LUKAS 1
1
Panẹ̌takenge
1Teofilus makěndagẹ̌,
L᷊awo taumata seng nẹ̌tawakal᷊i němohẹ dingangu mahundugẹ̌ mạanun hal᷊ẹ̌ pirambaụ kụ seng nariadi sutal᷊oaran kitẹ. 2I sire němohẹ mẹ̌sul᷊ungkewen dingangu wẹ̌kene si kitẹ kěbị bọʼi sire apang kụ seng nakasilo hala manga hal᷊ẹ̌ ene bọu panětakenge, kụ masene nẹ̌kakeken habarẹ̌. 3Sarạeng iạ bọu nanẹ̌sui mapia kěbị ene bọu panětakeng e, ute su tiněnnaku e mapiawe mamohẹ laporang sěmbaụ pakahundugẹ̌ pakapia baugʼi Tuang. 4Iạ mẹ̌koạ ene, tadeạu i Tuang masingkạ u apang kụ seng nitěntiro si Tuang ene mambeng kahěngang.
Kal᷊awantelʼi Yohanes Mananahani e niapakasingkạ
5 #
1Kar. 24:10
Su tempong i Herodes nakoạ datu su wanuang Yudea,#1:5: Yudea: Bawera ini měnẹ̌bọu kasěllahu wanuang Palestina. piạ e sěngkatau imang arenge i Zakharia. I sie nasuẹ̌ su kamonaěng u manga imang i Abia. Kawinge arenge i Elisabet, mal᷊aing pal᷊ahěntong imang. 6Pẹ̌bawiahʼi rẹ̌dua sěngkawingang ene makạl᷊uasẹ̌ naungu Mawu e. I rẹ̌dua ene matatuhụ su kěbị parenta ore lai Toratʼu Mawu ringangu kạguwạu naung i rẹ̌dua. 7Tawẹ anạ i rẹ̌dua watụ u i Elisabet kawe wantọ dingangu i rẹ̌dua kěbị seng maghurang.
8Piạ su sahěllo tempong kamonaěng i Abia nakaěbạ bageang, i Zakharia měndal᷊engu munarane makoạ imang su těngon Mawu Ruata e. 9Dingangu lahurị, tuhụewe tundung pělẹ̌hal᷊ẹ̌ u manga imang, i Zakharia kai kinatẹ̌bọ tadeạu sumuẹ̌ sol᷊ong Bal᷊em Mawu kụ měnawungu kamania. 10Ene kạpanutunge kamania e taumata l᷊awọ e kạpẹ̌kal᷊iomanenge su l᷊ikude. 11Su tempo ene malạekatʼu Mawu e nẹ̌těngkatodẹ u watangenge si Zakharia. Malạekatẹ̌ ene dụdarisị su sěmbẹ̌kang koanengu meda tampạ pananutungangu kamania. 12Sarạeng i Zakharia nakasilo malạekatẹ̌ ene, i sie nẹ̌bingọ dingangu mạtakụ. 13Kai tangu malạekatẹ̌ e nẹ̌bera, ”Abe katakụ, Zakharia! Mawu Ruata e seng nakaringihẹ̌ kakal᷊iomanengu. Kawingu i Elisabet e sarung maiwantelʼu sěngkatau ahusẹ̌ esẹ. I kau harusẹ̌ mẹ̌gěllịu arenge isẹ̌bạ si Yohanes. 14I kau sarung lumuasẹ̌ dingangu l᷊awọ l᷊ai taumata sarung mahul᷊uasẹ̌ kereu rariọ e seng naiwantelẹ̌ sarung! 15#Pẹ̌t. 6:3 I sie sarung mariadi taumata masěllahẹ̌ su těngon Mawu e dingangu i sie tawe manginung anggorẹ̌ arau inumang makạbukang. Dokeng su kawawantele i sie seng su kawasang Rohkẹ̌ u Mawu. 16Lawọ taumatang Israel sarung tataěnge mẹ̌sul᷊e kapia sol᷊ong anung Mawu Kasěllahenge Ruatan sire. 17#Mal. 4:5-6 I sie sarung makoạ darolohang u Mawu kụ matoghasẹ̌ dingangu piạ kawasane mẹ̌sul᷊ung i Elia e. I sie sarung mapẹ̌damen manga i amang dingangu manga anạ e, ringangu taumata kụ tawe mangimang sarung tataěnge kạpia su ral᷊ungu tiněnna kahěngang. Dingangu kerene i sie managhupia sěngkatau umatẹ̌ kụ seng sẹ̌sadiang baụgu Mawu e.”
