MATIUS 19
19
Těntiroʼm Mawu Yesus mạanum pẹ̌sasindo
(Mrk. 10:1-12)
1Ene Mawu Yesus nasuẹen hengetange kěbịe, i Sie naněntangkeng Galilea e mase nakoạ sol᷊ong banuang Yudea, su sěmběkan Sal᷊ụ u Yordan. 2Lawọ taumata nẹ̌batụ si Sie, kụ i Sie napakapian sire sene.
3Mase tau Farisi e nahunděnta mẹ̌deạu mětẹ̌gạ si Sie. I sire nakiwal᷊o, ”Tumuhụ toratʼu agamang kitẹ e, botonge ngae taumata manindo kawinge walạewe měnsang ual᷊ingu a?”
4 #
Pěnd. 1:27, 5:2 Mawu Yesus simimbang, ”Kai ta nakạbasa i kamene su ral᷊ungu Winohẹ Susi u Měndariadi taumata e nạung bọu tětạe něndiadi si rẹ̌dua esẹ dingangu wawine? 5#Pěnd. 2:24 Kụ bọu ene i Sie něhengetang, ’Kai ene, hakịeweng esẹ e kawe maněntang i ninang dingangu i amange kụ mẹ̌těngkatakidẹ̌ dingangu kawinge kụ i rẹ̌dua nasěmbaụ.’ 6Kutẹu i rẹ̌dua e sembem bal᷊inewe rarua, kaiso kawe sěmbaụ. Kụ kai ene, hakịu apang kụ seng nikauhʼu Ruata abe pẹ̌tan taumata.”
7 #
Pang. 24:1-4; Mat. 5:31 Mase tau Farisi němpẹ̌kiwal᷊o si Sie, ”Kamageng kerene, unụe wue i Musa mạngoro taumata apěgẹ̌gěllịu suratʼu sindo su kawinge kụ seng nisindoěng e?”
8Mawu Yesus simimbang, ”I Musa napakawalang kamene manindo kawingʼi kamene ual᷊ingu i kamene tumanịu makětị těntiroěng. Kai tuhụ hinone ute kai wal᷊inewe kerene rokeng bọu tětạe. 9#Mat. 5:32; 1Kor. 7:10-11 Kụ pẹ̌daringihẹ̌ko ini: I sai manindo kawinge – sěmbal᷊iau wawine ene tawe nawuang – bọu e saụ nẹ̌kawing u wawine wal᷊ine ute, tau ene nawuang.”
10Tangu manga muritʼi Yesus němpẹ̌berạe si Sie, ”Kamageng kakakoạu sěngkawingang kai kerene ute, mạpiangbe ta mẹ̌kawing.”
11Mawu Yesus simimbang u, ”Bal᷊inewe kěbị taumata makatarimạu manga wawera ene, kai kětạeng taumata apan seng nitilakehʼu Ruata. 12Ual᷊ingu kai piạ taumata tawe nẹ̌kawing, ual᷊ingu i sire semben kerene rokeng bọu kal᷊uwaeng i ninange. Piạbe lai tawe nakapẹ̌kawing ual᷊ingu pẹ̌kakoạu taumata wal᷊ine. Dingangu piạbe lai nẹ̌tatudẹ tawe nẹ̌kawing, mědeạu makapẹ̌tangkiang Mawu Ruata. I sai makaumal᷊ẹ̌ manarimạ u těntiro ini ute, walạe kere i sie apěnarimạ.”
Mawu Yesus něngal᷊amatẹ̌ manga rariọ
(Mrk. 10:13-16; Luk. 18:15-17)
13Piạko taumata němpěngěntudẹ̌ manga rariọ su anung Yesus pakịtěllideng l᷊imanʼE su těmbọ i sire ringangu makikal᷊iomaneng i sire. Kutẹu manga muritʼi Yesus kawe němpẹ̌pědu si sire. 14Tangu Mawu Yesus němpẹ̌bera su manga muritʼE, ”Balạe manga rariọ e ruměnta su anuku! Abe sahaghei i sire, u kai manga rariọ kere ini e sarung makoạ kawanuan Duata.”
15Mase Mawu Yesus naněllidʼu l᷊imanʼE su těmbọ u manga rariọ ene kụ něngal᷊amatẹ̌ si sire. Mase i Sie nangensọ bọu tampạ ene.
