MARKUS 12
12
Papinintu mạanun manga měmamunara waelʼu anggorẹ̌
(Mat. 21:33-46; Luk. 20:9-19)
1 #
Yes. 5:1-2
Bọu e Mawu Yesus nanětạ e nẹ̌bisara ringangu papinintu su manga imang těmbonange manga mananěntiro agama ringangu manga mananěmbonangu Yahudi e. Mawu Yesus něhengetang, ”Piạ e sěngkatau nẹ̌suangu anggorẹ̌ su wawaelange, mase nipagarenge nal᷊ikụ. Bọu ene i sie namangka l᷊ohang baugʼu pěmaměhaseng anggorẹ̌, mase něndarisịu wal᷊en pělahapaěng. Bọu ene i sie nakitamangu sasuang u anggorẹ̌ ene su měndal᷊ukadẹ̌ pirang katau mase i sie něbuạ sol᷊ong banua wal᷊ine. 2Sarạeng seng tempone manipo wuang anggorẹ̌, i sie rimolohʼu ěllange sěngkatau sol᷊ong anum mělahal᷊ẹ̌ u sasuang ene mědeạu měnarimạ bageang e. 3Kutẹu manga mělahal᷊ẹ̌ e měngkatewe něnamẹ ěllang ene. Bọu ene nipahangeng i sire, kụ nioro pinakapul᷊ẹ tạ ul᷊ene apa-apa. 4Mase taghuangu sasuange saụewe rimolohʼu sěngkatau ěllange wal᷊ine. Kutẹu manga mělahal᷊ẹ̌ e kawe němpaměbahẹ̌ těmbọ u ěllang ene, mase nanokolẹ̌ apidʼu kapẹ̌parohange. 5Taghuangu sasuange saụewe rimolohʼu sěngkatau ěllange wal᷊ine. Kai i sire kawe němate ěllang ene. Kụ kerene lai pẹ̌kakoạ i sire su kal᷊awọu ěllang bal᷊ine, tuhụ e: piạ u niwanggo ringangu piạbe lai nịpapate. 6I sai lai ini e wẹ̌dang botonge ikarolohʼu taghuang sasuang e? Kate nal᷊ěmbe sěngkatau, kụ samatang ahuse ikẹ̌kěndagẹ̌. Kụ samurine i sie rimolohʼu ahuse sol᷊ong anum manga mělahal᷊ẹ̌ e. ’Nal᷊ahẹ u ahusẹ̌ku e sarungbe ilahunggeẹ̌,’ su tiněnnane. 7Kutẹu manga mělahal᷊ẹ̌ ene němpahumbisara sěmbaụ su wal᷊ine, ’Ěndaị mẹ̌papusakạ e! Mahịe pateěng i kitẹ i sie, tadeạu makoạ si kitẹ pusakạ e!’ 8Tangu rariọ ene nisamẹ mase nipate. Kasuange nirěmmẹ i sire su l᷊ikudʼu waelẹ̌ ene.”
9Mase Mawu Yesus nakiwal᷊o, ”Apạe ngae sarung koateng u taghuang sasuang e? Nal᷊ahẹu i sie sarung sumongo kụ měmate si sire mělahal᷊ẹ̌ ene, kụ bọu ene měnarakangu sasuange su mělahal᷊ẹ̌ bal᷊ine. 10#Mzm. 118:22-23 I kamene nal᷊ahẹu seng bọu němpẹ̌basa ayetẹ̌ ini su ral᷊ungu Bukẹ̌ Susi e,
’Batu kụ ta nipakẹ u tukang e,
ini e nakoạ batu pinẹ̌bukuange.
