LUKA 11
11
Yesu Yechitsa Veechi Veve Khuli Vasaala
(Mat 6:9-13; 7:7-11)
1Litukha lindi, Yesu yali nasaalanga havundu handi. Lwa yali namali khusaala, mulala khu veechi veve yamuvoolela, “Mwami, khwechitsi khusaala, khuli Yohana Mubatisi yechitsa veechi veve.”
2Yesu yavavoolela, “Nu mwenyi khusaala khutukha musaale,
‘Tata,
lira liolio litakatifu litsominywi.
Vwami vwovwo vwitsi.
3Ukhuhe shiukhulia shieru shia khase khosi.#11:3 Inoho shiukhulia shia mukamba.
4Khusemehe vwoni vweru,
khuli khutsi khusemehanga yavo vakhukholelanga vindu vitamanu.
Ukhakhuhila mu machelitso tawe.’ ”
5Khulwa yako, Yesu yavavoolela, “Khuvoole mulala khu munyi ali nu mulina, ma atsi khuye hakari mu vutukhu, navoola, ‘Mulina wanje, khonyakhu mikati chivaka; 6shichila mulina wanje khurula mu luchendo wakhitsa khundolakhu, khandi mbulakhu shiukhulia shiosi shianyala khumuha.’ ” 7Lwa ye ali munzu amuchipi, “Nzikale muliango. Lekha khunyashitsa; vaana vaanje vakoni. Shinyala khuvukha mu tsindolo khuhe shindu shiosi shia wenyanga tawe?” 8Muvoolelanga ndi, khali niiva wambakhane khuvukha mu tsindolo amuhe mukati, shichila nu mulina wewe, navutswa shichila khusavasava khwekhwe alavukha mu tsindolo amuhe shia shindu shiosi shia yenyanga.
9“Khulwa yako, muvoolelanga ndi musave, na muliitsa khuheelwa; mukhave, na muliitsa khunyola; mwikulitsi, na munyi muliitsa khwikulilwa muliango. 10Shia mundu wosi usavanga, aheelwangwa, khandi mundu wukhavanga anyolanga; khandi mundu wikulitsanga khu muliango, yikulilwangwa. 11Ni tata shina mu munyi, wa mwana wewe aliitsa khumusava isutsi, naye amuhe lichina; inoho niiva aliitsa khumusava isutsi, naye amuhe inzukha, 12inoho livuyu, neye amuhe inge? 13Niiva munyi vamuli vatamanu, mwamanya khuha vaana venyu vihanwa vilahi, ni vianga mu vunyishi via Tata wenyu uli mwikulu aha Roho Mutakatifu khu vandu vamusavanga!”
Yesu nende Belezebuli
(Mat 12:22-30; Mk 3:20-27)
14Yesu yakhunga litimoni liali niliambakhana khulomoloma. Lwa litimoni liarula mu mundu mwenoyo, yaraanga khulomoloma; ma shituma shia vandu nivava nilichenya. 15Navutswa vandu valala khuvo vavoola, “Ni Belezebuli, mwimilili wa matimoni, neye umuheetsanga tsingulu tsiu khukhunga matimoni.”
16Valala khuvo vachelitsa khureeka Yesu nivenya avahe shimanyilu khurula khu Nyasaye. 17Navutswa Yesu yali namanyi ka vakanakananga, navavoolela, “Shivala shiosi nishiavukhanamu mu vituma vikwananga viene khuviene shivala shienesho shishinyala khuhindila tawe; khandi vandu vi inzu nivavukhanamu vene khuvene vanyala khuyongovela. 18Niiva Shetani wayavukhanamu mwene, vwami vwevwe vunyala khuhindila munjila shina? Muvoolelanga yaka shichila muvoolanga khunganga matimoni khuvirila mu tsingulu tsia Belezebuli. 19Niiva kakhunganga khuvirila mu tsingulu tsia Belezebuli, valondi venyu vakakhunganga khuvirila mu tsingulu tsia viina? Khulwa yako, navo valiitsa khuva vakhalachi venyu. 20Navutswa niiva khunganga matimoni khuvirila mu tsingulu tsia Nyasaye, khu Vwami vwa Nyasaye vumali khwitsa khu munyi.