18”Kereapa iạ makakasingkạ u hal᷊ẹ̌ ene sarung mariadi?” kakiwal᷊ong i Zakharia su malạekatẹ̌ e. ”Iạ seng maghurang dingangu kawingku e l᷊ai seng maghurang.”
19 #
Dan. 8:16, 9:21 Malạekatẹ̌ e simimbang, ”Iạ e i Gabriel. Iạ mẹ̌tangkiang Mawu Ruata e ringangu kai i Sie něndolohʼu iạ e ipẹ̌lẹ̌habarʼu habarẹ̌ mapia ini si kau. 20Apan takụ iwera, sarung mariadi su tempone. Kai ual᷊ing i kau ta mangimang ute, i kau hědowe ta makawera; i kau sarung měmou sarạeweng apang kụ takụ iwera ini mariadi.”
21Kạpẹ̌bisarane kerene taumata l᷊awo měngkatewe kạpěngampal᷊e si Zakharia. I sire měngkate rụdal᷊inaụ, kai unụe i sie kereng karěngụe su ral᷊ungu Wal᷊em Mawu e. 22Kụ su tempong i sie simẹ̌bang, i sie tawe nakawerang apa si sire. I sie kětạen něgěllịu tanda něnịdan limane kụ měngkawe wẹ̌dang mou. Tangu taumata ene masingkạ e u i sie seng nakasilo sěmbaụ papasilo su ral᷊ungu Wal᷊em Mawu.
23Sarạeng tempong pělahal᷊ẹ̌ e su Wal᷊em Mawu seng nasuẹ e, ute i Zakharia e napul᷊ẹ sol᷊ong bal᷊ene. 24Tawe nararěnnạ wọu ene, i Elisabet kawinge piạ e kapapia kụ i sie tawe manga simẹ̌bang bọu wal᷊e lima wul᷊ang karěngụe. 25I sie nẹ̌bera, ”Mahunẹu Mawu kasěllahenge mẹ̌tul᷊ungu iạ dingangu měndědasẹ̌ katatelorẹ̌ku.”
Kawawantelʼi Yesus e nilahabarẹ̌
26Ene mangạ e kaěnnung u wul᷊ange i Elisabet mẹ̌bẹ̌bawa kapapia, Mawu Kasěllahenge rimolohen malạekatẹ̌ Gabriel nakoạ sol᷊ong Nazaret, soa sěmbaụ su wanuang Galilea. 27#Mat. 1:18 I Gabriel nirolohẹ̌ sol᷊ong anun sěngkatau mahuala parawang arenge i Maria. Mahuala parawang ene seng měkẹ̌kakaghiang dingangu sěngkatau esẹ arenge i Yusup pal᷊ahěnton Datu i Daud. 28Malạekatẹ̌ ene riměnta si Maria kụ nẹ̌bera, ”Tabeạko si kau kụ nial᷊amatengu Mawu su kapiane! Mawu ruměndingang si kau!”
29Nakaringihẹ̌ baweran malạekatẹ̌ e i Maria himěkosẹ̌, hakịe měngkate mětẹ̌tiněnna su ral᷊ungu naunge měnsang apa mangal᷊ene pẹ̌tatabeạ ene. 30Tangu malạekatẹ̌ e nẹ̌bera si sie, ”Abe katakụ Maria, batụu i kau mẹ̌tẹ̌tatahino su naungu Mawu e. 31#Mat. 1:21 I kau sarung piạ kapapia ringangu maiwantelʼu sěngkatau rariọ, kụ i kau harusẹ̌ pẹ̌sěbạ arenge si Yesus. 32#2Sam. 7:12, 13, 16; Yes. 9:7 I Sie sarung mawantugẹ̌ dingangu sarung isěbạ Ahusʼu Ruata Kụ Karangetange. Mawu Ruata sarung mapakariadin Sie ratu kere Ratu i Daud, i upungʼE. 33Kụ i Sie sarung mẹ̌parenta kere ratu su hiten Yakub e sarang kakalẹ̌. KararatuangʼE tawẹ pěngěnsueěnge.”
34”Kutẹu ia bẹ̌dang parawang,” angkuěng i Maria su malạekatẹ̌ e, ”kai kereapa tangu hal᷊ẹ̌ ene mariadi?”
