Matayo 27
27
Yeso okoirwa ase Pilato
(Mar 15:1; Luk 23:1-2; Yoh 18:28-32)
1Bogachia gokia mambia, abakuani abanene bonsi na abatureti bagakora omoroberio bw’ogoita Yeso. 2Bakamosiba, bakamoira, bakamomoa Pilato, oyorenge gabana o Rumi.
Ogokwa kwa Yudasi
3 #
Ogok 1:18,19 Ekero Yudasi, oria omoruete achia korora ng’a onacheirwe ekiina, ageitia, akairania chitaabu chiria chi’echifeta emerongo etato ase abakuani abanene na abagaaka, 4okobora, “Namochire ase okorua omonto otari na bobe bonde aitwe.” Barabwo bakaboora, “Ninki aya are ase tore? Echio n’echigurube chiao!” 5Yudasi agatuguta chitaabu chiria chi’echifeta ase Hekalu ime, akaimoka, akagenda akeng’enta. 6Korende abakuani abanene bakaimokia chitaabu chiria chi’echifeta bakaboora, “Tari boronge gochibeeka ase ekungo y’esadaka ya Nyasae, ekiagera chirochio nechie rigori ri’amanyinga.” 7Bakanacha ekiina giokogora omogondo bw’omokori chinyongo, obe aase bagotindeka abageni. 8Ase ayio omogondo oyo nigo okorokwa Omogondo bw’Amanyinga goika reero. 9#Zak 11:12,13Erio rigaikeranigwa eriatebetwe nomobani Yeremia, ogoteeba, “Bakaimokia chitaabu chiria chi’echifeta emerongo etato, rigori riaye oria obegetwe rigori n’abanto bande b’Abaisraeli, 10bagachiira ase okogora omogondo bw’omokori chinyongo, buna Omonene achigeete.”
Pilato okoboria Yeso amaborio
(Mar 15:2-15; Luk 23:3-5,13-25; Yoh 18:33—19:16)
11Nere Yeso agatenena ase gabana bw’Abarumi; oyio omobooretie, “Naye Omorwoti bw’Abayahudi?” Yeso akamoteebia, “Naboigo, aye gwateebire.” 12Korende ekero Abakuani abanene na abagaaka bamosoerete, tairaneria ing’ana rinde. 13Erio Pilato akamoteebia, “Toigweti amang’ana aya amange bakona‐goteeba igoro yao?” 14Korende ere tairaneria rinde, nonya nase ring’ana erimo, na gabana agakumia mono.
15Bono ekero kie rituko rinene nigo yarenge engencho ya gabana gosiborera Abayahudi omosibwa oyomo oyo barigetie. 16Mbabwate omosibwa oyomo omanyekanete, okorokwa Baraba. 17Erio kobasangererekanire, Pilato akababoria, “Norori morigetie mbasiborere ase abasibwa aba babere Baraba gose Yeso, oyo okorokwa Kristo?” 18Ekiagera konya omanyire ng’a Abayahudi nigo baruete Yeso ase obogechi. 19Ekero Pilato aikaransire ase ekerogo gi’ekiina, akarenterwa amang’ana na mok’aye, ogoteeba, “Oyio nomonto omonyene oboronge, tobaisa kwebwatia asare, ekiagera reero inachandetwe namange ase okorota ase engencho yaye.” 20Bono abakuani abanene na abagaaka bakagenka emeganda ng’a baborie baegwe Baraba, na Yeso bamoite. 21Korende Pilato akaboria omoganda oria naende, “Ase abanto aba babere, norori morigetie mbasiborere?” Bakamoteebia, “Baraba.” 22Pilato akababoria, “Imokore naki Yeso, oyo okorokwa Kristo?” Bakamoteebia bonsi, “Tiga abambwe!” 23Akababoria, “Nase ki? Mbobe ki akorete?” Barabwo bakamenta goaka egeturi, bakobora, “Tiga abambwe!”
24 #
Okoir 21:6-9
Ekero Pilato achia korora ng’a gento tikenyarekaneti asare, ne rirorooche rioka rikona‐kobucha, akaimokia amaache, agaisaba amaboko aye ase obosio bw’omoganda, ogoteeba, “Inche tindi na komocha ase amanyinga y’omonto oyo omonyene oboronge. Niigoro yaino abanyene.” 25Abanto bonsi bakairaneria, “Amanyinga aye, tiga abe igoro ase tore, na ase abana baito!” 26Erio akabasiborera Baraba, na magega gaakire Yeso emecharichi, akabamotigera anyare kobambwa.
Abasikari bagochecheria Yeso
(Mar 15:16-32; Luk 23:26-43; Yoh 19:17-27)
27Erio abarwani ba Pilato bakaira Yeso ime ase enyomba y’egabana, bakamosangererekanera omoganda omogima bw’abarwani. 28Bakamorusia chianga chiaye, bakamobeekera eyanga embariri. 29Bagatwang’a egutwa y’amagwa, bakamobeekera motwe, na egetonto bakamobekera ase okoboko kwaye gw’okorio; bagatung’ama asare, bakamochecheria na kobora, “Ochie kare, Omorwoti bw’Abayahudi!” 30Erio bakamotwera amate, bakaimokia egetonto keria, bakamoaka ase omotwe. 31Kobamochecheirie, bakamorusia eyanga eria embariri, bakamobeekera chianga chiaye omonyene, bakamoira isiko abambwe.
