Tshibangidilu 32
32
1Butshia Labane ubika ne dinda dionsu, kulayanganaye ne bana bende pamue ne bikulu bende bonsu. Kubajingila dikasa dimpe. Kupinganaye kuende.#32.1 32.1-33 mmumue ne 31.55—32.32 mu mikanda mikuabu.
Yakobe udi udilongolola bua kumonangana ne Esawu
2Yakobe kutungunuka ne luendu, kusambakenaye ne batumibue ba Mvidi Mukulu. 3Yakobe ubamona, kuelaye diyi dikole wamba ne:
— Muaba ewu mmitanda ya Mvidi Mukulu. Kuinyikaye muaba awu ne: Mahanayime.#32.3 Mahanayime: muaku awu udi umvuija ne: mitanda ibidi. Ke muaba uvua dishiya dia Yardene pabuipi ne musulu wa Yaboke. Kadi kabena bajadike menemene muaba uvua musoku awu to.
4Ke Yakobe kudianjila kutuma bantu bende ne mukenji, bua kumonangana ne mukuluende Esawu, uvua mu mpata ya Edome mu ditunga dia Seyire.#32.4 mpata ya Edome ne ditunga dia Seyire: ke miaku ibidi idi ituleja ditunga dia momumue, didi kuinshi kua Mayi manene a luepu ku luseke lua kudi diba dipatukila. 5Yakobe kuelela bantu bavuaye mutume abu mukenji ne:
— Numanyishe Esawu ne: “Muena mudimu webe Yakobe udi ukuambila ne: meme mvua kua Labane matuku onsu awu. Mpindiewu ndi musue kupingana. 6Ndi ne ngombe, mpunde, mikoku, mbuji ne bapika balume ne bakaji. Ndi ntuma bantu banyi ne mukenji kuudi wewe mukuluanyi, mukalenga wanyi, bua ungakidile bimpe.”
7Bantu bavua Yakobe mutume ne mukenji bua kumonangana ne Esawu, kupinganabu, bambila Yakobe ne:
— Tuamonanganyi ne mukuluebe Esawu. Udi ulonda ne bantu nkama inayi bua kusambakena nebe.
8Yakobe kupampakana bikole, bowa kumuenzabu. Kutekaye bantu bavuaye nabu, mikoku, mbuji, ngombe ne tumelu mu bisumbu bibidi bibidi. 9Kuelaye meji ne: “Pikala Esawu mua kubunda tshisumbu tshimue mvita, tshikuabu netshimunyeme.” 10Yakobe kutendelela Mvidi Mukulu, wamba ne:
— Mvidi Mukulu wa kaku wanyi Abrahame, ne wa tatu wanyi Izake, unteleje! Uvua mungambile ne: “Upingane kuenu mu ditunga dienu. Meme nenkulame, neupete dikasa dimpe.” 11Maweja-Nangila, tshiena mukumbanyine dikasa dimpe diwudi muntutshishe meme, muena mudimu webe, kuyi upungila. Bualu mvua musabuke musulu wa Yardene ewu anu ne dikombu. Kadi mpindiewu nkadi ne bintu bisumbu bibidi ebi. 12Nanku ndi nkutendakena ne: unsungidile kudi mukuluanyi Esawu. Ndi ne bowa, bualu udi mua kumbutula ne bakaji ne bana. 13Wewe uvua mundaye ne: “Nenkulame, neupete dikasa dimpe. Nemvudije ndelanganyi yebe bu lusenga lua ku muelelu wa mayi manene, ludi muntu kayi mua kubala.#32.13 Tangila 28.14; fuanyikija ne 22.17.”
14Yakobe kulala muaba awu. Kusungulaye bimuna biende bikuabu bua kupesha mukuluende Esawu: 15ke mashina a mbuji nkama ibidi ne mpumbu makumi abidi; mikoku ya mashina nkama ibidi ne ya bimpanga makumi abidi; 16tumelu tukaji makumi asatu, ne bana batu batshidi bamua mabele; ngombe mikaji makumi anayi, ne ngombe milume dikumi; mpunde mikaji makumi abidi, ne mpunde milume dikumi. 17Yakobe kuabanyina bena mudimu bende bimuna abi. Muena mudimu yonsu uvua ne tshiende tshisumbu. Kubambilaye ne:
— Dianjilayi kumpala. Nuikale bashilangane mutantshi ku tshisumbu ne ku tshisumbu.
