LUKA 15
15
Lukanu khu Likondi Liakora
(Mat 18:12-14)
1Litukhu lindi, vasololi vu vushuru nende vooni vandi vasimukha nivatsia khuhulila Yesu nalomolomanga. 2Vafarisayo nende veechitsi va Malako varaanga khung'ung'una, nivavoola, “Mundu uyu yinjilitsanga vandu vooni, nalia navo.” 3Khulwa yako, Yesu yavavoolela lukanu yulu:
4“Khuvoole mulala khu munyi ali na makondi imia indala khandi akoritsi lilala khuko yakhakhola shina? Aliitsa khulekha makondi karikale makhomi tisa na tisa mulwayilu atsi khukhava likondi likori lienelo khutukha lwa aliitsa khunyola. 5Navutswa lwa alinyolanga, alichinganga khu maveeka keke nali nu vuyaanzi. 6Lwatukhanga ingo, alaanganga halala valina veve nende vareende veve, avavoolela. ‘Mwikhoye ninzi, shichila mali khunyola likondi lianje liali ni liakora.’ 7Munjila indala yeneyo, muvoolelanga ndi khuliitsa khuva nu vuyaanzi vunyishi mwikulu, shichila mwoni mulala wikanili khuvira vandu vi likhola liu vulunji makhomi tisa na tisa vambakhananga khwikanila.
Isenti Yakora
8“Khuvoole mukhali ali ni tsishilinji likhomi tsialombwa khu ifetsa, ma akoritsi indala khutsio, yakhakhola shina? Alahaambitsa itaaha, nu khuyenza munzu mwemwe, khukhava isenti yeneyo khutukha lwa achinyola. 9Lwa ava nanyoli, alalaanga halala valina veve nende vareende veve, avavoolele, ‘Mwikhoye ninzi, shichila mali khunyola isenti yanje ya mbele ningoritsi.’ 10Munjila indala yeneyo, muvoolelanga ndi tsinjelosi tsia Nyasaye tsili nu vuyaanzi vunyishi shichila mundu mwoni mulala umali khwikanila.”
Lukanu khu Mwana Wakora
11Yesu yatsililila khuvoola, “Litukhu lindi, khwaliho nu mundu wali na vaana vi shiyayi vavili. 12Mwana mushie yavoolela tata wewe, ‘Tata, mbe shitonye shianje khu miandu nunundi.’ Tata wavo yakavulila vaana veve vavili venavo miandu chiechie. 13Matukhu mati nikakhavira, mwana mushie yakuulitsa miandu chia yaheelwa; nahamila mu shivala shihale wene, wa yamalila tsisenti mu limenya livula vukhonyi. 14Lwa yamala shia shindu shiosi shia yali nashio, inzala yakwa mu shivala shienesho; navula khuva ni shindu shiosi. 15Khulwa yako, yasimukha natsia khuhinzilila mulala khu vandu vi shivala shienesho. Mundu mwenoyo yamuruma khutsia khukhola mihinzilu mu mulimi kwekwe khuha tsingulume tsietsie shiukhulia. 16Yikomba khulia viukhulia vi tsingulume tsialiitsakhu; navutswa mundu avulakhuho wamuheetsanga shiukhulia shialia. 17Lwa yali niyakhacheliha, yavoola, ‘Varumishi voosi va tata wanje yasamulitsa khumukholela muhinzilu vali ni viukhulia vinyishi, khali vi vakhayanga khulia, navutswa inzala yenyanga khunziirila hanu!’ 18Nasimukha ngalushi khu tata wanje, muvoolele, ‘Tata wanje, kholi vwoni khu Nyasaye khandi khu yivi; 19khali shindushili khulaangwa mwana wowo tawe; khola mbe khuli mulala khu varumishi vovo va wasamulitsa.’ 20Yarula natsia khu tata wewe.
“Navutswa lwa yali nashilikhu ihale wene khurula ingo, tata wewe yamulola. Yamulolela tsimbavasi, niyilukhaka, natsia khumukhumbelela khandi natsunzuna mwana wewe mwenoyo. 21Mwana mwenoyo yavoolela tata wewe, ‘Tata wanje, kholi vwoni khu Nyasaye khandi khu yivi; khali shindushili khulaangwa mwana wowo tawe.’#15:21 mwana wowo: Mahandiko Matakatifu kandi kakhale kameetakhu “Khola mbe khuli mulala khu varumishi vovo va wasamulitsa.” 22Navutswa tata wu mwana mwenoyo yavoolela varumishi veve, ‘Leri vwangu inguvu indahi yene, mumufwale; mufwali ipete khu mukhono kwekwe, khandi vilaaro mu vilenje vievie. 23Musinzili shimoli shikhomeelu, muleshe khwikhoyele mulukha kwi lilia; 24shichila mwana wanje yali wakhutsa, navutswa nunundi ashili mwoyo; yali wakora, navutswa nunundi khumali khumunyola.’ Khulwa yako, varaanga khwikhoyela mulukha kwi lilia.
25“Navutswa, mwana wewe mukhulundu yali nali mu mulimi. Lwa yisuunda himbi khu inzu, yahulila vandu nivimbanga nivasieva. 26Yalaanga mulala khu varumishi namureeva makhuva kali nikakholekhanga. 27Murumishi mwenoyo yamuchipa, ‘Amwavo wowo ukalushi ingo; ma tata wowo umusinzili shimoli shikhomeelu, shichila umunyoli nashili mwoyo khandi mulamu.’
28“Navutswa mwana mukhulundu yali nu vurima vunyishi muno niyambakhana khwinjila munzu. Khulwa yako, tata wewe yarulamu namusaya nayaanza yinjilimu; 29navutswa yavoolela tata wewe, ‘Lola, mihika yichi chiosi nakhukholela muhinzililu khuli murukwa; khandi shili khwambakhanakhu khulonda malako koko koosi. Ni shina shia wambakhu? Khali ushili khumbakhu imbuli, khu nzikhoye na valina vaanje. 30Navutswa mwana wowo uyu wamalila miandu chiochio khu vakhali vakholanga vulaaya; navutswa lwa akalushi ingo umusinzili shimoli shikhomeelu!’ 31Tata yachipa mwana mukhulundu, ‘Mwana wanje, shia khase khosi wumenyanga ninzi; khandi miandu chiandi nachio chiosi ni chiochio. 32Vwali vulahi khwikhoya nukhuyaanza, shichila amwavo wowo yali wakhutsa, navutswa nunundi ashili mwoyo; yali wakora, navutswa nunundi khumali khumunyola.’ ”
Currently Selected:
LUKA 15: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013