Luka 1
1
1Abanto abange beruete koriika ebirage bi’amang’ana aria aikeranetigwe egati yaito. 2Nigo barigete buna intwe twatebetigwe nabwo barenge abarori korwa omochakano na abakori emeremo be ring’ana batorenteire. 3Naboigo nainche narorire buya, magega konatukire amang’ana onsi boronge korwa ritang’ani, gokoriikera aye Theofilo bw’amasikani, 4erinde onyare komanya oboene bw’amang’ana aria kwegeretigwe.
Obobani igoro yokoiborwa kwa Yohana Omobatisi
5 #
1 Amg 24:10
Ekero Herode arenge omorwoti o Boyahudi, narenge Omokuani oyomo, erieta riaye Zakaria, oyo orongebw’ororeria rwa Abiya. Mokaye nigo arenge korokwa Elisabeti oyio orenge omoiseke bw’ororeria rw’ Omokuani Aroni. 6Na bonsi babere nigo barenge abanyene oboronge ase obosio bwa Nyasae; nigo babwatetie amachiiko ne chinchera chionsi chi’Omonene batari na komocha. 7Barabwo tibarenge nomwana, ekiagera Elisabeti nigo arenge omogomba, na barabwo bonsi babere konya bagotire mono.
8Na ekero riika ria Zakaria ri’ogokora emeremo y’obokuani ase obosio bwa Nyasae riarenge, 9kobwatekana nengencho y’obokuani, obomera bokamogwera asoe ase Hekalu y’Omonene asambe ubani. 10Na omoganda bwonsi bw’abaanto nigo orenge isiko gosaba ekero ki’ogosamba ubani. 11Zakaria akaorokerwa nomomalaika bw’Omonene, oteneine ensemo ya borio y’egesasiimero ki’ogosambera ubani. 12Ere agaichana gachia komorora, na omoondoko okamobwata. 13Korende omomalaika oria akamoteebia, Toiroka, Zakaria, ekiagera ogosaba kwao kwaigurwe, na mokao Elisabeti nakoiborere omwana omoisia, na erieta riaye nomoroke Yohana.
14Aye nobe nomogooko na ogosasooka,
na abanto abange nabagokere okoiborwa kwaye,
15 #
Omob 6:3
ekiagera nabe omonene ase obosio bw’Omonene.
Takonywa edivai gose ekenyugwa kegotindia;
ere naichorwe n’Omoika Omochenu,
nonya nkorwa enda ya ng’ina.
16Naonchore abange b’Abaisraeli gocha ase Omonene, Nyasae obo.
17 #
Malk 4:5,6 Ere natang’ane bosio bwaye ase omoika ne chinguru chi’Elija,
aonchore chinkoro chi’abaise ase abana baabo,
na aonchore abamochi ase obong’aini bw’abanyene oboronge,
abeekere ang’e Omonene abanto baroisiigwe.
18Zakaria agateebia omomalaika, “Naki ndakore imanye ayio? Ekiagera inche nomogotu, na mokane nagendererete kogota.”
19 #
Dan 8:16; 9:21 Omomalaika akamoiraneria, “Ninche Gabirieli, ngotenena ase obosio bwa Nyasae; ninche natomwa nkwane naye, ngoteebie amang’ana aya amaya. 20Korende bono aye ekiagera otegena amang’ana aane ayio agochia kooroka chingaki chiaye rora aye nobe rimama, tonyara gokwana goika rituko riria ayio agocha kooroka.”
21Chingaki echio abanto baria baganyete Zakaria, bagakumia ase ogotebana kwaye ime ase Hekalu. 22Ekero asogete isiko, tanyarete gokwana nabarabwo; erio barabwo bakamanya ng’a nigo arora okorora aria Hekalu ime. Ere nigo arenge kobateeberia nokoboko, akagenderera koba rimama. 23Ekero amatuko aye y’ogokora emeremo aerete, ere akagenda bwoye.
