Mwanzo 4
4
Kaina na Abeli
1Adamu akalala na muke wake Eva, naye akapata mimba, akazaa Kaina#4.1 Kaina: Jina Kaina ni kama neno la Kiebrania lenye maana “nimepata”.. Eva akasema: “Nimepata mutoto mwanaume kwa musaada wa Yawe!” 2Kisha akazaa ndugu yake Abeli. Abeli alikuwa mufugaji wa kondoo na Kaina alikuwa mulimaji. 3Nyuma ya muda fulani, Kaina akamutolea Yawe sadaka kutoka mazao ya shamba, 4naye Abeli akamutolea Mungu sadaka ya wazao wa kwanza wa kondoo wake na nyama nono. Yawe akapendezwa na Abeli pamoja na sadaka yake, 5lakini hakupendezwa na Kaina wala na sadaka yake. Basi, Kaina akakasirika sana na uso wake ukakunjamana. 6Yawe akamwambia Kaina: “Kwa nini umekasirika, na kwa nini uso wako umekunjamana? 7Ukitenda vyema hautakubaliwa? Na usipotenda vyema, basi, zambi inajificha kwa mulango; inakutamani, lakini unapaswa kuishinda.”
8Kisha Kaina akasemezana na ndugu yake Abeli. Basi, walipokuwa katika shamba, Kaina akamushambulia ndugu yake Abeli, akamwua.
9Yawe akamwuliza Kaina: “Ndugu yako Abeli yuko wapi?”
Kaina akamujibu: “Mimi sijui! Mimi ni mulinzi wa ndugu yangu?” 10Yawe akasema: “Umefanya nini? Damu ya ndugu yako inanililia kutoka katika udongo. 11Sasa wewe unalaaniwa juu ya udongo ambao ulifungua kinywa kwa kupokea damu ya ndugu yako uliyemwua. 12Unapolima udongo, hautakupatia tena mazao yake. Utakuwa mukimbizi na mwenye kutangatanga katika dunia.”
13Kaina akamwambia Yawe: “Azabu yangu ni kubwa sana. Siwezi kuivumilia. 14Angalia, leo umenifukuza kutoka udongo wenye mboleo na mbali nawe. Basi, nitakuwa mukimbizi na mwenye kutangatanga katika dunia, na yeyote atakayeniona ataniua.”
15Lakini Yawe akamujibu: “Hapana, sivyo! Atakayekuua wewe Kaina atalipizwa mara saba.” Basi, Yawe akamutia Kaina kitambulisho hata yeyote atakayemwona asimwue. 16Kisha Kaina akaondoka mbele ya Yawe, akaenda kuishi katika inchi ya Nodi,#4.16 Nodi: maana yake “kutangatanga”. upande wa mashariki wa Edeni.
17Kaina akalala na muke wake, naye muke wake akapata mimba, akazaa Enoki. Kaina akajenga muji akauita kwa jina la mwana wake Enoki. 18Enoki akazaa Iradi, naye Iradi akazaa Mehuyaeli, naye Mehuyaeli akazaa Metusaeli, naye Metusaeli akazaa Lameki. 19Lameki akaoa wanawake wawili, mumoja aliitwa Ada na mwingine Sila. 20Ada akazaa Yabali ambaye alikuwa baba ya wafugaji wanaoishi katika mahema. 21Ndugu yake alikuwa Yubali; huyo alikuwa baba ya wapiga muziki wote wanaopiga zeze na filimbi. 22Naye Sila akazaa Tubali-Kaina, ambaye alikuwa mufuaji wa vyombo vyote vya shaba na chuma. Dada ya Tubali-Kaina alikuwa Nama.
23Lameki akawaambia wake zake:
“Ada na Sila musikie sauti yangu!
Musikilize maneno ninayosema enyi wake za Lameki.
Maana niliua mutu kwa sababu ya kunipiga,
nilimwua kijana kwa kuniumiza.
24Ikiwa Kaina atalipizwa mara saba,
kweli Lameki atalipizwa mara makumi saba na saba.”
Seti na Enosi
25Adamu akalala tena na Eva muke wake, naye akazaa mutoto mwanaume, akamwita Seti akisema: “Mungu amenijalia mutoto pahali pa Abeli aliyeuawa na Kaina.”#4.25 Seti: katika kiebrania, jina hili labda linatokana na neno “kujalia” au “kubadilisha”. 26Seti naye akapata mutoto mwanaume, akamwita Enosi. Hapo ndipo watu walipoanza kumwomba Yawe kwa jina lake.
Currently Selected:
Mwanzo 4: SWC02
Highlight
Share
Copy
Want to have your highlights saved across all your devices? Sign up or sign in
Bible in Swahili Congo © Bible Society of the Democratic Republic of Congo (DRC), 2002.