MATIUS 10
10
I sire mapul᷊o dua rarolohangʼu Mawu
(Mrk. 3:13-19; Luk. 6:12-16)
1Mawu Yesus kimui si sire muritʼE mapul᷊o dua su kataune pinẹ̌komolẹ̌, kụ nẹ̌gěllị u kawasa si sire apěnokol᷊ʼu manga rohkẹ̌ dal᷊aị dingangu mapạkapian kal᷊awọu haghin sakị dingangu tědụ u wadang. 2I sire ene ute kai: humotong, i Simon (isẹ̌sẹ̌bạ lai si Petrus) dingangu tuarine i Andreas, mase i Yakobus dingangu tuarine i Yohanes, manga anạ i Zebedeus. 3Bọu e i Filipus dingang i Bartolomeus, i Tomas dingang i Matius maghaghělle bea ringangkewen Yakobus anạ i Alfeus, dingang i Tadeus; 4mase pěngěnsueěnge i Simon, i Anu Wahani ringang i Yudas Iskariot, i anu nẹ̌tul᷊ạen Mawu Yesus.
Munaraʼm manga rarolohang
(Mrk. 6:7-13; Luk. 9:1-6)
5I sire mapul᷊o dua ene nirolohʼi Yesus ringangu nitumbal᷊ungang u, ”Kumbahang měmpahundal᷊eng makahumpạ u wanuam bal᷊ine tau Yahudi. Dingangu abe lai kakoạ sarang soan tau Samaria. 6Kaiso kahumotongange kakoạko sarang anun tau Israel apan něngkailang. 7#Luk. 10:4-12 Pẹ̌habarẹ̌ko si sire u Ruata e sarung mal᷊ighạ mẹ̌parenta kere sěngkatau Ratu. 8Pakapiangkon masasakị; Pamiahẹ̌ko apan nate; pakaul᷊ekong apang piạ sakịe su pisị makạtatakụ, dingangu pěnokol᷊ẹ̌kon manga rohkẹ̌ daral᷊aị. I kamene seng něnarimạu kěbị ene tawẹ bawaehe, kụ pěmpěgěllịko l᷊ai tawẹ bawaehe. 9Abe pěmpẹ̌bawa roitẹ̌ bul᷊aeng, roitẹ̌ sal᷊aka arau lai roitẹ̌ tambaga. 10#1Kor. 9:14; 1Tim. 5:18 Abeko l᷊ai pěmpẹ̌bawa kawihʼu roitẹ̌ arau l᷊ahaweng u rarua waugʼu raral᷊engu, arau sapatu, arau těking. U i sai měkẹ̌karadiahange ute hinone wue makahombang laidope.
11Kereu i kamene makahumpạen soa arau kampong sude, ute pěmpẹ̌deạbe si sai mapulu manarimạ i kamene. Kěngkatanạbe ringange sarạeweng i kamene měmpahundal᷊eng kạpia wọu ene. 12Kereu i kamene kạdangenge su wal᷊e ute, pẹ̌berako, ’Karimạko Mawu e měngal᷊amatẹ̌ si kamene.’ 13Kamageng taumata su wal᷊e ene manarimạ u ene, ute pěngangadatʼu e remben marěpang si sire. Kai kereu i sire tawe manarimạ i kamene ute kaul᷊e e kapia pangangadatʼu e. 14#MMR. 13:51 Kereu piạ bal᷊e arau soa tawe manarimạ i kamene arau tawẹu rumaringihẹ̌ si kamene, ute pahuntěntangkeng kamene tampạ ene ringangu tontongke awul᷊ẹ̌ bọu pal᷊edʼu laedu. 15#Pěnd. 19:24-28; Mat. 11:24 Tahěndungeko u, su Ěllong Kiamatẹ̌, Duata e mạhaěngangbe mangonggọu ampung su taumatan soan Sodom dingangu Gomora e sul᷊ungken taumatan soa ene!”
