Luka 9
9
Yeso ogotoma abatomwa ikomi na babere
(Mat 10:5-15; Mar 6:7-13)
1Akarangeria baria ikomi na babere akabaa chinguru na okobua igoro ase ebirecha bionsi na ase okogwenia amarwaire. 2Akabatoma korandia oborwoti bwa Nyasae na kogwenia abarwaire. 3Akabateebia, “Timobogoria gento ase orogendo rwaino, nonya nenyimbo, gose esaro, gose omogati, gose chitaabu; naende timoba ne chianga ibere. 4Naende enyomba ende yonsi morasoe, mobeere aroro goika moruo. 5#Ogok 13:51#Luk 10:4-11Naende abatabaroiseti, komogosoka korwa omochie oria, mokong’onte orotu rw’amagoro aino, erinde robe kirori ase bare.”
6Bakagenda, bagaetanana ase emechie, bakorandia enchiri, na kogwenia abanto chinsemo chionsi.
Ogoichana kwa Herode
(Mat 14:1-2; Mar 6:14-16)
7 #
Mat 16:14; Mar 8:28; Luk 9:19 Bono Herode omorwoti akaigwa onsi ayakorekire, agaichanigwa mono, ekiagera abande baare goteeba ng’a Yohana obokiigwe korwa ase abakuure, 8na abande ng’a n’Elija oorokire, na abande ng’a noyomo bw’ababani abakoro obokire. 9Herode agateeba, “Yohana inamonachete omotwe, korende ning’o oyo rende naigure amang’ana are buna aya?” Akarigia komorora.
Okoragerigwa kw’abaanto chilifu isano
(Mat 14:13-21; Mar 6:30-44; Yoh 6:1-13)
10Abatomwa baria ekero bachia koirana bagateebia Yeso amang’ana onsi ayabakorire. Erio akagenda amo nabarabwo bobisi akabaira, gochia ase omochie okorokwa Bethisaida. 11Emeganda egachia korora, ekamotunyana, na ere akabaroisia, agakwana nabarabwo amang’ana ’oborwoti bwa Nyasae, akagwenia abarenge nokogania gw’okogwenigwa. 12Rigachaaka kogoroba#9:12 Rigachaaka kogoroba: engencho yaye boachaka koira, na baria ikomi na babere bakamochiera, bakamoteebia, “Tiga omoganda ogende goika ase ebichie ne chinsemo chietanaine, banyore aase bakorara amo nendagera, ekiagera aiga nigo tore aase erooro.”
13Akabateebia, “Inwe bae endagera!”
Bakaboora, “Titobwati kende kobua emegati etano ne chinswe ibere. Gose togende kogorera abanto aba bonsi endagera?” 14Naki mbarengeo abasacha chilifu isano iga.
Agateebia aborokigwa baye, “Baikaransie abanto aba ase ebiombe, na kera ekeombe koreng’ana emerongo etano.”
15Bagakora boigo, bakabaikaransia bonsi. 16Akabogoria emegati eria etano ne chinswe chiria ibere, akarigereria igoro, akabisesenia, akabisamunyora, akaa aborokigwa babiterekere abanto. 17Bonsi bakaria, bakaigota. Na ebisamunye biria biatigarete bigasangererigwa, bigaichora ebitonga ikomi na bibere.
Okoorokia gwa Petero ng’a Yeso nere Kristo
(Mat 16:13-19; Mar 8:27-29)
18Engaki eyemo ekero Yeso are gosaba are ere bweka, aborokigwa baye nigo barenge ange nere, akababooria, “Abanto nigo bakobora ng’a ninche ng’o?”
19 #
Mat 14:1,2; Mar 6:14,15; Luk 9:7,8 Bakairaneria, “Yohana Omobatisi; abande Elija, na abande ng’a oyomo ase ababani abakoro obokire.”
20 #
Yoh 6:68,69 Akababoria, “Nainwe nigo mokobora ng’a ninche ng’o?” Petero akairaneria, “Kristo o Nyasae.”
