MATIUS 28
28
Pẹ̌bawangung u Mawu Yesus
(Mrk. 16:1-10; Luk. 24:1-12; Yoh. 20:1-10)
1Ene sarạeng ěllon Sabatẹ̌ e nal᷊iu, tangu su kalongeng ěllo Misa e, i Maria Magdalena ringangi Maria lai wal᷊ine natamaịe němpẹ̌dal᷊inge němpamanda l᷊ěbing ene. 2Sěngkianu piạ linuhẹ̌ maihạ. Sěngkatau malaekatʼu Mawu e limintụ bọu sorga kụ nělungging batu lahěpinge; kụ kimaiangke su wowone. 3Gahịu malạekatẹ̌ e kere kilạ, pakeange mawira pal᷊usẹ̌. 4Sordado měndal᷊ukadẹ̌ e měmpẹ̌lěhapa sene měngkatewe něngkawintogẹ̌ sarang i sire nahungkende, kụ tabidạu kere taumata nate.
5Malạekatẹ̌ e nẹ̌bera su manga wawine ene, ”Abe kěngkatakụ! Iạ masingkạ i kamene mědědeạ si Yesus nạung seng nikuruisẹ̌ ene. 6I Sie tawẹdise sini. I Sie kai seng nẹ̌bangung kerẹewe seng nihabarʼE kal᷊amona. Mahịe pěmpẹ̌kakělla ěnnạ u rẹ̌dal᷊okaěnge. 7Ene, rakọe lighạ pěhabarẹ̌ su manga muritʼE, ’U i Sie kai seng nẹ̌bangung bọu tal᷊oaran taumata nate, kụ i Sie kai seng natamai něngal᷊imona si kamene sol᷊ong Galilea. Sene i kamene sarung makasilo si Sie!’ Tahěndungeko apang seng takụ nịbawera si kamene.”
8Měngkatewe masahawụ manga wawine ene němpaněntang u l᷊ěbing ene. I sire nahuntal᷊ang mědeạu měhabaru hal᷊ẹ̌ nariadie su manga muritʼu Mawu Yesus, dingangu takụ nẹ̌dal᷊aụ u ral᷊uasẹ̌.
9Sěngkianụe Mawu Yesus naněnsomahẹ̌ manga wawine ene, kụ něhengetang, ”Tabeạ!” Kụ i sire himaungke si Sie mase limahěkụe laede ringangu němpẹ̌suba si Sie. 10”Abe kěngkatakụ,” angkuěng i Yesus si sire, ”dakọe pěmpěhabarẹ̌ su manga anạ u sěmbaụku e mẹ̌deạu i sire makoạ sol᷊ong Galilea kụ sene i sire sarung makasilo Siạ.”
Pělahabarʼu manga měndal᷊ukadẹ̌ e
11Piạ e manga wawine ene kạpahundal᷊enge, pirang katau sordado apang měmpělẹ̌hapa l᷊ěbinge němpẹ̌bal᷊ị sol᷊ong soa, kụ němpěhabarʼu patikụ apan nariadie su manga těmbonangu imang. 12Manga imang těmbonange němpẹ̌dal᷊ahintau ringangu manga matatimadʼu tau Yahudi, mase nangonggọen doitẹ̌ lawọ su sordado měndal᷊ukadẹ̌ e, 13kụ nẹ̌bera, ”I kamene harusẹ̌ pěmpaul᷊ị u manga muritʼu Mawu Yesus e riměnta hěbi, kụ němpẹ̌tako maietʼu Mawu Yesus piạ i kamene kạpahuntikịe. 14Kụ kereu ikaringihu guběrnurẹ̌ hal᷊ẹ̌ ene ute, i kami hědowe měloke si sie tadeạu i kamene tawe mẹ̌sombangu sungkal᷊ene apa.”
15Tangu sordado měndal᷊ukadẹ̌ e rimaẹ doitẹ̌ ene, kụ nẹ̌koạewe apan nạung nitanata si sire. Ual᷊ingu ene tangu wěke ene wědangben nasěsahẹ̌ su tal᷊oaran tau Yahudi e sarang ěllo ini.
Mawu Yesus nẹ̌těngkasiloʼm batangenge su manga muritʼE
(Mrk. 16:14-18; Luk. 24:36-49; Yoh. 20:19-23; MMR. 1:6-8)
16 #
Mat. 26:32; Mrk. 14:28 MuritʼE mapul᷊o ěsa e simaka sol᷊ong bul᷊ude su Galilea, kerẹewe nạung pakịděntaing Yesus si sire. 17Piạ i sire nakasilo Mawu Yesus sene, i sire němpẹ̌suba si Sie. Maning kerene kai mang piạ u mẹ̌děndapatẹ̌ bọu tal᷊oaran sire. 18Mawu Yesus himaung si sire, apidʼu nẹ̌bera angkuěng, ”Patikụ kawasa su sorga ringangu su dunia e seng nisarakang si Siạ. 19#MMR. 1:8 Ual᷊ingu ene ute, dakọe pěmpahundal᷊eng, kụ patikụ umatẹ̌ su kasěllahʼu dunia e koạko muritẹ̌-Ku. Sahaniko i sire su areng i Amange ringangu Ahusẹ̌ dingangu Rohkẹ̌ u Ruata e. 20Těntiroiko i sire mẹ̌sempị kěbị apan takụ nioro si kamene. Kụ pẹ̌tahěndungu Iạ e mang maněntanudẹ̌ si kamene sarạeweng kasueěngu dunia e.”
Currently Selected:
MATIUS 28: SXN
Highlight
Share
Copy
Want to have your highlights saved across all your devices? Sign up or sign in