24Magega y’amatuko aria mokaye Elisabeti akaba morito, akebisa emetienyi etano, ogoteeba, 25“Igo nabo Omonene ankoreire ase amatuko aya andigereretie, na konduseria obosooku bwane ase amasio y’abanto.”
Obobani bw’okoiborwa kwa Yeso
26Omotienyi bw’etano nomo omomalaika Gabirieli agatomwa na Nyasae kogenda omochie o Galili, okorokwa Nazareti, 27#Mat 1:18ase omoiseke omwekungi oriereire boko nomosaacha, erieta riaye Yusufu, bw’eamate ya Daudi, na erieta ri’omoiseke oria Mariamu. 28Agacha asare, akabora, “Mbuya ore aye, oyobwanchererie#1:28 oyobwanchererie: engencho yaye oyo osesenirie goetania bonsi. Omonene nigo are amo naye.”
29Mariamu agaichana mono ase ring’ana eri, erio ere akebooria, “Ngokwania ki oko?” 30Omomalaika akamoteebia, Toiroka Mariamu, ekiagera kwanyorire ogwancherwa ase Nyasae. 31#Mat 1:21Rora, nobe morito, noibore omwana omoisia, nomoroke erieta riaye Yeso.
32 #
2 Sam 7:12,13,16; Isaya 9:7 Oyio nabe omonene, narokwe Omwana o Nyasae ore Igoro Mono;
n’Omonene namoe ekerogo ki’obonene gia Daudi sokoro yaye;
33nagaambere enyomba ya Yakobo goika kare na kare;
nonya noborwoti bwaye tibokoba nomoerio.
34Mariamu akabooria omomalaika oria, “Naki rirabe ring’ana eri, ekiagera tindaba nomosaacha?”
35Omomalaika akamoteebia,
“Omoika Omochenu nogochere,
ne chinguru chiaye Oyore Igoro Mono nachikobekere ekiriri.
Ase ayio, oyoraiborwe narokwe Omochenu, Omwana o Nyasae.
36Rora, Elisabeti omoamate oo, nere boigo nare noborito bw’omwana omoisia ase obogotu bwaye; na omotienyi oyo noyo bw’etano nomo asare ere oyorogetwe omogomba. 37#Omoch 18:14Naki ing’ana tiriri ritanyarekane ase Nyasae.”
38Mariamu akabora, “Rora, inche nomosomba bw’Omonene; abe ase ’nde buna ring’ana riao.” Omomalaika akaimoka akarua asare.
Mariamu ogochia gokwania Elisabeti, naende ogotogia Nyasae
39Mariamu akaimoka ase amatuko ayio, akagenda bwango ase ebitunwa goika omochie oyomo o Yuda, 40agasoa nyomba mwa Zakaria, agakwania Elisabeti. 41Ekaba Elisabeti agachia koigwa ogokwania kwa Mariamu, omwana omoke agatuma ase enda yaye ime; Elisabeti agaichorwa n’Omoika Omochenu, 42agaaka eriogi ase chinguru, agakwana, “Gwaseseniigwe aye ase abakungu, na oroiboro rw’enda yao rwasesenigwe. 43Ng’ai ring’ana eri riarure, ng’ina Omonene one anchicheire inche? 44Ekiagera rora, eriogi ri’ogokwania kwao riachia gosoa ase amato aane, omwana omoke otuma ase omosasoko ase enda yane ime. 45Nasesenirie oyobwegenete ng’a amang’ana ayio ateebigwe n’Omonene naikeranigwe.” 46Mariamu agateeba,
“Omoyo one otogirie Omonene,
47omoika one ogokeire Nyasae, Omotoria one,
48 #
1 Sam 1:11
ekiagera origereirie obwororo bw’omoiseke omosomba oye.
Naki ekeene, korwa reero ebigori bionsi nabindoke omosesenigwa,
49ekiagera ere oyore ne chinguru onkoreire amanene,
na erieta riaye nerichenu.
