LUKAS 8
8
Manga wawine mẹ̌tẹ̌tangkiang si Yesus
1Tawe Karěngụe wọu ene tangu i Yesus limuhu kal᷊awọu soa ringangu manga kampong tadeạu měhabarʼu Injilẹ̌ u Mawu Ruata seng nanětạ mẹ̌parenta makoạ Datu. I sire mapul᷊o dua su kataune muritʼE ute ringangʼE. 2#Mat. 27:55-56; Mrk. 15:40-41; Luk. 23:49 Kerene lai pirang katau manga wawine apan seng naul᷊e wọu rohkẹ̌ dal᷊akị dingangu sakịe. I sire ene i Maria, isẹ̌sẹ̌ba si Magdalena (rohkẹ̌ dal᷊akị pitu e nạung seng nisěbang bọu i sie); 3i Yohana l᷊ai, kawingi Khuza, mělẹ̌hal᷊ẹ̌ su wal᷊eng Datu i Herodes; i Susana ringangu l᷊awọ lai manga wawine wal᷊ine. Ringangu wawaehʼi sire hala ute i sire měmpẹ̌tẹ̌tangkiang si Yesus dingangu l᷊ai manga muritʼE.
Papinintung mananawuhẹ̌
(Mat. 13:1-9; Mrk. 4:1-9)
4Taumata měngkatewe mạhunděnta sol᷊ong anung Yesus wọu kal᷊awọu soa. Ringangu su tempon seng lawọ taumata natampung, i Yesus mẹ̌bẹ̌běken papinintu kere ini: 5”Piạ e sěngkatau měnanawuhẹ̌ bine. Kutẹu kạpanawuhete, piạ bine nanawo su ral᷊eng. Sěnggạ ute nitahidang u taumata ringangu sěnggạ nikaěng u manụ u winalangeng e. 6Piạko l᷊ai nanawo su tampạ mawatu kụ su tempon himẹ̌tị, apidu nahẹ̌gu, watụ u ěntanane mamara. 7Piạko l᷊ai wine nanawo su tal᷊oaran sumpinị. Tangu sumpinị e timuwo sěngkatuwo ringangu wine e, kụ nakaěpisẹ̌ hakịu nate. 8Kutẹu piạko l᷊ai wine nanawo su ěntanane matawa, mase timuwo ringangu nẹ̌bua mahasụ su kawene.”
Sarạeng bọu nẹ̌běkem papinintu ene, i Yesus něhengetang, ”Kamageng piạ tul᷊i, daringihẹ̌!”
Kawe unụe Mawu Yesus nẹ̌papinintu e
(Mat. 13:10-17; Mrk. 4:10-12)
9Manga muritʼi Yesus nakiwal᷊o si Sie mangal᷊en papinintu ene. 10#Yes. 6:9-10 I Yesus simimbang, ”I kamene seng nionggotang u tahuěnna tadeạu makaěnna piněnnisu mạanun měnsang kereapa Mawu Kasěllahenge nẹ̌parenta nakoạ Datu e. Arawe i sire wal᷊ine ute tẹ̌těntirong dingangu papinintu, mẹ̌deạu i sire kumakělla, kaiso wẹ̌ga wue apa nariadi; ringangu i sire makạdingihẹ̌, kaiso tawe makaěnna.”
Mawu Yesus mạnualagʼu papinintu mạanung sěngkatau mananawuhẹ̌
(Mat. 13:18-23; Mrk. 4:13-20)
11”Kai ini mangal᷊em papinintu ěndaị e: Bine ene kai hengetangu Ruata. 12Bine nasawuhẹ̌ sural᷊eng mẹ̌sul᷊ungu taumata apan nakaringihẹ̌ hengetang ene. Arawe setang riměnta kụ něhampasẹ̌ hengetang ene wọu naungi sire, mẹ̌deạu i sire tawe měmpangimang kụ měngkasal᷊amatẹ̌. 13Bine nasawuhẹ̌ su tampạ mawatu mẹ̌sul᷊ungu i sire nạung su tempon nakaringihẹ̌ hengetang ene, něnarimạbe ringangu naung maral᷊uasẹ̌. Kaiso hengetang ene tawẹ hamụe su ral᷊ungu naung i sire. I sire němpangimang sěngkakondạ, kụ su tempon sasal᷊ukạ himombang, i sire němpẹ̌děndilẹ̌. 14Bine nanawo su sumpinị mẹ̌sul᷊ungu i sire apan nakaringihẹ̌ hengetang e, kaiso ghụgěnggang u pẹ̌bawiahʼi sire ringangu mapulu mẹ̌biahẹ̌ su kakakalạ dingangu karal᷊unsemahẹ̌ su ral᷊ungu dunia ini. Kěbị ene mạngěpisẹ̌ si sire hakịu tawe měmpẹ̌buam buane masasạ. 15Bine nanawo su ěntanane matawa e mẹ̌sul᷊ungu taumata nakaringihẹ̌ hengetang e, mase něndesọ maěmpigẹ̌ su naunge ringangu katul᷊ide. I sire měmpạngampal᷊ẹ̌ sarang piạ buane.”
