1 Bamakabe Diumvuija
Diumvuija
— Mikanda eyi ya Bamakabe mmipeta dina ku dina dia makumbu divuabu bapesha tshilobu tshia kalandamusenga, Yudase, pashishe ne bana babu, Yonatane ne Simone. Mikanda eyi idi itulondela muvua bena Yuda batombokela bakalenga ba Baseleyuside, bavua bapingana Aleksandre munene, badia bumfumu mu Antiyokiya, tshimenga tshinene tshia mu ditunga dia Siriya. Ke nangananga Seleyukuse IV (187-175 bgbg ne Y.K.), Antiyokuse FV Epifane (175-164), Antiyokuse V (164-162), Demetriyuse I (162-150), Aleksandre Balase (150-145), ne bakalenga babidi bavua baluishangana: Demetriyuse II (145-138) ne Antiyokuse VI (145-142).
Bavua bafunda mukanda wa kumpala wa Bamakabe mu buena ebrewu. Kadi mukanda awu kujimina. Tudi balame amu diandamuna dia mukanda wa kudi bena Ngreke. Mukanda udi utulondela malu avua enzeka pankatshi pa 175 ne 134 bgbg ne Y.K. Udi utuvuluija mu tshikosu bukalenga bua Aleksandre munene, ne bua Baseleyuside bavua bamupingana mu bukalenga. Udi utuleja nangananga bulongolodi bubi bua ditunga bua Antiyokuse IV, udi wenzeja bena Yuda ku bukole, bua balonde bibidilu bia bena Ngreke, batendelela ne nwidie yabu. Bu mudi Antiyokuse mubenzeje bionsu abi ne tshikisu, mutuangaji Matatiyase ne bana bende badi bamutombokela (tshit. 1).
Munkatshi mua 166 ne 160, Yudase Makabe, udi ulombola bena mvita, badi baluisha tshiluilu tshia Baseleyuside ne balombodi batshi badi balondangana: Lisiyase, Bakidese ne Nikanore (2.1—9.22).
Yudase mumane kufua, muanabu Yonatane udi umupingana (160-142). Kadi pa mutu pa kuluangana mvita, udi ukeba diumvuangana. Mukalenga Aleksandre Balase udi umupesha muanzu wa mutuangaji munene, kadi badi bamushipa mu 142 kudi Trifone, mulombodi munene wa bena mvita ba bena Siriya, uvua ujinga kudia bukalenga pa muaba wa Antiyokuse VI (9.23—12.53).
Muanabu Simone udi umupingana (142-134). Mukalenga Demetriyuse II udi umupesha pende muanzu wa mutuangaji munene. Kadi udi ubangulula mvita ne baseleyuside. Udi upetesha kabidi bana babu budikadidi. Muanende Yowanane Irkane kumupingana. Ke mudi Simone Makabe muashi wa bukalenga bua bena Yuda ba bena Asmone (13-16).
Mukanda wa kumpala wa Bamakabe udi utuambuluisha bikole bua tumvue bimpe malu avua enzekela bena Yuda mu tshikondu tshikole atshi. Udi utujinguluila malu a bungi adi mukanda wa Danyele ukeba kutumanyisha mu musokoku (Dan 7-12).
Currently Selected:
1 Bamakabe Diumvuija: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996