Matayo 15
15
Lemkei mi Judongo
(Mk 7:1-13)
1E Jufarisayo ku jugorcik gilund giai Yerusalem, gibino ba Yesu, giwacu kumae, 2Julubni gikadhu ku wi lembe mi kei mi judongo nedi? kum gilogo cing’gi ngo ka gicamu kwen. 3Eloko lembe de ewacu igi kumae, Wun bende wukadhu ku wi cik pa Mungu nedi kum lembe mi kei mu? 4#Ai 20:12; Poi 5:16; Ai 21:17; Law 20:9Kum Mungu wacu kumae, Yung wuru ku meru: man, ng’atu m’uyero lembe ma rac kum won kadi min, wek etho athoa. 5Ento wun re wuwacu kumae, Ng’atu ma tek biwacu ni won kadi min kumae, Maeno ma nwang’u ande bedo iri ni kuloka ni kuma emire ni Mungu; 6meca ebiyungo won ungo. E wuthiro lembe pa Mungu kum lembe mi kei mu. 7Wu weg ambili, yang’ Isaya ewo piwu dre, m’ewacu ko kumae,
8 #
Isa 29:13
Dhanu maeni giyunga ku dendhoggi;
Ento adundegi tung’ i kuma.
9Ento girwo i bang’a mananu,
Ma giponjo ko cik mi dhanu ni ponji migi.
Gin ma Cido i Dhanu
(Mk 7:14-23)
10Man elwong’o udul dhanu i bang’e, ewacu igi kumae, Wuwinji, man wung’ei: 11giki ma mondo i dhok cido i dhanu ngo; ento maeno ma ai kud i dhok, maeno e ma cido i dhanu. 12Julub gilund gibino, giwacu ire kumae, Ing’eyo nia Jufarisayo ka giwinjo lembe maeni, gikieri? 13Ento eloko lembe ewacu kumae, Ku ba girapidha ceke ma Vwa m’i polo kupidho en ungo jubifudhe woko. 14#Lk 6:39Wekgi: gi jutelwidhanu ma gin de gin abinga. Man tek abinga telo wi abinga, gin ario de gibipodho i vur. 15E Petro loko lembe ewacu ire kumae, Tuc iwa the lembabolane. 16Man ewacu kumae, Wun bende kara fodi wumbe ku ng’eyong’eci? 17Wung’eyo ngo, nia gin ma tek umondo i dhok kadhu i ic, jutere de woko i odbari? 18#Mt 12:34Ento giki ma ai kud i dhok re giai kud i adunde; man gicido i dhanu. 19Kum pidoic ma rac ai ku i adunde, ku negonek, ku gier, ku tarwang’, ku kwo, ku cwayu ndra, ku cayucac: 20maeni e ma giki ma cido i dhanu; ento camu ku cing’ m’aloga ngo re cido i dhanu ngo.
Yioyic pa Dhakananaya
(Mk 7:24-30)
21E Yesu ai woko ku kakeca, ecidho de i ng’et Turo ku Sidon. 22Man nen, Dhakananaya uai kud i kieu maeno, man ekok akoka, ewacu kumae, Bed ku kisa i kuma, E Rwoth, i wod Daudi; nyara besendre dit ku pajogi. 23Ento eloko lembe acel de ngo ire, Julubne de gibino gikwaye, giwacu kumae, Keth ecidhi; kum ebekok i ng’eiwa. 24Ento eloko lembe ewacu kumae, Juora ngo ento ni rombe m’urwinyo m’i ot pa Israel kende. 25Ento ebino erwo de ire, ewacu kumae, Rwoth, konya do. 26Eloko lembe ire ewacu kumae, Emaku ya jugam kwen mi nyithindho ngo jubol ni gwogi. 27Ento ewacu kumae, Eyo, Rwoth: kum cil gwogi gicamu ng’ili m’upodho ku wi mesa pa weggi. 28Yesu lund uloko lembe ewacu ire kumae, E dhaku, yioyic peri bedo dit: dong’ etimbre iri cil calu iyenyo. E kum nyare kei i saa nica.
Yesu Keyo Kum Dhanu Dupa
29E Yesu ai kakeca, man ebino ceng’ni ba nam Galilaya; man eidho malu wi got, ebedo de kuca. 30E udul dhanu ma dit de gibino i bang’e, ma gibedo ku weg abala, ku ju ma abinga, ku ju ma ajuba, ku weg abala mi bot, ku ju mange de dupa, man gipielogi piny the tiende; e ekeyo kumgi: 31ketho udul dhanu igi wang’ lii, ka gineno ju ma ajuba weco, weg abala mi bot de titri, man weg abala mi tielo de wotho, ju ma abinga de neno piny: e giyungo Mungu pa Israel.
Cam ni Dhanu Rubanga Ang’wen
(Mk 8:1-10)
32E Yesu lwong’o julubne i bang’e, ewacu de kumae, Ngisi benega kum udul dhanu, kum gibedo i bang’a kawono ceng’ adek man giracama mbe kugi: man ayenyo ngo alalgi ku kec, gimaru voc i yo. 33Julubne de giwacu ire kumae, Wabinwang’u lungu kwen dupa ma kumeni kani i ng’om ngele ma biyeng’o udul dhanu ma dit ma rokeni? 34E Yesu wacu igi kumae, Wutie ku lungu kwen adi? Man giwacu kumae, Abiro, ku rec moko ma thindho. 35Man eng’olo ni udul dhanu ya gibed piny i ng’om; 36man egamu lungu kwen abiro ku rec de; man emio foc, eng’weko ie, emio de ba julub, julub ke mio ni udul dhanu. 37E kagi ceke gicamu, giyeng’ de: e gicoko dong’ kwen ma jung’weko m’udong’, upong’o katoko abiro. 38Man ju m’ucamune jumaco rubanga ang’wen, ku mon man nyithindho bende. 39E elalu udul dhanu, man emondo i yei, ebino de i kieu ng’om mi Magdala.
Currently Selected:
Matayo 15: AB1970
Highlight
Share
Copy
Want to have your highlights saved across all your devices? Sign up or sign in
The Holy Bible In Alur (Lur), Revised Orthography © United Bible Societies, 1970.