Suzane 13
13
Bualu bua Suzane ne bakulumpe babidi
1Mu Babilone muvua muena Yuda kampanda, diende Yoyakime. 2Dina dia mukajende divua Suzane, muana wa Elkya. Uvua mukaji muimpe mutambe, uvua mulamate Maweja-Nangila bikole. 3Baledi ba Suzane bavua bantu bakane, bavua bamulongesha mua kunemeka mikenji ya Moshe. 4Yoyakime uvua ne bubanji buvule, uvua ne lupangu lunene pamue ne nzubu wende. Bena Yuda bavule bavua bafika kuende bua kumuebeja malu, bualu bakoshi ba nsambu bavua bamuangata ne mushinga wa bungi.
5Tshidimu atshi, bavua basungula bakoshi ba nsambu babidi munkatshi mua bakulu ba tshisamba tshia bena Yuda. Maweja-Nangila uvua mumane kubambila ne: “Bubi mbufumine mu Babilone kudi bantu bakulumpe bakoshi ba nsambu, ke bobu bavua balombola bantu.” 6Bakulu aba bavua baya misangu yonsu kua Yoyakime. Nenku bantu bonsu bavua ne bilumbu bavua babasangena anu kuende. 7Kadi, munda munya, pavua bantu bumuke, Suzane uvua uye kuendakana mu lupangu lua bayende. 8Bakulu babidi abu, bavua bamumone dituku dionsu, ubuela mu lupangu wendakana, bavua bamualakana. 9Kulubakanabu bikole. Kubengabu mua kutendelela Mvidi Mukulu, kulekelabu kabidi mua kunemeka mikenji yende miakane.
10Bonsu babidi muoyi kubakuata kapia bua Suzane. Kadi kabavua bambilangana bualu buvua bubatonde abu to. 11Bualu muntu yonsu kavua ne dikamakama dia kuambila mukuabu muvuaye ujinga mua kubuelela Suzane mu nzubu to. 12Dituku dionsu bavua amu bamutentekela bikole bua kumumona. 13Munda munya, dituku dikuabu, kuambilanganabu ne: “Diba dia kudia diakumbanyi, tuyayi pambelu.” 14Pashishe bamane kulayangana, kunyima kua katupa, bonsu babidi kupingana tshiakabidi muaba awu, kumonanganabu mpala ne mpala. Kumvuijanganabu muvua Suzane mubasamine muoyi. Pashishe kumvuanganabu mua kukeba dibadidibu mua kumujikidila nkayende.
Bakulu badi basonguela Suzane ne: mmuena buendenda
15Nanku bakulu babidi abu bavua amu bakeba mushindu wa kupeta Suzane. Dimue dituku, Suzane kuya mu lupangu amu bu muvuaye ubuelamu matuku makuabu. Uvua ne bakaji bena mudimu babidi, kadi Suzane uvua musue kuowa mayi, bualu munya uvua mukole. 16Mu lupangu kamuvua muntu, pa kumusha amu bakulu babidi abu bavua basokome bamutentekela. 17Suzane kutuma bakaji bena mudimu babidi abu, bua kuyabu kumukebela mafuta ne manananshi. Pashishe kubambilaye ne: “Nuinjile tshiibi tshia lupangu bua mmone mua kuowa mayi.” 18Bakaji bena mudimu abu kuenzabu muvuaye mubambile. Kuinjilabu biibi binene bia ku lupangu, kupatukilabu ku tshiibi tshia ku luseke bua kuya kukebela Suzane bivuaye muambe. Bobu kabavua bamone bakulu babidi abu to, bualu bavua basokome. 19Kadi diakamue, bobu bamane kuya, bakulu babidi kulonzoka panshi, kunyema batangila kudi Suzane, 20bamba ne:
— Bibi mbinjila. Muntu kena mua kutumona to. Tudi tukualakana bikole. Anyishe bua tushale nebe. 21Wewe mubenga, netukusonguele ne: mulume mukuabu uvua mushale kubuelela Suzane mu nzubu, pavuaye mutume bakaji bena mudimu bende.
