Matyu 4
4
Setan Tray Jizɔs
(Mak 1:12-13; Lyuk 4:1-13)
1Afta dat, Gɔd in Spirit lid Jizɔs go na di dɛzat we Setan tray Jizɔs fɔ mek i du bad. 2Wɛn Jizɔs dɔn fast fɔti de ɛn nɛt, i bin aŋri. 3Nain Setan kam mit am ɛn se, “If yu na Gɔd in Pikin, tɛl dɛn ston ya fɔ tɔn to bred.”
4Bɔt Jizɔs se, “Dɛn rayt na Gɔd in Buk se, ‘Nɔto di it we pɔsin de it de gi am tru layf, na Gɔd in wɔd de gi pɔsin tru layf.’”
5Wɛn dat dɔn, Setan kɛr Jizɔs go Jerusɛlɛm, pantap di tawa we de na Gɔd in Os, 6ɛn i se, “If yu na Gɔd in Pikin, ib yusɛf dɔŋ, bikɔs dɛn rayt na Gɔd in Buk se, ‘Gɔd go tɛl in enjɛl dɛn fɔ gyad yu, ɛn yu go fɔdɔm na dɛn an, fɔ mek yu fut sɛf nɔ wund pan ston!’”
7Jizɔs se, “Dɛn rayt na Gɔd in Buk se, ‘Pɔsin nɔ fɔ tray fɔ mek Gɔd we nain Masta du wetin in want.’”
8Wɛn dat dɔn, Setan kɛr am go pantap wan ay ay il ɛn sho am ɔl dɛn neshɔn na wɔl wit ɔl dɛn pawa ɛn jɛntri. 9Setan se, “A go gi yu ɔl dɛn tin ya, if yu nil dɔŋ ɛn se mi na yu masta.”
10Jizɔs se, “Kɔmɔt biɛn mi, Setan! Dɛn rayt na Gɔd in Buk se, ‘Pɔsin fɔ nil dɔŋ bifo Gɔd we nain Masta ɛn pre to am ɛn nain nɔmɔ i fɔ wok fɔ.’”
11Dɛn Setan lɛf Jizɔs, ɛn enjɛl dɛn kam ɛp Jizɔs.
Jizɔs Bigin In Wok na Galili
(Mak 1:14-15; Lyuk 4:14-15)
12Wɛn Jizɔs yɛri se dɛn dɔn ol Jɔn, i go na Galili. 13I nɔ go tap na Nazarɛt, na Kepanyɔm we de klos Lek Galili, midul Zɛbyulɔn ɛn Naftali, i go tap, 14so dat wetin di prɔfɛt we nem Ayzaya bin tɔk, go bi. 15I bin se,
“Zɛbyulɔn ɛn Naftali we de na di ɔda sho nia Riva Jɔdan,
klos da wata we dɛn kɔl Mɛditarenian Si, insay Galili,
we dɛn pipul we nɔto Ju plɛnti;
16di pipul dɛn we bin lib de bin de na dak,
dɛn nɔ bin no Gɔd, bɔt dɛn si big layt;
dɛn bin tan lɛkɛ pipul we want day,
bɔt di layt dɔn shayn pan dɛn.”
17Frɔm da tɛm de Jizɔs bigin tɛl pipul se, “Una chenj una we ɛn lɛf fɔ du di bad tin dɛn we una de du, bikɔs Gɔd in rul dɔn kam klos una.”
Jizɔs Kɔl Fo Fishaman fɔ bi In Lanin Bɔy dɛn
(Mak 1:16-20; Lyuk 5:1-11)
18Wɛn Jizɔs bin de waka na di bich na Lek Galili, i si tu brɔda dɛn we na bin fisha man, Saymɔn we dɛn de kɔl Pita ɛn in brɔda Andru, dɛn tu bin de fishin wit fishin nɛt na Lek Galili. 19Jizɔs kɔl dɛn, i se, “Una kam bi mi lanin bɔy dɛn, ɛn a go sho una aw fɔ briŋ pipul kam to mi lɛkɛ aw una de kech fish.” 20Dɛn lɛf dɛn fishin nɛt wantɛm ɛn fala Jizɔs.
21Jizɔs go bifo say, nain i si Jems ɛn Jɔn, tu brɔda we Zɛbidi bɔn. Dɛn bin de insay bot wit dɛn papa Zɛbidi, dɛn bin de rɛdi dɛn fishin nɛt. Jizɔs kɔl dɛn, 22dɛn lɛf di bot ɛn dɛn papa wantɛm, ɛn fala Jizɔs go.
Jizɔs Tich, I Tɛl Pipul di Gud Nyuz, ɛn I Mɛn Sik Pipul
(Lyuk 6:17-19)
23Jizɔs go ɔlɔbɔt na Galili de tich pipul na di Ju mitin os dɛn, i tɛl dɛn di Gud Nyuz bɔt di tɛm we Gɔd de kam rul, ɛn i mɛn pipul we gɛt ɔl kayn sik. 24Di nyuz bɔt Jizɔs prɛd ɔlɔbɔt na Siria, dat mek dɛn kɛr ɔl dɛn sik pipul, dɛn wan we dɛn bɔdi de at dɛn ɛn dɛn wan we gɛt dɛbul insay dɛn, dɛn wan we gɛt fiks, ɛn dɛn wan we nɔ ebul waka, kam to am; Jizɔs mɛn dɛn ɔl. 25Plɛnti pipul we kɔmɔt Galili, di Tɛn Tɔŋ dɛn, Jerusɛlɛm, Judia, ɛn dɛn pipul we de na di istɛn pat na Riva Jɔdan, bin de fala Jizɔs.
Currently Selected:
Matyu 4: KRIO13
Highlight
Share
Copy
Want to have your highlights saved across all your devices? Sign up or sign in
Krio Bible © The Bible Society of Sierra Leone, 2013.