2 Bamakabe 3
3
Badi belela Shimeyone tshitungu tshibi
1Tshikondu tshia Onyase,#3.1 Onyase III, muana wa Shimeyone II (tangila Sir 50) ndelanganyi ya Sadoke (tangila Yez 40.46 ne diumvuija). Misangu mikuabu yeye ewu ke udi mu Dan 9.26; 11.22. mutuangaji munene, mu Yerushalayime, tshimenga tshia tshijila, bantu bavua basombe mu bupole, balama meyi a Mvidi Mukulu. Bualu Onyase uvua munemeki wa Mvidi Mukulu, mubenga bubi. 2Bakalenga mene bavua banemeka muaba wa tshijila, kabidi bafila milambu mipite buimpe. 3Ke muvua Seleyukuse, mukalenga wa Aziya#3.3 Seleyukuse IV, dina diende dikuabu Filopatore mukalenga wa bena Seleyuside (tangila diumvuija mu 1 Mak 1.8), bituadije mu 187 too ne mu 175 bgbg ne Y.K. — mukalenga wa Aziya: tangila 1 Mak 8.6 ne diumvuija. ufila biende biuma bua kufuta milambu ivuabu balambula.
4Kadi bavua bateka mutuangaji mukuabu dina diende, Shimeyone, wa mu tshisumbu tshia Bilga,#3.4 Tshisumbu tshia bena Bilga tshivua tshimue tshia ku bisumbu makumi abidi ne binayi bia batuangaji (tangila 1 Kul 24.7-18). mfumu wa balombodi ba midimu ya nzubu wa Mvidi Mukulu. Yeye ewu uvua mupangakane ne mutuangaji munene Onyase, pa bualu bua dikenketa dia tshisalu tshia mu tshimenga. 5Kadi mutuaye kayi mua kumyuangana ne mutuangaji Onyase, kuyaye kudi Apolonyuse, muana wa Traseyase. Tshikondu atshi uvua mulombodi wa Siriya#3.5 Tangila diumvuija mu 1 Mak 7.8. ne wa Fenisiya. 6Kumulondelaye mutua biuma bitule mu tshibutshilu tshia nzubu wa Mvidi Mukulu, kabayi nansha mua kutabala. Kadi bine bionsu abi kabitua amu bua milambu to. Mbimpe kubinyenga kubipesha mukalenga.
Badi batuma Eliyodore mu Yerushalayime
7Patua Apolonyuse muye kudi mukalenga kumulondela bualu bua mpetu, uvua mumuambile bua bungi bua mpetu itua Shimeyone mumumanyishe. Nanku mukalenga kutuma Eliyodore, mulombodi wa kumpala wa mu bukalenga buende, bua kuya mu Yerushalayime, kumuangatshila mpetu ayi. 8Diakamue Eliyodore kuya bu muntu udi uya kukenketa buloba bua Siriya ne Fenisiya, kadi pabi bikale bua kuenza tshitata mfumu mumutumine.
9Eliyodore ufika mu Yerushalayime, kumuakidilabu bimpe kudi mutuangaji munene ne kudi bena mu tshimenga. Kubajikuilaye kendela kende ne tshidiye mumvue bua mpetu ya mu nzubu wa Mvidi Mukulu. Kubakonkaye ne: bualu butotabu batulondela mbua bushuwa anyi? 10Mutuangaji munene kumuleja ne: bidi mukuetu Shimeyone muambe mbia dishima. Kumvuijaye mutata mpetu ivuabu balame mikale ya bakaji bakamba ne bana ba nshiya. 11Tshitupa tshia lupetu tshivua tshia Irkane, muana wa Tobiyase, muntu wa lumu. Nenku tshivua Shimeyone, muntu mubi awu muambe mbualu bua dishima. Kabidi muvua amu kilo binunu dikumi ne tshimue ya nkanu mitoke ya mushinga mukole ne kilo binunu bitanu ne nkama itanu ya mpawungi.#3.11 Bionsu ebi bivua bianyisha kudi mikenji (Diel 14.9; 27.19). — Irkane, wa mu diku dia Tobiyade, bavua balombola buloba bua Amane dishiya dia Yardene (fuanyikija ne 1 Mak 5.13 ne diumvuija). 12Mutuangaji kumvuija kabidi ne: kamuena mushindu wa kuanyisha bua muntu kampanda angate biuma bidi bantu bateka mu muaba wa tshijila, bualu bavua bamanye ne: muaba wa nzubu wa Mvidi Mukulu mmuaba udi bintu kabiyi mua kunyanguka, mmuaba udi kabidi ne lumu pa buloba bujima.