Tatumbiagẹ̌ sarung duměnta
(Mrk. 13:9-13; Luk. 21:12-17)
16 #
Luk. 10:3
”Pẹ̌daringihẹ̌ko: Iạ e měndolohʼi kamene kere domba su tal᷊oaran dal᷊ugẹ̌ marangěngisẹ̌. Kụ pakapapentesẹ̌ko i kamene kere těmpu ringangu pakatatul᷊idẹ̌ naung, i kamene kere paluma. 17#Mrk. 13:9-11; Luk. 12:11-12, 21:12-15 Pakaral᷊ěndị bue, batụ u i kamene sarung samekang kụ ipẹ̌těngo manga mělahukung. U i kamene sarung ipakasịgěsạ su kanisan sire. 18I kamene sarung isarakang su těngom mangangawasa ringangu manga ratu ual᷊ingu i kamene kawe tumatol᷊e Siạ. Kụ seng tempone si kamene waụgʼu měmpẹ̌sahiding Iạ si sire ringangu su taumata apạewem bẹ̌gan Duata. 19Arawe kamagengu i kamene kawe i sarakang su mělahukung ute, abe ghěnggangu apa hinong i werang kamene, arau kereapa i kamene hinong mẹ̌bisara. U apa hinong i werang kamene ene, sarung ihabarẹ̌ si kamene su tempone. 20U měbẹ̌bisara su tempo ene e wal᷊inewe i kamene, kaiso kawe Rohkẹ̌ i Amang su Sorga e su ral᷊ung i kamene.
21 #
Mrk. 13:12; Luk. 21:16 Sarung mariadi u taumata e sarung manarakangu anạ u sěmbaụe sẹ̌sane mědeạu ipakapate. Dingangu ene lai sarung mariadi sutal᷊oarang amange ringangu anạe. Manga anạ sarung dumokạ si ninange ringangu si amange ku manarakang i sire mědeạu pakipate. 22#Mat. 24:9, 13; Mrk. 13:13; Luk. 21:17 I kamene sarung ipẹ̌binsị u kěbị ual᷊ingu i kamene kawe tumatol᷊e-Ku. Arawe i sai makakẹ̌dang sarang pangěnsueěnge, sarung masal᷊amatẹ̌. 23Kereu i kamene sẹ̌sahusuang su soa sěmbaụ, ute pahuntal᷊ang sol᷊ong soa sěmbaụ. Iạ maul᷊ị si kamene: U mambeng kahěngang těntal᷊ang i kamene reng ta nakạsuen pěpide kal᷊awọu soang Israelẹ̌ e, Ahusʼu Taumata e seng diměnta.
24 #
Luk. 6:40; Yoh. 13:16, 15:20 Muritẹ̌ e wal᷊inewe limembong gẹ̌guwạ bọu mananěntirone, ringangu ěllange wal᷊inewe limembong kasěllahẹ̌ wọu mawune. 25#Mat. 9:34, 12:24; Mrk. 3:22; Luk. 11:15 Seng kapapiane kereu sěngkatau muritẹ̌ mariadi kere mananěntirone, ringangu sěngkatau ěllange kere mawune. Kereu matimadʼu wal᷊e seng nisěbạ si Beelzebul ute, rumakeleng kawe ral᷊ohom bal᷊ene. I sire sarung kaghělirangu areng limembong karal᷊akise!”
Kěngkatakụben Mawu Ruata
(Luk. 12:2-7)
26 #
Mrk. 4:22; Luk. 8:17 ”Abe kěngkatakụ u taumata. U tawẹu kạl᷊ahěmbung kụ tawe ikasilo, dingangu tawẹu kạbawuni kụ tawe kasingkateng. 27Apạeweng takụ nipaul᷊ị si kamene su marěndung, ul᷊ịko su matualagẹ̌. Dingangu apạeweng nịsasiang su tul᷊ing kamene ute wohangko pakal᷊ikụ! 28Abe kěngkatakụ i sire apam měmpamate wadang, kai tawẹ kawasa měmpamate himukudẹ̌ e. Kai kěngkatakụben Mawu Ruata kụ kai makạbinasa himukudẹ̌ ringangkewelaing badange su naraka. 29Hěnggeng duambaụ botonge kawěliangu roitẹ̌ sěngkal᷊ẹ̌pa kakạdodokange. Maning kerene kai tawẹu sarang sěmbaụ manawo su ěntana su l᷊ikudʼu kasingkạ i Amang i kamene. 30Kakěpal᷊u utạ su těmbọ u seng nirekenang kěbị. 31Batụ u ene, abe kěngkatakụ! I kamene limembowe maarẹ̌ga wọu manga hěnggeng!”
