MARKUS 14
14
Laakal᷊ẹ̌ su Mawu Yesus
(Mat. 26:1-5; Luk. 22:1-2; Yoh. 11:45-53)
1 #
Sas. 12:1-27
Ene kate rua ěllo seng Ěllom Paskah ringangu Sal᷊iwangu Borotẹ̌ Tawẹ Kabọ e. Manga imang těmbonange ringangu manga mananěntirong agama e měngkate měmpědẹ̌deạ dal᷊engu mělikosẹ̌ e menamẹ Mawu Yesus, dingangu tadeạu měmate si Sie. 2”Kaiso kumbahang bue i kitẹ mẹ̌koạ ene su tempon sal᷊imbange,” angkuěng i sire, ”Kibasịu makapẹ̌gohaeng.”
Mawu Yesus nilanisang u lana mawěngi
(Mat. 26:6-13; Yoh. 12:1-8)
3 #
Luk. 7:37-38
Su tempoʼm Mawu Yesus narěnta su Betania, su wal᷊en Simon kụ nạung piạ sakị e kusta makạtatakụ, kụ piạ e tau wawine himaung si Sie. I Sie nẹ̌bawa wotol᷊ẹ̌ marmarẹ̌ lohong lana mawěngi mal᷊ẹ̌gadẹ̌, nikoạ bọu hamụ u kalu mawěngi. Ene Mawu Yesus kụkaiangke měsẹ̌simokol᷊ẹ̌, tau wawine ene měngkatewe namose wotol᷊ẹ̌ e, kụ naněbohʼu l᷊ana mawěngi ene su těmbọ u Mawu Yesus. 4Ene piạko pirang katau ěndaị sene němpẹ̌langehẹ̌, kụ nahumbisara lawọ i sire u, ”Apawe gunane lana mawěngi ene nipẹ̌gagholọ? 5Lana ene ikawal᷊ụbe ringangu arẹ̌gane nangělembo wọu těllu hasụ su kal᷊ěpane roitẹ̌ sal᷊aka,#14:5: Doitẹ̌ sal᷊aka: kakělla pasalẹ̌ 6:37. kụ doite reng ikaonggọ su tau kasiang!” Tangu i sire němpẹ̌pědu su tau wawine ene.
6Kai Mawu Yesus e něhengetang, ”Balạe kere i sie! Unụe i kamene napakasusan sie? I sie kai nẹ̌koạ munara mapia ringangu rẹ̌daloěng baugu Iạ. 7#Pang. 15:11 Tau kasiang hanesẹ̌be ene ringangi kamene. Apan tempo kereu i kamene mapulu, i kamene makaambang si sire. Arawe Iạ e tawe hanesẹ̌ dingangi kamene. 8Tau wawine ini e seng nẹ̌koạ apạewen botonge ikakoạ e. I sie seng namaghẹ baugu Iạ dingangu l᷊ana mawěngi waugʼu pěnanampạku kal᷊imonang tempone. 9Pěmpangimangke! Su kaguwạu dunia e suapạewen Injilẹ̌ bọu Mawu Ruata e ipẹ̌kẹ̌kakeke, kakakoạu wawine ini e ute sarung iwẹ̌ke lai makoạ kere tatahěndung si sie.”
I Yudas kimire mẹ̌bal᷊u u Mawu Yesus
(Mat. 26:14-16; Luk. 22:3-6)
10Ene i Yudas Iskariot, sěngkatau wọʼi sire mapul᷊o dua muritʼu Mawu Yesus, nakoạ sol᷊ong anum manga imang těmbonange manarakangu Mawu Yesus si sire. 11I sire měngkatewe němpẹ̌luasẹ̌ kahěngang nakaringihe rorong ene, kụ němpẹ̌kědo sarung mangonggọu roitẹ̌ si Yudas Iskariot. Tangu i Yudas nanětạe mědẹ̌deạ loahe tadeạu manarakangu Mawu Yesus.
Mawu Yesus nẹ̌simokol᷊ẹ̌ simokol᷊u Paskah ringangu manga muritʼE
(Mat. 26:17-25; Luk. 22:7-14, 21-23; Yoh. 13:21-30)
12Su ěllo kahumotongangu ěllon Sal᷊iwangu Borotẹ̌ Tawe Kabọ e – su tempon taumata mạmotọ dombaʼm Paskah e, manga muritʼu Mawu Yesus němpẹ̌kiwal᷊o si Sie, ”Suapạe mẹ̌tatal᷊ahino pěndiahiang i kami e kaěngu Paskah waugʼi Tuang?”