11Ini e munaraʼm Mawu Kasěllahenge;
kụ enẹ e kaholẹ e!’ ”
12Tangu manga mananěmbonangu tau Yahudi apan nakaringihẹ̌ papinintu ene, mědẹ̌deạu měnamẹ Mawu Yesus, batụu i sire kai masingkạu papinintu ene ipětẹ̌tahino Mawu Yesus si sire. Kaiso i sire kai matakụ u taumata l᷊awọ. Tangu i sire němpẹ̌dal᷊eng naněntangken Mawu Yesus.
Hal᷊ẹ̌ u pěmamaehẹ̌ pajakẹ̌
(Mat. 22:15-22; Luk. 20:20-26)
13Pirang katau wọu tau Farisi ringangu wọu ghal᷊ipohon Herodes nirolohẹ̌ pěngẹ̌ngal᷊ạ bera su Mawu Yesus ringangu kakiwal᷊o. 14I sire riměnta su anum Mawu Yesus kụ němpẹ̌bera, ”Tuang Guru, i kami e masingkạ u i Tuang kawe matul᷊idẹ̌ dingangu lai tawe mẹ̌sasěmpị kapulun sai-sai. I Tuang mạněntirowe ringangu mal᷊ahẹ mạanung kapulun Duata su taumata, batụu i Tuang e tawe měmamamile ghatin taumata. Ho, kěnangko i Tuang pẹ̌bera si kami, ’Tuhụ atorʼu agamang kitẹ e, botonge mamaehẹ̌ pajakẹ̌ su Kaisarẹ̌ arau tala? Harusẹ̌ i kitẹ mamaehẹ̌ pajakẹ̌ arau tala?’ ”
15Mawu Yesus e masingkạu lulun sire měmpẹ̌mẹ̌mělle. I Sie simimbang, ”Kawe unụe i kamene měmpěnal᷊ukạ si Siạ? Kěnangko todẹ Siạ doitẹ̌ sal᷊aka sěngkal᷊ěpa.”
16Tangu i sire němpanẹ̌gọen doitẹ̌ sal᷊aka sěngkal᷊ěpa. Mase Mawu Yesus nakiwal᷊o, ”Kai ghahị i sai ringangu areng i sai ini e?”
”Kaisarẹ̌,” angkuěng i sire.
17”Ho, kamageng kerene,” angkuěngʼu Mawu Yesus, ”onggọ e su Kaisarẹ̌ apạewen tataghuanengu Kaisarẹ̌, dingangu su Mawu Ruata apạewen tataghuanengu Ruata.” I sire mangkewen dimal᷊inaụ nakaringihẹ̌ si Sie.
Hal᷊ẹ̌ u pẹ̌bawangung bọu papate
(Mat. 22:23-33; Luk. 20:27-40)
18 #
MMR. 23:8
Ene piạ e pirang katau wọu ghal᷊ipohon tau Saduki himaung su Mawu Yesus. (I sire kai wọu komol᷊angu apam mangěnna u taumata nate e tawe mẹ̌biahẹ̌ kapia.) 19#Pang. 25:5 ”Tuang Guru,” angkuěng i sire su Mawu Yesus, ”I Musa e namohẹ u tita ini waugʼi kitẹ: ’Kereu sěngkatau esẹ mate kụ i sie wědang tawẹ anạe su kawinge, ute sěngkatau wọu anạ u sěmbaụ e hinong mamillasẹ̌ su wal᷊une tadeạu makahombangke pal᷊ahite waugu wahakạ e.’ 20Nạung piạ i sire pitu tahatuari. Kaiakanenge nẹ̌kawing, mase nate wẹ̌dang tạ hitene. 21Tangu tuarine karuane nẹ̌kawingu wal᷊une, kụ i sie mal᷊aing nate tawẹ hitene. Kakakoạ kerene mal᷊aing nariadi su tuarine katěllune, 22kụ mětẹ̌tatuhụ sarạeweng kapitune. Pangěnsueěnge tangu tau wawine ene nate e lai. 23Su tempoʼm pẹ̌bawangungu taumata nate kapia e, ute kawingken sai ngae tau wawine ene? U i sire pitu e seng bọu němpẹ̌kawing i sie kěbị!”
