YOHANES 7
7
Mawu Yesus dingangu manga anạ u sěmbaụ e
1Bọu ene Mawu Yesus nẹ̌daral᷊eng su apan tampạ su Galilea. I Sie tawe mapulu sol᷊ong banuan Yudea batụu manga měngangawasan Yahudi e sene měkẹ̌karaki měmate si Sie.
2 #
Imng. 23:34; Pang. 16:13 Su tempo ene ute seng masandigẹ̌ Ěllon Sal᷊imbangu Selo Raukalu. 3Tangu manga anạ u sěmbaụ u Mawu Yesus němpẹ̌berạ e si Sie, ”Těntangke tampạ ini e kụ kakoạko sol᷊ong Yudea, tadeạu manga muritʼU e mal᷊aing makasilo munaranʼU. 4Tawẹ apa taumata kụ sarung měmuning apang kinoạ e, kereu i sie kai mapulu tumeleng mapia. Kereu i Kau e mẹ̌koạ bue kěbị tamai ene, ute kasěllahu dunia e harusẹ̌ masingkạ.” (5Batụu manga anạ u sěmbaụ e sẹ̌sane mal᷊aing tawe mangimang si Sie.)
6”Bědangbe wal᷊ine tempone si Siạ,” ungkuěngu Mawu Yesus si sire, ”arawe waụgu i kamene, sěntiniạ mang botonge. 7Dunia ini e tawe mariadi mẹ̌binsị i kamene. Arawe Iạ e mang ipẹ̌bẹ̌binsịu dunia, ual᷊ingu Iạ měngkate hanesẹ̌ měbẹ̌bera su dunia e u kakakoạ e kai ral᷊akisẹ̌. 8Dakọ e i kamene hala kakoạ sol᷊ong sal᷊imbang ene. Iạ e tawe tamai#7:8: Iạ e tawe tamai: Binohẹ u nạung pira-pira: Iạ deng ta nạtamai. u reng bal᷊ine tempo-Ku.” 9Kerene piněhengetang u Mawu Yesus su manga anạ u sěmbaụ e, kụ i Sie natanạ su Galilea.
Mawu Yesus su sal᷊imbang u Selo Raukalu
10Sarạeng manga anạ u sěmbaụ e němpẹ̌tamai sol᷊ong sal᷊imbang ene, ute marěma-rěmasẹ̌ Mawu Yesus e nẹ̌buạ sẹ̌sane tawẹ su kasingkạ u l᷊awọ. 11Karěngụewen sal᷊imbang ene e, manga měngangawasa su Yahudi e měmpědẹ̌deạ si Sie ringangu mạhěngkiwal᷊o, ”Kai suapa i Sie?”
12Taumata l᷊awọ e nanětạ e měmpẹ̌sẹ̌sasiang mạanun Sie. Piạben měbẹ̌bera u: ”I Sie taumata mapia,” Piạ ewe lai měbẹ̌berau: ”Tala! I Sie makạpal᷊idẹ̌ taumata l᷊awọ.” 13Kai tawẹu sarang sěngkatau wahani mẹ̌bisara su těngo mạanun Sie, u i sire mạtakụ u měngangawasan Yahudi.
14Měloarạen parahul᷊uasẹ̌, Mawu Yesus simuẹ̌ su ral᷊ungu Wal᷊em Mawu, kụ nanětạ e naněntiro. 15Manga měngangawasan Yahudi něngkaherang kụ němpẹ̌bera u, ”Kereapa wue tau ini nakakasingkạ u kereng kal᷊awọ e, sěmbal᷊iau i Sie tawe nẹ̌sẹ̌sikol᷊a?”
16Mawu Yesus simimbang, ”Takụ itẹ̌těntiro ini e wal᷊inewe těntiro-Ku, kaiso kai těntiron Sie něndolohʼu Iạ e. 17I sai mapulu tumuhụ kapulun Duata ute sarungbe makakasingkạ měnsang těntiro Takụ itẹ̌těntiro e asal᷊e wọu Ruata arau wọu Iạ sẹ̌saku. 18I sai měgẹ̌gěllịu těntirone sẹ̌sane kai mědeạu mapakasěllahen batangenge sẹ̌sane. Arawe i sai mědeạu mapakasěllahen Sie kụ něndolohẹ̌ e, ute i sie matul᷊idẹ̌, kụ tawẹ apa pẹ̌kakakonti su watangenge. 19Karạ kawe i Musa seng nẹ̌gěllịu manga titan Duata e si kamene? Kai sutal᷊oarang kamene tawẹu timuhụ manga tita tamai ene. Kawe unụe i kamene měngantibẹ̌ měmate Siạ?”
20Taumata l᷊awọ e němpẹ̌simbang, ”Pulu i Kau! Kai i sai tangu mapulu měmate si Kau e?”
