Miqueas 4
4
Dawan tasba aiska ra kupia kumi lâka kingka aimakbia
(Ais 2.2-4)
1Mani nani kau lui wabia ba ningkara,
Dawan ra pura sunaia watla ilka ba lika tara pali kabia.
Il wala nani sut wal kau purara kabia.
Nisan nani sut bahara aidrubi banhwi kabia;
2upla sâtka nani ailal naku aisi balbia:
“Bal, man nani, kaisa Dawan ilka ra uli wap,
Jekob Gâdka ra pura sunaia watla ba kat;
witin sin ai yabalka nani natka dukiara wan smalkbia,
bara yawan lika witin ai yabalka nani ra wapbia.”
Kan Saion wina sika
Dawan lâka smalkanka nani ba bal takbia,
âu, Jerusalem wina ai aisanka balbia.
3Dawan mita nisan bani tilara lâ daukbia,
upla ailal aiklabanka ba wapni daukbia,
kau plis wihka ra iwi nani ba lâka sin.
Aiklabaia sordka nani bri ba,
baha ni witin nani tasba tukbaika nani paskbia,
ai langsika nani ba ni sin ispara nani paskbia.#Jl 3.10.
Nisan kum bui nisan wala mapara kli war aiklabaia lukbia apia,
war aiklabaia lâka nani sin kli smalkbia apia.
4Upla nani sut ai wainka nasla nani ra,
kwah damni dusa nani distika ra sin,
ban ai kupia kumi iwi kabia,
sibrin sin daukbia apia.#Sak 3.10.
¡Dawan karnika nani sut bri ba
ai bîla aisin ba kat kabia!
5Upla kiamka wala nani ba sut,
ai gâdka nani lilka paski,
baha nani bîla wali daukisa,
ban sakuna, yawan lika wan Dawan, wan Papaskra ba,
bîla wali dauki kabia ban kaia ra.
Dawan bui ai uplika nani ba pri sâkbia
6-7Naha sika Dawan bui kasak aisi ba:
“Baha piua ra sîpki nani asla daukamna,
baha nani klala yabri ba;
swapan, mina kriwan nani bara yakabrira nani ba.
Witin nani, ya wal takaskuya nani ba,
nisan karnakira daukamna.
Yang, Dawan,
tawanki ba tâ brimni Saion ilka wina,
nanara bara ban kaia ra.#Ais 40.11; Isi 34.11-16; Sof 3.19; Jn 10.7-16.
8Bara man, Jerusalem,
Saion tawerka bara kan kahbaika sma ba,
man kli king tasbaya kiapitalka aimakma,
kan piua ra pura wihtka tara aimaki katma ba baku.”
9Bamna nanara, ¿dîa kan man nani
mairin ai luhpia baikaia latwanka brih ini ba baku,
ban karna inisma?
¿Man nani tilamra kingkam brisma apia?
¿Apia kaka, lâ uplika nani ba sut pruan sa?
10Saion tawanka,
latwan saura brih ini bas,
mairin luhpa baikaia latwanka brih ini baku,
kan nanara man nani tawankam wina mai kangbi mai sakuya,
bara twi tasbaya ra iwi kama,
ban Babilon kat mai brih wabia.
Sakuna baha kat pri takma,
kan bahara sika
Dawan bal waihlam nani mihta wina mai dakbi mai sâkbia.
11Nanara sika nisan ailal asla takan sa,
man nani mampara balaia;
witin nani wisa:
“¡Kaisa yawan lilia takaia
Jerusalem ba aisawi tiwuya ba dukiara!”
12Ban sakuna, baha uplika nani
Gâd lukanka ba kaikras,
witin dîa daukaia ba tânka sin briras sa;
witin baha uplika nani ba asla kukan kabia,
plawar mâ klubanka nani kapaia watla ra wahbi brin ba baku.
13Dawan aisisa:
“¡Saion uplika, man nani mahka bus,
waihlam nani ba rausauhks!
Bîp wainhka ayan aringka nani bri,
bras sûska nani sin bri ba karnika baku,
karnikam maikamna.
Bara upla kiamka ailal sauhki tikma;
witin nani bui upla dukia kukan nani sut mihta dakbi brin kan ba,
baha kli witin nani wina dakbi yang ra aikma,
tasba aiska Dawanka sna bamna.”
Currently Selected:
Miqueas 4: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua