Matiu 7
7
Kasi Toere Na Too Ria Basoero
(Luka 6.37-38,41-42)
1Tesu igo napu dena, “Kasi toere na too ria basoero go God tiniki toere kaega too ramu. 2Tanego pataro qamu toere qirae basoero ne, God tina toere napu qamue ramu mana avana ka vatovato qamu zazune ze ramu dekoe basoero ne, iato vatovato nae to God tina teke napu qamu ramu. 3Avigo tane qo toere go ragu suka ikoego matana vakitaka aro do, qoki toere kaega ragu lavata ikoego matamu tanumu. 4Iki tora kaega tono sine ne vakitaka aro, ‘Va mao aro ma vakuziki ne era ragu ikoe loborona matamu.’ Do era qa go, vegolo lavata ikoego matamu qoki mia kaega. 5Aro qo basoe poqepoqe! Ono vakuziki kenaqe ragu lavata ikoe matamu tanumu, mana ṉalu ono mimia velaka to ia, tono ara vakuziki ne ragu suka i koe matana vakitaka aro.
6Kasi tekene qira sika ro pata tabo i tavine go dekoe God, tanego tarina za ule me lama kabala qamu. Kasi vanaqe na kaki pata lete menomeno ramu dekoe boko ro tanego tarina kube vasakate so.”
Pene God Sauna Pataro Qamu Soko
(Luka 11.9-13)
7Jesu igo napu dena, “Pene God sauna pataro qamu soko go, ia tinara teke ne qamu. Igo muna taqia go tamuna soba go, tetedeke go siporaṉa ne tina papaqa ne qamu go. Muna tetedeke, God tinara papaqa ne qamu, go qamu mazala go keba. 8Tanego basoe i pene go God, ia tina pala banaso, basoe i taqia, tina soba mana basoe i tetedeke siporoṉa tina papaqa bana neso. 9Avigo kakia ramu basoero i mazala tekene sale ia ipaka ṉalu i pene go bureri? 10Ba i mazala tekene sale ia dole, ṉalu i pene inana? 11Patavolomo ramu qamu ki vano totoloṉo kaega do qamu rove pata velaka so tamuna tekene sale ro ramu. Iago God Tamaqamu ikoe rani ne i lete velaka sivala go tina tekene qira pata velaka ria iri pene ze ia kakia pata.
12Iago vatovato qamu soko go tarina zazu ne zego basoero ne, de qamu koego ne, iato tamuna zazu ze go de iri koego basoero ne. Ianae to i talupasana go Tamana ro ia Mosese mana vari vatatana ro ria propeta ro go.”
Zuka I Lulu Za Rani I Makuru
(Luka 13.24)
13Jesu i sine napua, “Muna keba goza loborona siporaṉa suka. Zuka ilulu za nako ne i papaqa lavata. Topu ria basoero iri keba goza siporaṉa gogone. 14Do siporaṉa i luluza de ikoe too ogoto i siporaṉa suka so. Mana zuka ilulu za dekoe too ogoto ilete makuru sivala. Kavia ria so basoero iri soba go zuka igogone.”
Vatovato Qo Zazune Aro Iri Mazala Mia Rove Ze Basoero Dego Too Aro
(Luka 6.43-44)
15Jesu igo napu dena, “Muna mia velaka qira basoero, tanuqira iri propeta ia God iri go do iki ogoto kaega. Tanego ṉalu iri lamae de qamu koego ramu, iri gere basoe ki mimia vari vasareki kaega. Do dego loborona too ogoto ria i vari vasareki, iri gere qira sikapiru ro. 16Basoero dena qamu mazala mia rove qirae dego vatovato ria mana pataro iri zazu ne. Pata velaka ro ki reqeme kaega dekoe basoe sakata gerena urena moki kekoso iki za ure kaega qolo paqo, mana urena karukae ki ure kaega lozo. 17Gerena napu so moki i too velaka tokamana i urena velaka. Mana moki ki podo velaka kaega, urena tiniki za velaka kaega. 18Moki i podo velaka tokama ki mazala kaega tina sakata urena, mana moki ki podo velaka kaega tokamana tiniki za velaka kaega urena. 19Moki i kaega ure velaka na mara qeto vanaqe subi zaqe nako ne. 20Iago qamu mazala mia rove qira propeta poqepoqe ro nae sauna pataro iri zazu nego. 21Vano totoloṉo so tirina koe loborona vari miasoka ia God. Muniki nanao ria basoero iri koru ve era, ‘Batu, Batu,’ tarina keba za dekoe vari miasoka ia God. Do ria tarina zae go dekoe God, ria to basoero iri zazu neso pataro i soko God Mamae ikoego rani ne. 22Ṉalu tina doka musaqara God tina toere go too ria basoero iri koe vudu pua, topu basoero era, tarina vane ava dena, Aro to qo Batu remu. Loborona vitoṉomu aro qemu sine vasadake go seko ia God. Mana karaputa raro qemu kakale qira ego manuru sakata ro ne mana qi zazu ne zego topu na ro, pata vari va nureke.’ 23Do ṉalu nae tuna sine ne qira, ‘Kasi ne de qa koego era, qamu vano sakata. Qaki rove bana qamu kaega.’ ”
Karua Basoe Zazu Pade
(Luka 6.47-49)
24Jesu igo napu dena, “Basoe i gata go seko ro era mana lulua igogo ne, i gere basoe i nanao tarove go. Basoe i nanao tarove go i zazu ze pade ia popokona ipaka go tina nadu pade ia. 25I lama nare mana kiale lavata, mana sokoro lavata i lama vae pade ne, do ki soru kaega, tanego i degere vanadue ipaka ne.
26Do basoero iri gere go basoe bulaṉoe, izazu ne ze go pade ia karakoni. 27I soru me nare lavata mana i kiale mana, i lama sokoro lavata vae pade ne gonae tapabala mana pade ne lete sakata to igo.”
Karaputana Seko Vari Vatatana Ia Jesu
28Taramuzina Jesu i seko lupo, topu basoero iri lete nureke ne dego vari vatatana ia. 29Tanego, de igogo vari vatatana ia Jesu iva sadake ikoe karaputa. Sekoro i vari vatatana nego ia, iki gere kaega sekoro iri vari vatatana ne go vano tarove na tamana.
Currently Selected:
Matiu 7: VRSNT
Highlight
Share
Copy
Want to have your highlights saved across all your devices? Sign up or sign in
The New Testament in Varisi, Solomon Islands © Bible Society of the South Pacific, 1994, 2004.