Matthew 13
13
Pupulyuk Ke Mwet Taknelik
(Mark 4:1–9; Luke 8:4–8)
1In len sacna, Jesus el fahsr liki lohm sac ac som nu sisken lulu uh, ac muta in luti. 2Un mwet su tuku raunella uh arulana pus, ouinge el sroang nu fin oak soko ac muta fac, ac mwet uh tu finmes uh. 3El orekmakin kas in pupulyuk in luti nu selos ke ma puspis.
El fahk, “Mwet se som in taknelik. 4Ke el sisalik fita uh nu fin fohk uh, kutu fita uh putatla nu sisken inkanek inima uh, ac won uh tuku kangla. 5Kutu putatla nu yen eoteot, yen minini fohk fac. Tia paht na fita uh srunak. 6Tusruktu ke faht uh takak, sacn ma srunak uh folla ac uli, ke sripen srikla fohk nu ke oka. 7Kutu fita uh putatla inmasrlon kokul uh, su kapak ac kupoiya sacn ma kapak we. 8A kutu fita uh putatla nu fin fohk wo, ac kapak ac isus fahko puspis: kutu pacl siofok, kutu pacl onngoul, ac kutu pacl tolngoul.”
9Ac Jesus el fahk, “Ke ma inge kowos porongo, fin oasr srewos!”
Sripen Pupulyuk Inge
(Mark 4:10–12; Luke 8:9–10)
10Na mwet tumal lutlut elos kalukyang nu yurin Jesus ac siyuk sel, “Efu ku kom orekmakin kas in pupulyuk ke kom sramsram nu sin mwet uh?”
11Ac Jesus el topuk ac fahk, “Etauk ke ma lukma lun Tokosrai lun kusrao uh itukot nu suwos, ac tia nu selos. 12El su oasr etauk yoro ac fah itukyang tuh in arulana yohk liki meet; a el su wangin etauk yoro, etauk srisrik su oasr yorol ac fah itukla lukel. 13Sripa se sis nga orekmakin kas in pupulyuk nu selos uh pa, elos liye a tiana kalem kac, ac elos lohng a tiana akilen. 14Ouinge mwet inge elos akpwayeye kas in palu lal Isaiah, su fahk:
‘Mwet inge ac fah lohng na lohng, a tia kalem kac;
Elos ac fah liye na liye, a tiana akilenak,
15Mweyen nunak lalos uh upa,
Ac elos fonosya insraclos,
Ac kaliya mutalos.
Funu tia ouinge mutalos lukun liye,
Ac sraclos lukun lohng,
Ac nunkalos lukun kalem kac,
Ac elos lukun forma nu sik,
Tuh nga in akkeyalosla. Ouinge God El fahk.’
16“A kowos arulana insewowo, mweyen motowos liye, ac srewos lohng. 17Pwayena nga fahk nu suwos lah mwet palu puspis ac mwet lun God puspis kena liye ma kowos liye ac lohng ma kowos lohng, a elos tiana.
Jesus El Aketeya Pupulyuk Ke Mwet Taknelik
(Mark 4:13–20; Luke 8:11–15)
18“Ke ma inge, kowos porongo ac lutlut ke kalmen pupulyuk ke mwet taknelik. 19Elos su lohng pweng ke tokosrai ac tia kalem kac, elos oana fita ma putatla nu sisken inkanek inima uh. El su Koluklana el tuku ac tulakunla fita se su yoki insialos. 20Ac kalmen fita ma putatla yen eoteot, ma nu selos su engan in eis pweng wo ke elos tufahna lohng. 21Tusruktu, tiana tili nu in elos, ke ma inge ac tiana oan paht in elos. Na mwe lokoalok ku ma upa fin tuku nu selos ke sripen pweng sac, elos sa na in fuhleak. 22Ac fita su putatla inmasrlon kokul uh el oana elos su lohng pweng uh, tusruktu elya lun faclu ac lungse lalos nu ke mwe kasrup uh kupoiya pweng sac, na tiana isus fahko. 23Ac fita ma yoki in fohk wo uh, elos pa mwet su lohng kas inge ac kalem kac, na elos isus fahko puspis — kutu siofok, kutu onngoul, ac kutu tolngoul.”
Pupulyuk Ke Mah Koluk Uh
24Na Jesus el sifilpa fahk nu selos sie pac pupulyuk: “Tokosrai lun kusrao ouinge: Sie mwet el yukwiya fita wo in ima lal. 25Sie fong ah ke mwet nukewa motulla, mwet lokoalok se tuku ac yukwiya mah koluk inmasrlon wheat uh, na el som. 26Ke sacn uh kapak ac mutawauk in sikyak fahko, na mah koluk uh sikyak pac. 27Na mwet kulansap lun leum sac tuku nu yorol ac fahk, ‘Leum se, fita wo mukena pa kom tuh yukwiya ke ima se lom ah. Na mah koluk ke ima sac tuku ya me?’ 28Ac leum sac fahk, ‘Kalem lah mwet lokoalok se pa oru ma inge uh.’ Na elos siyuk sel, ‘Kom lungse kut in som fusak mah koluk uh?’ 29Ac el fahk, ‘Mo, mweyen kowos fin fis mah koluk uh, sahp kowos ac tuh fusak pac kutu sin sacn wo uh. 30Lela wheat ac mah koluk uh in tukenina kap nwe ke na pacl in kosrani, na nga fah fahk mwet telani uh in fusak mah koluk uh meet, loseni nu sie ac esukak. Na elos fah orani wheat uh ac filiya in lohm in filma uh.’”