Yeso okobana ogokwa na okoboka kwaye
(Mat 16:20-21; Mar 8:30-31)
21Akabachiika na kobakania tibateebia monto ring’ana eri, 22ogoteeba, “Negwenerete Omwana‐o‐Mwanyabaanto anyore ogochandeka ase chinchera chinyinge, na kwangwa nabagaaka, na abakuani abanene, na aborokia b’amariiko, naende aitwe, na ase rituko ria gatato naboke.”
Okorangerigwa kw’ogwekeyia omonyene
(Mat 16:24-28; Mar 8:34—9:1)
23 #
Mat 10:38; Luk 14:27 Agateebia bonsi, “Oyorigetie gontunyana, tiga ekaane ere omonyene, etweke omosalaba oye kera rituko antunyane. 24#Mat 10:39; Luk 17:33; Yoh 12:25Naki onde bwensi orarigie koegera obogima bwaye oyio nabosirie; na oyorasirie obogima bwaye ase engencho yane, oyio naboegere. 25Ekiagera inki eragwenere omonto karanyore ense yonsi, ko esirie gose gwesaria ere omonyene? 26Naki kera omonto orandorere obosooku inche na amang’ana aane, Omwana‐o‐Mwanyabaanto kagocha ase obonene bwaye, namororere obosooku ase Ise na ase abamalaika abachenu. 27Korende nabateebirie ekeene, mbare abanto ase aba bateneine aa, abataigwe amakweri nonya ng’ake, goika barore oborwoti bwa Nyasae.”
Okoonchoka ekieni kwa Yeso
(Mat 17:1-8; Mar 9:2-8)
28Agachia koba amatuko ang’e atano na atato magega ase amang’ana aya, akaira Petero, na Yohana, na Yakobo, agatiira gochia egetunwa igoro gosaba. 29Na ekero arenge gosaba, ekieni ki’obosio bwaye gekaonchoka, ne chianga chiaye chikaba chindabu, chikameka‐meka. 30Na agwo, abanto babere bakarorekana bagakwana nere, nabwo Musa na Elija. 31Abwo barorekanete ase obonene, na gokwana amang’ana ay’ogokwa kwaye, aya agwenerete goikerania Yerusalemu. 32Petero na baria barenge amo nere, konya babwatirwe ne chitoro, korende nigo bategesetie, bakarora obonene bwaye, na abanto baria babere bateneine amo nere. 33Ekero abanto aba baare korua asare, Petero agateebia Yeso, “Omonene, imbuya intwe koba aiga; tokore ebigutu bitato, ekemo ekiao, na ekemo ekia Musa, na ekemo eki’Elija”; tamanyete aya agokwana.
34Ekero agokwana amang’ana aya riire rigacha rikababisia, bakairoka kobachia gosoa ase riire. 35#Isaya 42:1; Mat 3:17; 12:18; Mar 1:11; Luk 3:22#2 Petr 1:17,18Eriogi rigasoka korwa ase riire riria rigoteeba, “Oyo n’Omwana one, Omochorwa one; moigwere ere!”
36Ekero eriogi riakwanire, Yeso akarorekana ore bweka. Na barabwo bagakira, tibateebia monto ase amatuko aria ring’ana rinde rionsi ri’ayio baroche.
Yeso okogwenia omomura obwatire nekerecha
(Mat 17:14-18; Mar 9:14-27)
37Rituko ria kabere ekero baare gotirimboka korwa ase egetunwa, omoganda omonene okaumerana nere. 38Naende rora, omonto oyomo ase omoganda oria agaaka egeturi, okobora, “Omworokia, nagosabire, origererie omomura one, ekiagera ere nomwana one omomoima. 39Na rora ekerecha nigo gekomobwata, na ere bwango nigo akorera, naende kemogaragaria, erinde asokia amasombogoku, korende tikeri komorua otatiga ase okomosionora mono. 40Nasaba aborokigwa bao bageserie, korende tibanyara.”
