Luka 14
14
Oborwaire bw’okobimbia omobere bokogwenigwa ase rituko ri’Esabato
1Rituko erimo ri’Esabato, ekero asoete ase enyomba y’omonto oyomo, omonene bw’Abafarisai, arie endagera, nigo barenge bamorigereretie. 2Na rora, ase obosio bwaye narengeo omonto oyomo orenge noborwaire bw’okobimbia omobere. 3Yeso agateebia abanto b’amachiiko na Abafarisai, akababoria, “Inee! Mboronge kogwenia ase rituko ri’Esabato, gose taibo?”
4Bagakira. Akamobwata, akamogwenia, akamoa ribaga agende. 5#Mat 12:11Akababoria, “Ning’o ase more ore netigere gose eng’ombe yagure ase engoro, otari koyerusia erio kegima ase rituko ri’Esabato?”
6Barabwo tibanyara komoiraneria ase amang’ana aria.
Oboitongo na okoroisia abageni
7Agateebia baria barangeretigwe omoreng’anio, gachia korora buna bachorire ebirogo bi’eritang’ani, akabateebia, 8#Emeb 25:6,7“Gokorangerigwa nomonto ase omoyega bw’enyangi, toikaransa ase ekerogo kie ritang’ani; onye omonto bw’amasikani kobua aye orangeretigwe nere, 9oria obarangeretie inwe babere nache kogoteebia aye: Motigerere oyo ekerogo eke; erio nochake koba nobosooku gokoiranigwa goikaransa magega. 10Korende gokorangerigwa, genda oikaranse magega, erinde kagocha oyokorangeretie, agoteebie: Mosani, tigera gocha aa aase e ritang’ani. Erio nobe nogosikwa ase amasio abo bonsi abaikaransete amo naye. 11#Mat 23:12; Luk 18:14Ekiagera kera oyokweimokereria igoro nairanigwe inse, na ere oyokweirania inse naimokererigwe igoro.”
12Agateebia oria omorangeretie, “Kogokora endagera ya mambia gose eya mogoroba, torangeria abasani bao, gose abamino, gose eamate yao, gose abagisangio bao abanda; baabaise gokorangeria banyare gokoakana. 13Korende kogokora omoyega, barangerie abataka, na ebirema, na amagata, na emeuko; 14aye nosesenigwe, ekiagera tibari na gento bagokoakana. Naki aye noche goakanwa ase okobokigwa kw’abanyene oboronge.”
Omoreng’anio bw’omoyega omonene
15Ekero oyomo ase abwo baikaransete ase endagera amo nere achia koyaigwa akamoteebia, “Nasesenirie oyoranyare koria omogati ase oborwoti bwa Nyasae!”
16Yeso akamoteebia, “Omonto oyomo okorete omoyega omonene; akarangeria abanto abange. 17Ekero ki’omoyega agatoma omosomba oye kogenda goteebia baria konya barangerigwe: Inchuo, ekiagera ebinto bionsi biabeire ang’e. 18Bagachaaka bonsi korigia chintamero. Oyo bw’eritang’ani akamoteebia: Nagorire omogondo, nindigetie kogenda koyorora; nagosabire, onyabere. 19Oyonde akabora: Nagorire chintang’ana amachoki atano, nkogenda nde gochiteema; nagosabire, onyabere. 20Oyonde akabora: Nanyuomire omokungu, na ase engencho eye tinkonyara gocha. 21Omosomba oria agacha, akorokia omonene oye amang’ana aya. Erio oria omonyene enyomba akabea, agateebia omosomba oye: Soka bwango, ogende ase chinchera na ebinchera bi’emechie, orente abataka, na ebirema, na emeuko, na amagata. 22Na omosomba oria akabora: Omonene, ayio gwachika aikire gokoreka, ko nonya mbono ribaga ndireo. 23Omonene oria agateebia omosomba oye: Genda ase chinchera ne chimbebe, obabetererie basoe, erinde enyomba yane enyare goichora. 24Ekiagera nagotebirie ng’a ase abanto baria barangeretigwe onde tari nonya noyomo oranyare koigwa omoyega one.”
Rigori ri’okoba omworokigwa
25Emeganda emenge nigo yarenge amo na Yeso; ere akeonchora, akabateebia, 26#Mat 10:37“Omonto kagocha ase ’nde, nere atagecheti ise na ng’ina, na mokaye, na abana baye, na abamura bamwabo, na abasubati bamwabo, ee, nonya nobogima bwaye, takonyara koba omworokigwa one. 27#Mat 10:38; 16:24; Mar 8:34; Luk 9:23Naende monto onde bwensi otabogoreti omosalaba oye na gontunyana, takonyara koba omworokigwa one. 28Naki ning’o ase more, onye origetie koagacha oboagacho, otaikaranse ritang’ani kobara rigori ri’oboagacho obo, gose nabwate ebinto biisaine kobokoora? 29Aise gosinywa gokoora oboagacho boria kabekire oboroso, abanto bonsi bachake komosekerera, 30bagokwana: Omonto oyo nigo achagete oboagacho, korende tabokoora. 31Gose morwoti ki, gakogenda korwana nomorwoti onde, otaikaranse ritang’ani na korengereria onye ere amo nabaanto chilifu ikomi nanyare koumerana nere oyokomocheera nabaanto chilifu emerongo ebere? 32Onye taibo, nigo agotoma abanto korigia enchera y’omorembe, omonto oria gakare aare. 33Nabo kera oyomo oino otatigeti ebinto bionsi are nabio, takonyara koba omworokigwa one.
34“Omonyo nomuya, korende omonyoo korasirie obwansu bwaye, ninki orabekwe bwanse? 35Togwenereti riroba gose etui; abanto nigo bakoyotuguta isiko. Oyore namato akoigwera, tiga aigwe.”
Currently Selected:
Luka 14: EKGE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2021