Matyu 6
6
Jizɔs Lan Pipul Aw fɔ Ɛp dɛn Wan we Nɔ Gɛt Natin
1“Wɛn una de du dɛn tin we una rilijɔn tɛl una fɔ du, una nɔ fɔ du am, so dat ɔlman go si wetin una de du. If una du am fɔ mek pipul si una, una nɔ go gɛt wetin una Papa we de na ɛvin gɛt fɔ gi una.
2“So wɛn una de du gud to dɛn pipul we nɔ gɛt natin, una nɔ mek pipul no bɔt dat lɛkɛ aw dɛn ipokrit pipul de du na dɛn Ju mitin os ɛn na trit. Dɛn de du am fɔ mek pipul prez dɛn, bɔt a want mek una no se di prez we pipul dɔn prez dɛn na di pe dat nɔmɔ we dɛn go gɛt. 3Bɔt wɛn una de du gud to dɛn pipul we nɔ gɛt natin, una fɔ so du am, dat una tayt padi sɛf nɔ go no bɔt dat. 4Da tɛm de di ɛp we una ɛp go lɛf to una tu nɔmɔ, ɛn una Papa we si wetin una du sikrit wan, go gi una di pe.
Jizɔs Lan Pipul Aw fɔ Pre
(Lyuk 11:2-4)
5“Wɛn una de pre, una nɔ fɔ du lɛkɛ aw dɛn ipokrit pipul de du. Dɛn lɛk fɔ tinap na dɛn Ju mitin os, ɛn na dɛn kɔna dɛn na trit fɔ pre, so dat ɔlman go si dɛn we dɛn de pre. A want mek una no se, dɛn dɔn gɛt ɔl di pe we dɛn fɔ gɛt. 6Bɔt wɛn una de pre, una fɔ go insay una rum, una lɔk una do, ɛn pre to una Papa we de na ɛvin we una nɔ de si. In de si wetin una de du, ɛn i go gi una ɔl wetin i fɔ gi una.
7“Wɛn una de pre, una nɔ fɔ de tɔk plɛnti plɛnti wɔd dɛn we nɔ min natin, lɛkɛ aw dɛn pipul we nɔ biliv pan Gɔd de du, dɛn tink se Gɔd go yɛri dɛn bikɔs dɛn pre lɔŋ pre. 8Una nɔ fɔ tan lɛkɛ dɛn, bikɔs una Papa we de na ɛvin dɔn no wetin una nɔ gɛt bifo una aks am. 9Mek a tɛl una aw una fɔ pre, una fɔ se:
‘Papa Gɔd we de na ɛvin:
Na yu wangren na Gɔd, mek ɔlman pre to yu ɛn ɔna yu;
10Wi de pre mek yu rul wi;
mek wetin yu want, bi na dis wɔl, lɛkɛ aw i de bi na ɛvin.
11Gi wi wetin wi fɔ it tide.
12Padin wi fɔ di bad tin dɛn we wi dɔn du, lɛkɛ aw wisɛf de padin dɛn pipul we de du wi bad.
13Mek wi nɔ lɛf fɔ biliv pan yu ɛnitɛm we Setan tray wi; nɔ mek Setan ebul wi.
[Na yu de rul di wɔl, na yu gɛt pawa, ɛn na yu gɛt prez ɛn ɔna, fɔ ɛva ɛn ɛva. Emɛn.’]
14“If una padin ɔda pipul fɔ di bad we dɛn du una, una Papa we de na ɛvin insɛf go padin una. 15Bɔt if una nɔ padin ɔda pipul, una Papa we de na ɛvin insɛf nɔ go padin una fɔ di bad we una dɔn du.
Jizɔs Lan Pipul Aw fɔ Fast
16“Una nɔ tay fes wɛn una de fast lɛkɛ aw dɛn ipokrit pipul dɛn kin du wɛn dɛn de fast, so dat pipul go si se dɛn de fast. A de tɛl una se; dɛn dɔn gɛt dɛn pe. 17Wɛn una de fast, una fɔ was una fes ɛn kom una ia, 18so dat ɔda pipul nɔ go no se una de fast. Na una Papa nɔmɔ, we pipul nɔ de si, de si wetin una de du sikrit wan, ɛn i go gi una di pe we una fɔ gɛt.
