LUKAS 12
12
Laingatẹ̌ su apan taumata mạmělle
(Mat. 10:26-27)
1 #
Mat. 16:6; Mrk. 8:15 Měngkatewe ringangu hiwune kal᷊awọu taumata měmpẹ̌sẹ̌sasěngkilẹ̌ hakịu seng piạ u kẹ̌katahidaěng laede. Těntal᷊ang manga taumata reng měmpẹ̌dẹ̌dahěmung, i Yesus něhengetang su manga muritʼE, ”Pěmpẹ̌teghang bue su l᷊ahaesʼu tau Farisi, mangal᷊ene i sire kai měmpạmělle. 2#Mrk. 4:22; Luk. 8:17 Tawẹ apa mạl᷊ahěmbung kụ tawe lekesang dingangu tawẹ apa mạdal᷊irung kụ tawe kasingkateng. 3Apan niwerang kamene su tempong hěbi sarung karingihẹ̌ su tempong ěllo; kụ apạewen nisiang i kamene su ral᷊ungu kamarẹ̌ makakunsị sarung iwohang pakapěpidẹ̌.”
Kěngkatakụ bue su Mawu
(Mat. 10:28-31)
4”Manga hapị pěmpẹ̌tahěndung bue! Abe katakụ si sire apan měmpạmate wadange, kaiso kawe tawe makapẹ̌kapura mapal᷊iung ene. 5Mapiangbe Iạ maněntiro si kamene i sai hinong ikẹ̌katakụ i kamene. Kěngkatakụ su Mawu Ruata! Watụ u wọuten namate, i Sie kawasa lai měhipe su ral᷊ungu naraka! Pěmpangimangke u kai i Sie hinong ikatakụ i kamene.
6Hěnggeng limambaụ iwẹ̌bal᷊ụ su roitẹ̌ kararodokange ruang kal᷊ěpa. Maningbe kerene tawẹu sarang sěmbaụ kawul᷊eěngu Mawu Ruata. 7Saral᷊aing utạ su těmbọ mang kạdarekeng kěbị, ual᷊ingu ene abe katakụ; i kamene limembowen maarẹ̌ga wọu manga hěnggeng!”
Mangakung Kristus su těngon taumata
(Mat. 10:32-33, 12:32, 10:19-20)
8”Pěmpẹ̌tahěndungko pakapia-pia: I sai mangakum batangenge su těngong l᷊awọ u i sie kai muritẹ̌-Ku ute, i sie sarul᷊aing iakung Ahusʼu Taumata e su těngon manga malạekatʼu Mawu Ruata e. 9Arawe i sai mẹ̌sunial᷊ʼu Iạ e su těngon taumata e u i sie kai muritẹ̌-Ku e tangu i sie sarul᷊aing ipẹ̌sunial᷊ẹ̌ su těngon manga malạekatʼu Mawu Ruata e.
10 #
Mat. 12:32; Mrk. 3:29 Kamageng i sai mẹ̌berang sěngkamohong ipěndokạ Ahusʼu Taumata e, i sie rembeng ampungang; arawe kereu i sie kai měhinakang Rohkẹ̌ u Ruata e, i sie tawe kaampungang.
11 #
Mat. 10:19-20; Mrk. 13:11; Luk. 21:14-15 Kereu i kamene iěntudẹ̌ sarang manga wal᷊eng pẹ̌kakal᷊iomanengang kụ ipakihukung su těngon těmbonangu kawanua arau měngangawasa ute, abe ghěnggang u měnsang kereapa wue i kamene mẹ̌tahutěndạu watangeng arau kai hinong sumimbang kereapa. 12U wawera hinong ipẹ̌berang kamene e sarungbe těntiroěngu Rohkẹ̌ u Ruata si kamene su tempone.”
Papinintun tau kalạ tạ kasingkạ e
13Sěngkatau wọu tal᷊oaran taumata l᷊awọ e nẹ̌bera si Yesus, ”Tuang Guru, kěnnangko i Tuang pẹ̌bera su tuhangku, iạ gěllirengkon sěmbạgeang bọu arětạ tatěntang i amang i kami.”