35Malạekatẹ̌ e simimbang u, ”Rohkẹ̌ u Ruata e sarung mětěngkatěntung si kau ringangu kawasan Mawu Ruata e sarung mangělung si kau. Kai ene hakịu dariọ kụ ikawantelẹ̌ e sarung ikasěbạ Susi, Ahusʼu Ruata. 36Pẹ̌tahěndung: I Elisabet, manga anạ u sěngkataunu ene, seng piạ kal᷊uwaenge kụ seng kaěnnungu wul᷊ange, maningbe i sie seng mahunggurang kụ taumata e mẹ̌bẹ̌bera u i sie kawe wantọ. 37#Pěnd. 18:14 U kai su Mawu Ruata e tawẹ u ta mariadi.”
38Bọu e i Maria nẹ̌bera, ”Iạ ini e kai ěllangu Mawu; balạe karariadine si siạ e kere ipẹ̌bẹ̌beranu.” Bọu e malaekatẹ̌ e tamai naněntang i Maria.
I Maria nẹ̌tiwo si Elisabet
39Ta nararěnnạ wọu ene, i Maria e nakoạ sol᷊ong soa su Yudea su wawul᷊urange. 40I sie nakoạ e sol᷊ong bal᷊eng Zakharia, kụ nasuẹ̌ e, i sie něgěllịu adatẹ̌ si Elisabet. 41Ene i Elisabet nakaringihe adatʼi Maria e, dariọ su ral᷊ungu gandongang i Elisabet e nẹ̌kakanoạ e. Tangu Rohkẹ̌ u Ruata e nẹ̌karadiahangke si Elisabet, 42kụ něluntingihẹ̌, ”Seng i kau e nial᷊amateng bọu patikụ manga wawine! Kawuạko al᷊amatẹ̌ su rariọ kụ sarung ipěhěndingu ene! 43Kai i sai iạ e hakịu i ninangu Mawu e ruměnta su anuku? 44Ene piạ e iạ nakaringihẹ̌ adatʼu e, tangu rariọ su ral᷊ungu gandongangku e nẹ̌kakanoạ eng dal᷊uasẹ̌. 45Kariangkamang i kau, ual᷊ingu nangimang apang nipěluntingihʼu Mawu si kau e, sarungbe mariadi!”
Kakal᷊iomaneng tatarimakasẹ i Maria e
46 #
1Sam. 2:1-10
I Maria nẹ̌bera,
”Naungku e mědẹ̌dalo Mawu,
47dingangu himukudẹ̌ku e lụl᷊uasẹ̌
batụu Ruata e Měnanal᷊amatẹ̌ku.
48 #
1Sam. 1:11
I Sie mẹ̌tẹ̌tahěndung si siạ, ěllangʼE hina ini!
Manětạ bọu orasẹ̌ ini e patikụ bansa e
měbẹ̌bera u iạ e masal᷊amatẹ̌.
49Ual᷊ingu Mawu Ruata Makawasa e
měkẹ̌koạbe hal᷊ẹ̌ masasěllahẹ̌ si siạ e.
ArengʼE mambeng susi.
50Bọu hěnto sarang hěnto,
Mawu e kụkěndagʼu taumata kụ mạtakụ i Sie.
51Dingangu takiahʼE makawasa e
i Sie něnal᷊iawuhʼu mal᷊aobotẹ̌ e,
ringangu něngal᷊iaesẹ̌ tiněnnan dal᷊ungu naung i sire.
52 #
Ayb. 5:11, 12:19 Manga ratu e niaparěluse wọu kararatuang
mase napakarangẹ u apang su kasasanạ e.
53I saing lunusẹ̌ e ipakạl᷊aedʼu patikụ kapia e,
makakalạ e ipakạpul᷊ẹ dingangu l᷊imane tạ lohone.
54I Sie mětẹ̌tul᷊ungu Israel ěllangʼE,
tuhụewe kědonʼE ringangu manga i upung i kitẹ e.
55 #
Pěnd. 17:7
Mawu e tawe miwawul᷊eng kědonʼE,
i Sie mal᷊ondo si Abraham
dingangu hitene sarang marěngụ-děngụ.”
56Manga těllu wul᷊ang karěngụe i Maria mětẹ̌tanạ dingang i Elisabet, buhụe i sie napul᷊ẹ sol᷊ong bal᷊ene.
Kal᷊aiwantelʼi Yohanes Mananahani
57Nịdatingken tempone i Elisabet mamantelẹ̌. I sie naiwantelʼu ahusẹ̌ esẹ. 58Manga l᷊ampung dingangu anạ u sěmbaụ e nakaringihẹ̌ u Mawu e kai kereng kapiane si Elisabet, dingangu i sire mal᷊aing nahul᷊uasẹ̌ dingange.
