Zekaria 8
8
Jung’olo pi Yiko Yerusalem
1Man lembe pa Yehova mir udul ubino i bang’a, m’uwacu kumae, 2Yehova mir udul uwacu kumae: Ngiri nega pi Sayuni ku ngiri ma dit, man ngiri nega pire ku kwinyo ma dit. 3Yehova wacu kumae: Adwogo Sayuni, man abibedo i kind Yerusalem: e jubilwong’o Yerusalem Adhura mi lemandha; man got pa Yehova mir udul kumae, Got ma leng’. 4Yehova mir udul uwacu kumae: Fodi dhanu m’uti ku mon m’uti gibibedo i gengi mi Yerusalem, ku ba dhanu nzu ku musongolo i cinge kum giti hai. 5E gengi mir adhurane bibedo pong’ kud awia ma co man ku nyir m’ubetuko i gengine. 6Yehova mir udul uwacu kumae: Tek en e lembe mi wang’uic i wang’ dong’ dhanu maeni i ceng’ maeca, maku ebed ni wang’uic bende i wang’a? Yehova mir udul uwacu. 7Yehova mir udul uwacu kumae: Nen, abibodho dhanu para kud i ng’om ma yo nyangu, man kud i ng’om ma yo reto; 8man abikelogi, e gibibedo i kind Yerusalem; man gibibedo dhanu para, man abibedo Mungu migi, i lemandha man i bedopwe.
9Yehova mir udul uwacu kumae: Dong’ cingwu bed tek, wun ma wuwinjo i ceng’ maeni lembe m’uai i dhu jubila ma ginuti i ceng’ ma juguro ie thepiny mi ot pa Yehova mir udul, en e hekalu, kara egombre. 10Kum ka fodi ceng’ maeca kuwok ungo, sukulia mi dhanu mbe, kadok sukulia mi lim de; kadok kwiocwiny moko de mbe ni ng’atu m’ucidho woko kadi m’umondo, kum jakwor: kum aketho dhanu ceke ku ba dhanu nzu ng’atuman kum wadi. 11Ento kawono abibedo ni dong’ dhanu maeni calu i ceng’ ma kwong’a ngo, Yehova mir udul uwacu. 12Kum kodhi mi kwiocwiny bibedo nuti; ulok bicego nyinge, ng’om de bimio medrine, man polo bimio thoi migi: man abiketho dong’ dhanu maeni ucam pacu mi gin maeni ceke. 13Man ebitimbre, nia, calu wubedo ni kwong’ i kind thek, E ot mi Yuda ku ot mir Israel, e abibodhowu kumeca, man wubibedo ni mugisa. Kud wulwor, ento dong’ cingwu bed tek.
14Kum Yehova mir udul uwacu kumae: Calu ia pido nia atim rac i kumwu, ka kwaruwu nyayu kwinyo i ia, Yehova mir udul uwacu, man aloko cwinya ngo; 15e kumeno ia pido kendo i ceng’ maeni atim ber ni Yerusalem, man ni ot mi Yuda: kud wulwor. 16#Ef 4:25Maeni gin ma wubitimo: Wuwec lembe mandha ng’atuman ku wadi man ku wadi; wupok lembapoka mi lemandha ku kwiocwiny i dhugang’ mu: 17man i ng’atu moko kud upor lembe rac kum wadi; man kud umar kwong’ mi ndra: kum gin maeni ceke en e gin m’adagu, Yehova wacu.
18Man lembe pa Yehova mir udul ubino i bang’a, m’uwacu kumae, 19Yehova mir udul uwacu kumae, Wekocam mi dwi mir ang’wende, man wekocam mir abije, man wekocam mir abirone, man wekocam mir apaje, bibedo ni anyong’a ku mutoro, man agba mir anyong’a ni ot mi Yuda; ka kumeno wumar lemandha ku kwiocwiny. 20Yehova mir udul uwacu kumae: Fodi ebitimbre, nia kodhidhanu bibino, ku dhanu m’ubedo i adhura dupa; 21man dhanu m’ubedo i adhura acel gibicidho ba wadi, gibiwacu kumae, Dong’ wacidhu pio wakweyu ngisi ba Yehova, man wayenyu Yehova mir udul: abicidho bende. 22Eyo, kodhidhanu man thek ma tek gibibino Yerusalem niyenyo Yehova mir udul, man nikwayu ngisi ba Yehova. 23Yehova mir udul uwacu kumae: I ceng’ maeca ebitimbre, nia co apar, kud i dhu thek ceke, gibimaku dhu kendi pa Jayahudi, gibiwacu kumae, Wabicidho wakudu, kum wa winjo nia Mungu ni kudu.
Currently Selected:
Zekaria 8: AB1970
Highlight
Share
Copy
Want to have your highlights saved across all your devices? Sign up or sign in
The Holy Bible In Alur (Lur), Revised Orthography © United Bible Societies, 1970.