14Mawu Yesus simimbang, ”I sai wue něnduị Siạ makoạ mělahukung arau měmamahiạ pusakạ sutal᷊oaran dua?” 15Mase su kěbị taumata apan ene sene i Yesus něhengetang, ”Pěmpẹ̌teghang dingangu pakarariagạ bue, i kamene kumbahangbe maanggang. U pẹ̌bawiahʼu taumata e wal᷊inewe kahiang kakakalạ e, maningbe lai rarotonge mạhěmpal᷊iu.”
16Mase i Yesus nẹ̌běkem papinintu ini, ”Piạ e sěngkatau kalạ. I sie piạ ěntanane kụ mẹ̌gẹ̌gěsi mal᷊awọ. 17Tau kalạ ene mẹ̌sěsipirẹ̌ su ral᷊ungu naunge, ’Seng tawẹ apa tampạ l᷊ai pěngomol᷊angu ghẹ̌sing ěntanaku. Kụ kai mẹ̌kapurạe iạ e?’ 18Bọu e i sie měngkate saụ mạngěnna kụ nẹ̌bera e su ral᷊ungu naunge, ’Ah! Iạ piạbe akal᷊ẹ̌ku; manga gudangku e sarung takụ golangeng mase takụ koateng limembong kaguwạe. Su tampạ ene takụ pěngomol᷊ang kal᷊awọu gandung dingangu patikụ darotongku wal᷊ine. 19Tangu iạ sarung mẹ̌bera su watangengku: I kau nakauntung! Kal᷊awọu apang mapia seng tẹ̌taghuanengu ringangu tawe sarung kasueěnge karěngụewen taung mědẹ̌dal᷊iun taung. Pangirol᷊oko! Kaěngko ringangu panginungko kụ temangeko wiahu!’ 20Arawe Mawu Ruata e něhengetang si sie, ’Ei tungkọ! Sěhěbi ini e lai i kau sarung mate, mase i sai wue sarung makaěbạ kěbị kakakalạ u seng niriahinu e?’
21Kerene kakakoạ u apan taumata mědẹ̌deạu makalạ baụgu watangenge hala, kaiso tawe mẹ̌těngkakalạ su matan Duata.”
Pěmpangimang su Mawu Ruata
(Mat. 6:25-34)
22Mase i Yesus něhengetang su manga muritʼE, ”Ual᷊ingu ene hakịu Iạ e něhengetang, ’Abe ghěnggangu pẹ̌bawiahu, měnsang i kamene kai kumaěng a ringangu mẹ̌pakeangu a.’ 23Pẹ̌bawiahẹ̌ e limembowen bọu laidopẹ̌ dingangu wadange limembowen bọu pakeang. 24Tatingangko manga manụ gaga! I sire tawe mangangasị, dingangu tawe mananipo, tawẹ lai manga gudange arau pěndaresokangu ěmme. Arawe Mawu Ruata mang mělẹ̌hiking si sire! I kamene limembong maarẹ̌ga wọu manga manụ u kinoaěng. 25I sai wue wọu tal᷊oarang kamene kahiang ghěnggange makạkasěmpụ umurẹ̌ maning kětạeng kadodọ?#12:25: Makạkasěmpụ umurẹ̌ maning kětạeng kadodọ: arau matambang karangẹ e maning kadodọ. 26Kereu hal᷊ẹ̌ kakạdodokange mang tawe ikakoạ i kamene, unụe ghuměnggangu manga hal᷊ẹ̌ bal᷊ine? 27#1Rat. 10:4-7; 2Kar. 9:3-6 Tatingangko! Kereapa manga ghal᷊oghonge timuwo nẹ̌bungang, kutẹu manga bungang ene e tawe mělahal᷊ẹ̌, dingangu tawe mẹ̌kakahiwuang. Arawe lai Ratu i Salomo e kerẹeng kakalạ e tawe mẹ̌papakeang kere manga bungang ene kaholẹ e. 28Děmpugẹ̌ sural᷊one timuwo su sahěllo ini e kụ sěngkariọěllone nịtatutung. Arawe Mawu Ruata e mělẹ̌lěnggihẹ̌ děmpugẹ̌ ene kereng kaholẹ e. Dumakelengbe i kamene! Kutẹu i kamene kai lome pangangimange! 29Kụ abe ghěnggang dingangu mẹ̌bingo měnsang i kamene kumaěng a ringangu manginung a! 30Manga hal᷊ẹ̌ tamai ene rẹ̌dareakengu apan taumata wẹ̌gam Mawu Ruata. Sumbal᷊iau i Amangu e masingkạ u i kamene mambeng mẹ̌sẹ̌sal᷊imaẹ patikụ ene. 31Kaiso i kamene hinong mẹ̌sẹ̌sěmpị tadeạu Mawu Ruata mẹ̌kawasa su pẹ̌bawiahu, kụ apạewen bal᷊ine ute, mal᷊aing ionggọ u Mawu Ruata si kamene.”
