O KEJADIAN 8
8
O Taufani ima togumu
1Ma Jou Madutu wïwohangua o Nuh deʼ hagala o aiwani naga dede ünanga o kapa gënanga magoronaka. Ma Jou Madutu wadiai o hidal̄oko iwuwu, hiädono o akere gënanga imulaenge iowaha. 2Mata-mata o akere malako o dunia matimiuku deʼ mata-mata o akere mangorana o dihangoka wabeno. O awana imatogumu deʼ o akere idogo-dogo iowaha. 3Ipaha o wange o ratuhu moi deʼ moritoa o akere hokokiaokaua magurutil̄e 4O wange ngimoi deʼ tumidoka o mede matumidoka, o kapa gënanga itirï o Ararat mal̄oku mabuturungu moi matubuoka. 5O akere gila-gila iowaha deʼ o wange mahira o mede ma ngimoioka, hagala o l̄oku matubu mulaenge yamake.
6Ipaha o wange moruata, o Nuh wahelenga o kapa majangela o gahumu moi, deʼ wahoho moi o totaleo o wogono. 7O totaleo gënanga iliokaua o kapaino duga-duga gila-gila ihoho yakaika yakaino hiädono o taufani ma akere duru mata-mata iowahoka. 8Itai-taitino gënanga, o Nuh wahoho moi o totaleo o namo dara la wohiöriki boteka o akere gënanga igoungu iowahoka. 9Mä karana o akere kaya tamunukuohi o dunia mal̄okuino mata-mataika, o totaleo o namodara gënanga mangale itangi imä makeua o ngï. Done enanga imakilioro o kapaika; o Nuh wohi doakika ai giama ipaha wao wohingohama. 10O Nuh wodamä o wange tumidoli, daha wahoholi o totaleo o namodara gënanga. 11O wange o bobimaoa o totaleo gënanga imakilioro ünangika iao o hoka moi o zaitun magota mahoka ma hungi-hungi ma uruoka. O öraha nënanga o Nuh wohiöriki o akere iowahoka. 12Iböto wotamä o wange tumidoli, ünanga wahoholi o namo dara gënanga ma moioli; deʼ mamoi gënanga o totaleo gënanga i ma kiliorokaua unangika.
13Maöraha o Nuh ai umuru o taongo o ratuhu butanga deʼ moi o wange moioka o mede mamoioka, o akere iowahoka duru i mata-mataka. O Nuh wahelenga o kapa gënanga majangela, deʼ womä lega magilolitino. Unanga wamake o tonaka mal̄okuino idudungoka. 14Mawange monaoko deʼ tumidi o mede mahinotoka, o dunia idu-dungoka.
15Daha ma Jou Madutu witemo o Nuhika, 16”No hupu o kapaino gënanga kamamoi deʼ ngoni hekata, ani ngoha-ngohaka deʼ toönanga manga heka-hekata. 17Nao nohihupu o totaleo mata-mata deʼ o aiwani mahomoaohi, ma ago-agomo kayaoa mahohumujuru, hupaya enanga yakunu ifäta i ngohaka deʼ imahigerewoto o dunia yamode-modekika.” 18O Nuh wohupu o kapaino gënanga, kamamoi deʼ ngoi hekata, aingoha-ngohaka deʼ toönanga manga heka-hekata. 19Mata-mata o totaleo deʼ o aiwani o dudungika ihupu o kapa ino gënanga, moi-moi deʼ matika kamamoi o rupa moi-orupa moi.
O Nuh wohihuba o huhuba
20O Nuh wohigoko o gahumu moi o huhuba mangï mangale ma Jou. Wal̄e o rupa moi-o rupa moi ototaleo moi deʼ aiwani mahomoaohi ihohalali, daha wohihuba hokä o huhuba yatö tuhu-tuhuku o huhuba mangï gënanga mal̄okuoka. 21Mabounu mahemoro o huhuba wohihuba-huba gënanga yasanangi ma Jou Ai hininga, deʼ ünanga wotemo ai hiningaka, ”Ngohi aha kowalioka Talolai o dunia nënanga karana o nyawa manga manarama; Ngohi tohiöriki kaogikiri magöohi, o nyawa manga dibanga gënanga itorou. Ngohi aha komaiwaka tabinaha hagala o dodadi iwowango-wango hokä nënanga ahaö Tadodiai nënanga. 22Hokokia madekana naga o dunia nënanga, salalu aha naga o dadatomo maöraha deʼ o gugutuku maöraha, o dumamata maöraha deʼ o hiwara maöraha, o wange-wange deʼ o hutu-hutu.”
Currently Selected:
O KEJADIAN 8: TLB
Highlight
Share
Copy
Want to have your highlights saved across all your devices? Sign up or sign in