4
4
Mpamba a Gënkhoo mung'ë a Vëife a Irongo
1Gwa uvii, sese gutiutëna nkumbu mung'ë a utënda mwëmo uruu gusoko në Muungu unë gwa gëhe gakwe wagufee sese mwëmo uruu. 2Sese guhita gëmpihe goong'e na ntendo yoong'e ya mënyaa. Sese guhita utënda wegheghe mba utënda lakuno gwa ukhani wa Muungu. Gwa urighëëtya tutë në a tutë sese gwendie udwëëra mwino gwina ukumu uja, kunu dhamiri ya antu yiugusudangëa usonge a Muungu. 3Na mbesa Sayu Njija ne sese gumëtanantya ëtimanyëkie, ëtimanyëkie gutufu gwa avoo nëvëmunjëa a uyaghao. 4Gwa uvaru wawe, Setani, mungu wa urëmi uruu wendie ufokuya mahaa a avoo nëvëtihuvëe. Veeso vëtinje goona weru, wasuu unë Sayu Njija nëëmughokee üküü wamwa Kiristo, unë vining'anëre viina Muungu. 5Gusoko sese gutiutanantya nëëgughokee sese aghonjo. Ëgweeso sese gumutanantya Yesu Kiristo mwino Müküü itambëëmwe na sese aghonjo mwino atumami vanyu gusoko amwa Yesu. 6Gusoko në Muungu agahanya, “Weru në werye mukiti.” Në Muungu uyuyo unë wendie umwëka munkhoo yitu gwa ugufa weru wa umanyi wa weru wa Muungu usonge a miho amwa Kiristo.
7Ëgweeso sese gukweti mpamba ëyëë a gënkhoo mung'ë a maifee a irongo. Ëyëë ëguraghëëra mwino tutë udaho në üküü ufumie kunë Muungu ti kunë sese. 8Sese gugasëka gwa njëa yoong'e, ëgweeso gutiusyekaa. Mbesa itungo në sese gutimanyie gutënde wurë, ëgweeso gutiutëna khumbu kamwe. 9Arunghu vitu vëugukhasya sese, ëgweeso Muungu atëugurekaa, veeso vëugusacha sese gugwe, ëgweeso sese gutiukuyaa. 10Mwitiku sese gutigineghaa holota a utëndewa mwikuya mwino Yesu, gusoko antu vangëja vëdahe goona ufanga wamwa Yesu mung'ë a mëërë itu. 11Gusoko itungo në sese guduva mwitiku sese guhangaa uvavi wa ikuya gusoko amwa Yesu gusoko antu vangëja vëdahe goona ufanga wamwa Yesu mung'ë a Mëërë itu në a ikuya. 12Uvii ikuya rëutendaa mwëmo mukhatë itu, ëgweeso ufanga mukatë anyu.
13Gusoko sese gwina nkhoo ëyëëyo në a uhuvëi mwino muntu umwedu wadahie gwandëka, “Nene nahuvëe na uvii ngahanya.” Sese noo guhuvëa, na uvii guhanya. 14Umanya mwino mweeso [Muungu] unë wendie umufëtya Müküü Yesu ufuma mwikuya winjë ugufëtya në sese itambëëmwe na Yesu. Na mweeso [Muungu] uguguhora itambëëmwe na nyee faafo fana mweeso urëfo. 15Uvii ëyëë në gusoko anyu. Gusoko mwino mboto a Muungu ëdahe uvafikëa antu vingë, ëdahe gongeeya asi kunë Muungu. Na ëyëë injë gweeta uküü në uküü kunë Muungu.
Uduva gwa Uhuvëi
16Uvii sese gutiutëna nkumbu. Mbesa mëërë itu ëgukhombifa, ufanga witu wa mukhatë ugutëndwaa ukhamu nanguu mwitiku. 17Gusoko makhasëko manyughu nëëguguhanga sese itungwee ëgugughondanëya gusoko a weru wa khae na khae uroo nëutiudaha gikhwanëywa. 18Uvii sese gutigihenga mantu nëëdwëëre ëgweeso mantu nëëtidwëëre. Gusoko mantu asaa nëëdwëëre ëgukëra, ëgweeso mantu asaa nëëtidwëëre ëtiukëra.
Currently Selected:
2 Akorinto 4: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.