MATIUS 7
7
Mạanun pělahukung taumata
(Luk. 6:37-38, 41-42)
1”Kumbahang měmpẹ̌hukung taumata wal᷊ine, tadeạu i kamene tawe ihukung u Ruata e. 2#Mrk. 4:24 U kerẹewe i kamene měmpẹ̌hukung taumata wal᷊ine, kerene lai Mawu Ruata e sarung měhukung i kamene. U sasukạ ipanukạ i kamene su taumata wal᷊ine e sarung l᷊ai ipanukạu Mawu Ruata si kamene. 3Unụe i kamene makạsilo wue tahuwu su mataʼm manga anạ u sěmbaụ u arawe sal᷊awaku su ral᷊ungu matanue tawe ikasilong kamene? 4I kamene makạbera su anạ u sěmbaụ u, ’Mahịe iạ měngal᷊ạ pul᷊ing ene bọu matanu e,’ dal᷊iune kawe piạ sal᷊awaku su ral᷊ungu matanu? 5Ei tau mělle! Al᷊ako kal᷊amona sal᷊awaku su matanu ho, buhụe i kau makasilo mapia kụ makaal᷊ạ pul᷊ingu matang anạ u sěmbaụ u e.
6Abe onggọ apan susi su asu, u asu e kai měmal᷊ị maněmbo si kamene. Kerene lai mutiara e abe onggọ su wawi, u mutiara e kai sarung dal᷊indaěngu wawi e.”
Pẹ̌dorong, pẹ̌deạ dingangu pěnengkelẹ̌
(Luk. 11:9-13)
7”Pěmpẹ̌dorong, tangu i kamene onggol᷊ang. Pěmpědeạ, tangu i kamene makahombang. Pěmpěnengkel᷊ẹ̌, tangu i kamene sarung pěnopeěng tukadẹ̌. 8Ual᷊ingu i sai mědẹ̌dorong i sie sarung onggotang; i sai mědẹ̌deạ sarung makahombang; dingangu i sai měnẹ̌nengkelẹ̌ sarung pěnopeěng tukadẹ̌. 9I Amangbe sude ngae měgěllịu watu kereu anạe mẹ̌dorong kaěng? 10Arau kawe mangonggọu těmpu kereu anạe mẹ̌dorong kinạ? 11Maningbe i kamene matal᷊ipupụ, kai i kamene masingkạbe lai mangonggọu apan mapia su manga anạ i kamene. Něngalembọewe i Amang su Sorga e! I Sie limembong kapiane, kụ sarung mangonggọu apan dẹ̌dorongang si Sie.
12 #
Luk. 6:31
Pěmpẹ̌koạko su taumata wal᷊ine kerẹewe ikẹ̌kapulung kamene, wọu i sire. U kai ene timonan toratẹ̌ nionggọ i Musa ringangu těntirom manga nabi.”
Sasuẹ̌kang mahepọ
(Luk. 13:24)
13”Pěmpẹ̌suẹ̌ bọu tukadẹ̌ mahepọ, u tukadẹ̌ dingangu ral᷊eng mětẹ̌timona naraka kai ghẹ̌guwạ dingangu mal᷊oahẹ̌, kụ mal᷊awọ taumata mạhunsuẹ̌ bọu ene. 14Kai mahepọ dingangu masěsẹ tukadẹ̌ arau ral᷊eng makạhumpạ u pẹ̌bawiahẹ̌ e. Kụ kětạeng mahal᷊i taumata makahumpạ u ene.”
Kalu ringangu wuane
(Luk. 6:43-44)
15”Pakatateghang su manga mahang nabi e. I sire rụděnta anung kamene makịtikạ domba, sěmbal᷊iau tumuhụ hinone i sire kai ral᷊ugẹ̌ bahani. 16I kamene makakiral᷊a si sire wọu apang kẹ̌koateng i sire. Sumpinịe tawe kapanipoěng buang anggorẹ̌ dingangu wọu ěnggahanạe tawe kapědeakeng buang ara. 17Bọu kakaluang matatendange kẹ̌kaěbakeng buane mapapia ringangu wọu kakaluang daral᷊akịe kẹ̌kaěbakeng buane ral᷊aị. 18Kakaluang matatendange tawe mẹ̌bawuam buane ral᷊aị, dingangu kakaluang daral᷊akịe tawe mẹ̌bawuam buane mapapia. 19#Mat. 3:10; Luk. 3:9 Apang kalu tawe mẹ̌bawuam buane mapapia e ute tuwangeng dingangu tutungang. 20#Mat. 12:33 Kerene lai manga mahang nabi e. I kamene sarung makakiral᷊a si sire wọu l᷊ěnnạʼu munarane.”
Tatuhụ, bal᷊inewe wawera
(Luk. 13:25-27)
21”Bal᷊inewe kěbị taumata apan měsẹ̌sěbạu Iạ, ’Mawu, Mawu,’ sarung makoạ kawanuan Duata, kaiso kawe kětạeng i sai-sai měkẹ̌koạ kapulung Amang-Ku su Sorga. 22Tangu su ěllo kasamuriange sarung mal᷊awọ taumata měmpẹ̌bera su těngo-Ku, ’Mawu, Mawu, u karạ kai ringangu arengu Mawu e i kami mělẹ̌habarʼu hengetangu Mawu Ruata? Dingangu karạ kai ringangu arengu Mawu e lai i kami měnẹ̌nokol᷊ʼu manga rohkẹ̌ daral᷊aị mase makakoạ manga hal᷊ẹ̌ makạdal᷊inaụ lawọ?’ 23#Mzm. 6:9 Arawe Iạ e sarung sumimbahʼu, ’Iạ e mambeng bẹ̌gang kamene! Kụ pěmpamehọe wọu ini, i kamene tahapẹ̌koạ dal᷊aị!’ ”
Měmamětị bal᷊e matahuěnna ringangu longong
(Luk. 6:47-49)
24”Tangu, i sai makạdingihẹ̌ bawera-Ku ini e, kụ tutuhụe, ute mẹ̌sul᷊ungu tau matahuěnna nẹ̌koạ bal᷊ene su wowom batu. 25Su tempon tahiti nangěndụ dingangu lẹ̌bae rimal᷊engke mase wal᷊e nitanggaěngkol᷊aing anging maihạ, kai wal᷊e ene mang tawe nahaka u kawe nirarisị su wowom batu.
26Kụ i sai makạdingihẹ̌ bawera-Ku ini e kụ tawe tumatuhụ, ute i sie mẹ̌sul᷊ungu taumata l᷊ongong i sie namětị bal᷊ene su ěnne. 27Su tempon nirasehang dingangu nělěbạe kụ anging maihạ timanggạe, tangu wal᷊e nahakạe. Kụ měngkate apa naghagholang!”
Kawasam Mawu Yesus
28 #
Mrk. 1:22; Luk. 4:32 Ene sarạeng Mawu Yesus nasuẹen těntirone, tangu taumata apan ene sene mangkewen něngkaherang nakaringihẹ̌ těntironʼE e. 29Ual᷊ingu i Sie mạněntiro piạ pěhěngkinge, wal᷊inewe kere manga mananěntirong agama.
Currently Selected:
MATIUS 7: SXN
Highlight
Share
Copy
Want to have your highlights saved across all your devices? Sign up or sign in