LUKAS 7
7
Mawu Yesus niapakapian ěllangu sěngkatau sordadong Roma
(Mat. 8:5-13)
1Tangu sarạeng nasuẹ e kal᷊awọu hengetange su taumata l᷊awọ, i Yesus simuẹ̌ e su Kapernaum. 2Sene piạ těmbonangu sordadong Roma e piạ ěllange ikẹ̌kěndage. Kutẹu ěllang ene kai masakị marasai, kụ seng marani mate. 3Su tempon těmbonangu sordado nakaringihẹ̌ u kai piạ i Yesus e, i sie rimolohʼu pirang katau manga těmbonangu tau Yahudi iapẹ̌sombang i Sie tadeạu pẹ̌gẹ̌gausẹ̌ si Sie apạděnta kụ apạkapiang ěllange. 4Ene, sarạeng i sire narěntạe su anung Yesus, i sire měngkatewe mẹ̌dẹ̌dorong tadeạu i Sie měngambang těmbonangu sordado e, ”Těmbonangu sordado ene hinong ambangeng i Tuang,” angkuěng i sire si Yesus. 5”U i sie kai kụkěndagʼu wansang kitẹ e kụ seng němangung wal᷊em pẹ̌kakal᷊iomanengang waugʼi kami e.”
6Tangu i Yesus měngkatewe rimal᷊eng sěngkahindọ dingangi sire. Kutẹu i Yesus seng mạdaniem bal᷊e e těmbonangu sordado ene rimolohen manga hapịe su anunʼE mẹ̌deạu iapẹ̌bera, ”I Tuang manịeng tawe mẹ̌těngkasaghedẹ̌, sol᷊ong bal᷊eku. Iạ ta hinone manarimạ i Tuang su wal᷊eku e. 7Hakịu ene iạ sẹ̌saku tawe wahani humaung si Tuang. Kụ botongke pẹ̌hengetang sěngkamohong tadeạu ěllangku e seng mul᷊e. 8U iạ e mal᷊aing mạsasěllung su parentang mangangawasa ringangu su al᷊ungu iạ piạ l᷊ai manga sordado mal᷊aing harusẹ̌ sumasuměllung su parentaku. Kereu iạ mẹ̌bera su sěngkatau sordado, ’Rakọko!’ ute i sie rumal᷊eng; dingangu kereu iạ mẹ̌bera su wal᷊ine, ’Mahiko!’ ute i sie mitụ. Dingangu kereu iạ mẹ̌parenta ěllangku, ’Pẹ̌koạko ini!’ ute i sie mẹ̌koạ.”
9I Yesus naral᷊ingu nakaringihẹ̌ ene. I Sie nẹ̌bihu kụ něhengetang su taumata l᷊awọ mạhuntol᷊e si Sie, ”Nanihing bue tau ěndaị e. Su tal᷊oaran taumatang Israel e Iạ mang ta nakạhombang pangangimang kasěllahe kere ini!”
10Tangu sarạeng taumata nirol᷊ohẹ̌ e něngkawal᷊ị su wal᷊eng těmbonangu sordado ene tangu ěllang ene napiạ e.
I Yesus napẹ̌biahʼu anạ u sěngkatau wawine wal᷊u
11Tawẹ karěngụe samuring ene,#7:11: Tawẹ karěngụe samuring ene: Winohẹ u nạung pira-pira e: Sěngkarịěllone. i Yesus nakoạ sol᷊ong soan Nain. Manga muritʼE ringangu taumata l᷊awọ e mạhundingang i Sie. 12Ene sarạeng i Yesus lụhaung pasěllangeng u soa e ute manga taumata ěnsaẹ měmpẹ̌tẹ̌tatimbang taumata nate ene sarang l᷊ikudu soa ute kai anạ esẹ, anạ u tau wawine wal᷊u mang sěmbaụ. Lawọ taumatan soa e němpẹ̌tal᷊eing tau wawine ene. 13Ene sarạeng Mawu Yesus nakasilo tau wawine ene, i Sie timal᷊ěntụ e mase něhengetang, ”Kuhạe sumangị, bawine!” 14Bọu e i Yesus himaung ringangu nanenggehẹ̌. Tangu mamamenteng e nangẹ̌dung kụ i Yesus něhengetang, ”Ei umbaseng Iạ mẹ̌bera si kau pẹ̌bangungke!” 15Umbaseng nate ene něpětịe kimaiang dingangu nanětạe nẹ̌bera. Tangu i Yesus e něnarakangke si ninange.
16I sire kěbị e něngkatakụ e kụ nanětạe němpẹ̌dalo Mawu Ruata. I sire němpẹ̌bera, ”Sěngkatau nabi masěllahẹ̌ e seng limẹ̌to su tal᷊oarang kitẹ e! Mawu Ruata e seng diměnta tadeạu makasal᷊amatẹ̌ kawanuanʼE!”
17Tangu habarẹ̌ mạanun hal᷊ẹ̌ i Yesus e niměnẹ su patikụ banuan Yudea ringangu ghal᷊ipohone.