Jizɔs Lan Pipul Aw dɛn Go Gɛt Plɛnti Wɔndaful Tin na Ɛvin
(Lyuk 12:33-34)
19“Una nɔ fɔ kip plɛnti dia tin fɔ unasɛf na dis wɔl, bikɔs una fɔ no se wɔrɔm go pwɛl dɛn, dɛn go rɔsti ɛn tifman go brok una os go insay ɛn tif dɛn. 20Bɔt una fɔ kip una jɛntri na ɛvin, we wɔrɔm ɛn rɔsti nɔ go pwɛl dɛn, ɛn tifman nɔ go go insay go tif dɛn. 21Bikɔs ɔltɛm una at go de di say we una kip una jɛntri.
Jizɔs Tɔk Se, di Yay dɛn Tan Lɛkɛ Lamp na di Bɔdi
(Lyuk 11:34-36)
22“Di yay dɛn tan lɛkɛ lamp na di bɔdi. If di yay dɛn gud, ɔl di bɔdi go gɛt layt; 23bɔt if di yay dɛn nɔ gud, di bɔdi go de na dak. So if di layt we bin fɔ de insay una, nɔ de, di daknɛs we de insay una go dak pasmak.
Gɔd ɔ Mɔni, Uswan?
(Lyuk 16:13; 12:22-31)
24“Nɔbɔdi nɔ go bi slev to tu masta di sem tɛm. If i bi so, i go lɛk wan masta, i nɔ go lɛk di ɔda wan. I go wok gud fɔ wan masta, bɔt i nɔ go wok gud fɔ di ɔda wan. Una nɔ go de du Gɔd wok ɛn bi slev to mɔni, di sem tɛm.
25“Na dat mek a de tɛl una se: una nɔ wɔri fɔ wetin una go it, drink, ɔ wɛr. Layf nɔ pas tin fɔ it? Di bɔdi nɔ pas tin fɔ wɛr? 26Una luk dɛn bɔd, dɛn nɔ de plant, dɛn nɔ de kɔt ɛn kip wetin dɛn de gɛda na sto; pan ɔl dat, Gɔd we na una Papa na ɛvin de fid dɛn. Una impɔtant pas bɔd fawe! 27Una min se una layf go lɔŋ pas aw i fɔ lɔŋ, bikɔs una de wɔri?
28“Wetin mek una fɔ wɔri fɔ klos fɔ wɛr? Una luk dɛn flawa we de gro na fil, dɛn nɔ de wok ɛn mek klos fɔ dɛnsɛf; 29bɔt a de tɛl una se, pan ɔl di jɛntri we Kiŋ Sɔlɔmɔn bin jɛntri, in klos dɛn nɔ bin fayn rich ɛni dɛn flawa de. 30Na Gɔd de mek flawa gro pan gras lɛkɛ we pɔsin go wɛr klos, da gras we de tide, ɛn tumara, dɛn go ib am na faya fɔ bɔn. Gɔd nɔ go du pas dat fɔ gi una klos fɔ wɛr? Una nɔ biliv Gɔd lɛkɛ aw una fɔ biliv am!
31“Na dat mek una nɔ fɔ wɔri se, ‘Wetin a go it?’ Ɔ ‘Wetin a go drink?’ Ɔ ‘Wetin a go wɛr?’ 32Na dɛn tin ya dɛn pipul we nɔ no Gɔd de fɛn, bɔt Gɔd we na una Papa we de na ɛvin no se una fɔ gɛt ɔl dɛn tin ya. 33Una fɔ put una at gud pan dɛn tin we impɔtant na di say we Gɔd de rul ɛn du di rayt tin we Gɔd want una fɔ du fɔs, da tɛm de i go gi una ɔl dɛn tin ya. 34Una fɔ lɛf tumara yon wɔri fɔ tumara; una nɔ put mɔ trɔbul pan unasɛf tide.
Currently Selected:
Matyu 6: KRIO13
Highlight
Share
Copy
Want to have your highlights saved across all your devices? Sign up or sign in
Krio Bible © The Bible Society of Sierra Leone, 2013.