32Kobagosoka korwa ase omochie, bakarora omonto oyomo, Omokurene, okorokwa Simioni; erio abasikari bakabetereria omonto oyio abogorerie Yeso omosalaba. 33Bagachia goika aase akorokwa Gologotha (engencho yaye: Aase Ekeore), 34#Zab 69:21bakamoa edivai esang’anirie egento ekeroro, anywe; Agachia koyeigwa, tancha konywa. 35#Zab 22:18Kobamobambire bagakora obomera, bagaatanana chianga chiaye. 36Erio bagaikaransa komorigereria aria. 37Igoro ase omotwe oye bakabeeka ogosoerwa kwaye, koriikire, “OYO NERE YESO, OMORWOTI BW’ABAYAHUDI”. 38Erio abauri babere bakabambwa amo nere, oyomo ensemo y’okoboko kwaye gw’okorio, na oyomo ensemo y’okoboko kwaye gw’okobee. 39#Zab 22:7; 109:25Na barabwo abaare goeta, bakamorama, bagosinga‐singisia emetwe yabo, bakobora, 40#Mat 26:61; Yoh 2:19“Aye oyogotagora Hekalu na koyeagaacha ase amatuko atato, etoorie! Onye naye Omwana o Nyasae, ika korwa ase omosalaba.” 41Na baria abakuani abanene bagakora boigo, bakamokorera echeche amo naborokia b’amariiko na abagaaka, bakobora, 42“Natooretie abande, ere omonyene takonyara gwetooria. Ere n’Omorwoti bw’Abaisraeli, tiga aike bono korwa ase omosalaba, na intwe rirorio ntomwegene. 43#Zab 22:8Nigo asemeretie Nyasae, tiga Nyasae amotoorie bono, onye omoganetie, ekiagera nateebete: Inche n’Omwana o Nyasae.” 44Na baria abauri, abaabambetwe amo nere, bakamorama boigo.
Ogokwa kwa Yeso
(Mar 15:33-41; Luk 23:44-49; Yoh 19:28-30)
45Bono korwa chinsa isano nemo omosunte okaba igoro ase ense yonsi goika chinsa kianda. 46#Zab 22:1Chiachia koba ang’e chinsa kianda, Yeso, akarera neriogi rinene, akabora, “Eloi, Eloi, lama sabakitani?” Okoonchorwa kwaye, “Nyasae one, Nyasae one, naki gwantigire?” 47Na abande b’abwo bateneine aroro, bakayaigwa, bakaboora, “Omonto oyo n’Elija akorangeria.” 48#Zab 69:21Erio kegima oyomo obo akaimokia esifunchi, akayeichoria chinkama, akayebeeka ase egetonto, akamoa anywe. 49Korende baria abande bakaboora, “Tiga torore gose Elija ngocha are komotooria.” 50Yeso akarera naende neriogi rinene, erio agatweka mo.
51 #
Okong’ 26:31-33
Na rora, egetambaa gi’okonacha Hekalu kegatandoka korwa igoro goika inse, gekaba bibere, ense egatengecha, ebitare bigatandoka. 52Chimbeera chikamaanoka chigaasama, na abanto abange abachenu konya bakuure bakabokigwa. 53Kabaruure ase chimbeera, magega y’okoboka kwa Yeso bagasoa ase omochie omochenu#27:53 Omochie omochenu: Noro Yerusalemu agwo ase abanto abange babaroche. 54Na ekero omotang’ani bw’abarwani rigana, na abwo barenge amo nere korenda Yeso, bachia korora omotengecho bw’ense na ebiakorekire, bakairoka mono, bakaboora, “Ekeene, oyo nigo arenge Omwana o Nyasae!”
55 #
Luk 8:2,3 Mbarengeo boigo abakungu abange, barigereretie korwa are, abatunyanete Yeso korwa Galili, bakomokorera. 56Ase abwo nigo barenge Mariamu Magadalena, na Mariamu ng’ina Yakobo na Yusufu, na ng’ina ’abana ba Zebedi.
Ogotindekwa kwa Yeso
(Mar 15:42-47; Luk 23:50-56; Yoh 19:38-42)
57Riachia koba mogoroba, omonto omonda bw’Arimathaya, okorokwa Yusufu, agacha; ere nomworokigwa o Yeso orenge. 58Oyio akagenda ase Pilato, akarigia omobere o Yeso. Erio Pilato agachiika ayoegwe. 59Yusufu akaimokia omobere, akayoboyia egetambaa ekiya ki’egatani, 60akayobeka ase oboina bwaye oboyia, obwabachete ase egetare; naende agaturunkania rigena rinene gochia ase egesieri ki’oboina, akagenda. 61Mbarengeo Mariamu Magadalena na Mariamu onde, baikaransete bosio bw’oboina.
Oboina bokorendwa
62Rituko ria kabere, erio riare rituko ri’Esabato, abakuani abanene na Abafarisai bagasangererekana ase Pilato, 63#Mat 16:21; 17:23; 20:19; Mar 8:31; 9:31; 10:33,34; Luk 9:22; 18:31-33bakaboora, “Omonene, twainyoire ng’a omong’ainereria oria nateebete ekero arenge moyo: Magega ase amatuko atato nimboke. 64Gaki, chiika oboina borendwe buya goika rituko ria gatato, aborokigwa baye tibaabaisa gocha komoiba, bateebie abanto ng’a obokire korwa ase abakuure; oborimo bw’omoerio inabobue boria bw’eritang’ani.” 65Pilato akabateebia, “More nabarendi; genda morende mono oboina buna moranyaare.” 66Ase igo bakagenda bakarenda oboina mono ase okobeeka rigena riria ekemanyererio, naende bakabeeka abarendi.
Currently Selected:
Matayo 27: EKGE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2021