Darolohang i Yohanes Mananahani
(Mat. 11:2-19)
18Manga muritʼi Yohanes e tangu němpaul᷊ịe si Yohanes kal᷊awọu sạbarang ene. Ene i Yohanes kimuịe murite ruang katau. 19Mase něndolohen sire sol᷊ong anun Mawu Yesus e kụ nakiwal᷊o, ”Seng i Tuang tangu sarung duměnta kere su riandin Mawu Ruata e arau měnsang i kami reng iapạngampal᷊ẹ̌ taumata wal᷊ine?”
20I rẹ̌dua muritʼi Yohanes e natamai sol᷊ong anun Yesus kụ nẹ̌bera, ”I Yohanes Mananahani něngoro si kami pakịbal᷊o si Tuang, měnsang i Tuang kai taumata kụ sarung marěnta tumuhụ diandin Duata e arau i kami měngampal᷊ẹ̌ taumata wal᷊ine?”
21Orasẹ̌ ene, i Yesus napakapian taumata l᷊awọ dingangu něnguserẹ̌ kal᷊awọu rohkẹ̌ daral᷊akị apidu napẹ̌kěllan taumata wuta mal᷊awọe. 22#Yes. 35:5-6, 61:1 Tangu i Yesus simimbang, ”Pěmpẹ̌sul᷊ẹ e sol᷊ong anung Yohanes kụ pěmpẹ̌habarẹ̌ apang kinaringihẹ̌ dingangu kinasilong kamene: tau wuta nẹ̌kělla, tau peosẹ̌ nakaral᷊eng, tau piạ sakịe pisị makạtatakụ#7:22: Piạ sakịe pisị makạtatakụ: Kakělla pasalẹ̌ 5:12. naul᷊ẹ e, tau wengelẹ̌ nakaringihẹ̌, tau nate nẹ̌biahẹ̌ saụ, dingangu Injilʼu Mawu Ruata e nilahabarẹ̌ su taumata kasiang. 23Kariangkamang, i sain tạ kadiongeng dal᷊engu mẹ̌sunial᷊u Iạ.”
24Su pal᷊useng manga rarolohang i Yohanes e, tangu i Yesus nanětạe něhengetang su taumata l᷊awọ mạanun Yohanes, angkuěngʼE, ”I kamene nahunsẹ̌bang sol᷊ong banua l᷊inggi e kai měmpẹ̌kakělla apa? Hiung ipẹ̌gẹ̌gaghinggeng anging? 25I kamene nahunsẹ̌bang timingang apa tangu? Sěngkatau měpẹ̌pakeang mal᷊ěnggihẹ̌? Taumata apang měpẹ̌pakeang kerene ringangu měbẹ̌biahẹ̌ masasẹ̌dapẹ̌ e kai mětẹ̌tanạ su wal᷊eng mararatu! 26Kụ i kamene kai simẹ̌bang němpẹ̌tingang apa tangu? Němpẹ̌tingang nabi ngae? Ore! Limembol᷊ain sěngkatau nabi! 27#Mal. 3:1 Kai i Yohanes nạung ipẹ̌bẹ̌bal᷊on ayetʼu Winohẹ Susi ini,
’Ini e kai rarolohang-Ku,’ angkuěngu Ruata e.
’Iạ e sarung měndolohʼi sie iapangal᷊imona wọʼi Kau,
tadeạu i sie iapěndiahi raral᷊engangu e su těngonʼU!’ ”
28”Pẹ̌tahěndungko,” angkuěng i Yesus lai, ”su dunia ini e tawẹu sarang sěngkatau limembong kasěllahe wọʼi Yohanes Mananahani. Arawe taumata kakạdọdokang e sutal᷊oarang kawanuan Duata e, limembong kasariane wọʼi Yohanes Mananahani.”
29 #
Mat. 21:32; Luk. 3:12 Kěbị taumata – nasowa l᷊ai maghaghělle bea e – rụdaringihẹ̌ si Yesus něhengetang u hal᷊ẹ̌ ene; i sire ete taumata apan tụtuhụ manga atorangu Mawu Ruata ringangu napulu nakisahani si Yohanes e. 30Arawe tau Farisi ringangu manga mananěntiro agama e tawe manarimạ u tingirang u Ruata e si sire. I sire madiri makisahani si Yohanes.
31Mase i Yesus něhengetang kapia angkuěng, ”Kai Takụ isihing suapa taumata tempo ini? Kai mẹ̌sul᷊ungu a i sire? 32I sire kai mẹ̌sul᷊ungu manga rariọ mạhungkaiang su pasarẹ̌; sěngkamonaěng měmpẹ̌kẹ̌kui si sire wal᷊ine, ’I kami mẹ̌sẹ̌sulingu lagun dal᷊uasẹ̌ si kamene, kai i kamene mang tạ kadiongeng mẹ̌sal᷊ai! I kamene mẹ̌kẹ̌kantarịu kakantarị makạsusa kaiso i kamene mang tạ kadiongeng sumangị!’ 33I Yohanes Mananahani e riměnta – i sie mẹ̌pẹ̌puasa ringangu tawe manginung anggorẹ̌ – kụ i kamene němpẹ̌berau, ’I sie kinasuěkangu setang!’ 34Ahusewen Taumata e riměnta – i Sie kụkaěng dingangu mạnginung – mase i kamene němpẹ̌berau, ’Kěllạe taumata ěndaị! Kombangeng, tahawukaneng, hapị u maghaghělle bea ringangu hapịu taumata warạdosa.’ 35Maningbeng kerene, katatahuěnnan Mawu Ruata e nitahutěngadeng bọu kal᷊awọu taumata apan mạnarimạ i sie.”