Tau umbaseng kalạ
(Mrk. 10:17-31; Luk. 18:18-30)
16Su sahěllo piạ tau esẹ sěngkatau riměnta su anung Yesus. ”Tuang Guru”, angkuěng e, ”kakanoạ sude mapia hinon takụ koateng tadeạu makatarimạ pẹ̌bawiahẹ̌ tutune ringangu kakalẹ̌ e?”
17Mawu Yesus simimbang, ”Unụe i kau makịbal᷊ong hal᷊ẹ̌ mapapia e si Siạ? Kětạeng piạ sěmbaụ mapia. Kereu i kau mapulu mẹ̌biahẹ̌ ute, i kau e harusẹ̌be pakatuhụ su titaʼm Mawu Ruata.”
18 #
Sas. 20:13-16; Pang. 5:17-20 ”Tita we sude tangu ene?” angkuěngu tau ene.
Mawu Yesus simimbang, ”Kumbahang mamate, kumbahang mawuang, kumbahang mẹ̌tako, kumbahang mẹ̌sahiding konti, 19#Sas. 20:12; Imng. 19:18; Pang. 5:16 pangadatẹ̌ si amang dingangu si ninangu ringangu kěndagʼu kasanggidangu mẹ̌sul᷊ungu i kau kuměndagʼu watangengu e hala.”
20”Patikụ tita e seng takụ nisěmpikang,” angkuěngu tau umbaseng ene, ”Delaing apa wědang?”
21Mawu Yesus nẹ̌berạe si sie, ”Kereu i kau mapulu masukụ ute, rakọe pẹ̌bal᷊ụ u patikụ darotong u, onggọko roite su taumata kasiang, kụ i kau sarung makahombang arětạ su sorga. Bọu ene, ramahị e tol᷊ẹ e si Siạ!”
22Sarang nakaringihe wawera ene, umbaseng ene napul᷊ẹ dingangu naunge masusa watụ u i sie kawe taumata rarotonge lawọ.
23Mase Mawu Yesus něhengetangke su manga muritʼE, ”Iạ mẹ̌bera si kamene, apawe mawěhạ kahěngang tau kalạ makoạ kawanuan Duata. 24Kạpia Iạ maul᷊ị si kamene; mạl᷊owokangbe onta sumuẹ̌ lohangu tul᷊ing darahung, sul᷊ungu tau kalạ sumuẹ̌ su Runian Duata Wuhu e.”
25Sarạeng manga muritʼi Yesus nakaringihẹ̌ baweran Mawu Yesus e, i sire měngkai apa rimal᷊inaụ. ”Kamageng kerene,” angkuěng i sire, ”i sai wue masal᷊amatẹ̌ e ho?”
26Mawu Yesus němandạe si sire mase nẹ̌berạe, ”Su taumata e, ene tawe nasowa su akal᷊ẹ̌! Arawe su Ruata e, kěbị měngkai mariadi.”
27Mase i Petrus nẹ̌berạe, ”Kakěllako, i kami seng naněntang u patikụ sạbarang baugʼu tumol᷊e si Tuang. Kụ apa wue sarung ikatarimạ i kami?”
28 #
Mat. 25:31; Luk. 22:30 Mawu Yesus nẹ̌berạe si sire, ”Pěmpangimangke: Su Dunia Wuhu e, Ahusʼu Taumata e sarung maiang su wowong kaderang kawawantugẹ̌. Su tempo ene i kamene manga muritẹ̌-Ku e sarung maiang su kaderang kawawantugẹ̌ mapul᷊o dua kụ měmpẹ̌hukung u hěntong Israel mapul᷊o dua! 29Kụ isaịewen naněntang u wal᷊e arau anạ u sěngkataune esẹ arau wawine, arau inang i amang arau manga anạ, arau winal᷊aenge waugʼu Iạ e, tau ene sarung manarimạ kapia mahasụ su sul᷊ene. Kụ i sie sarung l᷊ai manarimạ pẹ̌bawiahẹ̌ tutune ringangu kakalẹ̌. 30#Mat. 20:16; Luk. 13:30 Kai lawọ taumata orasẹ̌ ini apang kahumotongange sarung měngkakoạ kasamuriange, ringangu apan kasamuriange sarung měngkakoạ kahumotongange.”
Currently Selected:
MATIUS 19: SXN
Highlight
Share
Copy
Want to have your highlights saved across all your devices? Sign up or sign in