Mateo 9
9
Puriyta mana puëdiq runata Jesús allïtsinqan
Marcos 2.1-12; Lucas 5.17-26
1Tsaypitanam büquiwan tsimpaskir täranqan Capernaúm markaman Jesús kutikurqan. 2Tsaychömi puriyta mana puëdiq runata kirmawan Jesús kaqman apayarqan. Apaqkuna payman criyiyanqanta musyarmi tsay qeshyaykaq runata Jesús nirqan: <<Hïju, ama llakikuytsu. Llapan jutsaykitam perdonarqüna>>.
3Tsaynö niptinmi ley yachatsikuqkuna yarpachakur niyarqan: <<¡Tsaynö nirqa Dios tukuykanmi!>>
4Tsaynö yarpäyanqanta musyarmi Jesús nirqan: <<¿Imanirtä llutanta yarpäyanki? 5¿Mayqantä mas aja? ¿Runapa jutsankunata perdonayku? ¿O qeshyaqta allïtsiyku? 6Runapa Tsurinqa kay patsachö runakunata perdonananpä poderyuqmi kaykan. Tsaytam kanan musyayanki>>.
Tsaypitanam puriyta mana puëdiq runata nirqan: <<¡Shäriy! Kirmaykita apakurkur wayikipa aywakuy>>.
7Tsaynö niptinmi jinan höra allishqana shäriskir wayinpa aywakurqan. 8Tsayta rikaykurmi runakuna pasaypa espantashqa Tayta Diosta alabar niyarqan: <<¡Kay runataqa Tayta Diosmi podernin qarashqa kaykunata rurananpä!>>
Discïpulun kananpä Mateuta Jesús qayanqan
Marcos 2.13-17; Lucas 5.27-32
9Tsaypita aywarmi Mateo jutiyuq runa impuestuta cobrar jamaraykaqta Jesús rikarqan. Paytam nirqan: <<Qatimay>>. Tsaynö niptinmi Jesúswan Mateo aywarqan.
10Tsaypitanam wayinchö mikuyänanpä Jesústa Mateo qayatsirqan. Tsaychömi impuestu cobraq runakuna y jutsasapa runakuna Jesúswan y discïpulunkunawan juntu mikuyarqan. 11Tsayta rikaykurnam fariseukuna Jesúspa discïpulunkunata tapuyarqan: <<¿Imanirtä impuestu cobraqkunawan y jutsasapa runakunawanpis Señornikikuna mikuykan?>>#Luc. 15.1-2.
12Tsaynö niyanqanta wiyaykurmi Jesús nirqan: <<Sänu kaqkunaqa manam mëdicuta nisitayantsu, sinöqa qeshyaqkunallam. 13Tayta Diospa palabranchö imata ninqantapis yachakuyay. Tsaychömi nin: <Sacrificiuta rupatsiyanqaykipitapis mas munä kuyapäkuq kayänaykitam>.#Ose. 6.6; Mat. 12.7. Noqaqa manam jutsaynaq runakunamantsu shamurqü, sinöqa jutsasapa runakunamanmi [jutsankunata dëjayänanpä]>>.
Yachatsikuynin mushuq kanqanta Jesús tantiyatsinqan
Marcos 2.18-22; Lucas 5.33-39
14Juk kutichömi Juanpa discïpulunkuna Jesústa tapuyarqan: <<Noqakunapis y fariseukunapis cada vezllam ayunayä. Qampa discïpuluykikunaqa ¿imanirtä ayunayantsu?>>
15Jesúsnam nirqan: <<Casaraq jövin kaykaptinqa casaray fiestaman qayatsinqan kaqkuna ¿llakikuyanmantsurä? Peru casaraq jövinta wanutsiyaptinmi sïqa ayunayanqa.
16<<Manam pipis makwa röpata mushuq ratashwan remendantsu. Mushuq ratash qentirmi makwa röpata mas rachikätsin. 17Tsaynölla manam pipis tsayrä rurashqa vïnuta makwa urpuman wiñantsu. Wiñaptinqa vïnu poqurmi pakitsinqa. Tsaynö kaptinqa vïnupis y urpupis ushakanqam. Tsaymi tsayrä rurashqa vïnutaqa sänu urpuman wiñantsik. Tsaynö rurashqaqa vïnupis manam jichanqatsu ni urpupis manam ushakanqatsu>>.#9.17 Makwa röpata y makwa urputam unay costumbrinkunaman Jesucristo iwalatsirqan. Mushuq ratashta y tsayrä rurashqa vïnutanam kikinpa yachatsikuyninman iwalatsirqan. Tsaynö iwalatsirmi Jesucristo nirqan paypa yachatsikuynin mushuq kar unay costumbrinkunaman mana iwalanqanta.