13Tangu Mawu Yesus něndolohen duang katau wọʼi sire, ”Rakọ e sol᷊ong soa, kụ paịse piạ tau esẹ, měnẹ̌nuěng běnsadu akẹ, sarung ipẹ̌sombang i rua. Pěmpẹ̌tol᷊ẹ e si sie 14sol᷊ong bal᷊e suěkange kụ pẹ̌bera su taghuang u wal᷊e ene, ’Mananěntiro e makịbal᷊o, kai suapa tampạ i Sie ringangu manga muritʼE makapẹ̌simokol᷊ẹ̌ kaěngu Paskah.’ 15Tau ene sarung měnul᷊ada si rua dal᷊unge mal᷊oahẹ̌ su wowone rasị. Dal᷊unge ene seng nihundugẹ̌ nauadipẹ̌ dingangu manga apal᷊iwụe. Kụ sadiaịete kěbị sene waugʼi kitẹ.”
16Tangu muritʼu Mawu Yesus darua ene nakoạ sol᷊ong soa. Tangu sene i rẹ̌dua e nakahombangke kěbị kerẹewe nipaul᷊ịu Mawu Yesus. Tangu i rẹ̌dua e němpanadiạe kaěngu Paskah e.
17Sěhěbi ene, Mawu Yesus simongo ringangu muritʼE mapul᷊o dua. 18#Mzm. 41:10 Kutẹu i sire kụkaiang kạpahungkaěnge, Mawu Yesus něhengetang, ”Daringihẹ̌ko: sěngkatau wọʼi kamene, kụ su orasẹ̌ ini sěngkakaěng dingangku sarung mẹ̌sunial᷊u Iạ e.”
19Nakaringihẹ̌ ene, manga muritʼu Mawu Yesus e mamben něngkasusa, kụ sěngkatau-sěngkatau e nanětạe nakiwal᷊o su Mawu Yesus, ”Tantu wal᷊inewe iạ tẹ̌timonang i Tuang arau ěng?”
20Mawu Yesus simimbang, ”I sie ute kai sěngkatau wọu i kamene mapul᷊o dua ini, kụkaěng su lamạ sěmbaụ dingangku. 21Kahěngang bue Ahusʼu Taumata e sarung mate kerẹewe mạbawohẹ su ral᷊ungu Winohẹ Susi. Kaiho! Kaěngkěhang bue i sai manarakangu Ahusʼu Taumata e! Mapiaěngbe nạung tau ene manịeng tawe kạdiongeng pinahanạ!”
Pẹ̌paperjamuang u Mawu
(Mat. 26:26-30; Luk. 22:14-20; 1Kor. 11:23-25)
22Ene kạpahungkaěnge i sire e, Mawu Yesus něngal᷊ạe borotẹ̌ dingangu nẹ̌kal᷊iomaneng nakitarimakasẹ su Mawu Kasěllahenge. Bọu e něngangompeng borotẹ̌ e, mase nịbawal᷊awuhe su manga muritʼE apidʼu něhengetang, ”Daekeko kụ kaengko, ini e kai wadangku.”
23Bọu e i Sie nangal᷊ạe panganginumangu anggorẹ̌ e. I Sie nẹ̌kal᷊iomaneng tatarimakasẹ su Mawu Kasěllahenge, kụ tinẹ̌gone su manga muritʼE. Tangu i sire kěbị e němpanginungke anggorẹ̌ e. 24#Sas. 24:8; Yer. 31:31-34 Samuring ene ute Mawu Yesus něhengetang, ”Ini e kai rahaku, rahạen pẹ̌kakakědoʼm Mawu Ruata, kụ niapatědọ baugu l᷊awọ. 25Pěmpangimangke: Iạ e seng tawe saụ manginung bọu anggorẹ̌ ini, sarạeweng su tempong Iạ manginung anggorẹ̌ buhu su Dunia Wuhung Amang-Ku e.”
26Tangu i sire němpẹ̌kantarịeng kakantarị daralo sěmbua. Kụ bọu ene i sire nakoạ sol᷊ong Bukidʼu Zaitun.