24Mawu Yesus simimbang, ”I kamene mambeng nẹ̌sal᷊a kahěngang. Batụu i kamene tawe makal᷊aěnna Winohẹ Susi kerene lai kawasaʼm Mawu Ruata e. 25Kụ kamageng manga taumata nate měmpẹ̌bangung kapia, i sire seng tawe saụ měmpẹ̌kawing, kaiso i sire saụ mẹ̌biahẹ̌ kere malaekatẹ̌ su sorga. 26#Sas. 3:6 Arawe taumata nate kụ ipẹ̌bangung kapia e, kai wědang ta nakạbasa i kamene su ral᷊ungu bukẹ̌ i Musa piạ běkeng gahundungu sumpinị dimaẹ tangu? Su ral᷊ungu manga ayetẹ̌ ene kạbawohẹ u Mawu Ruata e něhengetang si Musa, ’Kai Iạ e Ruatang Abraham, Duatang Ishak dingangu Ruatang Yakub.’ 27Ruata ene wal᷊inewe Ruatan taumata nate. I Sie kai Ruatan taumata wiahẹ̌. I kamene kai tumanịu měsẹ̌sal᷊a ěnna!”
Tita kahumotongang e
(Mat. 22:34-40; Luk. 10:25-28)
28 #
Luk. 10:25-28
Kutẹu narěntạe sěngkatau mananěntirong agama nạung nakaringihẹ̌ pal᷊ahumbisaram Mawu Yesus dingangi sire wọu komol᷊angu Saduki e. Mananěntirong agama e masingkạ u Mawu Yesus seng simimbahẹ̌ mapia-pia si sire. Tangu i sie nakiwal᷊ọe su Mawu Yesus, ”Kai tita sude kasěllahengu patikụ tita e?”
29 #
Pang. 6:4-5
Mawu Yesus simimbang, ”Kahumotongangu tita ute: ’Daringihẹ̌ko, i kamene tau Israel! Mawu Ruatang kitẹ e kai Mawu mang sěmbaụ.#12:29: Mawu Ruatang kitẹ e kai Mawu mang sěmbaụ: arau Mawu e kai Ruatang kitẹ, kětạembeng Mawu sẹ̌sane. 30Kěndagẹ̌kon Mawu Ruatanu e ringangu kạguwạu naungu, ringangu kạguwạu l᷊aěnnanu ringangu lai kạguwạu ihạu.’ 31#Imng. 19:18 Tita karuane ute ini: ’Kěndagẹ̌ko kasanggidangu e, kerẹewe i kau kuměndagʼu watangengu.’ Tawẹ tita wal᷊ine limembong kahumotongange wọu tita ene.”
32 #
Pang. 4:35
Mase mananěntirong agama e nẹ̌berạe su Mawu Yesus, ”Sembeng nihino, Tuang Guru! Mambeng těngadẹ̌ apan nipěhengetang i Tuang: Seng i Tuang e Mawu Ruata mang sěmbaụ kụ seng tawẹ apa Ruata wal᷊ine. 33#Hos. 6:6 Dingangu taumata e harusẹ̌ kuměndagu Mawu Ruata e ringangu kaguwạu naunge, ringangu kaguwạu l᷊aěnnane, ringangu lai kaguwạu ihạe. Dingangu i sie lai harusẹ̌ kuměndagu kasanggidange kerẹewe kuměndagu watangenge. Ene kai limembong kapiaěnge wọu maněmbang sasěmba tẹ̌tutungang ringangkewelain sasěmba wal᷊ine su Mawu Kasěllahenge.”
34Mawu Yesus nakasilọe u mananentirong agama e seng simimbahẹ̌ maudupẹ̌ kahěngang. Kụ Mawu Yesus něhengetang si sie, ”I kau seng maraning makoạ kawanuan Mawu Ruata.”
