ZAKHARIA 14
14
Yerusalem ma leoina-la
1 Manetualain fai naketu-nala'din, deka so. De neukose manabonga uma-la, ala bonga Yerusalem, de ala baba'e ala kalo leni hata-heto-la, nai lea matan. 2Neukose Manetualain naloo nakabubua basa leoina-la, fo leu sapu-la Yerusalem. Neukose ala loso-la kota ndia, ala bonga uman-nala ma ala sungu loo inan-nala. Neukose, ala foo leni laun-na seli, leo mamana tu'u-tapak neu, tehu bei ela hataholi-la, ala leo lahele nai kota ndia. 3Boema neukose Manetualain tutulumatak, fo natee-nata'ti la'ban leoina sila-la, sama leo Ana taon nai tepo-lelek makahulun-na. 4Nai faik ndia, neukose napadeik nai Lete Sion-na, nai Yerusalem boboan dulu. Boema neukose, heaba'e Lete Setun-na hu kande bafa maloaina, mulai neme dulu losa muli. Neukose, letek ndia seli nakababale leo kii neu, ma seli leo kona neu. 5Neukose, emi malai tunga bafak fo manaba'e letek ndia neu 2. Neukose emi malai sama leo emi bei-ba'i kaim-mala, nai lelek dae manggengok-ka, ana da'di nai tepo-lelek, Uzia fo mane Yehuda paleta. Boema, Manetualain fo Manetualaing-nga, Ana mai, no basa ata nusa so'dan-nala tungan.
6Metema, faik ndia losa soona, ta hapu makalenik do eis so'on. 7Nai faik ndia, ta hapu makahatuk so'on. Neukose faik ndia, mangale'dok nahele, ma boeo nai fai le'odaen-na. Tehu ka'da Manetualain mesak-kana, nde bubuluk, faihi'da faik ndia losa.
8 #
Yesk. 47:1; Yoh. 7:38; Nin. 22:1 Nai faik ndia, neukose oe neuk-ka ana faa neme Yerusalem mai; oe ndia seli, ana faa leo Tasi Mates-sa neu, ma seli, ana faa leo Tasi Tala'dak neu. Neukose oe ndia, ana faa tunga teuk, nau nai fai oefak, do nai fai hanas boe. 9Boema neukose, Manetualain Ana paleta da'dileo manek neu basa daebafak-ka lala'en-na; basa hataholi-a, neukose sene-do'ok neun, da'di leo Manetualain, ma lalelak-kana nenik na'dek sama.
10Basa nusak-ka lala'en-na, neme Geba nai kii, losa Rimon nai kona, neukose da'di dae ma'dak. Tehu neukose, Yerusalem boetai namadema fo dema lena dae manai boboa-kaisun-na; neukose, kota ndia namaloa neme Lelesuina Benyamin-na, losa Lelesuina Sudut, fo nde lelesuina Pertama mamanan-na, ma neme Uma Puni Madema Hananeel, losa manek-ka mamana kaka'bi angol-la. 11#Nin. 22:3 Neukose, hataholi-la leo no nee-nee lino-linok, nai kota ndia, no ala ta bii-lamata'u neu momopo-mamatek-ka fa.
12Neukose Manetualain fe he'di-laus mangalauk, neu basa leoina fo latee-lata'ti basa loo Yerusalem so. Hataholi sila matan-nala, ma maan-nala, nakalenak basa aoinan-nala lala'en-na, neukose laboo, te bei kaso'dak-kala.
13Nai faik ndia, neukose Manetualain tao-na leoina sila-la lapangamak, ma ala bii-lamata'u lanseli, nalosa neukose hataholi esan-na, ana ho'u-na nonoon manai boboan-na, fo ana fepa-li'un. 14Touk manai Yehuda-la, neukose latee-lata'ti soaneu lasala'e Yerusalem. Neukose ala ho'i-la, basa leoina manai boboa-kaisun-nala hata-heton, da'di leo bua-lo'a kakalok, fo nalupa lilopilas, lilofulak ma bua-lo'a papakek-kala ladodou.
15He'di-laus mangalauk matuaina esa, neukose la'e ndala, bagal, onta ma keledei, boema basa bana-manu manai musu-a mamana leleon-na boe.
16 #
Im. 23:39-43
Basa boema, basa hataholi fo bei laso'da nai leoina manasapu-na Yerusalem dalek-ka, neukose leu leo kota ndia leu, fo ala sene-do'ok neu Manek, fo Manetualain ma soaneu, ala tao Feta Lalaa Akidook-ka. 17Metema hapu leoina ta nau neu leo Yerusalem neu, fo sene-do'ok Manek, fo Manetualain fa soona u'dan ta nai nusan-na fa. 18Ma metema, hataholi Masir-ra ta nau tao Feta Lalaa Akidook-ka fa soona, neukose ala hapu he'di-laus fo Manetualain Manakoasa fen neu basa leoina, fo ala ta nau leu sene-do'ok fa. 19Huhukuk-ka nde ndia, ba'eneu Masir ma ba'eneu leoina fo ana ta nau tao Feta Lalaa Akidook-ka fa.
20Nai faik ndia, kileik-kileik manai ndala-la bua papaken-na, neukose nanadoki-dulak nenik dede'ak-ka nae, “Nanafe hehelik soaneu Manetualain.” Kete-kete manai Manetualain Uman-na, neukose nanafe ha'da-holomata, sama leo mango-mango manai mei tunu-hotuk-ka matan-na. 21Basa kete manai Yerusalem-mala, ma nai basa Yudea lala'en-na, neukose nanafe hehelik, fo da'di Manetualain Fo Manakoasa pusakan. Laun fo manatunu-hotu tutunu-hohotuk-ka, neukose ana paken, fo ana nasu paa tutunu-hohotuk-ka. Metema, tepo-lelek ndia losa soona, neukose ta hapu manadangan nai Manetualain Fo Manakoasa Uman-na so'on.
Currently Selected:
ZAKHARIA 14: twu
Highlight
Share
Copy
Want to have your highlights saved across all your devices? Sign up or sign in