2 Bamakabe 8
8
Yudase Makabe udi ujula mvita
1Yudase Makabe#8.1 Yudase Makabe: tangila 5.27; 1 Mak 2.4 ne diumvuija. ne bavuaye nabu kuenda ku musoku ku musoku mu musokoku. Kubikilabu bana babu, kabidi ne bonsu bavua balonda malu a bena Yuda, bua basangile kaba kamue. Bantu kufika ku binunu bisambombu. 2Kusengelelabu Maweja-Nangila bua ambuluishe tshisamba tshiende tshidi bantu bonsu bakengesha, bua afuile nzubuende udibu banyanga ne mikiya kudi bantu ba matunga a bende luse, 3bua umvue luse bua tshimenga tshidibu banyanga bashiya munda mutupu, kabidi bua ateleje mashi adi amuela lubila lua kusombola.#8.3 mashi: tangila Tshib 4.10; Yez 24.7 ne diumvuija. 4Bavua bamulomba kabidi bua atuluke bana badi kabayi bualu bavuabu bashipe kudi bantu babi, pashishe adisombuele kudi bantu bavua bapepeja dina diende. Mvidi Mukulu abaleje nanku mudiye ubenga bikole bubi.
5Makabe mumane kulongolola tshiluilu tshiende bimpe, bukua matunga kumutshina, bualu tshiji tshia Maweja-Nangila tshikavua tshiandamuka luse. 6Uvua ubuela mu bimenga, kabidi mu misoku bantu kabayi badilongolola, ubiosha, wasa mu miaba milenga. Utua unyoka muluishi bikole. 7Bua kubabunda uvua ubanga mvita amu butuku bua miidima imuambuluishe. Lumu lua bulobu buende kuya kule.
Yudase udi utshimuna Nikanore
(1 Mak 3.38—4.27)
8Filipe, mulombodi wa malu a mukalenga mu Yerushalayime, umona mukavua Yudase wenda uya kumpala ku kakese ku kakese utshimuna amu kutshimuna, kufundilaye Ptolemeye, mulombodi wa Siriya#8.8 Filipe: tangila 5.22 ne diumvuija. ne Fenisiya mukanda bua avue kumuambuluisha mu dina dia mukalenga. 9Diakamue, Ptolemeye uvua usungula Nikanore, muana wa Patrokle, umue wa ku “balunda ba Mukalenga.#8.9 balunda ba Mukalenga: tangila 1 Mak 2.18 ne diumvuija.” Kumutumaye ne tshiluilu tshia bantu bapite pa binunu makumi abidi ba mu matunga onsu, bua baye kubutula tshisamba tshia bena Yuda tshionsu. Kusakidilaye kuvuabu Ngorjiyase, munene wa basalayi mumanyi mupiluke wa malu a mvita.
10Diba adi, Nikanore uvua muele meji a ne: nedikuate bena Yuda, netubapane bua tuye kufuta mulambu wa kilo 54.000 ya nkanu mitoke ya mushinga mukole#8.10 Nkanu ya bungi ivuabu bapesha bena Rome, ivua mua kuikala dibanza divua nadi tatuende wa Antiyokuse Epifane. kudi mukalenga wa bena Rome. 11Kubikidishaye bena mu bimenga bia pabuipi ne mayi manene bua batua kusumba bapika ba bena Yuda. Utua mubalaye bua kubapanyisha bantu makumi tshitema ku kilo 27 ya nkanu mitoke ya mushinga mukole. Kadi kavua muanji kumanya dinyoka divuaye ne bua kupeta kudi Mvidi Mukulu muena bukole buonsu to.
12Bavua bamanyisha Yudase mutua Nikanore wenda usemena pabuipi ne tshiluilu tshiende. Yudase kumanyisha bantu bende. 13Nenku bonsu bavua ne bukata, kabayi bitaba ne Mvidi Mukulu udi unyoka benji ba mibi, kunyemabu lubilu, kuya mu miaba mikuabu. 14Bakuabu kupana bintu bionsu bivuabu bashala nabi. Kusengelelabu Maweja-Nangila bua abapandishe kudi Nikanore, muntu mubi ewu, uvua mumane kubasumbisha bu bapika kabayi banji kubanga mvita. 15Kusangilabu bua Mvidi Mukulu abapandishe, nansha kabiyi bua dinanga didiye ubananga nadi, kadi nansha bua ndondu iwaye mutue ne bakakuabu, kabidi yeye Mvidi Mukulu wa tshijila, muena bulenga, ke uvua mubasungule bua bashale bantu bende.
16Yudase Makabe kusangisha bantu bende binunu bisambombu, kubabela bua kabatshinyi baluishi, kabatangidi bungi bua benyi badi babaluisha kapayi bualu, kadi bua baluangane ne bukitu. 17Uvua ulomba bua bavuluke muvua baluishi babu banyanga nzubu wa Mvidi Mukulu, babutula tshimenga tshia Yerushalayime, bashipa bibidilu bia bena Yuda. 18Kusakidilaye miaku ya ne: “Bobu badi batekemena ku bia lufu biabu ne kudi mianda yabu ya tshikama. Kadi tuetu tudi tutekemena kudi Mvidi Mukulu muena bukole buonsu.#8.18 Fuanyikija ne Mis 20.8. Amu yeye ubanduluka, udi utonkola bonsu badi batuluisha, bobu ne biluilu bia pa buloba bujiijia!” 19Yudase kubavuluija muvua Mvidi Mukulu muambuluishe bankambua betu: mu tshikondu tshia Senakeribe, baluishi#8.19 Tangila 2 Bak 19.35. babu binunu lukama ne makumi muanda mukulu ne bitanu kufua. 20Mu ditunga dia Babilone#8.20 Kabena batela nwita ayi muaba mukuabu to. bavua baluisha bena Ngalate. Bena Yuda bavua baluangana bavua binunu muanda mukulu, babambuluisha kudi bena Masedoniya binunu binayi. — Nanku, bantu binunu muanda mukulu kutshimuna baluishi binunu lukama ne makumi abidi, kupawula bintu bivule. Bavua batshimuna ku diambuluisha divuabu bapeta kudi Muena kulu.