Pupulyuk Ke Fiten Mustard
(Mark 4:30–32; Luke 13:18–19)
31Jesus el sifilpa fahkak nu selos sie pac pupulyuk. “Tokosrai lun kusrao ouinge: Mwet se el eis sie fiten mustard ac yukwiya in ima lal. 32Pa inge fita se ma srik oemeet, tusruktu el fin kapak el pa yohk oemeet ke sacn uh, na orala soko sak lulap, ac won yen engyeng uh tuku orala ahng lalos ke lesak uh.”
Pupulyuk Ke Mwe Pulol
(Luke 13:20–21)
33Jesus el sifilpa fahkak sie pupulyuk nu selos: “Tokosrai lun kusrao uh oana luman mwe pulol uh, ma sie mutan el sang kulamiseak ke sie pak in flao, na tok nufonna pak sac ac pulolak.”
Orekmakinyen Pupulyuk Sin Jesus
(Mark 4:33–34)
34Jesus el orekmakin kas in pululyuk in fahkak ma inge nukewa nu sin un mwet uh. El tia fahk kutena ma nu selos el fin tia orekmakin kas in pupulyuk. 35El oru ouinge in akpwayei kas lun mwet palu su fahk,
“Nga ac fah orekmakin pupulyuk ke nga sramsram nu selos;
Nga fah fahkak nu selos ma su tia eteyuk oe ke orekla faclu ah me.”
Jesus El Aketeya Pupulyuk Ke Mah Koluk Uh
36Ke Jesus el fahsr liki un mwet sac ac utyak nu in lohm uh, mwet tumal lutlut elos tuku nu yorol ac fahk, “Aketeya nu sesr lah mea kalmen pupulyuk ke mah koluk inima uh.”
37Ac Jesus el topuk ac fahk, “Mwet taknelik fita wo sac pa Wen nutin Mwet; 38ac ima sac pa faclu; ac fita wo uh pa mwet lun Tokosrai lun kusrao uh; mah koluk uh pa mwet su ma lun el su Koluklana; 39ac mwet lokoalok se ma taknelik fita koluk uh pa Devil. Pacl in kosrani uh pa saflaiyen faclu, ac mwet kosrani uh pa lipufan. 40Oana ke mah koluk uh ac orekeni ac isisyak in e uh, pa inge luman ma ac sikyak ke saflaiyen faclu. 41Wen nutin Mwet el ac fah supwalik lipufan lal tuh elos in orani mwet nukewa in Tokosrai lal su oru ma koluk, oayapa elos su kolla mwet uh in oru ma koluk. 42Ac elos ac fah siselosyang nu in funyu in e, yen ma elos ac fah tung, keok ac ngalis inwihselos. 43Na mwet lun God elos ac fah saromrom oana faht uh in Tokosrai lun Papa tumalos. Kowos porongo ma inge, fin oasr srewos.
Pupulyuk Ke Sie Ma Saok Wikinyukla
44“Tokosrai lun kusrao ouinge: Sie mwet el konauk sie ma saok wikinyukla in ima se. El sifilpa afinya, ac som ac kukakunla ma lal nukewa, na el folokla ac molela ima sac.
Pupulyuk Ke Sie Pearl
45“Ac Tokosrai lun kusrao ouinge pac: Sie mwet kuka el forfor ac sukok pearl saok, 46ac ke el konauk sie pearl ma arulana yohk molo, el som kitala ma lal nukewa ac molela pearl saok sac.
Pupulyuk Ke Sie Nwek
47“Tokosrai lun kusrao ouinge pac: Kutu mwet patur elos sisla nwek lalos nu in lulu uh, ac sruokya kain ik puspis. 48Ke nwek sac sessesla ke ik, elos amakunak nu finmes uh, ac sraclik ik uh: ik ma wo uh itukyang nu in mwe neinyuk uh, a ma koluk uh sisila. 49Ac fah ouinge ke safliyen faclu. Lipufan uh ac mau fahsrelik ac orani mwet koluk liki inmasrlon mwet wo, 50ac siselosyang nu in e uh, yen ma elos ac fah tung ke keok ac ngalis in wihselos we.”
Ma Pwaye Sasu, Ac Ma Matu
51Na Jesus el siyuk selos, “Ya kowos etu kalmen ma inge?”
Ac elos topuk, “Aok.” 52Na el fahk nu selos, “Kalmen ma inge pa mwet nukewa su mwet luti ke Ma Sap uh su ekla nu ke mwet lutlut in Tokosrai lun kusrao, elos oana sie mwet ma oasr sie lohm sel, ac el eisla ma sasu ac ma mah liki nien filma lal.”
Mwet Nazareth Elos Tia Lohang Nu Sel Jesus
(Mark 6:1–6; Luke 4:16–30)
53Tukun Jesus el fahkak pupulyuk inge, na el som liki acn sac, 54ac folokla nu in acn sel sifacna. El luti in iwen lolngok selos, ac elos su lohng luti lal elos arulana fwefela. Ac elos siyuk, “El eis ya me kain in lalmwetmet inge, ac mwenmen ma el oru inge? 55Ya el tia ma nutin mwet kamtu sac? Ya tia nina kial pa Mary, ac tia ma wial pa James, Joseph, Simon ac Judas? 56Ya tamtael lal nukewa elos tia oasr pac inge? Na el eis ma inge oya me?” 57Ke ma inge elos tiana lohang nu sel Jesus.
Jesus el fahk nu selos, “Mwet palu se el akfulatyeyuk in acn nukewa sayen acn sel sifacna ac sin sou lal sifacna.” 58Tiana pus mwenmen el oru in acn sac mweyen wangin lulalfongi lalos.
Currently Selected:
Matthew 13: KOS
Highlight
Share
Copy
Want to have your highlights saved across all your devices? Sign up or sign in
This text is in the Public Domain due to copyright expiration.