1 Bamakabe 16
16
Bana ba balume ba Simeyone badi bipata Kendebeye
1Yowanane mumbuke mu Ngezere,#16.1 Tangila diumvuija mu 4.15. kuya kumanyisha tatuende Simeyone tshivua Kendebeye muenze. 2Simeyone kubikidisha bana bende bakulumpe babidi: Yudase ne Yowanane. Kubambilaye ne:
— Meme ne bana betu ne bena diku dietu, tuvua baluishe bena lukuna ba bena Izrayele bituadije ku buana buetu ne ku lelu. Kabidi misangu mivule tuvua basungidile bena Izrayele. 3Mpindiewu mbakulakaji. Kadi bua dinanga dia Mvidi Mukulu, nuakolu. Pinganayi pa muaba wanyi ne wa muanetu. Ndayi kuluangana bua ditunga dietu. Muena kulu anulame.
4Yowanane kusungula bena nwita binunu makumi abidi, ne babandi ba pa tubalu. Kuyabu bua kuluisha Kendebeye. Kulalabu mu tshimenga tshia Modine.#16.4 Modine: tangila diumvuija mu 2.1. 5Pashishe butshia dinda dionsu, kuyabu batangila mu mpata. Kadi kumonabu musumba wa bena mvita ba ku makasa ne wa babandi ba pa tubalu uvua mutangile kuvuabu. Kadi musulu uvua pankatshi pabu. 6Yowanane ne bena diende kuela mualu wa mvita dia muamua dia musulu. Yowanane umona ne bantu bende bavua batshina bua kusabuka musulu, ke kudianjilaye kusabuka. Bantu bende bamona nanku kusabuka pabu, bamulonda. 7Yowanane kuabanya tshisumbu tshiende, kutekaye babandi ba pa tubalu munkatshi mua bena mvita ba ku makasa. Bualu babandi ba pa tubalu ba mu baluishi bavua bapite bungi. 8Kueleshaye mpungi. Ke kutshimunaye Kendebeye ne tshiluilu tshiende. Baluishi bavule kufua. Bavua bashale kunyemabu batangile ku nzubu wa bimana bikolesha wa mu Kedrone.#16.8 Tangila 15.39 ne 41.
9Yudase uvua mutapika mputa. Kadi muanabu Yowanane kulondakaja baluishi too ne ku Kedrone, tshimenga tshivua Kendebeye muasulule. 10Bantu bavua banyema kuya too ne ku tuleya tuvua mu mpata ya mu Asdode. Yowanane kuosha tshimenga atshi.#16.10 Asdode: tangila 5.68. Baluishi kulua binunu bibidi. Pashishe Yowanane kupingana mu Yudeya talalaa.
Badi bashipa Simeyone. Muanende Yowanane udi umupingana
11Ptolemeye, muana wa Abubose, uvua mupete muanzu wa bulombodi mu mpata wa Yeriko. Uvua ne nkanu mitoke ya mushinga mukole ne mpawungi mipite bungi. 12Bualu uvua musele muana wa Simeyone, mutuangaji munene. 13Ke pavuaye uditambisha bikole, ujinga mua kuikala mfumu wa ditunga. Kupetaye meji mabi a kushipa Simeyone ne bana bende.
14Kadi, Simeyone uvua ukeba mua kulongolola ditunga bimpe. Ke pavuaye wendakana mu bimenga bionsu bua kumanya makenga a bantu. Mu tshidimu tshia 177,#16.14 177: ke tshidimu tshia 134 bgbg ne Y.K. mu ngondu wa dikumi ne umue, udi dina dia Shebate, Simeyone kuya mu Yeriko ne bana bende: Matatiyase ne Yudase. 15Ptolemeye, muana wa Abubose, kubakidila ne meji mabi mu nzubu wende mukese wa bimana bikolesha udi dina dia Doke, uvuaye muashishe. Kubenzejilaye bia kudia. Kadi uvua musokoke baluishi munda mua nzubu. 16Diba divua Simeyone ne bana bende bakuatshika maluvu, Ptolemeye ne bantu bende kudileja patoke, kuangata bia lufu, kuya mu nzubu wa didia, kushipa Simeyone kabidi ne bana bende babidi, pamue ne bamue ba ku bena mudimu bende. 17Ptolemeye kuenza bualu bubi bupite bunene, kupingaja bibi pa bimpe. 18Ptolemeye kumanyisha mukalenga Antiyokuse, umufundila bionsu bivuaye muenze abi, ulomba bua bamutumine bisumbu bia bena mvita bidi mua kumuambuluisha, bua amone mua kupesha mukalenga bimenga ne misoku.#16.18 Bakuabu badi bandamuna ne: bua amone mua kudia bumfumu mu bimenga ne misoku. 19Kutumaye bantu mu Ngezere bua kushipa Yowanane.#16.19 Tangila 4.15. Kutuminaye kabidi balombodi ba tshiluilu mukanda ubabikila bua badisange nende, ubalaya bua kubabanyina nkanu mitoke ya mushinga mukole ne mpawungi ne bintu bia disanka. 20Ptolemeye kutuma bena mvita bakuabu mu Ngezere bua bakuate tshimenga ne mukuna wa tshijila. 21Kadi, muntu kampanda uvua mudianjile kuya mu Ngezere bua kumanyisha Yowanane muvuabu bashipe tatuende ne bana babu, kumuambilaye kabidi ne:
— Ptolemeye mmutume kabidi bantu bua kukushipa wewe muine.
22Yowanane umvua bualu abu, kupampakanaye. Kukuataye bantu bavua bafike bua kumushipa abu, kubashipa.
23Makuabu malu a Yowanane, mvita ivuaye muluangane, malu a dikema avuaye wenza, bimana bivuaye wibakisha ne minga midimu ivuaye mukuate, 24bionsu abi, bavua babifunda mu mukanda udi ulondolola malu a ku dituku ku dituku avua batuangaji banene benze. Mbabifunde bituadijile ku dituku divuilaye mutuangaji munene pa muaba wa tatuende.
Currently Selected:
1 Bamakabe 16: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996