21Mawu Yesus simimbang, ”Kětạben hal᷊ẹ̌ sěmbaụ koateng-Ku su ěllon Sabatẹ̌, kụ i kamene něngkaherang. 22#Pěnd. 17:10; Imng. 12:3 I Musa e nangonggọu tiahan sunatẹ̌ si kamene – manilaing tuhụ hinone sunatẹ̌ e bal᷊ine wọʼi Musa, kaiso kawe wọu manga i upung kal᷊imonan Musa. Ual᷊ingu ene su ěllon Sabatẹ̌ e i kamene mal᷊aing mapulu měnunatẹ̌ taumata. 23#Yoh. 5:9 Kereu i kamene kawe měmpẹ̌koạ ene u mědeạu kumbahangbe lumampa atorangu sunatẹ̌ boʼi Musa, unụewe i kamene limangehẹ̌ si Siạ, ual᷊ingu Iạ napakaul᷊en sakị u taumata patikụ e su ěllon Sabatẹ̌? 24Kumbahangbe mapẹ̌sal᷊an taumata tuhụewe silon mata e, kaiso tuhụbe su katul᷊idẹ̌.”
Kahěngang bue Mawu Yesus Datu Mananal᷊amatẹ̌ e?
25Samuring ene piạ e pirang katau tau Yerusalem němpẹ̌bera u, ”Bal᷊inewe ini taumatane kụ pẹ̌pareakeng tadeạu pateěng e? 26Pěmandạ e i Sie měbẹ̌bisarawe tạ konsange su těngon lawọ, mase tawẹu němpẹ̌berang apa-apa si Sie! Manga měngangawasang kitẹ e kai seng makạhěngang ngae u i Sie ini e kai Ratu Mananal᷊amatẹ̌ e? 27Kai kereu Ratu Mananal᷊amatẹ̌ e ruměnta, ute tawẹu sarang sěngkatau masingkạ u wọu apa asal᷊ʼE! Sěmbal᷊iau i kitẹ masingkạ bue wọu apa asal᷊e tau ini e.”
28Su samurine, piạ Mawu Yesus kạpaněntirone su Wal᷊em Mawu, i Sie něhengetangken tingihe maihạ, ”Kụ i kamene masingkạ u kai i sai Iạ ini, ringangu wọu a? Iạ e tawe riměnta ual᷊ingu kapuluku sẹ̌saku. Iạ e kai nirolohʼi Sie kụ kawasa něndolohʼu Iạ e, mase i Sie kai kapěngimangeng. Arawe i kamene tawe nakakiral᷊a si Sie. 29Iạ e masingkạ i Sie, u Iạ e kai wọu i Sie asal᷊e, kụ kai i Sie něndolohʼu Iạ e.”
30Su tempo ene i sire mapulu měnamẹ Mawu Yesus, kai tawẹu wahani měhěgo si Sie, u kai wẹ̌dang tanịdatingu tempone. 31Lawọ bọu tal᷊oaran sire ene nanětạe němpangimang si Sie ringangu němpẹ̌bera u, ”Kereu Ratu Mananal᷊amatẹ̌ e marěnta, měnsang i Sie makakoạbe hal᷊ẹ̌ makạdal᷊inaụ limembong kal᷊awọe wọu tau ini ngae?”
Hingidʼu měnamẹ Mawu Yesus
32Tau Farisi e nakaringihẹ̌ u kereapa taumata l᷊awọ e měmpẹ̌sẹ̌sasiang mạanun Mawu Yesus. Ual᷊ingu ene, i sire ringangkewen manga imang těmbonange, i sire němpẹ̌ndolohʼu pirang katau wọu manga měndariagạ Wal᷊em Mawu e apěnẹ̌namẹ Mawu Yesus. 33Mawu Yesus něhengetangke su těngon taumata su Wal᷊em Mawu e, ”Kate kadodọ tempo Iạ e ringangi kamene. Bọu ene Iạ e sarung mẹ̌bal᷊ị sol᷊ong anun Sie kụ něndolohʼu Iạ e. 34I kamene e sarung měmpẹ̌deạ si Siạ e, kai tawe mẹ̌sombangu Iạ e; batụu i kamene tawe makarěnta su tampạ su apan Iạ ene.”
35Mase manga měngangawasa Yahudi e nahumbisarạ e sěmbaụ su wal᷊ine, ”Tau ini e kai měnaung makoạ sol᷊ong a, hakịu i kitẹ e kawe tawe makareạ si Sie? Apa i Sie makoạ sol᷊ong anun tau Yahudi nasal᷊iawuhẹ̌ su soan tau l᷊iwụ sutal᷊oaran tau Yunani e, kụ maněntiro tau Yunani ngae? 36Kụ kai apa ngae timonane mẹ̌bera u i kitẹ sarung mědeạ si Sie kai tawe makareạ dingangu i kitẹ e tawe makakarěnta su tampạ e kụ su apan i Sie ene sene?”