Mawu Yesus su wal᷊en Simon
36Ene sěngkatau tau Farisi, arenge i Simon, něnotẹ̌ si Yesus kumaěng. Tangu i Yesus rimangeng su wal᷊ene e kụ naiang su meda e. 37#Mat. 26:7; Mrk. 14:3; Yoh. 12:3 Kutẹu su soa ene piạ l᷊ai sěngkatau wawine waradosa. Piạ e i sie nakaringihẹ̌ u i Yesus kụkaěng su wal᷊en tau Farisi e, i sie riměnta ringangu nẹ̌bawa wotol᷊ẹ̌ pualam lohong lana mawěngi. 38Kụ i sie rimarisị su l᷊ikudʼi Yesus maraning laedʼE kụ kạsangịe, kụ ěllong matane timědọ něnantạ laedʼi Yesus e. Bọu e laẹdʼi Yesus manantạ ene niěmmụeweng utạ e mase nirěnguange ringangu nilanisangu l᷊ana mawěngi. 39Tangu sarạeng tau Farisi něnotẹ̌ si Yesus nakasilọe hal᷊ẹ̌ ene, i Sie nẹ̌berạ e su ral᷊ungu naunge, ”Kereu tau ěndaị e nabi, ute angkeěng i Sie masingkạ bue i sai tangu wawine nanenggehẹ̌ si Sie ringangu kawe wawine waradosa!”
40Kutẹu i Yesus něhengetang si Simon, ”Simon, kai piạ apa Takụ ipaul᷊ị si kau.”
”Kerenẹ e Tuang,” angkuěngkewen Simon e, ”měngkate pěhengetang.”
41I Yesus něhengetang, ”Piạ duang katau němpangutang su tau piněngẹ̌dangeng doitẹ̌. Kụ sěngkatau něngutang l᷊ima hasụ doitẹ̌ sal᷊aka, mase sěngkatau l᷊ai limam pul᷊o sukal᷊ẹ̌pane roitẹ̌ sal᷊aka. 42I rẹ̌dua kěbị tawe nakawaehẹ̌ utang ene, tangu i rẹ̌dua semben tawe niapamaehẹ̌. Kụ i sai wọu tal᷊oaran dẹ̌dua e limembong kakěndage su tau pinangẹ̌dangeng doitẹ̌ ene?”
43”Su pěndangku e ute i anu kakěpal᷊enge utange ta niapamaehẹ̌ e!” angkuěng i Simon.
”Tiněnnanu e nihino,” angkuěng i Yesus. 44Bọu e i Yesus němanda su tau wawine ene ringangu něhengetang si Simon, ”I kau nakasilo wawine ini? Iạ dimangeng su wal᷊enu, kụ i kau tawe něnadiang akẹ lauhasẹ̌ laedẹ̌-Ku; arawe wawine ěndaị e ute seng němurẹ̌si laedẹ̌-Ku e ringangu ěllom matane mase niěmmụe ringangu utạ e. 45I kau tawe naněnsomahẹ̌ Siạ dingangu laimbu, arawe wawine ěndaị e ute tawe nangẹ̌do nangimbu laedẹ̌-Ku rokẹeweng Iạ narangeng sini e. 46I kau tawe naměmbingu l᷊ana piněluwi těmbọ-Ku, arawe wawine ěndaị e ute seng nanědọ u l᷊ana mawěngi su laedẹ̌-Ku e. 47Kahěngang: kakěndage masaria ene e mạnodẹu rosane lawọ e seng nasue niampungang! Kereu i saing kadodọ pangangampunge, ute i sie mal᷊aing sarung kadodọ kakěndage.”
48Mase i Yesus něhengetang su tau wawine ene, ”Kal᷊awọu rosanu e seng niampungang.”
49Manga taumata wal᷊ine mạhungkaiang kụkaěng dingangi Yesus nanětạ e němpẹ̌bera sěngkatau su wal᷊ine, ”I saị e tau ěndaị e kawe lai mangampung dosa e?”
50Kutẹu i Yesus něhengetang su tau wawine e, ”Ual᷊ingu i kau mạngimang si Siạ, i kau masal᷊amatẹ̌. Dakọe kapul᷊ẹ su pẹ̌darame!”
Currently Selected:
LUKAS 7: SXN
Highlight
Share
Copy
Want to have your highlights saved across all your devices? Sign up or sign in