Těbal᷊u i Petrus sarung mẹ̌sunial᷊ʼu Mawu Yesus
(Mat. 26:31-35; Luk. 22:31-34; Yoh. 13:36-38)
27 #
Za. 13:7
Tangu Mawu Yesus něhengetang si sire, ”I kamene kěbị e sarung měmpahuntal᷊ang maněntangu Iạ e. Batụu su ral᷊ungu Winohẹ Susi e kai mạbawohẹ u, ’Mawu Kasěllahenge sarung mapakaten mělal᷊ukadẹ̌ e, kụ gapaěngu rumba e sarung mẹ̌kal᷊iaesẹ̌.’ 28#Mat. 28:16 Arawe samurin pẹ̌bawangung-Ku kapia e, Iạ e sarung tamai měngal᷊imona si kamene sol᷊ong Galilea.”
29”Tala,” angkuěng i Petrus, ”Manilaing i sire kěbị maněntang i Tuang, kai iạ e mambeng tala.”
30”Ene eng,” angkuěngu Mawu Yesus, ”hěbi ini lai, kal᷊imonan manụ kimukụ karuan sul᷊ene e, i kau seng těllun sul᷊e nẹ̌sunial᷊u Iạ e.”
31I Petrus simimbangke ringangu mahoto, ”Manilaing iạ iapakapate sěngkakate ringangi Tuang, kai iạ e mambeng ta makawera u iạ e wẹ̌gan Tuang!”
Kụ manga muritʼE wal᷊ine e mal᷊aing němpẹ̌bera kerene.
Mawu Yesus měkẹ̌kal᷊iomaneng su Getsemani
(Mat. 26:36-46; Luk. 22:39-46)
32I sire nahumpạen tampạ sěmpalang kụ arenge Getsemani, mase Mawu Yesus něhengetang su manga muritʼE, ”Pahungkaiangko sini, těntal᷊ang Iạ deng tamai mẹ̌kal᷊iomaneng.”
33Mase Mawu Yesus němaringang i Petrus, i Yakobus, dingangi Yohanes sěngkapahundal᷊eng dingangʼE. I Sie nanětạe nakapěndang nasusa ringangu kimal᷊insau. 34”Naung-Ku e nasusa tawẹ sihinge,” angkuěng u Mawu Yesus si sire, ”pẹ̌pěndangeng seng sal᷊a makapatẹ e. Kěngkatanạko sini kụ pěmpělukadẹ̌ko!”
35Mawu Yesus nẹ̌těngkagheang kadodọ bọu e nẹ̌těngkasumagẹ̌ su ěntana kụ nẹ̌kal᷊iomaneng. Su ral᷊ungu kal᷊iomanenge i Sie mědẹ̌dorong sěngapam botonge tadeạu i Sie manịeng tawe kahombangengu tempon sigěsạ ene. 36”Amang, o i Amang,” angkuěnge, ”tawẹu sarang sěmbaụ kụ kai ta makoạ su Ruata. Apakapuạko kasasigěsạ ini e wọu anuku. Kẹ̌tạeweng bal᷊inewe kapuluku e kaiso kawe kapulung Amang.”
37Bọu e Mawu Yesus nẹ̌sul᷊e kụ sěngkakakěllane manga muritẹ̌ e kạpahuntikịe. I Sie nẹ̌bera si Petrus, ”Simon, mẹ̌tikị i kau e? Kětạeng beng sěngkaorasẹ̌, kụ i kau mang tawe makal᷊ukadẹ̌?” 38Tangu Mawu Yesus něhengetang si sire, ”Pakaral᷊ukadẹ̌ko, ringangu pěmpẹ̌kal᷊iomanengko tadeạu i kamene tawe kasal᷊ukateng. Rohkẹ̌ ete wue mambeng mapulu mẹ̌koạ apam mětẹ̌tatal᷊ahino, kai arawe i kamene e mambeng ta makatohạ ual᷊ingu ghẹ̌si e kai lome.”
39Kạpia Mawu Yesus tamai nẹ̌kal᷊iomanengu kerẹewe wawerane kal᷊imona. 40Bọu e i Sie nẹ̌sul᷊e kapia su anum manga muritʼE kụ nikahombangenge i sire mang bědang mětẹ̌tikị, ual᷊ingu i sire kai mẹ̌tikị-tikị. Tangu i sire wěga wue měnsang kai mẹ̌berạeng apa su Mawu Yesus.
41Kutẹu Mawu Yesus nẹ̌sul᷊ẹ e kapia su anun sire su katěllun sul᷊ene, i Sie něhengetang, ”Měngkai wẹ̌dang měmpạhuntikị dingangu měmpạngirul᷊e i kamene? Pianẹ e! Seng nịdating tempone, Ahusʼu Taumata e isarakang su l᷊iman taumata warạdosa. 42Pěmpẹ̌bangungke, bọete i kitẹ mahundal᷊eng. Kakělla! Taumata kụ měndal᷊akị si Siạ e seng diměnta!”
