2 Akorinto 1
1
1Faulo, mutumami wamwa Kiristo Yesu, gwa mafenji a Muungu nanë Timoteo muuna witu. Kunë Kanisa ra Muungu në rë uKorinto, nagwa antu në veru voong'e në vëuAkaya oong'e.
2Mboto kunë nyenye nane majëghana ufuma kunë Muungu witu nane Müküü Yesu Kiristo.
Faulo Ugumufa Muungu Asi
3Akuriwe Muungu Tata wa Müküü witu Yesu Kiristo. Mweeso në Tata në uguguonea uvavi sese; Muungu wa ufefeheyi woong'e. 4Mweeso ugugufefeheya sese mung'ë a malwe itu oong'e. Gusoko ëyëë sese gudahe uvafefeheya antu vangëja mung'e a malwe awe na mbesa ë wurë, itambëëmwe na ufefecheyi në Muungu ugugufefeheya sese aghonjo. 5Gusoko mwino gukhuvëa mung'ë a makhasëko amwa Kiristo në nanguu, uvii noo gukhuvëa mung'ë a ufefeheyi witu në uküü nanguu ukëërëa kunë Kiristo. 6Itungo në sese gukhasiwa, në gusoko a ufefeheyi wanyu nanë ughoji wanyu wa munkhoo, na itungo në sese gufefeheywa në gusoko a ufefeheyi wanyu, në nyenye muhanga itungo në nyenye mughimëëya makhasëko ayayo në sese guyahanga. 7Ighonjë ritu kunë nyenye në ikhamu. Gusoko sese gumanyie mwino nyenye mukhuvëa mung'ë a makhasëko itu, nyenye noo mwinjë ukhuvëa mung'ë a ufefeheyi witu.
8Sese gutiufenja nyenye mudëe umanya aruna vitu, makhasiko nëgwayahangie Asia. Gusoko sese guganempewa nanguu ukëra udaho witu, uvii gugatëna nkumbu a uduva. 9Tutë sese aghonjo gwendie ughema mwino itungo ra sese ukuya rafikaa. Ëgweeso ërëë rëgagutënda sese gweke uvëka wihaghamëyi kunë sese ëgweeso kunë Muungu nëugufëtya antu ufuma mwakuyi. 10Mweeso wagutyoe sese ufuma u momo wa ikuya, na mweeso winjë ugutyoa sese. Gunto akwe sese gwinjë uvëka ighonje ritu mwino mweeso winjë ugutyoa sese kangë. 11Nyenye noo imunoneye mugwarëëye sese gwa marombi, gusoko antu vingë vëdahe ufunya asi kunë Muungu gusoko itu, gusoko a iforyo unë Muungu winjë ugufa sese, mung'ë a usucha marombi itu ming'ë.
12Gusoko witëndeo witu nëturu, usudanga wa dhamiri yitu wasuu në wagutendie sese guduvë mung'ë a urëmi, na ino nanguu usonge a miho anyu. Sese gwatendie uwuu itambëëmwe na weru nanë weru wa nkhoo në Muungu wagufee. Ëgweeso gwatendie uwuu gwa mboto a Muungu na ti gwa ihaa ra gëuntu. 13Keeti yitu kunë nyenye itikweti kiti mukhatë ayo, ëgweeso rasëë në nyenye mudaha usoma na umanya. Nene nëhuvëëre nyenye mwinjë umanya vija. 14Mwino nyenye mwagumanyie sese gwa ifëgha, mwino nyenye mwinjë ukuriwa gusoko itu, viuyi mwino sese gwinjë ukuriwa gusoko anyu, itungo ëroo nëikwë Müküü witu wasuka.
15Gusoko nene naa nemanyie tutë ërëë. Nene naangufenja uja kunë nyenye mwandyo, gusoko nyenye mudahe uhanga mboto gwa mëhënjo ane në ëvëë ufuma kunë nene. 16Nene naangufenja umusoya nyenye mung'ë a muhënjo wane gwenda u Makedonia, na uja kangë kunë nyenye ufuma uMakedonia. Gwa njëa ëyëë nyenye mudahe unjarëya mung'ë a muhënjo wane gwenda uYudea. 17Nene naa ntigavëë mwino ibi ra nkunku gwa ufanga uja umusoya nyenye. Na nene naa ntinatëndaa mëfango gënya antu va mu urëmi uruu, gwa urumëëya na uhita oong'e gwa itungo rëmwedu. 18Tutë Muungu në wa uhuvëwa, na mweeso winjë uduya usudanga mwino ukhani witu kunë nyenye ti uyanja na uhita gwa muhënjo rumwedu. 19Gusoko Yesu Kiristo, Mwana wa Muungu unë ugutanantiwa na nene, nanë Silwano nanë Timoteo, arë ti Nha nanë Ee. Ëgweeso kunë mweeso faka në Nha. 20Gusoko maraghano oong'e a Muungu nëëkunë mweeso në Nha. Ëyëë në soko kunë sese uhanya Amina ukëërëa kunë mweeso, gwa uküü wa Muungu. 21Ëgweeso në Muungu unë wendie ugutënda sese gwë akhamu itambëëmwe na nyenye gwa ukhuvëa na Kiristo, na mweeso waguhwaniye sese. 22Muungu wendie uvëka gëmanyëko kunë sese ga uraghëëra mwino sese gwë vakwe. Na mweeso wagufee sese Mwahu Mweru mu nkhoo a mu muntu mwino dhamana.
23Ëgweeso Muungu adahe ung'utua nene mbesa nene ntiurighëëtya tutë, mwino nene nahitëe usuka uKorinto gusoko nene ntinafenja utenda nyenye muhange makhasëko angëja gunto a ayoo nimwayahangie. 24Sese gutiufenja gibala uhuvëi wanyu. Sese#1:24 Sese: Faulo na akhuvei vakwe. gutënda mwëmo itambëëmwe na nyenye umutenda nyee mwina uyanjo. Nyenye mwimëkie sësë gusoko uhuvëi wanyu ukhomie.
Currently Selected:
2 Akorinto 1: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.