ZAKHARIA 13
13
1 Manetualain Fo Manakoasa, nafa'da nae, “Nai faik ndia, neukose oemata esa ana faa, fo ana tao nalalao-nalalau Dauk tititi-nonosin ma laun Yerusalem-mala, leme sala-singok ma sosongo-tatangok fo ala taok-ka. 2Nai faik ndia, neukose Au lose heni sosongo-tatangok-kala na'den-na, neme dae ia mai, nalosa ta hapu hataholi esa boen, bei nafandelen bai. Neukose, Au usi heni basa hataholi fo ana manaku aoinan-na nabi, sama-sama loo sila fo duladale mangalauk-ka koasan-nalas. 3Ma metema, bei hapu hataholi fo nafa'da nae ndia naduku-nalosak hala heheluk soona, aman no inan nde lafa'dan lae, ndia muse nanahukunisak, nana hata fo ana kokolak-kana ndia nde bee-na, pepekok. Metema ana manaku nahele aoinan-na nabi boe, soona neukose aman no inan nde pau lisan-nana.
4Nai faik ndia, neukose basa nabi-la lame'da mamaek, soaneu lapadeik sama leo nabi. Neukose ala ta pake papake nabin-nala, fo ala ke'di-ndiu ma dalen-na lamatua neu ninitan-nala fa. 5Nasafalin-na, neukose lafa'da lae, ‘Au ta nabi fa. Au ka'da hataholi manatao tina-osi esa, de nai au so'da manalung-nga dalek, au aue-ale'di nai tina.’ 6Ma metema, hataholi natanen nae, ‘Bisu beek nai o fanam-ma ndia?’, soona nataa nae, ‘Bisu ndia la'e au, neme au nonoong-nga uman.’ ”
Paleta soaneu taonisa Manetualain nadenu nabi-la
7 #
Mat. 26:31; Mrk. 14:27 Manetualain Fo Manakoasa, nafa'da nae, “Fo'a leon, hai tafaina, fo sapu-ma manafoo fo naue-nale'di fe Au! Taomisan leona, soona neukose bi'ilopo-la tapasasala. Neukose Au sapu-a Au anang-ngala, 8ma neukose mate laun-na baba'ek 2, neme baba'ek 3, nai nusak-ka lala'en-na. 9Neukose maso'dak ka'da baba'ek esa neme baba'ek 3 mai. Ma neukose, Au tao alalao-alalafu hataholi sila, sama leo ha'i tao namaneu lilofulak-ka. Neukose Au so'bas, sama leo hataholi-a, ana fola lilopilas-sa. Boema neukose, ala hule-haladoi neu Au, fo neukose, Au ataa huhule-haladoin-nala. Neukose Au afa'das ae, sila nde been-na, Au anang, ma sila boeo, neukose manaku lae, Au nde Manetualain fo sila Manetualain-na.”
Currently Selected:
ZAKHARIA 13: twu
Highlight
Share
Copy
Want to have your highlights saved across all your devices? Sign up or sign in