50Amaabera aye nigo are ase abwo bamoirogete
korwa ebigori goika ebigori.
51Okorire ogokora gwe chinguru,
oserebanirie abaenenu ase ebirengererio bie chinkoro chiabo.
52 #
Ayubu 5:11; 12:19 Okeeirie abanene korwa ase ebirogo biabo bi’obonene,
oimokereirie igoro abaitongo.
53Abare nenchara obaigotirie amaya;
abanyene enibo obaseririe bare namaboko amasa.
54Okonyire Israeli, omosomba oye, ase okoinyora amaabera aye,
55 #
Omoch 17:7
#
1 Sam 2:1-10
buna atebeetie chisokoro chiaito, Aburaamu na oroiboro rwaye, goika kare na kare.”
56Mariamu akamenya nere emetienyi etato, akairana sobo.
Okoiborwa kwa Yohana Omobatisi
57Engaki yokoibora kwa Elisabeti egaika, ere akaibora omwana omoisia. 58Abairi na eamate yaye bakaigwa ng’a Omonene omororeire amaabera amange, bakagoka amo nere. 59#Abal 12:3Rituko ria gatano na gatato bakaira omwana komwarokia, bakarigia bamoroke erieta ria ise, Zakaria, 60korende ng’ina akairaneria, akabora, “Taibo; nigo ararokwe Yohana.”
61Bakamoteebia, “Tari nonya noyomo ase eamate yao okorokwa erieta erio.” 62Bakorokia ise ase ogokwana kw’ebimanyererio bi’amaboko, komoboria buna arigetie arokwe.
63Agasaba ebao y’okorika, akarika “Yohana, nario erieta riaye.” Bagakumia bonsi. 64Erio kegima agasiborwa omonwa na oromeme rwaye, agakwana, ogotogia Nyasae. 65Obwoba bogasoa ase abairi babo bonsi. Amang’ana aya onsi agasaarera ase ense yonsi y’ebitunwa bia Boyahudi. 66Na bonsi abayaigwete bakayabeeka ase chinkoro chiabo ime, bakaboora, “Mwana ki rende arabe oyo?” Naki okoboko kw’Omonene nigo kwarenge amo nere.
67Zakaria ise agaichorwa n’Omoika Omochenu, akabana, okobora,
68“Omonene, Nyasae o Israeli, atogigwe,
ekiagera obacheire abanto baye na kobabooria.
69Naende ototeneneirie Omotooria bw’okobua
ase eamate ya Daudi, omosomba oye.
70Buna ateebete korwa omochakano
goetera ase emenwa y’ababani baye abachenu,
71ng’a natotoorigwe korwa ase ababisa baito,
na korwa ase amaboko abo bonsi abatogechete,
72erinde abarorere amaabera chisokoro chiaito,
na koinyora okobwatana kwaye ogochenu.
73Emuma eria arierete sokoro yaito Aburaamu,
74ng’a natoe ribaga ri’okomosasiima totari nobwoba,
gatoratoorigwe korwa ase amaboko y’ababisa baito,
75ase obochenu na ase oboronge ase obosio bwaye amatuko aito onsi.
76 #
Malk 3:1
Naye, Omwana, norokwe omobani bw’Oyore Igoro Mono,
ekiagera notang’ane ase obosio bw’Omonene.
Oroisie chinchera chiaye,
77omanyie abanto baye ogotooreka
ase okwaberwa kw’ebibe biabo.
78Ase amaabera aye Nyasae oito,
ekero amasase a igoro aratochere,
79 #
Isaya 9:2
ababerere abamenyete ase omosunte na ase ekiriri ki’amakweri,
na koraa amagoro aito ase enchera y’omorembe.”
80Omwana oria agakiina, akamenteka chinguru ase omoika, akaba ase erooro goika rituko riria aorogete ase Abaisraeli.
Currently Selected:
Luka 1: EKGE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2021