Mangakun Yesus su těngong lawọ
(Luk. 12:8-9)
32”Tangu i saịewen mangakung Iạ su těngon taumata e, sarul᷊aing takụ iaku su těngong Amang-Ku su Sorga e. 33#2Tim. 2:12 Arawe i saing kawe mẹ̌sunial᷊ẹ̌ su těngong lawọe, Iạ e lai sarung mẹ̌sunial᷊ʼi sie su těngong Amang-Ku su Sorga.”
Bal᷊inewe pẹ̌darame, kaiso kawe pẹ̌darokạ
(Luk. 12:51-53, 14:26-27)
34”Abe pěmpangiral᷊ingu Iạ e kawe ruměntam pẹ̌darame su dunia ini. Iạ e wal᷊inewe riměntam pẹ̌darame, kaiso kai pẹ̌darokạ. 35#Mi. 7:6 Iạ e riměnta mapẹ̌daral᷊aị anạu esẹ dẹ̌duang amange, anạ bawine rẹ̌duan ninange, ringangu anạ mirarating bawine e rẹ̌duan ninange kinaratingang. 36Ore, kụ sarung mariadi sědụ kạguwakenge, ute kai ral᷊ohong bal᷊ene sẹ̌sane.
37I saing kụkěndagʼi amange arau i ninange limembo wọu Iạ e, tawe hinone makoạ muritẹ̌-Ku. Kerene lai isaing kụkěndagu anạe esẹ arau anạe wawine limembo wọu Iạ e. 38#Mat. 16:24; Mrk. 8:34; Luk. 9:23 Dingangu i sain tawe mapulu mamasaěng kuruisẹ̌ e ringangu tumol᷊e si Siạ, ute tawe hinone makoạ muritẹ̌-Ku. 39#Mat. 16:25; Mrk. 8:35; Luk. 9:24, 17:33; Yoh. 12:25 I sai mẹ̌tẹ̌tatahangu pẹ̌bawiahẹ̌ sarung kailangeng pẹ̌bawiahe, arawe i sai mẹ̌tẹ̌tatahangu pẹ̌bawiahẹ̌ e ual᷊ingu satiane si Siạ, e ute, sarungbe makahombang pẹ̌bawiahẹ̌.”
Al᷊amatʼu pẹ̌kakoạ mapia e
(Mrk. 9:41)
40 #
Mrk. 9:37; Luk. 9:48, 10:16; Yoh. 13:20 ”I sai manarimạ i kamene ute, manarimạu Iạ. Dingangu i sai manarimạu Iạ e ute manarimạ i Sie něndolohʼu Iạ e. 41I saim manarimạu nabi, ual᷊ingu i sie kai nabi ute, sarung manarimạ bawal᷊ise waugʼu sěngkatau nabi. Dingangu i sai manarimạu sěngkatau mapia ual᷊ingu i sie mapia ute, sarung manarimạ bawal᷊ise waugʼu sěngkatau mapia. 42I sai mapěnginungu sěngkatau wọu tal᷊oaran sire kasiang ini e manịeng tumbạ u akẹ lěnding ual᷊ingu i sie kawe muritẹ̌-Ku ute, pěmpangimangke u i sie mambeng těngadẹ̌ sarung manarimạ bawal᷊ise!”
Currently Selected:
MATIUS 10: SXN
Highlight
Share
Copy
Want to have your highlights saved across all your devices? Sign up or sign in