Akẹ makarěntang pẹ̌bawiahẹ̌
37 #
Imng. 23:36
Su ěllo kasamuriange wọu sal᷊imbang ene, ěllọ e kawantugange, Mawu Yesus dimarisị e su ral᷊ungu Wal᷊em Mawu mase něhengetang, ”I sain narou e rěntạ e su anuku tadeạu panginung. 38#Yeh. 47:1; Za. 14:8 Arawe i sai mạngimang si Siạ e, mạbawohẹ su ral᷊ungu Bukẹ̌ Susi e: ’Bọu ral᷊ungu naunge lụelehẹ̌ manga elehangu akẹ kụ makạděntang pẹ̌bawiahẹ̌ e.’ ”#7:38: Manga waweran Yesus su ayetẹ̌ 37-38, botonge i tungkang: ”Taumata kụ narou děntako su anu-Ku, dingangu taumata kụ mạngimang si Siạ e pěnginungko. Kere seng niwerang Binohẹ Susi: ’Bọu ral᷊ungu naungʼE maelehẹ̌ elehangu akẹ kụ makaonggọu wiahẹ̌.’ ” (39Mawu Yesus e měbẹ̌bisarang hal᷊ẹ̌u Rohkẹ̌ u Ruata e kụ sarung itarimạ u apan taumata měmpạngimang si Sie. Batụu su orasẹ̌ ene Rohkẹ̌ u Ruata e bẹ̌dawen ta nilẹ̌onggọ; batụu Mawu Yesus bědawen tawe niapakawantugu kapapohongʼE.)
40Mal᷊awọ taumata nakaringihẹ̌ apan nipěhengetang u Mawu Yesus, kụ sutal᷊oaran sire piạ němpẹ̌bera u, ”Tau ini, nasahẹ e u mang nabi e!”#7:40: Nabi e: Kakělla pasalẹ̌ 1:21.
41Angkuěng u sěnggạ, ”Ini e kai Ratu Mananal᷊amatẹ̌!”
Kutẹu piạko l᷊ai nempẹ̌bera u, ”Ah, unụe Ratu Mananal᷊amatẹ̌ e kawe ruměnta wọu Galilea? 42#2Sam. 7:12; Mi. 5:2 Su ral᷊ungu Bukẹ̌ Susi e kạbawohẹ u Ratu Mananal᷊amatẹ̌ e kai hěnton Daud, dingangu sarung suměpụ bọu Betlehem, kụ kai wọu soan Daud.” 43Pěngěnsueěnge taumata e nanětạ e němpẹ̌darendehẹ̌ mạanun Mawu Yesus. 44Piạ u mapulu měnamẹ si Sie, kai tawẹu sarang sěngkatau nanenggehu l᷊imane si Sie.
Manga mangangawasang Yahudi e tawe nangimang
45Piạ e měndariagạ Bal᷊em Mawu nirolohẹ̌ niapěnamẹ Mawu Yesus kẹ̌kapul᷊ẹ e, manga imang těmbonange ringangu tau Farisi e němpẹ̌kiwal᷊ọ e si sire, ”Kawe unụe i Sie tawe niwawang kamene ramahi?”
46Manga lukadẹ̌ e němpẹ̌simbang, ”Uh, bědang tạ apa taumata kapiane mẹ̌bisara kere i Sie!”
47”Apa i kamene seng napal᷊idẹ̌ kareạʼE?” ungkuěngu tau Farisi ene. 48”Piạ ngae wọu tal᷊oaran manga těmbonang i kitẹ e arau tau Farisi kụ piạ u mangimang si Sie? 49Arawe taumata l᷊awọ ini, i sire wěga wue atorang i Musa, mase waẹbe kereapa i sire kai seng niane.”
50 #
Yoh. 3:1-2
Sěngkatau wọu tal᷊oaran tau Farisi ene ute i Nikodemus, i anụ e nạung bọu simongo su anun Mawu Yesus. I Nikodemus nẹ̌bera su tau Farisi wal᷊ine e, 51”Tumuhụ atorange, taumata e tawe wotonge ihukung, těntal᷊ang katataingu pẹ̌sasal᷊ane deng dẹ̌daringihang dingangu kakanoạ e deng sẹ̌sẹ̌suiang.”
52”Apa i kau e mal᷊aing bọu Galilea?” ungkuěng i sire, ”Měngkate panẹ̌sui su Bukẹ̌ Susi! I kau sarungbe makasilo u tawẹ apa nabi kụ asal᷊e#7:52: Tawẹ apa nabi kụ asal᷊e: Sěmbaụ binohẹ u nạung: nabi ene tangu tawẹ asal᷊e. wọu Galilea!”
Sěngkatau wawine kinatangkạ nawuang
[ 53Samurin ene, kěbị taumata něngkapul᷊ẹ e sol᷊ong bal᷊e.
Currently Selected:
YOHANES 7: SXN
Highlight
Share
Copy
Want to have your highlights saved across all your devices? Sign up or sign in