41Yeso akairaneria, “Inwe ekegori getari nokwegena, naende ekebe, nimbe amo nainwe goika ririri, na koremereria nainwe? Renta omomura oo aiga.”
42Agachia koba nkomochiera are ekerecha keria gekamoigusia na komoiyeria. Yeso agakania ekerecha keria, akagwenia omomura oria, akamoirania ase ise. 43Abanto bonsi bagakumia ase okobua kwa Nyasae.
Obobani bwa kabere bwa Yeso igoro y’ogokwa kwaye
(Mat 17:22-23; Mar 9:30-32)
Korende ekero bonsi babete nogokumia ase amang’ana onsi akorete, agateebia aborokigwa baye, 44“Tiga amang’ana aya asoe ase amato aino, ekiagera Omwana‐o‐Mwanyabaanto ngochia are kobekwa ase amaboko ’abaanto.” 45Korende tibamanya ring’ana riria, rikaba ndiabiseka ase bare, erinde tibarimanya. Bakaba nobwoba komoboria engencho ye ring’ana riria.
Okworokereria igoro y’oboitongo
(Mat 18:1-5; Mar 9:33-37)
46 #
Luk 22:24
Okoengererania kogatuboka ase egati yabo ng’a ning’o ase bare ore omonene kobua abande. 47Korende ekero Yeso achia komanya ebirengererio bie chinkoro chiabo, akabogoria omwana, akamobeka ang’e asare, 48#Mat 10:40; Luk 10:16; Yoh 13:20akabateebia, “Onde bwensi oramwanche omwana oyo ase erieta riane, onyanchire inche; na oyoranyanche inche, omwanchire ere oyontomete. Ekiagera ere oyore omoke ase egati yaino, oyio nere omonene.”
Okworokereria igoro y’okobogorerania
(Mar 9:38-40)
49Yohana akairaneria, “Omworokia, ntwarora omonto ogoseria ebirecha ase erieta riao, tokamokania, ekiagera tabwataini naintwe.”
50Korende Yeso akamoteebia, “Timomokania, ekiagera oyo otari mamincha yaino nigo are ensemo yaino.”
Yeso okomanora kogenda Yerusalemu. Abasamaria abatakoroisia abageni
51Ekero amatuko aye aika ang’e kogenda igoro, akamanora kogenda Yerusalemu. 52Agatoma abatomwa komotang’anera, bagende na gosoa ase agachie k’Abasamaria, bamoroiserie aase. 53Abanto b’omochie oria tibamoroisia, ekiagera arenge kogenda Yerusalemu. 54#2 Abar 1:9-16Aborokigwa baye Yakobo na Yohana bagachia korora, aya, bakaboora, “Omonene, norigetie toborie omorero oike korwa igoro obasirie?”
55Akeonchora, akabakania. 56Erio Bakagenda ase agachie kande.
Amateemwa ase abwo barigetie koba aborokigwa
(Mat 8:19-22)
57Ekero baare kogenda nchera omonto oyomo akamoteebia, “Ningotunyane aande onsi ase okogenda.”
58Yeso akamoteebia, “Ebibwe mbire namakuruma, ne chinyoni chia igoro nchire nebiswa, korende Omwana‐o‐Mwanyabaanto tari nase akobeeka omotwe oye.”
59Agateebia oyonde, “Ntunyana!” Ere akabora, “Omonene, ritang’ani ing’a ribaga ngende gotindeka tata”.
60Akamoteebia, “Tiga abakuure batindeke abakuure babo, korende aye genda orandie oborwoti bwa Nyasae.”
61 #
1 Abar 19:20
Naende oyonde nere akabora, “Omonene, ningotunyane, korende ritang’ani ing’a ribaga mbaakere ng’a batigare buya abanto b’enyomba yane.”
62Yeso akamoteebia, “Omonto tari orabeeke okoboko kwaye ase obokombe bwe chieri, naende arigererie magega, oragwenere ase oborwoti bwa Nyasae.”
Currently Selected:
Luka 9: EKGE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2021