Matthew 4
4
Yael Moniyan We Hagela Jesus
(Mark 1:12–13; Luke 4:1–13)
1Iwe ngo Espritu Santus sa hakela depel Jesus sa paliloh irel loboswe ye tolmay loh bo fal mala be budoh Moniyan be hagela hare be weg depal.#Hb 2:18; 4:15 2Wol miril yal melegili fayeg ral mo fayeg bong le tor mele ye mongoy ngo sa kkel yal koloh. 3Iwe ngo Moniyan we sa budoh irel Jesus sa kangalu bo, “Hare gel Lol Deus ngo hosa kangalu faeska bo be mel bo flowa.”
4Iwe ngo Jesus sa sor bo, “Babior we ye santus ye sor, ‘Yarmat ila te flowa chog mele rebe molow iyang, bo mekla yalol Deus mele rebe molow iyang.’”#Dt 8:3
5Iwe ngo Moniyan we sa hasiloh Jesus wol Jerusalem irel Haplom we ye Santus, ye sala yitli lobowe ye hartal tagiyet mo wol Templum we. 6Iwe ngo yesa kangalu bo, “Hare gel Lol Deus ngo hosa llutdiy, bo babior we ye santus ye sor bo, ‘Deus be kangalur angelus kowe lol mele rebe faor ngalug; rebe holugdah lal mekla payur, bo ila ngo ye towe bbareg fael pechem irel feas.’”#Ps 91:11–12
7Iwe ngo Jesus sa sor bo, “Babior we ye santus ye wol sor bo, ‘Ho towe tapeli Samol la yami Deus hagelgel.’”#Dt 6:16
8Iwe ngo Moniyan we sa hasidah Jesus wol sew tayit le ye tagiyet sala kkewar ngali pangal meka faluyel faileng le mo lepal mala momayel. 9Iwe Moniyan we sa kangalu bo, “Pangal meka ngo iy be ngaloh igle hobe hasubgudiy ngo hosa hasrowuyey.”
10Iwe Jesus sa sor bo, “Chuy mo igla ho, Satan! Babior we ye santus ye sor bo, ‘Deus chog mele habe hasrowu ngo ha tagul ngali, ngo tor semal mo solbos!’”#Dt 6:13
11Iwe ngo Moniyan we sa chutang Jesus ngo angelus resa budoh resa tipingi Jesus.
Ye Chaep Yael Jesus Yengang Mo Wol Galilee
(Mark 1:14–15; Luke 4:14–15)
12Yodwe Jesus yela rongrong bo resa yetolong Johannes lal kalbus, ngo ye sa loh wol Galilee.#Mt 14:3; Mk 6:17; Lk 3:19–20 13Yete mel woal Nazareth bo ye loh sala mel mo wol Capernaum, sew haplom lengchel Laom we Galilee.#4:13 Laom we Galilee: sew laom le riyeg mile mala yeleal, ngo seg mo suluw mile mala chaolpal, irel mokwe faluyel Zebulun mo Naphtali.#Jn 2:12 14Iye sengal mele bo fael mala bela llah le katos mokwe profeta Isaiah ye sor,
15“Mekla faluyel Zebulun mo mekla faluyel Naphtali,
woal yalap we ye loh leted, rel Jordan rela sere,
Galilee, faluyer Gentiles!#4:15 Gentiles: ila rechoka teiyr Jews.
16Rechokla re mel luwul ruchupung ila re bele wiri sew teram le ye palleng.
Iwe ngo rechokla re mel luwul ruchupung lobola liliyer chomes ila bele werdiy sew teram uwor.”#4:15–16; Is 9:1–2
17Ila yodla ye chap yael Jesus foloy le ye sor bo, “Ha tagul tang molfidmi bo mala Lamliyel Laeng ila sa harep!”#Mt 3:2
Jesus Ye Ffesangur Famal Chol Fita
18Yodwe Jesus ye dedarloh woal ngachel Laom we Galilee ngo sala wiri rumal bisbis le chol fita, Simon (we rema ffesangu bo Pedrus) mo Andrew we bisil le re fefita irel wug we yar. 19Iwe Jesus sa kangalur bo, “Ha dabeyey, bo ibe haskuna ngalugmi fitel yarmat.” 20Yodwe chog ngo resa tahcheloh wug kowe yar resa dabey.
21Ye loh sala wol wiri rumal bisbis, James mo John le lol Zebedee. Re mel irel Zebedee we temer yuchul boat la war le re fofaor fadaley wug kowe yar. Jesus sa ffesangur, 22ngo yodwe chog ngo resa ligdi boat we mo molwe temer ngo resa dabey.
Jesus Ye Kekaskun, Ngo Ye Fofoloy, Ngo Ye Hachuya Yar Yarmat Tomay
(Luke 6:17–19)
23Jesus ye balsagililoh pangal Galilee, le ye fofoloy lal imwel ttey kowe, le kofal Hapatpat Momay we kofal mala Lamliyel Laeng, ngo ye hachuya metmetal tomay mo uwol yarmat.#Mt 9:35; Mk 1:39 24Yesa pallengloh molwe kaptal wol pangal mokwe faluyel Syria, iwe yarmat resa hasirdoh irel, panger rechokla re tomay le ikla resa hafohoy irel semat mo samat tomay, mo rechoka yor moniyan uwor, mo rechokla rema piyom, mo rechoka resa mehatugut, ngo panger ngo Jesus ye hachuya yar tomay. 25Feraketaw yarmat le re dabey le re budoh mo woal Galilee mo woal haplom we Decapolis, mo Jerusalem, mo Judea, mo fulu kala tot real mololul we Jordan rela sere.
Currently Selected:
Matthew 4: ULI
Highlight
Share
Copy
Want to have your highlights saved across all your devices? Sign up or sign in
Copyright © 1995 Bible Society of Micronesia