Arětạ su sorga
(Mat. 6:19-21)
32”I kamene maningbe rekenange mahal᷊i, kai abe katakụ! U i Amang i kamene e mal᷊uasẹ̌ mangonggọu al᷊amatʼE wọu KararatuangʼE. 33Bal᷊ụ e rarotong i kamene kụ onggọko manga roite su tau kasiang. Pẹ̌koạko kawihẹ̌ ta mal᷊ahenẹ baugu watangengu e, mangal᷊ene arětạ maresọ su sorga. Arětạ ene tawe mailang ual᷊ingu tahatako e tawe makapěngal᷊ạ dingangu uane tawe makapěnggolọ. 34U suapan piạ arětạ u e, naungu e mal᷊aing sene!”
Ěllang kụ měngkai sěntiniạ mahěkosẹ̌
35 #
Mat. 25:1-13
”Pakarariahi wue tumatěngo patikụ sạbarang. I kamene měngkai hinong měmpẹ̌pakeang dingangu sol᷊onu hanesẹ̌ dụděllị, 36#Mrk. 13:34-36 mẹ̌sul᷊ungu manga ěllang kụ měmpạngampal᷊ẹ̌ mawune mẹ̌bal᷊ị bọu sal᷊iwangu pẹ̌kakawing. Kereu mawune mẹ̌bal᷊ị kụ manengkelẹ̌ tukadẹ̌ e, tangu i sire sarung manope tukadẹ̌. 37Apạe mauntu manga ěllang kụ kẹ̌kaěbakeng měmpẹ̌lẹ̌lukadẹ̌ su tempon mawune sumongo. Pěmpangimangko: Mawu ene sarung mẹ̌dariahi kụ měngorọ e manga ěllange apạkaiang, kụ bọu ene i sie mẹ̌siliwirẹ̌. 38Apạ e mauntu manga ěllang ene kereu mawun sire ene kụ nakaěbạ si sire kạpẹ̌ngampal᷊e maningbe lai i sie simongo kẹ̌kal᷊oarane, arau maraning kalonge! 39#Mat. 24:43-44 Pẹ̌tahěndungko ini! Kereu manga taghuangu wal᷊e masingkạ u orasẹ̌ děntaěngu tahatako e, i sie sarung měndiagạ takadeạu tahatako e tawe makasuẹ̌ su ral᷊ungu wal᷊ene. 40Hakịu ene i kamene mal᷊aing pakarariahi, u Ahusʼu Taumata e sarung duměnta su tempo ta laantiwang i kamene.”
Ěllang masatia ringangu ěllang tawẹ satiane
(Mat. 24:45-51)
41”Mawu, apa wue těntiro ene timonane si kami arau su kěbị taumata?” angkuěng i Petrus.
42Mawu simimbang, ”I sai ěllang masatia ringangu matahuěnna hakịu niruị u mawune iapạněmbonang manga ěllange wal᷊ine iapạngonggọ u kaěng si sire su tempone? 43Kariangkamang ěllang ene kereu mawune mẹ̌sul᷊e kụ kẹ̌kaẹ̌bakeng i sie kạpẹ̌koạe munarane! 44Pěmpangimangko: Mawu ene sarung měnduị i sie manahimata patikụ darotonge. 45Kaiso kereu ěllang ene kụ kai mẹ̌bera su ral᷊ungu naunge, ’Mawuku e wẹ̌dang diọ mararěnna ruměnta,’ mase i sie měngkate mẹ̌mẹ̌mahang kal᷊awọu manga ěllange kụ kumaěng dingangu měnginung sarang miwukang, 46tangu mawune sarung duměnta su ěllo ringangu orasẹ̌ ta kinahěnganeng. Kụ ěllang ene sarung těntiroěngu papahang#12:46: Těntiroěngu papahang: arau i tokol᷊ẹ̌ pasěbang. bọu mawune, ringangu koateng kere nẹ̌koạ taumata tawẹ satiane su Ruata.