Warmita allïtsinqan y wamrata kawatsinqan
Marcos 5.21-43; Lucas 8.40-56
18Tsaynö parlaykaptinmi sinagögachö mandakuq runa chaykur Jesúspa puntanman qonqurikuykur nirqan: <<Taytay, warmi tsurïmi wanushqa. Aywaykulläshun. Makikita jananman churaptikiqa kawamunqam>>.
19Tsaynö rugakuptinmi discïpulunkunawan Jesús aywayarqan. 20Aywaykäyaptinmi chunka ishkay watana yawar apaywan qeshyaq warmi qepallanpa witiykur Jesúspa röpanpa kuchunta yataykurqan. 21Tsaynö rurarqan <<Jesúspa röpanta yataykullarpis allïshämi>> nirmi. 22Yataykuptinmi tikraykur Jesús rikaykur nirqan: <<Hïja, ama llakikuytsu. Yärakamunqaykipitam allirquyki>>.
Tsay ninqan höram warmi alliskirqan.
23Tsaypitanam autoridäpa wayinman Jesús chaykur müsicukuna tukaykaqta y runakunapis pasaypa waqaykäyaqta tarirqan. 24Paykunatam Jesús nirqan: <<Waqtapa yarquyay. Wamraqa manam wanushqatsu, sinöqa punuykanllam>>.
Tsaynö niptinmi asipäyarqan. 25Yarquskiyaptinnam wamra sutaraykanqanman Jesús yaykuskir makinpita jancharkuptin wamra kawaskamur sharkamurqan. 26Tsaynö kawatsimunqantam tsay markachö y wakin markakunachöpis musyayarqan.
Ishkay qaprakunata Jesús allïtsinqan
27Tsaypita Jesús aywakuptinmi ishkay qaprakuna paypa qepanpa aywar niyarqan: <<¡Davidpa Tsurin Jesús, kuyapaykayällämay!>>
28Wayiman Jesús yaykuptinpis tsay qaprakuna qepantam yaykuyarqan. Tsaymi Jesús tapurqan: <<¿Qamkuna criyiyankiku ñawikikunata allïtsinäpä kanqanta?>>
Niptinmi niyarqan: <<Awmi taytay, criyiyämi>>.
29Tsaynö niyaptinmi paykunapa ñawinkunata yataykur Jesús nirqan: <<Yärakayämunqaykipitam ñawikikuna rikanqa>>.
30Tsaynö niptinmi paykunapa ñawinkuna alliskirqan. Tsaymi Jesús nirqan: <<Allïtsinqäta ama pitapis willayankitsu>>.
31Peru tsaynö niptinpis yarquskillarmi Jesús allïtsinqanta pïmaytapis willayarqan.
Mana parlaq runata Jesús allïtsinqan
32Tsay allïtsinqan qaprakuna yarquskiyaptinnam Jesús kaqman mana parlaq runata pushayarqan. Tsay runachö supay kaptinmi parlarqantsu. 33Supayta Jesús qarquskiptinmi tsay runa parlar qallaykurqan. Tsayta rikaykurmi runakuna kushikur niyarqan: <<¡Manam maychöpis kaynö allïtsikuqtaqa rikarquntsiktsu!>>
34Peru fariseukunam niyarqan: <<Kay runaqa supaykunapa mandaqninpa poderninwanmi supaykunata qarqun>>.#Mat. 10.25; 12.24; Mar. 3.22; Luc. 11.15.
Runakunata Jesús kuyapanqan
35Llapan markakunapa y jallqakunapa Jesús purirmi Tayta Diospa mandakuyninpa alli willakuyninta sinagögakunachö yachatsirqan y tukuy niraq qeshyawan qeshyaqkunata allïtsirqan.#Mat. 4.23; Mar. 1.39; Luc. 4.44. 36Tsaymi tsaytsika runakuna Jesús kaqman qorikäyarqan. Mitsiqniynaq y oqrakashqa üshakunanö kaykaqta rikarmi Jesús kuyaparqan.#Núm. 27.17; 1Rey. 22.17; 2Crón. 18.16; Jer. 50.6-7; Eze. 34.5; Zac. 10.2; Mar. 6.34. 37Tsaymi discïpulunkunata nirqan: <<Cosëcha qoriypä kanqannömi atskaq runakunapis Tayta Diospa willakuyninta chaskiyänanpä kaykäyan. Peru tsaynö kaptinpis wallkaqllam willakuqkuna kayan. 38Willakuqkunata mandamunanpä Tayta Diosta mañakuyay>>.#Luc. 10.2.
Currently Selected:
Mateo 9: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.