Mawu Yesus nisamẹ
(Mat. 26:47-56; Luk. 22:47-53; Yoh. 18:3-12)
43Ene Mawu Yesus bẹ̌dang kapẹ̌lẹ̌hengetange, narěntạe i Yudas sěngkatau wọu manga muritʼE mapul᷊o dua e. Sěngkakarěnta ringangʼE mal᷊awọ l᷊ai taumata měmpẹ̌bẹ̌bawa warạ dingangu pal᷊o-pal᷊o. I sire nirolohu manga imang těmbonange, manga mananěntirong agama ringangu manga těmbonangu tau Yahudi. 44I něndal᷊aị e seng něgěllịu tatialane si sire u. ”Taumata kụ takụ děnguange,” angkuěnge si sire e, ”Ute kai i Sie taumatane. Samẹ e i Sie kụ bawạ e ringangu riagate pakapia.”
45Sarạeng i Yudas diměnta, i sie měngkatewe himaung Mawu Yesus kụ nẹ̌bera, ”Tuang Guru!” bọu e i sie riměngu Mawu Yesus. 46Mase i sire sěngkakarěnta ringangi Yudas e měngkatewe něnamẹ Mawu Yesus kụ něhapusẹ̌ si Sie. 47Arawe sěngkatau wọʼi sire sene měngkate nanawụ barạ e mase namilị ěllangu imang mawantugẹ̌ e hakịu nasahing tul᷊ine. 48Bọu e Mawu Yesus něhengetang si sire, ”Kai taumata ral᷊akị Iạ e, hakịu i kamene ruměntan barạ dingangu pal᷊o-pal᷊o kụ měnamẹ si Siạ? 49#Luk. 19:47, 21:37 Apang kal᷊aěllo e Iạ mạněntiro su Wal᷊em Mawu su těngong kamene, kai i kamene tawe měmpanamẹ si Siạ. Kai mang seng hinong kerene, tadeạu misěhụ apang kạbawohẹ su ral᷊ungu Winohẹ Susi e.”
50Kěbị muritẹ̌ e timal᷊ang němpanentangu Mawu Yesus.
51Umbaseng sěngkatau, kụ kětạeng měkẹ̌kakingkaengu hekạ leneng nipěhěmbung awạ e, tụtol᷊e Mawu Yesus. I sire mapulu měmpanamẹ si sie, 52kai i sie měngkatewe naměllọu kakingkaenge, kụ timal᷊ang těntol᷊e.
Mawu Yesus su těngon Sanhedrin
(Mat. 26:57-68; Luk. 22:54-55, 63-71; Yoh. 18:13-14, 19-24)
53Mawu Yesus niěntudʼi sire su wal᷊eng imang mawantugẹ̌. Paịse, kal᷊awọu imang těmbonange ringangu manga matatimaden tau Yahudi ringangu mananěntirong agama e mạtatampung. 54I Petrus timol᷊e Mawu Yesus wọu marau sarạeweng nasuẹ̌ su rěllahʼu wal᷊eng imang mawantugẹ̌. Sene i sie mạiang su rěduhu putung sěngkapěndarang dingangu manga měndariagạe. 55Manga imang těmbonange ringangkewen sěnaung Sanhedrin měngkatewe měmpědẹ̌deạ karal᷊ahẹu sahiding sire mapẹ̌sal᷊an Mawu Yesus tadeạu makapěhukungu papate si Sie. Kai i sire tawe nakahombang sal᷊a kadiongeng sarang sěmbaụ. 56Mal᷊awọ sahidi nikuiang ipẹ̌sẹ̌sahiding konti waugu Mawu Yesus, kaiso sasahiding sire e mědẹ̌dal᷊ewang sěmbaụ su wal᷊ine.
57Ene kai piạ pirang katau rimarisị kụ němpẹ̌sahiding konti, kerei mạanun Mawu Yesus, 58#Yoh. 2:19 ”I kami e nakaringihẹ̌ tau ini nẹ̌bera, ’Iạ sarung měnggoghahẹ̌ Bal᷊em Mawu kinoạu taumata, kụ samurin těllu ěllo, kụ Iạ e sarung mamětịewe lai wal᷊ine kụ bal᷊inewe koạ u taumata.’ ” 59Kai sasahidin sire ene e mal᷊aing nẹ̌dal᷊ewang sěmbaụ su wal᷊ine.