21“Lwa mundu wi tsingulu, niyiyavaale viuchi vievie, alindanga inzu yeye, miandu chiechie chivetsanga mu milembe. 22Navutswa lwa mundu wi tsingulu amukwana khandi amukuura amunuulanga viuchi viali navio viasuuvililamu, khandi yikavulila vindu via avetsanga niyanuula mundu wi tsingulu.
23“Mundu wambakhananga khukhonya inzi, ni kilikali neye mutsiku wanje; khandi mundu wambakhananga khuvunjelitsa ninzi, ni kilikali asalanyinyanga.
Khukalukha khwi Litimoni
(Mat 12:43-45)
24“Lwa litimoni lirulanga mu mundu, lichenda chendanga mu shiangalangwi nilikhava havundu halinyala khuhulushila. Navutswa lwa livula khunyola havundu henaho, livoolanga, ‘Niitsa khukalukha mu inzu yanje, mwa narula.’ 25Lwa litimoni likalukhanga munzu mwenomo, linyolanga inzu yeneyo nili inihu khandi nili mu milembe. 26Khulwa yako, likalukhayo khutsia khulera matimoni kandi saba kali ni tsingulu tsiu khulivira, makinjila khandi kamenya munzu mwenomo. Lwa matimoni kenako kavetsanga shia havundu hosi, mundu mwenoyo avetsanga nali mu liiva litamanu muno khuvira lia yavetsamu muliraanga.”
Vuyaanzi Vwatoto
27Lwa Yesu yali navooli ndio, mundu mukhali wali nali mu shituma shia vandu yalaanjilila namuvoolela, “Ali ni ikhaavi mukhali wakhwivula khandi nakhulela!” 28Navutswa Yesu yavoola, “Nikhali, vali ni ikhaavi yavo vahulilanga likhuva lia Nyasaye khandi vatsililila khulonda likhuva lienelo!”
Yesu Yambakhana Khukhola Shiloleshitsu
(Mat 12:38-42)
29Lwa vituma via vandu vali nivameetekhanga, Yesu yavoola, “Vandu va matukhu kanu ni vatamanu! Vandevanga vakholele shiloleshitsu, navutswa valiitsa khuvula khuheelwa shiloleshitsu shiosi, nikakhali shiloleshitsu shia Yona. 30Khuli Muprofeti Yona yali shimanyilu khu vandu vi litaala lia Nineve, nindio khandi Mwana wu Mundu aliitsa khuva shimanyilu khu vandu vamatukhu kanu. 31Muruchi wi shikhali wa Sheba aliitsa khusinjila ayaale vandu va matukhu kanu Khulitukhu liu Khukhalachilwa, shichila yachenda narula mu shivala shieshie khwitsa khuhulila mechitso ku Mwami Solomoni ku vusitsa; khandi muvoolelanga ndi shindu shili hanu shi tsingulu tsinyishi khuvira Solomoni. 32Vandu vi litaala lia Nineve valiitsa khusinjila vamuyaale munyi Khulitukhu liu Khukhalachilwa, shichila vikanila lwa vahulila Yona niyilwatsanga; khandi muvoolelanga ndi shindu shili hanu shi tsingulu tsinyishi khuvira Yona!
Vulavu vu Mmbili
(Mat 5:15; 6:22-23)
33“Mundu avulakhuho uhaambitsanga itaaha achivisa inoho achikhunishila mu muhinda; navutswa achiretsanga khu shikuru shi itaaha, nikanyalikha mundu wosi niyinjilamu alole vulavu vwenovo. 34Imoni yoyo ili khuli itaaha yu mmbili kwokwo; niiva tsimoni tsienyu nitsinamu, mmbili kwenyu kwosi kuli nu vulavu vunyishi. Navutswa lwa tsikhali tsinamu tawe, mmbili kwenyu kuli mu shisuundi shinyishi muno. 35Khulwa yako, muheenze mulole ndi vulavu vuli mu munyi shikali ni shisuundi tawe. 36Niiva mmbili kwenyu kwosi kuli nu vulavu vunyishi; khandi havundu halala khukwo shiali ni shisuundi tawe, kuliitsa khuva nu vulavu vunyishi muno, khuli vulavu vwi itaaha vumwashilanga.”