21Miaku ya Yudase kukolesha bena mvita ku muoyi. Bantu kudisuika bua kufuila mikenji ya Mvidi Mukulu ne ditunga diabu. Yudase kutapulula bena mvita mu bitupa binayi. 22Kutekaye ku mutu kua tshisumbu tshionsu bana babu: Shimeyone, Yozefe ne Yonatane, yeye nkayende kulombola tshisumbu tshinayi. Muntu yonsu uvua ne bantu tshinunu ne nkama itanu. 23Pashishe kutuminaye Eleyazare diyi dia kubala tshitupa tshia mukanda wa tshijila.#8.23 mukanda wa tshijila: fuanyikija ne 1 Mak 3.48. Mumane kuamba mudibu mua kudimanyisha ku miaku ya ne: “Mvidi Mukulu neatuambuluishe,” uvua uya ne tshisumbu tshia kumpala tshia basalayi, bua kubunda Nikanore.
24Mvidi Mukulu muena bukole bonsu kutua ku tshia bena Yuda. Kushipabu baluishi bapite pa binunu tshitema. Kutapabu bena mvita ba Nikanore mputa bapite bungi, kubipata bonsu. 25Kunyengabu lupetu luvua bantu bafika nalu bua kubasumba. Bamane kubalondesha mutantshi mule, kupinganabu, bakolesha luendu. 26Kabawa basue kubalondakaja mutantshi mule, bualu bavua dia muladilu wa dituku dia Dikisha. 27Bamane kuangula bia lufu bia baluishi, kabidi bamane kupawula bintu bivua pambidi pa bafue, kuenzabu tshibilu tshia dituku dia Dikisha. Bakela Mvidi Mukulu tuasakidila, batumbisha Maweja-Nangila bu mudiye mubaleja tshiakabidi luse luende. 28Dituku dia Dikisha dipite, kuabanyanganabu tshitupa tshia bintu bia mu mvita kudi bantu bavua bajimija bintu bipite mu mvita, kudi bakaji bakamba ne kudi bana banshiya. Nenku tshitupa tshiwa tshishala kuabanyanganabu munkatshi muabu ne mua bana babu. 29Bamane kulongolola malu nanku, bavua basangila bonsu pamue bua kusengelela Maweja-Nangila muena luse bua afuile bena mudimu bende luse lua kashidi.
Yudase udi utshimuna Timote
30Pashishe Yudase ne bena mvita bende kuluisha bena mvita ba Timote ne ba Bakidese.#8.30 Timote: tangila 1 Mak 5.6. — Bakidese: tangila 1 Mak 7.8. Kushipabu bantu bapite pa binunu makumi abidi, kunyengabu nzubu minene ya bimana bitumbuke. Kuabanyabu bintu bipite bungi bivuabu bapeta mu mvita mu bitupa bibidi bia momumue, tshimue buabu bobu nkayabu, tshikuabu bua bantu bawabu bakengesha mu mvita, bua bana banshiya, bakamba ne bantu bakulakaja. 31Bobu bamane kusangisha bia lufu bia baluishi, kubitekabu mu miaba mibikumbanyine. Kadi bintu bivua bishala, kuyabu nabi mu Yerushalayime. 32Kushipabu mulombodi wa bena mvita bavua balamata Timote, muntu mubi uvua muenzele bena Yuda bibi menemene. 33Pa wabu benza tshibilu tshia ditshimuna muabu, kuoshabu bantu bavua buosha biibi bia nzubu wa Mvidi Mukulu. Kuoshabu kabidi Kalistene#8.33 Diosha dia biibi bia nzubu wa Mvidi Mukulu, divua dienzeka pavuabu baluangana nwita mikole, idi mifunda mu 1 Mak 1.29-35, tangila kabidi mu 2 Mak 1.8. — Kalistene: muntu ewu kena mumanyike to. uvua munyeme mu nzubu mukese. Ke muvuaye mupete difutu dia pa buenzayi buende nanku.
Nikanore udi unyemena ku Antiyokiya
34Nikanore, mushipianganyi wa kashidi, uvua mufike ne bangenda mushinga tshinunu bua kusumba bena Yuda. 35Bavua bamutshimuna ku diambuluisha dia Maweja-Nangila, kudi bantu bavuaye mupepeje. Kuvulaye tshilamba tshia bukalenga, kunyemaye nkayende, ulalakana bu mudi mupika unyema mfumuende. Bu nuwuaye mupete dikasa dimpe, kufikaye ne mu Antiyokiya. Kadi bavua bamane kubutula tshiluilu tshiende tshijima. 36Yeye uvua mulaye bena Rome bua kubalambula tshitadi pikalaye musumbishe bena lukanu bavuabu mua kukuata mu Yerushalayime, ukadi wamba ne: bena Yuda badi ne udi ubasungidila. Kabena mua kutapa bena Yuda, bualu badi balonda meyi a mubasungidi ewu.
Currently Selected:
2 Bamakabe 8: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996