47Ěllang kụ masingkạ u kapulun mawune kaiso tawe nẹ̌dariahi ringangu tawe lai nẹ̌koạ timuhụewe kapulun mawune, sarung pahangengu ral᷊iwara maněnggạ. 48Arawe ěllang nạung bẹ̌gang kapulung mawune, bọu ene měkẹ̌koạ hal᷊ẹ̌ tawe mělahino hakịu hinong liwarangu ral᷊iwara riọ mahaěng. U i sain seng nionggol᷊ang l᷊awọ sarul᷊aing paghěleěng l᷊awọ. Kụ i sain piněnarakanengu l᷊awọ saunengke wue panẹ̌tul᷊ang limembong kakěpal᷊e.”
Bal᷊ine pẹ̌darame kaiso pẹ̌sasitori
(Mat. 10:34-36)
49”Iạ duměnta mapakahěngisu dunia ini. Apa kapia kereu putunge seng dụděllị! 50#Mrk. 10:38 Bẹ̌dang piạ kasasusa masaria hinon Takụ dal᷊engang. Ene naung-Ku e měngkate apa maghěnggang těntal᷊ang ene wẹ̌dang ta nakoạ. 51Su naung i kamene Iạ duměnta e kai mẹ̌bawa pẹ̌darame su dunia e? Tala, bal᷊inewe pẹ̌darame kaiso kawe pẹ̌daral᷊aị. 52Manětạ bọu ini e, dal᷊ohom bal᷊e limangkatau e sarung mẹ̌darokạ, těllungkatau sarung dumokạ duang katau arau ruang katau rumokạ těllungkatau. 53#Mi. 7:6 I amang sarung dumokạ anạe esẹ dingangu anạ e esẹ dumokạ si amange. I ninange sarung dumokạ anạ e wawine kụ anạe wawine rumokạ si ninange. I ninange kinaratingang sarung dumokạ anạ e mirarating, kụ anạ e mirarating dumokạ si ninange kinaratingang.”
Mẹ̌kiral᷊a tialan tempo
(Mat. 16:2-3)
54Mawu Yesus něhengetang l᷊ai su taumata l᷊awọ, ”Kereu i kamene makạsilo winawa masapuạ su puěngu wahẹ ute, i kamene apidʼu měmpẹ̌bera u, ’Sarung dumasehẹ̌.’ Kụ mang kahěngang-hěngang mẹ̌tahiti. 55Kereu i kamene makapěndang u anging tumiụ bọu timuhẹ̌ ute, i kamene měmpẹ̌berau, ’Sarung měpẹ̌disẹ̌.’ Kụ mang makoạ kerene. 56I kamene kai puluang měmělle! I kamene makakatikạ bue kakakoạ u wanua mạeng měmpẹ̌patehẹ̌ kakakoạ u l᷊angị dingangu dunia. Kawe unụe manga tatialan tempo ini tawe ikatikạ i kamene?”
Pěmpẹ̌damẹ e ringangu sědụu e
(Mat. 5:25-26)
57”Kawe unụe tawe ikaputusi kamene hala e hal᷊ẹ̌ u katul᷊idẹ̌ e? 58Kereu piạ taumata mangaduhang i kamene su mělahukung, ute pẹ̌kakereapa wue sěngapang botonge pěngěnsue patikụ hal᷊ẹ̌ ene těntal᷊ang i kamene deng bědang su tal᷊oaran dal᷊enge. Kamageng tala ute, kiwuạu i sie kai mamol᷊eng i kamene sol᷊ong těngon mělahukung kụ sarung měnarakang i kamene su polisi, kụ měnowang kamene su ral᷊ungu tahungkụ. 59Pěmpangimangko! I kamene tawe makasẹ̌bang bọu tahungkụ těntal᷊ang une su ral᷊ungu naung bědang ta nasue.”
Currently Selected:
LUKAS 12: SXN
Highlight
Share
Copy
Want to have your highlights saved across all your devices? Sign up or sign in