Sol᷊o nilingkubang u wěnsadẹ̌
(Mrk. 4:21-25)
16 #
Mat. 5:15; Luk. 11:33 ”Tawẹ taumata měndikọ sol᷊o mase lingkubang u wěnsadẹ̌ arau isěllung sual᷊ung u ral᷊okang. I sie sarung maměllọ u sol᷊o e tadeạu taumata apan simuẹ̌ e makasilo tualagẹ̌. 17#Mat. 10:26; Luk. 12:2 Tawẹ apa mạbawuni kụ tawe ikasilo; ringangu tawẹ apa mạdal᷊irung kụ tawe sarung l᷊umahẹ dingangu kasingkateng.
18 #
Mat. 25:29; Luk. 19:26 Ual᷊ingu ene kakěllako pakapia-pia apan seng kinaringhʼi kamene. U i sain piạ delaing onggotang pakal᷊awọe; arawe i sain tala, ute lěmbene kadodọ e relaing sarung pěngal᷊akeng.”
I ninang dingangu anạ u sěngkataung Yesus e
(Mat. 12:46-50; Mrk. 3:31-35)
19Ene i ninangʼE ringangu manga tuhang i Yesus nahunděnta sol᷊ong anunʼE, arawe i sire tawe nakahaung si Sie kahian taumata tumanịu l᷊awọ. 20Tangu piạ sěngkatau nẹ̌bera si Yesus e, ”Tuang, i ninang dingangu manga mahuanenʼU ene su l᷊ikude. I sire mapulu mẹ̌sombang i Tuang.”
21Kai i Yesus něhengetang, si sire, ”I sire apạewen dụdaringihẹ̌ hengetangu Mawu Ruata e ringangu mẹ̌kẹ̌koạ ene, ute kai i sire i ninang-Ku ringangu anạ u sěngkatau-Ku e.”
Mawu Yesus napakal᷊ẹ̌dang děllang
(Mat. 8:23-27; Mrk. 4:35-41)
22Ene su ěllo sěmbaụ i Yesus dingangkewen muritʼE simake sakaeng. ”Mahịe i kitẹ dumakị sol᷊ong sěmbẹ̌kang dano e,” angkuěng i Yesus si sire. Tangu i sire němpẹ̌buạ e. 23Su tempong i sire kạpẹ̌sakaenge, i Yesus kinahuntikilang. Sěngkělěndịe piạ děllang timiụ su rano e. Akẹ nanětạe nakasuẹ̌ sarang dal᷊ungu sakaeng, hakịu nakatatakụ si sire kěbị. 24Manga muritʼi Yesus himaungke si Sie kụ němpamuko si Sie. I sire němpẹ̌bera, ”Tuang Guru, Tuang Guru, i kitẹ masilakạ!”
I Yesus napuko mase němal᷊ěndihẹ̌ anging dingangu luạ kạpẹ̌gẹ̌galumbange. Anging dingangu luạ e nal᷊ědạe kụ dano e měngkatewe nal᷊ene-l᷊enehẹ̌. 25Mase i Yesus něhengetang su manga muritʼE, ”Kawe unụe i kamene tawe měmpangimang si Siạ?”
I sire něngkaral᷊ingu ringangu něngkatakụ. Kụ němpahumbisarạ e i sire sěngkatau su wal᷊ine, ”I sai tangu tau ěndaị e hakịu nẹ̌parenta anging dingangu luạ, kụ i Sie rẹ̌daringihang!”