Bọu ene seng tawẹu sarang sěngkatau relaing bahani makiwal᷊o su Mawu Yesus.
Mạanun Datu Mananal᷊amatẹ̌
(Mat. 22:41-46; Luk. 20:41-44)
35Kạpaněntirone su Wal᷊em Mawu, i Yesus nakiwal᷊o, ”Kawe kereapa manga mananěntirong agama e makapěbẹ̌bera u Ratu Mananal᷊amatẹ̌ e kai hěnton Daud? 36#Mzm. 110:1 Sěmbal᷊iau i Daud sẹ̌sane – ual᷊ingu nipẹ̌karadiahangu Rohkẹ̌ u Ruata e – nẹ̌bera,
’Mawu e něhengetang su Mawuku:
kaiangke su koaneng-Ku#12:36: Kaiangke su koaneng-Ku: Tumuhụ adatu Yahudi i saing lẹ̌onggotangu adatẹ̌ dingangu kawasa e kaiang su sěmběka koaneng.
sarang Iạ e mapakawatạ u kal᷊awọu
sědụʼU su těngo-Nu.’
37Tangu kamagengu i Daud měsẹ̌sěbạ u Ratu Mananal᷊amatẹ̌ e kai ’Mawu’, ute mariadi we kereapa u i Sie kawe hěnton Daud?”
Tatumbal᷊ung tadeạu pakal᷊aingatẹ̌ su manga mananěntirong agama
(Mat. 23:1-36; Luk. 20:45-47)
Taumata l᷊awọ apang ene su Wal᷊em Mawu maral᷊uasẹ̌ dụdaringihẹ̌ Mawu Yesus mạněntiro. 38I Sie něhengetang si sire, ”Pakal᷊aingatẹ̌ bue su manga mananěntirong agama. I sire papuluang mẹ̌daral᷊eng dingangu lakụ mananandụ, dingangu papuluang adateng su manga pasarẹ̌. 39I sire papuluangu kal᷊aianeng su horone su ral᷊ungu Wal᷊em Mawu ringangu su manga sal᷊iwang. 40I sire měmpạngakal᷊ẹ̌ manga wawine wal᷊u ringangu měmpěngẹ̌ngaho wal᷊ene. Kụ tadeạu měmpangambung kararal᷊akisʼi sire ute i sire měmpẹ̌kal᷊iomaneng mananandụ-nandụ. Hukumang i sire sarung mawěhạ!”
Sasěmbang tau wawine wal᷊u
(Luk. 21:1-4)
41Ene, mạiangke mětẹ̌těngon kasẹ̌ u sasěmba su Wal᷊em Mawu e, Mawu Yesus měnẹ̌nahimata taumata apam měmpẹ̌tẹ̌tahon doitʼi sire su ral᷊ungu kasẹ̌ ene. Lawọ taumata kalạ měmpẹ̌tẹ̌tahon doitʼi sire maral᷊awọ; 42mase sěngkatau wawine wal᷊u kasiang himaungke lai. I Sie nẹ̌tahon doitẹ̌ bitụ duang kal᷊ěpa kaesẹ̌ kụ arẹ̌gane kasasanakenge. 43Tangu Mawu Yesus kimuị e manga muritʼE mase něhengetangke si sire, ”Kakěllako ini: Bawine wal᷊u kasiang ěndaị ene kai nẹ̌taho su kasẹ̌ e l᷊imembon kal᷊awọe wọu kěbị apan nịtatahon taumata wal᷊ine e. 44U i sire kěbị e němpẹ̌taho wọu l᷊ěmbeng arětạ i sire. Arawe tau wawine wal᷊u e maning kerene kakasiange kai nangonggọu apam piạ e – kụ kai apang gẹ̌gausange waugʼu ipẹ̌biahe.”
Currently Selected:
MARKUS 12: SXN
Highlight
Share
Copy
Want to have your highlights saved across all your devices? Sign up or sign in