18Pashishe kuambilaye muena mudimu uvua ne tshisumbu tshia kumpala ne:
— Wewe musambakene ne mukuluanyi Esawu, yeye mukuebeje ne: “Udi muena mudimu wa nganyi? Udi uya penyi? Bimuna bionsu ebi mbia nganyi?” 19Umuandamune ne: “Mbia muena mudimu webe Yakobe. Bintu ebi ke mulambu udiye ukutumina wewe, mfumuende Esawu. Yakobe muine udi utulonda panyima apa.”
20Balami ba tshisumbu tshibidi, ba tshisatu ne bonsu bavua balonda panyima, Yakobe uvua mubambile anu meyi a mushindu umue, usakidila kabidi ne:
— Panuasambakena ne mukuluanyi Esawu, 21numuambile ne: “Muena mudimu webe Yakobe udi ulonda panyima apa.”
Yakobe uvua udiabakena ne: “Bintu bindi mutume ebi, mbua kutuyisha tshiji tshia mukuluanyi Esawu. Nanku patuikala mua kumonangana nende, misangu mikuabu udi mua kungakidila ne disanka.” 22Yakobe mumane kutumina Esawu milambu, kushalaye mulale muaba awu butuku abu.
Yakobe udi uluangana ne Mvidi Mukulu
23Butuku abu, Yakobe ubika, kuangataye bakaji bende babidi, ne bana bende dikumi ne umue. Kubasabulaye musulu wa Yaboke#32.23 Yaboke: ke kasulu kadi kabuela mu musulu wa Yardene ku luseke ludi diba dipatukila luawu. ku dilobu. 24Kusabulaye ne bintu bionsu bivuaye nabi. 25Yakobe kushala nkayende dishiya. Muntu kampande kuluangana nende mvita too ne muatshi butuku. 26Muluishi awu#32.26 Muluishi wa Yakobe: tangila kabidi kan. 29 ne kan. 31; Osh 12.5. umo na ne: Yakobe mmumpite bukole, kutuutaye Yakobe ku tshikundukundu, kutshikoyobola. 27Pashishe muntu kampande awu kuambila Yakobe ne:
— Ndekela nya, bualu butuku mbumane kutshia.
Yakobe kuandamuna ne:
— Bua meme kukulekela amu wewe mungele lupemba.
28Yeye awu kukonka Yakobe ne:
— Dina diebe nnganyi?
Yakobe kumuandamuna ne:
— Ndi Yakobe.
29Yeye awu kuambila Yakobe ne:
— Kabakukubikila kabidi ne: Yakobe to. Nebakubikile ne: Izrayele. Bualu udi muluangane mvita ne Mvidi Mukulu,#32.29 Izrayele: mu muakulu wa bena Ebrewu dina edi didi diumvuija ne: kuluangana mvita ne Mvidi Mukulu; tangila kabidi 35.10. muluangane kabidi ne bantu, wewe kubatshimuna.
30Yakobe kumuebeja ne:
— Kadi wewe mene, dina diebe nnganyi?
Kampande awu kumuandamuna ne:
— Udi musue kumanya dina dianyi bua tshinyi?#32.30 Fuanyikija ne Bal 13.17-18
Pashishe kuelaye Yakobe lupemba. 31Yakobe kuamba ne:
— Ndi nginyika muaba ewu dina ne: Penuyele, mpala wa Mvidi Mukulu, bualu ndi mumonangane ne Mvidi Mukulu mpala ne mpala, meme kushala ne muoyi.
32Diba dipatuka, Yakobe kumuka ku dilobu dia Penuyele, wenda utebuka, bualu tshikundukundu tshivua tshikoyoboke. 33Ke padi bena Izrayele kabayi badia munyinyi wa mu tshikundukundu tshia nyama too ne ku lelu, bualu bavua bakoyobole Yakobe tshikundukundu.
Currently Selected:
Tshibangidilu 32: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996