Mawu Yesus napakapian tau nikasuẹ̌kang u rohkẹ̌ dal᷊akịe
(Mat. 8:28-34; Mrk. 5:1-20)
26Mawu Yesus dingangu manga muritʼE nanẹ̌pasen pẹ̌sasakaengi sire sol᷊ong nahumpạ u wanuang Gerasa#8:26: Gerasa: Binohẹ u nạung pira-pira: Gadara (kakělla Mat. 8:28); piạ u l᷊ai Gergesa. su sěmběkang Danong Galilea. 27Kutẹu sarangke i Yesus natumpa surul᷊unge, i Sie nihaungangu sěngkatau esẹ nikasuěkang u rohkẹ̌ dal᷊akị. Tau ene wọu soa. Seng marěngụ ta mělal᷊uhen pakeange ringangu mạdiri matanạ su wal᷊e. I sie měngkawe mapulu mạtanạ su ral᷊ungu manga l᷊iang tampạ u pěndal᷊ẹ̌bingang. 28Sarangke nakasilo si Yesus e, i sie němansagẹ̌ mase nẹ̌těngkaěnsạ su těngong Yesus kụ nẹ̌bera, ”Yesus, Ahusʼu Mawu Ruata Karangetange! Sarung koatengʼU kereapa iạ e? Iạ mẹ̌kal᷊iomanengu abe paněnsara siạ e!” 29Tau ene nakapẹ̌bera kerene ual᷊ingu i Yesus nẹ̌parenta rohkẹ̌ dal᷊akị e niapasẹ̌bang bọʼi sie. Měngkatewe seng masau i sie sẹ̌sawelangu rohkẹ̌ dal᷊akị e hakịu maning lima ringangu l᷊aede seng mạl᷊aikị dingangu hante kụ i sie lẹ̌lukadeng, kai i sie wẹ̌dang lai makabẹ̌sụ hante ene mase wẹ̌bawaěngu rohkẹ̌ dal᷊akị sol᷊ong banua l᷊inggi.
30Mawu Yesus nakiwal᷊o su tau ene, ”I sai arengu?”
”Arengku e ’Legiun’,” angkuěngu tau ene – ual᷊ing kai lawọ rohkẹ̌ dal᷊akị seng simuẹ̌ e su ral᷊ungu watangenge. 31Manga rohkẹ̌ daral᷊akị e měngkatewe němpẹ̌dorong sěngapam botonge tadeạu i Yesus kumbahangbe měnokol᷊i sire su Těndihe Makạpate.#8:31: Těndihe Makạpate: Taumata měngěnna u manga rohkẹ̌ dal᷊akisẹ̌ nitahungkụ su ral᷊ungu těndihe maral᷊ung-dal᷊ung sarang hukumang i sire pěngěnsueěnge.
32Kutẹu maraning tampạ ene piạ gapaěngu wawi kapẹ̌deạ e kaěng su lengehʼu wul᷊ude. Manga rohkẹ̌ daral᷊akị e němpẹ̌dorongke si Yesus tadeạu apạmalan sire sěngapam botonge mahunsuẹ̌ su manga wawi ene. Tangu i Yesus kimirẹ e. 33Ene manga rohkẹ̌ daral᷊akị e nahunsẹ̌bangke wọu tau e kụ nahunsuẹ̌ su wawi e. Kutẹu wawi sěnggapaěnge měngkatewe nahuntal᷊ang dingangu nahuntumpa wọu wiwihu tigal᷊ụ sol᷊ong dano, bọu ene něngkal᷊ěmmisẹ̌.
34Manga měndal᷊ukadʼu wawi e tangu seng nakasilo hal᷊ẹ̌ nariadie. Tangu i sire nahuntal᷊angke kụ němpẹ̌běkeng habarẹ̌ ene su soa ringangu su kampong nal᷊ikụe. 35Mase manga taumata e nahunsẹ̌bangke němpẹ̌kakělla hal᷊ẹ̌ nariadie. I sire nahunděnta sol᷊ong anung Yesus e, kụ sene i sire nakaěbạ taumata wuhu nisěbangengu manga rohkẹ̌ daral᷊akisẹ̌ kạkaiange maraning laedʼi Yesus e. I sie seng piạ pakeange ringangu naunge seng matilang. I sire měngkatewe něngkatakụ. 36Ene i sire apạewen nakasilo kakakoạ e němpẹ̌bẹ̌kẹ e su manga taumata l᷊awọ e kereapa tau ene niapakapia. 37Kutẹu kal᷊awọewen dal᷊ohom banuang Gerasa e měngkatewe němpẹ̌dorong tadeạu i Yesus maněntangu tampạ ene, u i sire mangkewen mạtakụ. Kụ i Yesus e tangu simakẹ e su sakaeng e mase nẹ̌sul᷊e. 38Kutẹu tau nisẹ̌bangeng u rohkẹ̌ daral᷊akị e kai nẹ̌dorong si Yesus mědeạu i sie makakatol᷊e.
Arawe i Yesus kai rimolohʼi sie angkuěng, 39”Kapul᷊ẹ e ringangu pẹ̌běkeng apa seng kinoạ u Mawu Ruata e si kau.”
Tangu tau e tamai namombeng su kạguwạu soa e, apa seng kinoạ i Yesus si sie.