Bena mu Yerushalayime badi mu dipampakana
13Kadi Eliyodore uvua amu musue kuangata mpetu yonsu bua ishale mu dina dia mukalenga, bu muvua meyi a mukalenga mamufundila. 14Dituku dia kuenza mulubu wa mpetu dikumbana, kubuelaye mu nzubu wa Mvidi Mukulu.
Bena tshimenga bonsu bavua buwule ne kanyinganyinga. 15Ke batuangaji kuvuala bilamba biabu bia tshijila, kudiela mpala panshi kumpala kua tshilambuilu, babila Mvidi Mukulu uvua mufunde meyi a kulama bintu bia bende, bia bonsu bavua babiteka. Bualu Mvidi Mukulu uvua muambe bua kulama bintu biteka.#3.15 Fuanyikija ne Tshim 22.6-12. 16Bonsu bavua batangila mutuangaji munene, bavua bumvua dikenga dinene mu muoyi wabu. Bualu mpala wende uvua muandamuke bibi, uleja dibungama dinene divua mu muoyi wende. 17Bowa ne luzakalu bivua bikuata mutuangaji bivua bileja patoke bonsu bavua bamumona muvua muoyi wende musunsuke ne dibungama. 18Bantu kupatuka mu nzubu yabu bafuilakane, bikale mu bisumbu bisumbu, bua kutendelela Mvidi Mukulu pamue, bua nzubu wende kapetshi bundu bunene ebu. 19Bakaji bavuala bilamba bia madilu, bavua biadi bitupu,#3.19 Ntshimanyinu tshia madilu, mu matunga mashilangane ku kale. mu misesu tente. Bansongakaji batshidi mu nzubu ya baledi babu, bavua banyema, aba batangila ku biibi, bakuabu benda pa bimana, banga binangila ku madidishi a nzubu yabu. 20Bantu bonsu bavua bela bianza biabu kulu,#3.20 bavua bela bianza kulu: tangila Mis 28.2 ne diumvuija. balomba Mvidi Mukulu bua abambuluishe. 21Bivua bienza bia luse pa kumona bantu badiela panshi, basopakanangana, batendelela, kabidi umvua mutuangaji munene ukengakana ne kanyinganyinga.
Maweja-Nangila udi ulama nzubu wende
22Pine apu bonsu bavua basengelela Maweja-Nangila, muena bukole buonsu, bua alame bintu bivua bantu bateke mu nzubu wa Mvidi Mukulu ne ditekemena diabu dijima. 23Kadi Eliyodore pende uvua wenza tshiyuabu bamutume bua kuenza. 24Eliyodore ne bena diende bakavua bamane kufika pabuipi ne muaba udibu bateka biuma bia mu nzubu wa Mvidi Mukulu. Ke Mfumu wa nwidie yonsu ne makole a kulu#3.24 Mfumu wa makole a kulu: dina dia lumu divuabu binyika Mvidi Mukulu. onsu kumueneka ne lumu lupite, kupangisha bonsu bavua bafika muaba awu bukole ne dikanda dia kuenza kalu. 25Kumonabu muntu mukuata buowa, mubanda pa kabalu, kavuadika bilamba bimpe. Kabalu kavua kadiela ne lukasa lupite kudi Eliyodore, kumutua bikonu bia mpala. Muntu uvua mubanda pa kabalu uvua umueneka bu muvuala bia mvita bia mpawungi. 26Dine diba adi, bansongalume babidi, bikale ne bukole bupite, balenga menemene, bavuala bilamba bimpe, kumuenekabu kudi Eliyodore. Bavua bimana ewu ku dia balume, mukuabu ku dia bakaji, bamutuuta kakuyi luse, bamukuma bikole bipite. 27Eliyodore kupona panshi diakamue, kufua tshipuka.#3.27 Badi mua kuandamuna kabidi ne: mudiina mu miidima mikole. Kumuambulabu bua kumuteka mu nkuasa. 28Nanku muntu awu uvua mubuele mu nzubu wa mpetu ne musumba wa bantu, kabidi ne bena mvita bende, mpindiewu bakadi bamuambula, kayi mua kudienzela bualu nansha bumue. Nanku bantu bonsu bavua batonda patoke bumfumu bua Mvidi Mukulu.