59 #
Imng. 12:3
Ene rariọ e natimụe ual᷊u ěllo umure, i sire nahunděntạ e mědeạu manunatẹ̌ si sie. I sire mapulu mẹ̌sěbạ arengu rariọ e si Zakharia tuhụ arengi amange, 60kaiso i ninange kai nẹ̌bera u, ”Tala! I sie harusẹ̌ isěbạ si Yohanes.”
61”Tawẹu sarang sěngkatau wọu anạ u sěmbaụ e piạ arenge kerene,” ungkuěng i sire si sie. 62Mase kạpanịdane, i sire nakiwal᷊ọ e si Zakharia kai isěbạ si sai tangu rariọ e.
63I Zakharia nẹ̌dorongke pěpal᷊ẹ̌ pěmamohekang sěngkal᷊ěpa kụ němohẹ u, ”Arenge i Yohanes.” I sire kěbị e nasuẹ e rimal᷊inaụ. 64Su tempo ene lai i Zakharia nakawera kụ nẹ̌dalo Mawu Kasěllahenge. 65Tangu apạeweng sělampungange nasue něngkatakụ, kụ habarẹ̌ ene nakeke su kaguwạu wawul᷊urangu Yudea. 66Kěbị taumata apang nakaringihẹ̌ e makịbal᷊o su ral᷊ungu naung i sire, ”Kai makoạ e apa ngae rariọ ěndaị e?” U Mawu e mạněntanudẹ̌ si sie.
I Zakharia něhabarʼu hengetangu Mawu
67I Zakharia, i amangu rariọ e, nitumanakengu Rohkẹ̌ u Ruata e hakịu i sie něhabarʼu tatanatang Mawu. I sie nẹ̌bera,
68”I kitẹ mědaloko Mawu,
Ruatang Israel!
I Sie seng diměnta nẹ̌tul᷊ungu umatʼE
ringangu něliwirʼi sire.
69I Sie nẹ̌gěllịu měnanal᷊amatẹ̌ matoghasẹ̌ si kitẹ,
hěnton Daud, ěllangʼE.
70Nạung kạngerẹ lumiun manga nabi pinilenʼE,
Mawu e seng nangonggọu kědonʼE,
71waugʼu mapakasal᷊amatʼi kitẹ e wọu rokạ i kitẹ,
dingangu wọu kawasang taumata apang měbẹ̌binsị i kitẹ.
72Mědeạu manodẹ u tatal᷊ěntụʼE su manga i upung i kitẹ e,
pẹ̌kakědonʼE susi e sarung ipakasěhụʼE.
73-74I Sie nẹ̌salu si amang i kitẹ i Abraham,
dingangu nẹ̌kědo měngambang i kitẹ e wọu rokạ i kitẹ,
tadeạu i kitẹ tạ katatakụ e mětangkiang si Sie
75sěntiniạ mẹ̌munara waugʼi Sie
ringangu makal᷊uasẹ̌ naungʼE karěngụ u i kitẹ e reng biahẹ̌.
76 #
Mal. 3:1
Ei kau amang, anạku sarung isěbạ nabing
Mawu Karangetange.
I kau takụ irolohẹ̌ pěngal᷊imona Mawu
pěnal᷊oahẹ̌ dal᷊eng baugʼi Sie,
77apěngekeng habarẹ̌ su manga umatʼE
u i sire sarung ipakasal᷊amatẹ̌,
kereu Ruata e seng nangampung kal᷊awọu rosang sire.
78Mawung kitẹ e mal᷊ondo ringangu matal᷊ěntụ;
kụ ual᷊ingu mapakasal᷊amatʼi kitẹ e hakịu i Sie riměnta.
Mẹ̌sul᷊ungu matangěllo
simarang mal᷊ukadẹ̌,
79 #
Yes. 9:2
kerene i Sie nangonggọu tualagʼE waugu patikụ taumata e
kụ měbẹ̌biahẹ̌ su ral᷊ungu kararěndung dingangu katatakụ.
I Sie měngẹ̌ngahạ i kitẹ
sural᷊eng mětẹ̌timona pẹ̌darame.”
80Anạ i Zakharia e nahuntinambang kasěllahe ringangu natoghasẹ̌ su rohkẹ̌ e. I sie nẹ̌tanạ su wanua l᷊inggi, sarang nịdating tempone i sie nẹ̌těngkatodẹ u watangenge su tau Israel.
Currently Selected:
LUKAS 1: SXN
Highlight
Share
Copy
Want to have your highlights saved across all your devices? Sign up or sign in