Marka 8
8
Ta Yesu loko aphamela vanhu va mune wa makhulu (4 000)
(Matewu 15:32-39)
1Masikwini wolawo xitshungu lexikulu xitlhela xihlengeletana, kutani axingali na svakuja; hi loko Yesu avitana vajondzisiwa va yena, aku ka vona: 2“Nitwela vusiwana xitshungu lexi, hikuva sviyendla masiku manharhu na xitshame na mina, kutani axahali na svakuja. 3Hikolaho loko nixitlhelisela makaya na xili ni ndlala, xitawa ndleleni, hikuva van'we va xona vata hi le kule.” 4Vajondzisiwa va yena vamuhlamula vaku: “Xingalaveliwa kwihi svakuja lesvi xingajaka xixurha kola mananga ke?” 5Avavutisa aku: “Mi ni svinkwa svingani ke?” Vaku: “Hi ni ntlhanu wa svinkwa ni svimbirhi.” 6Hi loko abzela xitshungu lesvaku xitshama hansi, kutani ateka svinkwa lesvi sva ntlhanu ni svimbirhi, akhensa, asvikhemelela, asvinyika vajondzisiwa va yena, lesvaku vayavela xitshungu; hi loko xitshungu xiyaveliwa. 7Nasvona avali ni svihlampfana svingali svingani; kuteloko akhensile, alerisa lesvaku nasvona sviyaveliwa vanhu. 8Kutani vaja vaxurha, varholela ni matlhantlha lawa masaleke, matata svirhundzu sva ntlhanu ni svimbirhi; 9kasi vanhu avalava kuringana mune wa makhulu (4 000) Kutani avatlhelisela makaya.
10Kutani ahantla anghena bzatsweni ni vajondzisiwa va yena, aya tikweni ra Dalmanuta.
Ta Vafarisi loko vakombela xikombiso
(Matewu 16:1-4; Luka 12:54-56)
11 # Vona ni: Mat. 12:38; Luk. 11:16. Kuhumelela Vafarisi, vasungula kuphikizana na yena, vamuringa hi kukombela xikombiso lexihumaka tilweni. 12#Vona ni: Mat. 12:39; Luk. 11:29. Hi loko Yesu aketa moyeni wa yena aku: “Rixaka leri rikombelela yini xikombiso? Nitiyisile nili ka n'wina: Rixaka leri aringanyikiwi xikombiso!” 13Kutani avasiya, atlhela anghena bzatsweni, atsemakanya aya ka tlhelo rin'wana.
Ta comela ra Vafarisi ni ra Heroda
(Matewu 16:5-12)
14Vajondzisiwa avarivalile kuteka svinkwa, avova ni xinkwa xin'we ntsena bzatsweni. 15#Vona ni: Luk. 21:1. Kutani avalaya, aku: “Tlharihani, michava comela ra Vafarisi, ni comela ra Heroda!” 16Kutani vaphikizana vaku: “Kumbe hi lesvi hingaliki ni svinkwa.” 17Kuteloko Yesu asvitwa, aku ka vona: “Hikolaho ka yini miphikizana hi lesvi mingaliki ni svinkwa xana? Amisisvitwa ni kusvitwisisa xana? Xana timbilu ta n'wina taha nonon'hwa ke? 18#Vona ni: Yer. 5:21; Ezek. 12:2; Mar. 4:12.Lesvi minga ni mahlo amivoni ke? Lesvi minga ni tindleve, amitwi ha yini-ke? Amitsundzuki xana? 19Siku leri nikhemeleleke ntlhanu wa svinkwa ninyika lava va ntlhanu wa makhulu (5 000), xana mirhwele svirhundzu svingani lesvi asvitele hi matlhantlha ke?” Vaku ka yena: “Hirhwele khume ni svimbirhi” 20“Ni siku leri niphameleke lava va mune wa makhulu (4 000) hi ntlhanu wa svinkwa ni svimbirhi, mirhwalile svirhundzu svingani lesvi asvitele hi matlhantlha ke?” Vaku: “Hirhwele ntlhanu ni svimbirhi.” 21Kutani aku ka vona: “Amisitwisisa ni svosvi-ke?”