Anạ i Yairus – Wawine nanenggehẹ̌ si Yesus e
(Mat. 9:18-26; Mrk. 5:21-43)
40Su kawawal᷊ịen Yesus su sěmběkan dano e, i Sie niampangeng dingangu kararal᷊uasen sire watụ u i sire e měngkai měkẹ̌kati si Sie. 41Kutẹu riměntạ e sěngkatau těmbonang u jamaatẹ̌ su tampạ ene. Arenge i Yairus. I sie mẹ̌tẹ̌těngkasanạ su těngong Yesus kụ mẹ̌kẹ̌kal᷊iomaneng sěngapam botonge tadeạu i Yesus apạdangeng su wal᷊ene, 42ual᷊ingu mang sěmbaụ ene anạ e wawine kụ umbure mangawe mapul᷊o dua su taunge, seng lụhědụ.
Piạ e i Yesus kạhaunge wal᷊eng Yairus, taumata l᷊awọ e měngkawe mẹ̌sẹ̌sasěngkilẹ̌ walạe wọu tampạ sude. 43Wọu tal᷊oaran sire piạko l᷊ai sěngkatau wawine seng kapul᷊o duane su taunge masakị rẹ̌dal᷊engangu raha. I sie seng nakasue kěbị darotonge pẹ̌sẹ̌sal᷊imaẹ su dokterẹ̌,#8:43: Su ral᷊ungu winohẹ u nạung pira-pira e tawẹ apa: I sie seng nakasue kěbị darotonge pẹ̌sẹ̌sal᷊imaẹ su dokterẹ̌. kaiso mang tawẹu nakapia sarang sěngkatau. 44Bawine ene himaung si Yesus wọu l᷊ikudẹ̌, kụ nanenggehẹ̌ biwihʼu l᷊akụʼE. Orasẹ̌ ene raral᷊eng u rahane ringangkewen napotọ. 45I Yesus nakiwal᷊o, ”I sai nanenggehẹ̌ Siạ e?”
Tangu kěbị taumata němpẹ̌děndilẹ̌. Kutẹu i Petrus nẹ̌bera, ”Tuang, kai měngkate lawọ taumata mělẹ̌liwung si Tuang; i sire měngkate mạněsẹ si Tuang!”
46I Yesus něhengetang, ”Kai piạ tau nanenggehẹ̌ Siạ. Iạ nakapěndang batụu piạ kuatẹ̌ simẹ̌bang bọu Iạ.” 47Bawine ene nakahěngangke u kakakoạ e seng kinasingkateng. Kutẹu i sie himaung kạkendene mase nẹ̌suba su těngong Yesus. Tangu i sie nẹ̌běke su taumata l᷊awọ e unụe i sie nanenggehẹ̌ si Yesus mase sakịe naul᷊e su orasẹ̌ ene lai. 48I Yesus něhengetang si sie, ”Anạ-Ku, ual᷊ing i kau nangimang si Siạ ute i kau seng napia. Dal᷊engke su pẹ̌darame.”
49Kutẹu i Yesus bẹ̌dang mělẹ̌hengetang, sěngkatau rarolohange riměnta wọu wal᷊eng Yairus e. I sie nẹ̌bera si Yairus, ”Ahusʼi Tuang bawine e seng nate. I Tuang maningke tawe saụ mapakasigesạ i Tuang Guru.”
50Sarang i Yesus nakaringihẹ̌ ene, i Sie něhengetang si Yairus, ”Abe katakụ, měngkate pangimang, kụ anạu mul᷊e wue.”
51Sarạeng narěnta su wal᷊eng Yairus ute, i Yesus tawe nipakawala sarang sěngkatau niaparangeng dingangʼE kẹ̌tạu i Petrus, Yohanes, Yakobus dingangkewen i ninang i amangu rariọ. 52Ene kěbị měngkatewe mạhunsangị dingangu mạhul᷊ungkang batụu kapapateng anạ e. Arawe i Yesus něhengetang, ”Abe pěmpẹ̌sangị. Dariọ ene bal᷊inewe nate, kaiso kětạeng mětẹ̌tikị!”
53Ene i sire kai nahul᷊ěgen Yesus, watụ u i sire masingkạ u, i sie mambeng nate. 54Bọu e i Yesus něngumpaedẹ̌ l᷊imang anạ ene kụ něluntingihẹ̌, ”Pẹ̌bangungke, inang!” 55Tangu rohkẹ̌ u rariọ e nẹ̌sul᷊e su anung dariọ e kụ orasẹ̌ ene lai i sie nẹ̌bangung. Bọu e i Yesus nangoro si sire pakionggoteng kaěnge rariọ ene. 56Ene manga gaghurangu rariọ e mangkewen dimal᷊inaụ tạ sihinge. Kai i Yesus nẹ̌sěding i sire u kumbahang měhabarẹ̌ apan nariadị e sarang su sěngkatau.
Currently Selected:
LUKAS 8: SXN
Highlight
Share
Copy
Want to have your highlights saved across all your devices? Sign up or sign in