Tshibangidilu 28
28
1Izake kubikila Yakobe, kulayangana nende, umuambila ne:
— Kuena mua kusela mukaji wa bena Kenaane to. 2Uye ku tshitupa tshia ku mutu kua misulu tshia Mezopotamiya, kumbelu kua kakuebe Betuyele, muledi wa mamuebe. Usele mukaji wa mu ditunga adi, muana wa mansebebe Labane. 3Mvidi Mukulu wa bukole buonsu akuele lupemba mu dibaka diebe. Ulele bana ba bungi, ushale nkambua wa bisamba bivule. 4Mvidi Mukulu akuele wewe ne ndelanganyi yebe lupemba, muvuaye muele Abrahame, bua ditunga diudi usomba bu muenyi edi, didi Mvidi Mukulu mupeshe Abrahame, dishale diebe.#28.4 Tshib 17.4-8.
5Izake kutuma Yakobe ku tshitupa tshia ku mutu kua misulu tshia Mezopotamiya, kua Labane, muana wa Betuyele, muena Arame. Labane uvua muanabu ne Rebeka, mamuende wa Yakobe ne Esawu.
6Esawu kumona ne: Izake mmulayangane ne Yakobe, mumutume ku Mezopotamiya bua kusela mukaji, mumukandike bua kasedi mukaji wa bena Kenaane. 7Kumonaye kabidi ne: Yakobe mmuitabe diyi dia tatuende ne mamuende, muye ku Mezopotamiya. 8Nanku kujadikaye ne: Tatu kena musue bana ba bakaji ba bena Kenaane to. 9Ke muvuaye musue kusela Mahalata#28.9 Tangila Tshib 26.34. muana wa Ismayele. Ismayele uvua muana wa Abrahame. Mahalata uvua muanabu ne Nebayote.
Yakobe udi ulota tshilota
10Yakobe kumuka ku Bersheba, kuya ku Arane. 11Butuku buila, kuangataye dibue divua muaba awu, kudisangika ku mutu bua kulala tulu. 12Pawaye mulale, kulotaye tshilota. Kumonaye tshibandilu tshitue mulu tshitue panshi. Batumibue ba Mvidi Mukulu bavua babanda bapueka#28.12 Fuanyikija ne Yow 1.51. ku tshibandilu atshi. 13Kumonaye kabidi Maweja-Nangila muimane kumpala kuende, umuambila ne:
— Yakobe, ndi Maweja-Nangila, Mvidi Mukulu wa kakuebe Abrahame, kabidi Mvidi Mukulu wa Izake. Ndi nkulaya ne: “Nenkupeshe, wewe ne ndelanganyi yebe, buloba buudi mulale ebu.#28.13 Buloba buudi mulale ebu: tangila Tshib 13.14-15.” 14Ndelanganyi yebe neyivulangane bu lusenga lua pa buloba. Neyimuangalake nseke yonsu inayi ya buloba. Nengele bisamba bionsu bia pa buloba lupemba mu dina diebe#28.14 mu dina diebe: tangila Tshib 12.3 ne diumvuija. ne dia ndelanganyi yebe. 15Ndi nebe. Nenkulame muaba onsu uudi uya. Nenkupingaje kabidi mu ditunga edi. Nenkumbaje malu onsu andi mukulaye. Tshiena nkulekela to.
16Yakobe utabuluka ku tulu, kukemaye wamba ne:
— Bulelela, tshiena mumanye to! Kadi Maweja-Nangila udi muaba ewu!
17Bowa kumuenza. Kuambaye kabidi ne:
— Mbimpe kunemeka muaba ewu, bualu ke mudi nzubu wa Mvidi Mukulu, ne tshibuelelu tshia mu diulu.
18Yakobe kubika dinda dionsu, kuimanyika dibue divuaye musangike ku mutu adi, kudifita manyi ku lusongu, bua dikale dia tshijila. 19Yakobe kuinyika muaba awu ne: Betele, mmumue ne: Nzubu wa Mvidi Mukulu. (Muaba awu bavua baubikila ku kale ne: Luze.) 20Yakobe kulaya Maweja-Nangila ne:
— Wewe muikale nanyi, mundame bimpe mu luendu luanyi, mumpeshe biakudia ne bia kuvuala, 21mumpingaje bimpe kumbelu kuetu, nanku wewe Maweja-Nangila newikale Mvidi Mukulu wanyi. 22Dibue dindi muimanyike edi ndia tshijila. Nedikale nzubu wa Mvidi Mukulu. Nenkupingajile tshia dikumi tshimue tshia bintu bionsu biudi mumpeshe.
Currently Selected:
Tshibangidilu 28: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996