Yesu Yahuka Vafarisayo nende Vechitsi va Malako
(Mat 23:1-36; Mk 12:38-40)
37Lwa Yesu yali namali khulomoloma, Mufarisayo yamwinjilitsa khulia naye. Yinjilamu niyikhala nalia. 38Mufarisayo mwenoyo yali nilichenya, lwa yalola Yesu naliitsanga shiukhulia vuchila khusava makhono. 39Khulwa yako, Mwami yamuvoolela, “Munyi Vafarisayo mwochitsanga ilwanyi wi shikombe shienyu nende wi ibakuli yenyu, navutswa mukari mwenyu mwayitsula vung'wang'wa nende vindu vitamanu. 40Munyi vandu vayiingwa! Musuuvilanga Nyasaye walomba ilwanyi shiali ye walomba mukari khandi tawe? 41Navutswa muhaane vindu vili mu vikombe vienyu nende mu tsibakuli tsienyu khu vamanani, ma vindu viosi khu munyi vive vinihu.
42“Navutswa munyi Vafarisayo muli khu vutiinyu muno! Shichila muhaananga khu Nyasaye likhomi khu via muchesanga vi vilungu, khuli ipilapili nende vinzali nende tsingutsa tsindi tsihuunyanga mwayu mulahi, navutswa mwachaya khukhola katoto nu khuyaanza Nyasaye. Muve numukholanga ndio, vuchila khuchaya kandi.
43“Munyi Vafarisayo, muli khuvutiinyu muno! Shichila mwayaanza khwikhala khu visoko vilahi muno mu masinagogi, numuheelwa milembe chiu luyali na vandu mu tsisokoni. 44Munyi muli khuvutiinyu muno! Shichila muli khuli vilindwa vikhalolekhanga, via vandu vaseenakhu vuchila khuvimanya.”
45Mundu mulala khu veechitsi va Malako yamuvoolela, “Mwechitsi, ukhunyekanga lwa uvoolanga ndio.”
46Yesu yavoola, “Munyi veechitsi va Malako, muli khuvutiinyu muno! Shichila mutiukhanga vandu misiko militoho chia vanyala khuvula khunyala khuchinga, navutswa munyi vene mukhaywangwa khuvakhonya khuchinga. 47Munyi muli khuvutiinyu muno! Shichila mulombanga vilindwa vilahi via vaprofeti va vakuuka venyu viira. 48Munyi vene muhuchililanga ndi mwalola ka vakuuka venyu vakhola; viira vaprofeti numulomba vilindwa viavo. 49Khulondokhana khu shivune shienesho, vusitsa vurulanga khu Nyasaye vwavoola, ‘Niitsa khuvarumila vaprofeti nende varumwa. Valiitsa khwiira valala khuvo nu khutambitsa vandi.’ 50Vandu va matukhu kanu valiitsa khusalilitswa shichila viira vaprofeti voosi khurula shivala nishiloongwa, 51khuraanjila khu Abili yiirwa khutukha khu Zakaria wiirwa; yiirilwa hakari wu vwaali nende Havundu Hatakatifu. Ni kilikali, muvoolelanga ndi vandu va matukhu kanu valiitsa khusalilitswa shichila vo voosi.
52“Munyi veechitsi va Malako, muli khuvutiinyu muno! Shichila mwavikha lufungu lwikulanga muliango kwi inzu yu vucheli; navutswa munyi vene mwakhaywa khwinjilamu; khandi mwikalilanga vandu vachelitsanga khwinjilamu.”
53Lwa Yesu yali namali khulomoloma, veechitsi va Malako nende Vafarisayo varaanga khumureeva mareevo matinyu; khandi nivamuvoolela alomolome makhuva khulondokhana khu vindu vinyishi, 54nivalindililanga khumukumila, niiva anyala khulomoloma shindu shitamanu shiosi.
Currently Selected:
LUKA 11: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013