22Suzane kuitshija mioyi wamba ne:
— Ndi mu dikenga nseke yonsu. Meme muenze binudi nuamba abi, badi bamfundila tshibawu tshia lufu bua buendenda. Meme tshiyi muenze nanku, tshiena mua kupanduka mu bianza bienu to. 23Kadi mbimpe bua meme kupila tshiyi muenze bualu bubi, pa mutu pa meme kuenzela Maweja-Nangila bibi.
24Nanku Suzane kuela lubila lukole, bakulu kabidi bavua bela mbila bua kumufunda. 25Umue wa kudibu kunyema lubilu bua kunzulula biibi bia ku lupangu. 26Diakamue bena mudimu bavua mu nzubu bumvue mitoyi mu lupangu kuambulujabu lukasa mu lupangu ku tshiibi tshia ku mpenga, bua kumona tshivua tshienzekela Suzane. 27Bakulu kulondelabu bantu muvua bualu, bena mudimu kumvua bundu, bualu kabavua banji kumvua bajana Suzane ne udi muenze bualu bua mushindu ewu.
28Butshia, pavua bantu basangila kua Yoyakime, bayende wa Suzane, bakulu babidi abu kufikabu, bamane kushindika mua kufundila Suzane tshibawu tshia lufu bu muvuabu ne meji mabi. Bantu bonsu bateleja, bobu kutumabu diyi ne:
29— Bikidishayi Suzane muana wa Elkya, muena kua Yoyakime.
Bobu kutumabu bantu bua kumuangata. 30Suzane kufika ne baledi bende ne bana bende kabidi ne bena mutumba nende bonsu. 31Suzane uvua muimpe, ne mubidi mufumfule kabidi. 32Bakulu, kabayi ba nsongu, kutumabu diyi bua kuvulabu Suzane tshitambala tshivuaye muvuale, bua bamone mua kumujoja bimpe. 33Bena diku diende bonsu, kabidi ne bantu bonsu bavua bamumone bavua amu badila.
34Bakulu babidi aba kujuka kulu munkatshi mua bantu, kuteka bianza biabu pa mutu pa Suzane. 35Yeye uvua udila utangila kulu. Mu kondu kende ka munda uvua utekemena amu kudi Maweja-Nangila.
36Bakulu kumubandabu ne:
— Tuetu tuvua tuendakana nkayetu mu lupangu. Suzane ewu kufika ne bakaji babidi bena mudimu. Kutumaye diyi bua binjile biibi bia lupangu, pashishe kutumaye bena mudimu bende abu. 37Nsongalume uvua musokome mu lupangu, kuyaye kudi Suzane, kulalaye nende. 38Tuetu tuvua mu ditumba dia lupangu. Patuamonyi bualu bubi nenku, tuanyemi lubilu batangila kuvuabu. 39Tuetu kubajikidila bangatangana. Kafiwua mua kukuata mulume, bualu uvua mutupite bukole. Nanku kunzululaye tshiibi kudielaye lubilu pambelu. 40Kadi tuakuatshi anu Suzane. Tuvua bamuebeja dina dia muntu awu. 41Kadi kena musue kudiamba to. Ke mutudi bajadike bualu abu nanku.
Bu muvuabu bakulu kabidi bandumbulula, bantu bonsu bavua mu tshisangilu bavua bitabe. Ke kufundilabu Suzane tshibawu tshia lufu. 42Suzane kuela lubila lukole wamba ne:
— Eyi! Mvidi Mukulu wa kashidi! Wewe udi mumanye bidi bisokome, udi mumanye bualu bonsu bangabanga ne kabuyi buanji kuenzeka! 43Udi mumanye mudi bantu aba banshiminyina bualu. Udi mumanye mundi mfua tshiyi ne tshindi muenze ku bionsu bidibu banshiminyina.
Daniyele udi ubingisha Suzane
44Maweja-Nangila Mvidi Mukulu kumvua dilomba dia Suzane. 45Diba dika-vuabu baye ne Suzane bua kushipa, Mvidi Mukulu kusonsola mueyelu wa tshijila wa nsongalume mukuabu diende nDaniyele. 46Muana awu kuelaye lubila lukole ne:
— Ndi mubenge bua kubuelakana mu tshilumbu tshia lufu lua mukaji ewu!
47Bonsu kumutangila bamukonka ne:
— Udi musue kuamba tshinyi?
