Mateyo 2
2
Kuza kwabantu basongo
1Jesu naakazyalwa mumunzi wa Betelehemu mu Judiya mwami Helodi nguwakali kulela. Kuzwa waawo baalumi basongo bazwa kujwe bakasika ku Jelusalemu. Nibakasika bakabuzya kuti, 2“Uli kuli ooyo wakazyalwa Mwami wa Bajuda?” Nkaambo twabona nyenyezi yakwe kujwe, nkaako twaboolela kumukomba. 3Ciindi mwami Helodi naakamvwa ceeci, wakapenga kapati abamu Jelusalemu boonse. 4Mpoonya wakabunganya bapaizi basilutwe boonse abamayi ba Mulawo, wakababuzya-buzya ooko nkwaakeelede kuzyalilwa Munanike wa Leza.
5Bakamwaambila kuti, “Ku Betelehemu mu Judiya nkaambo kulilembedwe amusinsimi kuti,
6‘Ayebo Betelehemu mucisi ca Juda,
nikuba kuti uli muniini akati kaminzi ya Juda,
pele kuzwa kulinduwe kuyoozyalwa mweendelezi,
uyooembela bantu bangu Baisilayeli.’”
7Mpoonya Helodi wakaita baalumi basongo aabo kumbali, akubabuzya ciindi nyenyezi niyakapola. 8Naakamana wakabatuma ku Betelehemu, wakati, “Kamuya mukamuyandaule kabotu mwana, mwaakumujana muzoondaambile kuti ambebo nkaze kukumukomba.”
9Lino nibakamvwa boobo, bakainka, eelyo nyenyezi njibakabwene kujwe yakeendela kumbele, mane do niyakaakusika akwiima aawo mpaakabede mwana. 10Ciindi nibakabona nyenyezi bakakondwa kapati. 11Nibakanjila muŋanda bakabona mwana a Maliya banyina, mpawo bakafugama akumukomba. Mpoonya bakajula ziyobwedo zyabo, bapa zipego zyangolida, atununkilizyo twakuumpilila atwakunana.
12Kumane boobo bakacenjezegwa a Leza muciloto kuti batabweedi kuli Helodi. Nkaako bakabweeda kulimbabo anzila iimbi.
Jesu mbwaakatolwa ku Ijipiti
13Lino ciindi basongo nibakapiluka mungelo wa Mwami wakalibonya kuli Josefa muciloto akumwaambila kuti, “Nyamuka, utole mwana abanyina muye ku Ijipiti. Mukakkale ooko mane kusikila nkamwaambile, nkaambo Helodi uyanda kujaya mwana.”
14Eelyo wakanyamuka, wakatola mwana abanyina ciindi camasiku wainka ku Ijipiti. 15Wakaakukkala ooko mane kusikila lufu lwa Helodi. Eeci cakacitika mbubonya mbwaakaamba Mwami Leza mumusinsimi kuti, “Kuzwa ku Ijipiti ndakaita mwanaangu.”
Bana mbubakajaigwa
16Ciindi Helodi, naakabona kuti weenwa abaalumi basongo, wakakalala kapati, mpawo wakalailila kuti bajaigwe bana balombe boonse bamu Betelehemu amasena oonse aaengelede kutalikila bana bamyaka yobilo kuza aansi. Myaka eeyi yakeendelana azeezyo zyakamwaambila baalumi basongo kujatikizya nyenyezi yakalibonya. 17Nkaambo mbombubo mbwaakaambide musinsimi Jelemiya kuti,
18“Koomoka kwakamvwigwa aku Lama,
kulila akweema kupati.
Mbaamatumbu balila bana babo bakaka kuumbulizigwa,
nkaambo bana bazimina.”
Mbubakapiluka kuzwa ku Ijipiti
19Lino Helodi naakafwa, kwakalibonya mungelo wa Mwami muciloto kuli Josefa mu Ijipiti 20wakati, “Nyamuka, tola mwana muunke ku Isilayeli, nkaambo ooyo wakali kuyanda kumujaya wakafwa.” 21Mpawo Josefa wakatola mwana abanyina, akuunka ku Isilayeli.
22Pele naakainka wakamvwa kuti Aakelawosi nguwakali kulela Judiya mubusena bwawisi. Nkaambo kaako Josefa wakayoowa kuunka. Lino Leza wakamucenjezya alimwi mukulota, nkaako wakainka mucisi ca Galilii. 23Wakaakukkala mumunzi wa Nazaleta, nkaambo mbokwakaambidwe abasinsimi kuti, “Uzootegwa Jesu wa Nazaleta.”
Currently Selected:
Mateyo 2: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.