60Tangu imang mawantugẹ̌ e rimarisị su těngon sire kěbị mase nakiwal᷊o su Mawu Yesus, ”Unụe i Kau tawe sumimbahẹ̌ kal᷊awọu laěnsilẹ̌ itẹ̌timona si Kau e?”
61Kai Mawu Yesus mang tawẹ kakěndịe. I Sie tawe kadiongeng simimbahẹ̌ sarang kadodọ. Mase imang mawantugẹ̌ e saụ nakiwal᷊o sěnsul᷊e si Sie, ”Kahěngang i Kau e Ratu Mananal᷊amatẹ̌, Ahusʼu Ruata L᷊imembon Susi?”
62 #
Dan. 7:13
”Seng Iạ e i Sie,” angkuěngu Mawu Yesus, ”kụ i kamene kěbị e sarung makasilo Ahusʼu Taumata e kụkaiang su sěmběkang koanengu#14:62: Kụkaiang su sěmběkang koanengu: Kakělla pasalẹ̌ 12:36. Mawu Ruata Lembong Kawasa kụ diměnta su ral᷊ungu winawa wọu l᷊angị!”
63Tangu imang mawantugẹ̌ e něningkasẹ̌ pakeange#14:63: Něningkasẹ̌ pakeange: Lulun tau Yahudi mẹ̌pědu. ringangu nẹ̌berạe u, ”Tawe wahal᷊uasu piạ sahidine! 64#Imng. 24:16 I kamene hala e semben nakaringihẹ̌ manga wawerane mělẹ̌hinakang Duata. Kụ orasẹ̌ ini e kereapa su tiněnnang kamene?”
I sire kěbị němpamutusẹ̌ u Mawu Yesus nẹ̌sal᷊a, kụ i Sie mambeng hinom pateěng.
65Tangu sěnggạe wue nanětạe němpangědu Mawu Yesus, dingangu i sire němpanakạ matanʼE, kụ němpangoka si Sie kạpěberane, ”Kěnang panikạ, i sai nangoka si Kau?” Manga měndariagạ e mal᷊aing němpameru Mawu Yesus.
I Petrus nẹ̌děndilʼu Mawu Yesus
(Mat. 26:69-75; Luk. 22:56-62; Yoh. 18:15-18, 25-27)
66Těntal᷊ang i Petrus bědang su rěllahẹ̌, sěngkatau wọu ěllang bawine ěllangu imang mawantugẹ̌ e riměnta sene. 67Sarang nakasilo si Petrus mẹ̌děndarang su putung i sie timingangke mapia-pia gahị i Petrus dingangu nẹ̌bera, ”Wal᷊inẹbe i kau lai ringangu Mawu Yesus tau Nazaret?”
68Kaiso i Petrus kawe nẹ̌děndilẹ̌, ”Iạ e wẹ̌ga wue ringangu tawe nakahěngang měnsang apa wue timonanu,” angkuěnge su ěllang ene. Mase i Petrus simẹ̌bang sol᷊ong tukadʼu wal᷊eng imang mawantugẹ̌ ene. [Tangu manụ kimukụe.]
69Tangu ěllang bawine ene saụewe nakasilo si Petrus, kụ nẹ̌bera kapia si sire apang sene, angkuěng, ”I anu ěndaịe mal᷊aing dingangi sire!” 70Kai i Petrus saụewe nẹ̌děndilẹ̌ kapia.
Tawe nararěnnạ, i sire apang sene němpẹ̌bera kapia si Petrus, ”Sembelaing tawe ikapẹ̌sunial᷊ẹ̌ i kau mang sěngkatau wọʼi sire u i kau e wọu Galilea!”
71Mase i Petrus nanětạ e nẹ̌salu ringangu nẹ̌bera, ”Iạ wěgangbeng taumata itẹ̌timonang kamene ene!”
72Su orasẹ̌ ene lai tangu manụ kimukụ karuan sul᷊ene. Kụ i Petrus nakatahěndung u Mawu Yesus bọuwen něhengetang si sie, ”Těntal᷊ang manụ tawe kimẹ̌kukụ duan sul᷊e, i kau e seng těllun sul᷊e nẹ̌sunial᷊u Iạ.” Ene i Petrus měngkatewe simangị marehe.
Currently Selected:
MARKUS 14: SXN
Highlight
Share
Copy
Want to have your highlights saved across all your devices? Sign up or sign in