48Kadi Daniyele kujuka panshi munkatshi muabu kuamba ne:
— Bena Izrayele, munudi mua kuikala bantu batshimbakane mbishi? Nudi amu mifundila mukaji muena Izrayele tshibawu tshia lulu, kanuyi banji kukonkonona bualu, babujadika. 49Pinganayi ku tubadi. Bantu aba mbashiminyine Suzane tshilumbu.
50Bantu bonsu kupingana kabidi lukasa ku mbadi. Kadi bakulu bakuabu kuamba Daniyele ne:
— Luaku usombe munkatshi muetu emu, utuambile muudi wela meji, bualu Mvidi Mukulu mmumane kukuleja mudi malu a bantu bu muntu mumane kulala panu bikole.
51Daniyele kubambila ne:
— Tekayi bantu babidi aba kule, bikale bashilangane mutantshi. Meme nembalumbuluishe ku muntu ku muntu.
52Bamane kuenza nanku, kubikilaye umue wa kudibu, kumuamba ne:
— Kia! Wewe udi ukulakajila amu mu bubi! Dinyoka dia mibi yonsu iuvua mumane kuenza, didi pambidi pebe mpindiewu, 53kuena ukosa bilumbu pa biobi to, upisha badi kabayi ne tshilumbu, ubingisha bena tshibawu. Maweja-Nangila mmuele mukenji ne: Kuena mua kufundila muntu udi kayi ne tshilumbu nansha udi kayi ne bualu tshibawu tshia lufu nansha. 54Kadi uvua mpindiewu mujikidile Suzane ulala ne mulume mukuabu, ungambile, uvua muinshi mua mutshi kaayi?
Mukulu kuandamuna ne:
— Muinshi mua ndunga.
55Daniyele kuamba ne:
— Bulelela udi ushima, amu wewe nkayebe udi udikebela lufu. Bualu mutumibue wa Mvidi Mukulu ukadi mumane kupeta bumfumu bua kudi Mvidi Mukulu bua kukupanda mu bipesa bibidi.
56Daniyele kupingaja mukulu awu, kutuma diyi bua bafike ne mukulu mukuabu, Daniyele kumuambila ne:
— Wewe udi ndelanganyi ya Kenaane, kuena wa mu ndelanganyi ya Yuda. Buimpe buakushimi, kabidi dialakana diebe ndikudimune muoyi webe. 57Nuvua mua kuenza nanku ne bakaji ba mu bukalenga bua kale bua bena Izrayele. Nuvua nubangata bavua bakuatshika bowa, benda nenu tshiendenda. Kadi mukaji udi mu ditunga dia Yuda, kena mua kuanyisha bubi bunudi nuenza to. 58Mpindiewu ungambile, uvua mumujikidile wenda buendenda muinshi mua mutshi kaayi?
Mukulu awu kuandamuna ne:
— Muinshi mua lusanga lua mabeji a bungi.
59Daniyele kumuamba ne:
— Bulelela udi ushima, udi mudikebele nkayebe lufu! Bualu mutumibue wa Mvidi Mukulu udi muindile, udi mukuate muela wa myita bua kukukosa mu bitupa bibidi, wewe kufua. Neanushipe nuenu bonsu babidi.
60Bantu bonsu kuela mbila mikole, batumbisha Mvidi Mukulu bua padiye usungidila badi bamutekemena. 61Pashishe bantu kukudimukilabu bakulu babidi abu. Bualu Daniyele uvua mumane kubapisha bilondeshile ku miaku ivuaye mubakonke, bobu bamuandamuna. Bakabakengesha bibi amu bu muvuabu bela meji mua kuenzela muanabu bibi. 62Nanku kubashipabu bilondeshile mudi mikenji ya dituku adi. Muntu uvua kayi ne bualu kupanda ku lufu.
63Elkyane mukajende kutumbisha Mvidi Mukulu. Kabidi Yoyakime ne bana babu bonsu bavua bela Mvidi Mukulu tuasakidila, bualu bantu kabavua basangana Suzane ne kalu kabi. 64Bituadija dituku adi, bantu bonsu kuangata Daniyele ne mushinga muvule, kumunemekabu bikole.
Currently Selected:
Suzane 13: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996