29Eliyodore ukavua udijinga panshi diyi kadiyi diumvuika, kayi mua kutekemena mua kunyema ku bianza bia Mvidi Mukulu. 30Kadi bantu bavua mu tshimenga bavua basamuna Maweja-Nangila, bualu uvua ulama lumu lua muaba wende wa tshijila. Nzubu wende uvua mukuatshishe bowa ne tshimvundu kudi bantu amu mutantshi awu, ukadi muwule ne disanka ne musangelu, bualu Maweja-Nangila muena bukole buonsu wadileji patoke.
Onyase udi ulombela Eliyodore
31Balunda bakuabu ba Eliyodore kuyabu lukasa kudi Onyase, mutuangaji munene, bamulomba bua atendelele Muena Kulu bua apingajile Eliyodore muoyi, bualu ukavua pa kukula muoyi. 32Mutuangaji munene uvua utshina bua mukalenga kavu kuamba ne: bena Yuda mbenzele muntu wanyi bibi. Ke pavua Onyase ulambula Mvidi Mukulu mulambu bua apingajile Eliyidore muoyi.
33Patshivua mutuangaji munene ulambula mulambu wa dimulombela luse kudi Mvidi Mukulu, bansongalume abu kumuenekela Eliyodore tshiakabidi. Bavua bavuale bilamba bimpe, bimana pabuipi nende, bamuamba ne:
— Elaku Onyase mutuangaji munene tuasakidila mutule, bualu Maweja-Nangila mmukupeshe muoyi bualu buende. 34Kadi buebe wewe utuluke mudi Mvidi Mukulu mukunyoke, nanku ndaku kumanyisha bantu bonsu bukole bua Mvidi Mukulu.
Bamba amu nanku, kujiminabu.
Eliyodore udi umanyisha mudi bukole bua Mvidi Mukulu
35Nanku Eliyodore kulambula Maweja-Nangila mulambu, kumulayaye bintu bitule bualu uvua mumulame ne muoyi. Pashishe kushiyanganabu bimpe ne Onyase, kupinganaye ne tshiluilu tshiende kudi mukalenga. 36Kulondelaye bantu bonsu malu onsu atua Mvidi Mukulu mupite bunene mumuenzele kabidi mumuleje bua abimone ne mesu ende.
37Ke mukalenga kumukonka dina dia muntu utuaye mua kutuma tshiakabidi mu Yerushalayime. Eliyodore kuandamuna ne: 38— Mukalenga, pawikala nansha ne muluishi nansha muntu udi welela bukalenga buebe tshitungu, wamutuma mu Yerushalayime! Nansha yeye mua kupingana, neapingane, kadi bamane kumukengesha bikole bipite! Bualu bukole bua Mvidi Mukulu budi pa muaba awu. 39Bualu Mvidi Mukulu udi usomba mu diulu, udi ulama nzubu ewu, umukuba. Nanku badi bafika pa muaba awu ne meji mabi, Mvidi Mukulu udi ubashipa, ubabutula. 40Ke mupitshile malu a Eliyodore, uvua musue kuangata mpetu ya mu nzubu wa Mvidi Mukulu nanku.
Currently Selected:
2 Bamakabe 3: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996