Ta kuhanyisiwa ka xifamahlo xa Betisayida
22Vafika Betisayida. Kutani vatisa munhu wa kufa mahlo, vakombela Yesu lesvaku amukhumba. 23Hi loko akhoma xifamahlo hi voko, axiyisa handle ka xidoropana, axipshitela marhi matihlweni axitlhanteka mavoko, axivutisa aku: “Xana uvona xanchumu ke?” 24Xona, xitlakusa mahlo, xiku: “Nivona vanhu, nivavona na vafambafamba, vafana ni minsinya.” 25Yesu atlhela aveka mavoko ya yena matihlweni ya xifamahlo, xona xihonoka kutani xihanyisiwa, xivona svilo hinkwasvu khwatsi. 26Yesu axibzela lesvaku xifamba, aku: “Ungatshuki utlhelela axidoropanini.”
Ta Petrosi loko avula lesvaku Yesu i mani
(Matewu 16:13-20; Luka 9:18-21)
27Kutani Yesu asuka ni vajondzisiwa va yena, vaya svidoropanini sva Khezariya wa Filipi. Ndleleni, avutisa vajondzisiwa va yena aku ka vona: “Vanhu vali ni mani xana?” 28#Vona ni: Mar. 6:14-15; Luk. 9:7-9. Vona vaku: “Van'wana vali, hi wena Yohani Mukhuvuli; van'wana vali, hi wena Eliya; van'wana vali, u mun'we wa vaprofeta.” 29Kutani avavutisa aku: “Xana n'wina, mili nimani ke?” Petrosi ahlamula aku ka yena: “Hi wena Kriste.” 30Hi loko avalaya lesvaku vangatshuki vabzela vanhu, hambi kuvulavula hi yena vanhwini.
Ta Yesu loko ativisa rifu ra yena
(Matewu 16:21-28; Luka 9:22-27)
31Kutani Yesu asungula kuvajondzisa aku: “N'wana-wa-Munhu atafanela kutwisiwa kuvaviseka lokukulu, asoliwa hi vakulukumba ni Vaprista lavakulu, ni Vatsali; atadlawa, atlhela apfuka hi siku ra vunharhu.” 32Avula mhaka leyi rivaleni; kutani Petrosi amutekela tlhelweni, asungula kumutshinya. 33Kambe Yesu ahundzukula; kuteloko alangutile vajondzisiwa va yena, atshinya Petrosi, aku: “Suka ka mina Sathana, hikuva awuyehleketi sva Xikwembu, uyehleketa sva vanhu ntsena.”
34Kuteloko avitanile xitshungu ni vajondzisiwa va yena, aku ka vona: “Loko munhu alava kunilandza, aatitshike, atirhwexa xihambanu xa yena, kutani anilandza. 35#Vona ni: Mat. 10:39; Luk. 17:33; Yoh. 12:25. Lweyi arhandzaka kutihlayisela vutomi bza yena atalahlekeliwa hi bzona; kambe lweyi alahlekeliwaka hi vutomi bza yena hikolaho ka mina ni hikolaho ka Evhangeli, atabziponisa. 36Hikolaho, loko munhu akota kufuwa misava hinkwayu, kambe alahlekeliwa hi vutomi bza yena svingamupfuna yini ke? 37Xana munhu angahumesa yini kuxava vutomi bza yena ke? 38Lweyi anga ni tingana hikolaho ka mina ni marito ya mina rixakeni leri ra vawosvi ni vajohi, N'wana-wa-Munhu na yena atakhomiwa hi tingana hikolaho ka munhu lweyi siku leri angatavuya akukwetsimeni ka Tatana na ali ni tintsumi letokwetsima.”
Currently Selected:
Marka 8: NTC2014
Highlight
Share
Copy
Want to have your highlights saved across all your devices? Sign up or sign in
Novo Testamento Changana © Bible Society of Mozambique, 2014.